استانا: 
2319 
0
استانا، baq.kz ٴتىلشىسى. ەلوردالىق ٴبىلىم بەرۋ جۇيەسىن دامىتۋ پەرسپەكتيۆالارى نەگىزىندە بەلگىلەنگەن باسىم مىندەتتەر: استانامىزدىڭ بۇگىنگى دامۋ قارقىنىنا ساي ينفراقۇرىلىمدى جەتىلدىرىپ، دارىندى مۇعالىمدەردى تارتۋ، ولاردىڭ الەۋەتىن ارتتىرۋ ٴۇشىن جاعداي جاساۋ جانە ساپالى ٴبىلىم بەرۋ. بيىل جاڭا وقۋ جىلى قانداي وزگەرىستەرمەن باستالدى جانە بولاشاقتا قانداي وزگەرس كۇتپەك؟ ٴبىلىم سالاسىنداعى وسى جانە باسقا دا سۇراقتارعا استانا ٴبىلىم باسقارماسىنىڭ باسشىسى ٴانۋار جانعوزينمەن اڭگىمە وربىتتىك.
2019 جىلدا ٴاربىر سىنىپقا wi-fi جەلىسى وتكىزىلەدى
baq.kz: جاڭا وقۋ جىلى ٴبىلىم سالاسىندا قانداي وزگەرىستەرمەن، قانداي جاڭالىقتارمەن باستالدى؟
ٴانۋار جانعوزين: بيىلعى وقۋ جىلىندا قالالىق مەكتەپ جان باسىنا قارجىلاندىرۋ ادىسىنە كوشتى. بيۋدجەتتى ٴتيىمدى ٴبولۋ ارقىلى ٴاربىر مەكتەپ ٴوزىنىڭ ۇستەمەلىك قورىن ۇلعايتۋعا مۇمكىندىك الدى. قازىرگى ۋاقىتتا استانا قالاسىندا باستاۋىش جانە ورتا ٴبىلىم بەرۋدىڭ جاڭارتىلعان مازمۇنعا كوشۋىن قامتاماسىز ەتۋ ٴۇشىن مۇعالىمدەردىڭ بىلىكتىلىگىن ارتتىرۋ بويىنشا جۇمىس جالعاسۋدا. جاڭارتىلعان ٴبىلىم بەرۋ مازمۇنىنا بيىل 3،6،8 سىنىپتار قوسىلدى. كەلەسى جىلى 4،9،10،11 سىنىپتار دا كوشەدى.
2018 جىلدىڭ قاڭتار ايىندا ٴبىلىم باسقارماسىنىڭ باستاماسىمەن استاناداعى ٴبىلىم بەرۋدى جاڭعىرتۋ ورتالىعى قۇرىلىمدىق بولىمشەسى اشىلدى. ونىڭ ماقساتى – ٴبىلىم بەرۋدىڭ بارلىق دەڭگەيىندەگى مۇعالىمدەردىڭ كاسىبي بىلىكتىلىگىن ارتتىرۋ، ادىستەمەلىك كومەك پەن قولداۋ كورسەتۋ.
baq.kz: قاعازبەن بايلانىستى جۇمىستاردى قىسقارتۋ ماقساتىندا قانداي جۇمىستار جۇرگىزىلۋدە؟
ٴانۋار جانعوزين: بيىل قالا مەكتەپتەرى روبوتوتەحنيكا كابينەتتەرىمەن، كومپيۋتەرلىك، ينتەراكتيۆتى جانە stem زەرتحانالارىمەن جابدىقتالدى، ال 2019 جىلدا ٴاربىر سىنىپقا wi-fi جەلىسى وتكىزىلەدى. قاعازبەن بايلانىستى جۇمىستاردى قىسقارتۋ ماقساتىندا ەلەكتروندى جۋرنالدار مەن كۇندەلىكتەر جۇيەسى ەنگىزىلدى. اتا-انالار ٴۇشىن وسى جىلدان باستاپ ۇيالى قوسىمشاسى جۇمىس جاسايدى.
