BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندىق حيميك يۋنەسكو مەدالىمەن ماراپاتتالدى

استانا، baq.kz. تانىمال وتاندىق حيميك عالىم زۇلقايىر مانسۇروۆقا يۋنەسكو-نىڭ «نانوعىلىم مەن نانوتەحنولوگيالار دامۋىنا قوسقان ۇلەسى ٴۇشىن» مەدالى تابىستالدى. ماراپاتتاۋ ٴراسىمى 22 قاراشادا اتالعان ۇيىمنىڭ پاريجدەگى باس پاتەرىندە ٴوتتى.

مەدال تۇجىرىمداماسىن 2010 جىلى يۋنەسكو باس ديرەكتورى بەكىتىپ، سول كەزدەن بەرى جىل سايىن وسى سالاداعى الەمدىك عىلىمنىڭ العا باسۋىنا ەلەۋلى ۇلەس قوسقان كورنەكتى عالىمدار مەن ۇيىمدارعا بەرىلىپ كەلەدى. وتاندىق عالىم بيىل ٴوزىنىڭ «نانوكومىرتەك ماتەريالدارىن وڭدەۋ، كومىرتەكتى نانوتۇتىكتەر مەن گرافەندەردى جانۋ كۇيىندە سينتەزدەۋ تەحنولوگيالارىنا زەرتتەۋگە قوسقان ۇلەسى» ٴۇشىن ماراپاتتالدى.

مەدالدى تابىستاۋدان كەيىن سويلەگەن سوزىندە ز. مانسۇروۆ يۋنەسكو-عا جۇرگىزگەن زەرتتەۋلەرىنە وسىنداي جوعارى باعا بەرگەنى ٴۇشىن ريزاشىلىعىن ٴبىلدىردى.

"قازاقستاندىق عىلىمنىڭ جەڭىستەرىن بۇگىنگى تاڭدا عالىمدارىمىز، اسىرەسە جاستار، الەمنىڭ جەتەكشى زەرتتەۋ ورتالىقتارىمەن تىعىز ىنتىماقتاستىق ورناتۋعا بارلىق مۇمكىندىكتەرگە يە. جانە وسىعان جاعداي جاساعان ەلباسى باستاماسىمەن جۇرگىزىلگەن جۇيەلى رەفورمالاردىڭ ناتيجەسى" - دەدى عالىم.

راسىمگە قاتىسقان قازاقستاننىڭ يۋنەسكو جانىنداعى تۇراقتى وكىلى جان عاليەۆ وتانداسىمىزدى جىلى قۇتتىقتاپ، وسى مەدالدىڭ ونىڭ وتاندىق جانە حالىقارالىق عىلىمي قاۋىمداستىققا سىڭىرگەن ادال ەڭبەگى، نانوعىلىم مەن نانوتەحنولوگيالارعا قوسقان ماڭىزدى ۇلەسىنىڭ لايىقتى مويىنداۋى ەكەنىن جەتكىزدى.

بيىل اتالعان ماراپاتقا ز. مانسۇروۆتىڭ رەسەي، فرانسيا، اۋستراليا، فينليانديا، اۋستريا، گرەكيا، مىسىر مەن اقش سياقتى مەملەكەتتەردە ەڭبەك ەتىپ جۇرگەن تاعى دا توعىز ارىپتەسى يە بولدى. زەرتتەۋلەرىنىڭ ناقتى قولدانىس سالالارىنا ەلەكترونيكا، تەلەكوممۋنيكاسيالار، ماشينا جانە قۇرال جاساۋ، مەديسينا، ماتەريالتانۋ مەن كوپتەگەن باسقالار جاتادى. مەدالمەن وسى كەزگە دەيىن ماراپاتتالعاندار اراسىندا فيزيكا سالاسىنداعى نوبەل سىيلىعىنىڭ لاۋرەاتتارى يسامۋ اكاساكي مەن جورەس الفەروۆ، قىتاي عىلىم اكادەمياسىنىڭ پرەزيدەنتى چۋنلي باي بار.

پروفەسسور، حيميا عىلىمدارىنىڭ دوكتورى زۇلقايىر ايتمۇحامەت ۇلى مانسۇروۆ قر بعم جانۋ پروبلەمالارى ينستيتۋتىنىڭ باس ديرەكتورى. تانىمال عالىم كوپ جىلدار بويى ٴال-فارابي اتىنداعى قازاق ۇلتتىق ۋنيۆەرسيتەتىندە كوپ جىلدار بويى ەڭبەك ەتتى، سونىڭ ىشىندە ون بەس جىل بويى پرورەكتور رەتىندە. قازاقستان رەسپۋبليكاسىنىڭ مەملەكەتتىك پرەمياسى مەن قانىش ساتپايەۆ اتىنداعى پرەميانىڭ لاۋرەاتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي