BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستان ستۋدەنتتەرى ٴبىلىم ساپارىنا اتتاندى

فوتو: интернеттен

بۇگىن پولشانىڭ بىدگوشش ەكونوميكا ۋنيۆەرسيتەتىندە ٴبىلىم جەتىلدىرۋ ٴۇشىن جەتى ستۋدەنت جولعا شىقتى، دەپ حابارلايدى baq.kz اقپارات اگەنتتىگى.

بولون دەكلاراسياسىنا ەنگەن الەم ۋنيۆەرسيتەتتەرى اراسىندا اكادەميالىق ۇتقىرلىق بويىنشا ستۋدەنتتەر الماسۋ بۇگىندە ۇلكەن ماڭىزعا يە بولىپ وتىر. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى دە جىل سايىن شەتەلدىڭ ۇزدىك وقۋ ورىندارىمەن عىلىمي بايلانىستاردى نىعايتىپ كەلەدى.

سىرتقى اكادەميالىق ۇتقىرلىقپەن قاتار اقتوبەلىك ۋنيۆەرسيتەت پەن بىدگوشش ەكونوميكا ۋنيۆەرسيتەتى اراسىندا قوسديپلومدى ٴبىلىم بەرۋ جولعا قويىلدى. ٴقازىر اقتوبەنىڭ التى ستۋدەنتى وسى جوبامەن بىدگوششتا وقىپ ٴجۇر. وقۋلارىن بىتىرگەن سوڭ ەۆروپالىق ۇلگىدەگى «سپورت مەنەدجەرى» ماماندىعىن الىپ شىعادى.

جەرلەستەرىمىزدىڭ شەبەرلىگىنە پولياكتار دا ريزا. مىسالى، 3-كۋرس ستۋدەنتى ماكسيم بۋرلاچكو جۇزۋدەن بىدگوشش قالالىق جارىسىندا ەكى رەت التىن مەدال الدى. بۇعان دەيىن پولشادا 30 ستۋدەنتىمىز وقىپ كەلدى. ارىپتەستىك قارىم-قاتىناستىڭ پايداسىن ەسكەرە وتىرىپ، تاراپتار ستۋدەنتتەر الماسۋ پراكتيكاسىن ٴالى دە كوبەيتە تۇسۋگە نيەتتى.

تۇركيانىڭ ساكاريا ۋنيۆەرسيتەتىنە ٴماۋلانا گرانتتىق باعدارلاماسىمەن جەتى ستۋدەنت، ٴبىر ماگيسترانت جانە سىرتقى اكادەميالىق ۇتقىرلىق بويىنشا جەتى ستۋدەنت، ەكى ماگيسترانت اتتاندى.

ٴماۋلانا باعدارلاماسى – تۇركيا جانە الەم ەلدەرى ۋنيۆەرسيتەتتەرى اراسىندا ستۋدەنت پەن وقىتۋشى الماسۋعا مۇمكىندىك بەرەتىن تۇرىك ۇكىمەتىنىڭ بەدەلدى عىلىمي جوباسى. باسقا باعدارلامادان وزگەشەلىگى - گەوگرافيالىق شەكتەۋ قويماستان، بۇكىل دۇنيەجۇزىندەگى جوعارى وقۋ ورىندارىن تولىق قامتۋى. باستى ماقساتى - تۇركيا جوعارى ٴبىلىم جۇيەسىنىڭ بەدەلىن كوتەرۋ، ٴعىلىم-بىلىمنىڭ جاھاندانۋ پروسەسىنە ۇلەس قوسۋ، تۇرىك تاريحى مەن مادەنيەتىن بۇكىل الەمگە تانىستىرۋ، وركەنيەتتەر اراسىندا ٴوزارا قۇرمەت جانە تۇسىنىستىك مادەنيەتىنىڭ ارتتىرۋ.

باعدارلاما جاڭالىققا جانى قۇمار، اشىق مىنەزدى، وزىنە سەنىمدى، ۇزدىك وقيتىن باسەكەگە قابىلەتتى ستۋدەنتتەرگە ارنالعان. اعىلشىن نەمەسە تۇرىك ٴتىلىن جەتىك بىلسەڭىز گرانت ۇتۋعا مۇمكىندىك ەسەلەپ ارتادى. وقىتۋ شىعىنىن تۇرىك ۇكىمەتى ٴوز موينىنا العان. ستۋدەنتتەرگە شاكىرتاقى دا تولەيدى. جول شىعىنى مەن تاماعى، پاتەر جالداۋ ماسەلەسىن شاكىرتتەر وزدەرى شەشەدى.

شەتەلگە اتتانعان ستۋدەنتتەر ون ٴبىر ٴتۇرلى ماماندىق بويىنشا ٴوز وقۋلارىن جالعاستىرادى. ستۋدەنتتەر جارتى جىلدىڭ وزىندە شەت تىلىنەن ٴسوز قورلارىن كوبەيتىپ، ىسىلىپ كەلەدى. ۋاقىتتى ٴتيىمدى پايدالانۋ، تاباندىلىق پەن قايسارلىق، تەك ٴوز كۇشى مەن بىلىمىنە سەنۋ، باسەكەگە قابىلەتتى بولۋدىڭ پايداسىن ابدەن تۇسىنەدى. تۋعان ەل مەن اتا-اناعا دەگەن قۇرمەتى ارتادى. ەلگە ورالعان سوڭ بوتەن شارۋانى قويىپ، وقۋ-بىلىمگە شىنداپ دەن قويادى. ۋنيۆەرسيتەتتىڭ حالىقارالىق ىنتىماقتاستىق ورتالىعى ارقىلى بيىل فرانسيا مەن وڭتۇستىك كورەياعا كەتكەن ستۋدەنتتەر وقۋلارىن باستاپ كەتتى. ەندى شىڭجاڭ، تاتارستان مەن باشقۇرتستانعا جۇرەتىن توپتار ساپارعا ازىرلەنۋدە.

ايشۋاق دارمەن ۇلى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي