4252 
0
استانادا «جان دوسىم» قوعامدىق قورىنىڭ ۇيىمداستىرۋىمەن كادەت سىنىپتارىن دامىتۋ بويىنشا دوڭگەلەك ۇستەل ٴوتتى، دەپ حابارلايدى baq.kz اقپارات اگەنتتىگى.
ەرجان جاۋباي 
14869
0 
استانا: 
استانادا «جان دوسىم» قوعامدىق قورىنىڭ ۇيىمداستىرۋىمەن كادەت سىنىپتارىن دامىتۋ بويىنشا دوڭگەلەك ۇستەل ٴوتتى، دەپ حابارلايدى baq.kz اقپارات اگەنتتىگى.
الداعى ۋاقىتتا وسى باعىتقا باسىمدىق بەرىلەدى. ول ٴۇشىن ارنايى ۇيىرمەلەر جۇمىس ىستەيدى. جاڭا وقۋ جىلىنان باستاپ بۇل جاڭاشىلدىقتى جۇزەگە اسىرۋ ٴۇشىن 11 ٴبىلىم وشاعىندا پيلوتتىق جوبا جۇزەگە اسىرىلادى. نەگىزگى ساباقتار اياقتالعان سوڭ جاسوسپىرىمدەر ەرىكتى تۇردە اسكەري ۇيىرمەلەرگە قاتىسا الادى. تاكتيكالىق جاتتىعۋ 5 جىل بويى وقىتىلماق. تيىسىنشە ون ٴبىرىنشى سىنىپتى اياقتاعاننان كەيىن كادەتتەر اتتەستاتپەن بىرگە «اسكەري دايىندىقتان ٴوتتى» دەگەن ارنايى كۋالىكتەرگە دە يە بولۋى مۇمكىن. بۇل ۇسىنىس دونگەلەك ۇستەلدە ارنايى تالقىلاندى.
«جالپى ٴبىلىم بەرەتىن ورتا مەكتەپتەردەگى وقۋشىلاردى ساباقتان تىس ۇيىرمەلەرمەن قامتاماسىز ەتۋ ماقساتىندا اسكەري-پاتريوتتىق تاربيە بەرۋ باعىتىندا جۇمىس جاساۋعا نەگىزدەلگەن جوبا. بۇل جەردە وقيتىنداردىڭ كوبى تاڭعى ساباقتان كەيىنگى بوس ۋاقىتىندا اسكەري تاربيەشىلەر مەن باسقا دا پەدوگوگتاردىڭ جاتتىقتىرۋىندا ساپ دايىندىعى، مەرگەندەر دايىندىعى، تاكتيكالىق دايىندىق قاتارلى دايىندىقتاردان وتەدى» - دەيدى استانا قالاسى №13 ورتا مەكتەبىنىڭ ديرەكتورى قانات راقىمبەكوۆ.
ونىڭ ايتۋىنا قاراعاندا، كادەتتەر سىنىبىنا 7 مەن 11 سىنىپ ارالىعىندا وقيتىن ۇل-قىزدار قابىلدانادى. بارلىعىنا وقۋ تەگىن.
«مەكتەپ قابىرعاسىندا جاتتىققان وقۋشىلار 11 سىنىپ بىتىرگەن سوڭ كادەت سىنىبىن ٴبىتىردى دەگەن ارنايى اتتەستات الادى. بۇل ونىڭ بولاشاق اسكەري سالانى تاڭداپ، ٴوز ەلىنىڭ پاتريوتى، ٴوز ەلىنىڭ قورعانى بولۋىنا ۇلكەن كومەگىن تيگىزەدى. ولاردىڭ اسكەري جوعارى وقۋعا تاپسىرعاندا باسقا كۋرسانتتاردان ٴبىلىمى دە ارتىق بولادى» - دەيدى ديرەكتور.
قانات راقىمبەكوۆتىڭ سوزىنە قاراعاندا كادەت سىنىبىن بىتىرگەن وقۋشىلار قۇقىق بۇزۋشىلىقتان الىس، قوعامدىق ورتادا ٴتارتىپتى بولىپ وسەدى.
«ولار جالپى قوعامدا تارتىپتىك جاۋاپكەرشىلىكتى سەزىنىپ وسەدى. مەكتەپتە دە ٴوزىنىڭ قۇربى-قۇرداستارىنىڭ تارتىبىنە جاۋاپتى بولىپ، ٴارقاشان الدىڭعى قاتاردا جۇرەدى. ولار نەگىزى ٴوز ورتاسىندا كوشباسشىلىق قابىلەتكە يە. سوندىقتان دا بولاشاقتا ولاردىڭ ىشىنەن ەلگە، جەرگە دەگەن سۇيىسپەنشىلىگى جوعارى، ناعىز ۇلت پاتريوتتارى قالىپتاسىپ، جەتىلەتىنىنە سەنىمدىمىن» - دەيدى ول.
قازىرگى ۋاقىتتا كادەت سىنىپتارىندا 1700-دەن استام وقۋشى بار. ولاردىڭ 30 پايىزدان استامى الەۋمەتتىك جاعدايى تومەن وتباسىلاردىڭ بالالارى.
كادەت سىنىپتارىن وقۋ-جاتتىعۋ قۇرالدارىمەن قامتاماسىز ەتۋ، جاتتىعۋ الاڭدارى مەن عيماراتتارىن جالعا الۋ ماسەلەلەرىنە «جان دوسىم» قوعامدىق قورى قولداۋ كورسەتىپ وتىر.
«جان دوسىم» قوعامدىق قورى ٴبىزدىڭ وسى ىسىمىزگە وتە ۇلكەن قولداۋ كورسەتتى. مىسالى وقۋ-جاتتىعۋ قۇرالدارىن، جاتتىقتىرۋشىلاردى جالداۋ، مەكتەپ جەرتولەسىن كۇردەلى جوندەۋدەن وتكىزۋ ارقىلى جاتتىعۋ زالدارىن دايىنداۋدا دا اتالعان قور ايتارلىقتاي ەڭبەك ەتتى» - دەيدى قانات راقىمبەكوۆ.
ونىڭ ايتۋىنشا كادەت سىنىپتارىنىڭ جاس ۇلان مەكتەپتەرىنەن ايىرماشىلىعى بۇل جالپى ٴبىلىم بەرۋ جۇيەسىندە وقىتىلاتىندىعى. جانە وقۋشىنىڭ بوس ۋاقىتىن پايدالانۋ.
«كادەت سىنىپتارىندا وقيتىندار جالپى ٴبىلىم بەرۋ ستاندارتىنان اۋىتقىمايدى. سول نەگىزدە وقيدى. كادەت سىنىبىن مەكتەپتەگى سىنىپتان تىس ساباقتاردىڭ ٴبىرى دەپ قاراۋ كەرەك. ٴبىراق ناقتى باعىتى بار» - دەيدى ول.
ازىرگە استانانىڭ 11 مەكتەبىن قامتىعان جوبا الداعى ۋاقىتتا ەلىمىز كولەمىنە كەڭىنەن تارالادى دەگەن جوسپار بار. بۇل جەردە بارلىق وقۋ تەگىن، كادەت سىنىپتارىنىڭ كۋرسانتتارى ارنايى فورما كيەدى.
قر قورعانىس مينيسترلىگى، ىشكى ىستەر مينيسترلىگى، شەكارا قىزمەتى، ۇقك قاتارلى اسكەري سالا وكىلدەرى مەن استانا قالاسى مەكتەپتەرىنىڭ ديرەكتورلارى قاتىسقان دوڭگەلەك ۇستەل سوڭىندا اتالعان ۇيىمدار مەن كادەت سىنىپتارى اراسىنداعى الەۋمەتتىك ارىپتەستىكتى كەڭەيتۋ، سونداي-اق، وقۋشىلاردىڭ ساباقتان تىس ۋاقىتتا جۇمىسپەن قامتىلۋى شەڭبەرىندە ەلىمىزدىڭ جالپى ٴبىلىم بەرەتىن مەكتەپتەرىندە كادەت ساباقتارىنىڭ ٴبىرىڭعاي نورماتيۆتىك بازاسىن ازىرلەۋ جانە بەكىتۋ ماقساتىندا جۇمىس توبىن جانداندىرۋ تۋرالى شەشىم قابىلداندى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