سونداي-اق، ينكليۋزيۆتى ٴبىلىم بەرۋ جۇيەسى جەتىلدىرىلۋدە. وتكەن جىلى 375 ورىندىق ارنايى مەكتەپ-ينتەرناتى اشىلسا، تۇزەتۋ مەكەمەلەرىنىڭ سانى 3-تەن 6-عا دەيىن ارتتى. بۇگىنگى تاڭدا ٴبىلىم بەرۋ مەكەمەلەرىنىڭ 75 پايىزى ينكليۋزيۆتى ٴبىلىم بەرۋ ٴۇشىن جاعداي جاساعان. بيىلعى جىلى ەرەكشە قاجەتتىلىكتەرى بار بالالاردىڭ ٴبىرىڭعاي ەلەكتروندى بازاسى اياقتالىپ، ىسكە قوسىلماق.
ەلوردادا «سامعاۋ» جوباسى ىسكە اسىرىلۋدا
baq.kz: استاناداعى ٴبىلىم مەكەمەلەرىندە مۇعالىمدەر سانى جەتكىلىكتى مە؟
ٴانۋار جانعوزين: 20 جىل ىشىندە استاناداعى مۇعالىمدەر سانى 5 ەسە، ياعني 3 مىڭنان 16 مىڭعا دەيىن ارتىپ وتىر. الداعى بەس جىلدا جاڭا مەكتەپتەر مەن بالاباقشالاردىڭ اشىلۋىن ەسكەرە وتىرىپ، مامانداردىڭ قاجەتتىلىگى تاعى 5 مىڭ ادامدى قۇرايتىن بولادى.
بيىل العاش رەت ەلوردامىزدىڭ دامۋىنا اسا قاجەتتى ماماندىقتار بويىنشا رەسپۋبليكانىڭ 13 جوعارى وقۋ ورىندارىنا اكىمدىك تاراپىنان 700-دەن استام گرانت ٴبولىندى. جۇرگىزىلگەن تالداۋدىڭ ناتيجەسى بويىنشا سۇرانىسى كوپ ماماندىقتار انىقتالدى، سونىڭ ىشىندە: ٴبىلىم بەرۋ، مەديسينا، تۋريزم، it، ديزاين، كاسىپكەرلىك، ٴىرى دەرەكتەردى تالداۋ، قۇرىلىس سالاسى، كولىكتىك سالالارى بار.
baq.kz: «اقىلدى» قالا جوبالارىنا توقتالىپ وتسەڭىز؟
ٴانۋار جانعوزين: «اقىلدى» قالا ٴۇشىن ماڭىزدى جوبالاردىڭ ٴبىرى – قالانىڭ ٴوسۋىن ٴتيىمدى جوسپارلاۋعا مۇمكىندىك بەرەتىن big data (ۇلكەن دەرەكتەر) تەحنولوگياسى پايدالاناتىن جوبالار، مىسالى، مەكتەپتەر مەن اۋرۋحانالاردى ەڭ ىقتيمال جانە قاجەتتىلىگى بار ورىنداردا سالۋ جانە ت.ب.
وسىعان وراي استانا قالاسىنىڭ اكىمدىگى بۇل ماماندىققا بيىل 14 ٴبىلىم بەرۋ گرانتىن ٴبولىپ وتىر. سونىمەن قاتار «كاسىپكەرلىك سالاسىنداعى بيزنەستى باسقارۋ» ماماندىعىنا تاعى 34 گرانت تاعايىندالدى. باعدارلاما جاڭادان بيزنەستى قۇرۋعا قابىلەتتى، كاسىپكەرلىك ويلاۋ قابىلەتى دامىعان بالالاردى وقىتۋعا، وڭىردەگى كاسىپكەرلىك ەكوجۇيەنى دامىتۋعا باعىتتالعان. قازىردەن باستاپ ٴبىرىنشى كۋرسقا قادام باسقان گرانت يەگەرلەرى ەلوردانىڭ دامۋ ستراتەگياسىن زەرتتەپ، بولاشاقتا استانانىڭ ودان ٴارى الەۋمەتتىك-ەكونوميكالىق جەتىستىكتەرىنە ىقپال ەتەتىن ماسەلەلەر مەن تاقىرىپتاردى زەرتتەۋگە كىرىستى.
ەلوردادا «سامعاۋ» جوباسى ىسكە اسىرىلۋدا. بۇل ەرەكشە دامۋ تراەكتورياسى انىقتالعان 13 مەكتەپ. ٴارقايسىسى ٴوزى ٴۇشىن ىقتيمال باعىت تاڭداپ، سول بويىنشا سەرىكتەستەرمەن بىرىگىپ جۇمىس جاسايدى. 13 مەكتەپتە مەديسينا، اقپاراتتىق تەحنولوگيالار، عارىش، قولدانبالى ونەر، ديزاين، بيزنەس جانە ت.ب. سياقتى دامۋدىڭ باسىم باعىتتارى انىقتالعان.
«پەداگوگ مارتەبەسى تۋرالى» زاڭىنا قاتىستى جۇمىس توبى قۇرىلدى
baq.kz: ٴبىلىم جانە عىلىم ۆيسە-مينيسترى ەلميرا سۋحانبەرديەۆا ەلباسى جولداۋىندا ايتىلعان پەداگوگ مارتەبەسى تۋرالى زاڭدى ازىرلەۋگە دايىندىق باستالعانىن مالىمدەگەن بولاتىن. بۇل جاڭا زاڭنىڭ ەرەكشەلىگى نە بولماق؟
ٴانۋار جانعوزين: استانا قالاسىنىڭ ٴبىلىم باسقارماسىمەن «پەداگوگ مارتەبەسى تۋرالى» قازاقستان رەسپۋبليكاسىنىڭ زاڭىنا ۇسىنىستاردى قالىپتاستىرۋ بويىنشا جۇمىس توبى قۇرىلدى، وندا بۇدان ٴارى جۇمىس ىستەۋدىڭ نەگىزگى باسىمدىق باعىتتارى انىقتالدى (ەڭبەكاقى جۇيەسىنە وزگەرىستەر ەنگىزۋدەن باسقا): الەۋمەتتىك كەپىلدىكتەردى وزەكتىلەندىرۋ جانە پەداگوگيكالىق جوعارى وقۋ ورىندارىن ىرىكتەۋدە كانديداتتاردىڭ اكادەميالىق جەتىستىكتەرىنە، ولاردىڭ قارىم-قاتىناس داعدىلارى مەن وقىتۋعا ىنتالاندىرۋعا، ٴمۇعالىمنىڭ جوعارى ميسسياسىن بەلسەندى تۇردە العا جىلجىتۋعا، ۇزدىك وقىتۋشىلار مەن تالىمگەرلەردىڭ جەتىستىكتەرىنە ەرەكشە نازار اۋدارۋ. بۇل جۇمىس قر ٴبىلىم جانە عىلىم مينيسترلىگىنىڭ باقىلاۋىندا.
baq.kz: استانا قالاسى بويىنشا قانشا ٴمۇعالىم اتتەستاسيالاۋعا قاتىسىپ، قانشاسى ٴوتتى جانە ۇستەماقىعا يە بولدى؟
ٴانۋار جانعوزين: اعىمداعى جىلى 26-28 مامىردا ۇلتتىق بىلىكتىلىك تەستىلەۋگە 1907 ٴمۇعالىم قاتىستى.وتپەلى دەڭگەي جيناپ، ەكىنشى كەزەڭگە 1424 (74،6 %) ٴمۇعالىم جىبەرىلدى.
اتتەستاتتاۋدىڭ ەكىنشى كەزەڭى قورىتىندىسى بويىنشا 88،69 % مۇعالىمگە (1263) بىلىكتىلىك ساناتتارى بەرىلدى (پەداگوگ-مودەراتور» - 321، «پەداگوگ-ساراپشى» - 385، «پەداگوگ-زەرتتەۋشى» - 494، «پەداگوگ-شەبەر – 63).
اتتەستاتتاۋدىڭ جاڭا مودەلىنە كوشۋ جالاقىنى ارتتىرۋ شارالارىنىڭ ٴبىرى بولدى جانە پەداگوگتاردىڭ بىلىكتىلىك ساناتتارىن ارتتىرۋ ٴۇشىن جاڭا مۇمكىندىك بەرەدى.
جاڭا جۇيە بويىنشا اتتەستاتتاۋدان وتكەن پەداگوگتار ٴۇشىن 30-دان 50 % دەيىنگى لاۋازىمدىق ايلىقاقى بەلگىلەندى.
پەداگوگ-شەبەر – 50%;
پەداگوگ-زەرتتەۋشى – 40%;
پەداگوگ-ساراپشى – 35%;
پەداگوگ-مودەراتور – 30%.
اتتەستاتتاۋ ەرەجەسىنە سايكەس ۇلتتىق بىلىكتىلىك تەستىلەۋگە 3-4 قاراشادا 1989 پەداگوگ ٴوتىنىش بەردى.
قاتىسقاندار سانى 1884 (94،72%).
وتپەلى دەڭگەيدەن 1301 ادام (69 %) ٴوتتى («پەداگوگ-مودەراتور» – 366 (28،1%)، «پەداگوگ-ساراپشى» - 374 (28،7%)، «پەداگوگ-زەرتتەۋشى» - 515 (39،5%) جانە «پەداگوگ-شەبەر» - 46 (3،5%)).
استانا قالاسىندا اپاتتى مەكتەپتەر جوق
baq.kz: استانا قالاسىندا نەشە اپاتتى جاعدايداعى مەكتەپ بار؟
ٴانۋار جانعوزين: بۇگىنگى تاڭدا استانا قالاسىندا اپاتتى مەكتەپتەر جوق. ەلوردالىق ورتا ٴبىلىم مەكەمەلەرى بۇگىنگى تاڭدا 106 مەكەمەنى قۇراپ وتىر. ول 85 مەملەكەتتىك، 16 جەكەمەنشىك، جانە تاعى ٴ4-ۋى رەسپۋبليكالىق فيزيكا-ماتەماتيكا جانە نازاربايەۆ زياتكەرلىك مەكتەپتەر. جاڭا وقۋ جىلىندا استانالىق مەكتەپتەردە 161 مىڭنان استام بالا وقيدى، ونىڭ 22 مىڭ بالاسى – ٴبىرىنشى سىنىپ وقۋشىلارى. 1 سىنىپقا قابىلداۋ ەلەكتروندى جانە قاعاز جۇزىندە ٴجۇرىپ جاتىر. بۇگىنگى تاڭدا e.astana.kz جۇيەسى ارقىلى 16 مىڭنان استام ٴوتىنىش تىركەلگەن.
ول جالپى وتىنىشتەر سانىنىڭ 80% قۇراپ وتىر.
baq.kz: استانا قالاسىندا نەشە جاڭا مەكتەپ سالىنۋدا جانە قۇرىلىس جۇمىستارى قاشان اياقتالادى دەپ جوسپارلانعان؟
ٴانۋار جانعوزين: استانا قالاسىندا 2019 جىلى 8 مەكتەپتىڭ قۇرىلىس جۇمىستارى اياقتالادى، سونىمەن قاتار №24،28،40،57،64،68 مەكتەپتەردىڭ جانىنان 6 كەڭەيتىم (پريسترويكا) سالىنادى.
baq.kz: قالاداعى بارلىق ٴبىلىم مەكەمەسىنە بەينەباقىلاۋ كامەرالارى ورناتىلعان با؟
ٴانۋار جانعوزين: استانا قالاسىنىڭ ٴبىلىم بەرۋ سالاسىندا «تەرروريستىك تۇرعىدان وسال وبەكتىلەردىڭ تەرروريزمگە قارسى قورعالۋ جۇيەسىنە قويىلاتىن تالاپتاردى بەكىتۋ تۋرالى» قر ۇكىمەتىنىڭ قاۋلىسىنا سايكەس، بارلىق وبەكتىلەردە بەينەباقىلاۋ كامەرالارى ورناتىلعان. بۇگىنگى تاڭدا ونى پايدالانۋ جانە زاماناۋي ينتەگراسيا قىزمەتتەرىنە قول جەتكىزۋ ٴۇشىن ٴبىلىم بەرۋ مەكەمەلەرى بويىنشا تالداۋ جۇمىستارى جۇرگىزىلدى. ٴاربىر سىنىپتا (مەكتەپتە) جانە بولمەلەردە (مەكتەپكە دەيىنگى ۇيىمداردا) كامەرالاردى ورناتۋ قاجەتتىلىگىن، سونداي-اق بارلىق نىساندارداعى كوپشىلىك جينالاتىن جەرلەردە قوسىمشا كامەرالاردى ورناتۋ قاجەتتىلىگى ەسەپتەلدى. سوڭعى اقپارات بويىنشا قاجەتتىلىك 10 مىڭ كامەرانى قۇراپ وتىر. بۇل كولەمدەگى جابدىقتاۋ مەن ورناتۋ شارالارىن 2019 جىلدىڭ سوڭىنا دەيىن اياقتاۋ جوسپارلانۋدا.
بۇدان باسقا، استانا قالاسىندا تۋرنيكەتتىك جۇيە ارقىلى (قالالىق مەكتەپتەر نەگىزىندە) باقىلاۋدىڭ ٴبىرىڭعاي جۇيەسىنە سايكەس پيلوتتىق جوبالار ىسكە قوسىلدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
14746
0