بيىل تۇركىستان وبلىسى بويىنشا 55 مىڭنان استام بالا ٴبىرىنشى سىنىپقا بارادى - ٴبىلىم & عىلىم|23 تامىز 2018، 09:47
كۋرسى ۆاليۋت وبنوۆليايۋتسيا
استانا:

بيىل تۇركىستان وبلىسى بويىنشا 55 مىڭنان استام بالا ٴبىرىنشى سىنىپقا بارادى

تۇركىستان وبلىسىنىڭ ورتالىعى — تۇركىستان قالاسىندا ٴبىلىم بەرۋ قىزمەتكەرلەرىنىڭ تامىز كەڭەسى ٴوتتى. جيىنعا اۋداندىق جانە قالالىق ٴبىلىم بولىمدەرىنىڭ باسشىلارى، ۇستازدار، ٴبىلىم سالاسىنىڭ ارداگەرلەرى، وبلىستىق ٴماسليحات دەپۋتاتتارى جانە ٴوڭىر باسشىسى جانسەيىت تۇيمەبايەۆ قاتىستى، دەپ حابارلايدى baq.kz اقپارات اگەنتتىگى.

جيىندا تۇركىستان وبلىستىق ٴبىلىم باسقارماسىنىڭ باسشىسى يساتاي ساعىندىقوۆتىڭ 2017-2018 وقۋ جىلىندا اتقارىلعان جۇمىستارى مەن الداعى مىندەتتەر تۋرالى بايانداماسى تىڭدالدى.

ونىڭ ايتۋىنشا، بيىل ٴوڭىردىڭ ٴبىلىم بەرۋ سالاسىنا 262 ملرد 24 ملن تەڭگە قارالىپ، قارجى كولەمى 2017 جىلمەن سالىستىرعاندا 6 ملرد 15 ملن تەڭگەگە ۇلعايعان.

بيىل وبلىس بويىنشا ٴبىرىنشى سىنىپقا 55385 وقۋشى كەلەدى. ياعني، مەكتەپكە كەلەتىن وقۋشى سانى 19 مىڭعا ارتقان. دەموگرافيالىق وسىمگە بايلانىستى 2018-2025 جىلدارى ارالىعىندا وڭىردە 184 مەكتەپ سالۋ قاجەتتىلىگى تۋىنداپ وتىر. بيىل ٴبىلىم بەرۋ سالاسىنا قاجەتتى 83 نىساننىڭ قۇرىلىسى قولعا الىنعان. ونىڭ 40-ى جىل سوڭىنا دەيىن پايدالانۋعا بەرىلەدى. ناتيجەسىندە 9 اپاتتى، 5 ٴۇش اۋىسىمدى، 13 ىڭعايلاستىرىلعان جانە ورىن تاپشىلىعى بايقالعان 10 مەكتەپتىڭ ماسەلەسى شەشىلەدى. سونداي-اق 3 كوللەدجدىڭ دە عيماراتى جاڭارادى.

مەكتەپتەردى وقۋلىقپەن قامتۋ، قىسقى ماۋسىمعا ازىرلەۋ جۇمىستارى دا ويداعىداي. بيىل ۇبت-عا وڭىردەگى 25504 تۇلەكتىڭ 16181- قاتىسىپ، ولاردىڭ ورتاشا بالى 79،6-نى قۇراعان.

بيىل تۇركىستان وبلىسىنداعى مەكتەپتەردە 474 مىڭعا جۋىق وقۋشى ٴبىلىم الادى.

كەڭەستە ٴبىلىم بەرۋ سالاسىنداعى ىزدەنىستەر مەن جاڭا مىندەتتەر، «رۋحاني جاڭعىرۋ» باعدارلاماسى بويىنشا قولعا الىنعان جۇمىستار تۋرالى بىرنەشە ۇستاز-عالىم بايانداما جاساپ، تاجىريبەلەرىن ٴبولىستى.

ۇستازداردىڭ وي-پىكىرلەرىن تىڭداعان تۇركىستان وبلىسىنىڭ اكىمى جانسەيىت تۇيمەبايەۆ ٴبىلىم سالاسى ەلباسىنىڭ باستى نازارىندا تۇرعانىن اتاپ ٴوتتى.

"ٴمۇعالىم — قاسيەتتى ۇعىم ٴارى كيەلى تۇلعا. ۇلاعاتتى ۇستازداردىڭ الدىندا بۇكىل ادام بالاسى قۇرمەتپەن باس يەدى. بيىلعى تامىز كەڭەسى ەرەكشە تاريحي كەزەڭدە ٴوتىپ جاتىر. ەلباسى جارلىعىمەن تۇركىستان وبلىسى قۇرىلىپ، ونىڭ ورتالىعى بولىپ تۇركىستان قالاسى بەكىتىلدى. ياساۋيدەي بابامىز، ابىلاي حان باستاعان قازاقتىڭ 21 حانى جاتقان، قازاقتىڭ قايماقتارى ماڭگى قونىس تاپقان تۇركىستاننىڭ تاريحىن ۇستازدار كاۋىمى وقۋشىلارعا ۇيرەتۋى كەرەك. بارلىق اۋدان جانە قالا اكىمدەرىنە مۇعالىمدەردىڭ جاعدايىنا مۇقيات قاراۋدى، ولاردىڭ الەۋمەتتىك ماسەلەلەرىن بارىنشا شەشۋ جونىندە تاپسىرما بەرەمىن. ۇستاز قايراتتى بولسا، ەڭسەسى بيىك بولسا عانا مىقتى شاكىرت تاربيەلەيدى. بۇدان بىلاي مۇعالىمدەردى ٴجونسىز جۇمساۋ، ٴوز مىندەتتەرىنە كىرمەيتىن شارۋالارعا جۇمساۋ توقتاتىلۋى كەرەك. ۇستازداردىڭ جاعدايىن كوتەرۋ ماسەلەسى ۇكىمەت تاراپىنان دا نازارعا الىنىپ كەلەدى. سوندىقتان ٴبارىمىز بىرلەسىپ وتانشىل، نامىستى ۇرپاق تاربيەلەۋگە، تۇركىستاندى دامىتۋعا اتسالىسايىق. ٴجيى كەزدەسى تۇرايىق. ۇستازدار قاۋىمىنا قولداۋ كورسەتۋگە دايىنبىز. الداعى جاڭا وقۋ جىلىنىڭ تابىستارى مەن جەتىستىكتەرى مول، قۋانىشتارى كوپ بولسىن!" — دەدى جانسەيىت تۇيمەبايەۆ.

تۇركىستان تورىندەگى تاريحي تامىز كەڭەسىندە وبلىس اكىمى ٴبىر توپ ۇستازدادى ماراپاتتادى. اتاپ ايتساق، 5 ادامعا «وبلىسقا سىڭىرگەن ەڭبەگى ٴۇشىن» مەدالى تاپسىرىلسا، 10 پەداگوگقا وبلىس اكىمىنىڭ گراموتاسى مەن العىس حاتى تاپسىرىلدى. سونىمەن قاتار، 20 ادام قر ٴبىلىم جانە عىلىم مينيسترلىگىنىڭ ماراپاتتارىنا يە بولسا، 5 ۇستاز وبلىستىق ٴماسليحاتتىڭ گراموتاسىمەن ماراپاتتالدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي