BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەر ٴمۇعالىمنىڭ ورنى بولەك («وڭتۇستىك قازاقستان» گازەتى)

فوتو: Оңтүстік Қазақстан газеті

بۇگىندە عالىمدى دا، شاحتەردى دە، ٴتىپتى ەل باسقارعان پرەزيدەنتتى دە وقىتاتىن ۇستاز. جاسىراتىنى جوق، تۇركيادا ۇستازدى جۇمىستان تەك پرەزيدەنت شىعارا السا، بىزدەگى ۇستازدىڭ جاعدايى مۇلدەم بولەك. وكىنىشتىسى ەلىمىزدە ٴبىلىمدى مۇعالىمدەر سانى ازايىپ بارادى. قوعامنىڭ مازاسىن قاشىرعان بۇل ماسەلە ەلىمىزدە از كوتىرىلىپ كەلە جاتقان جوق. وسى رەتتە، «وڭتۇستىك قازاقستان» گازەتى زەينەتكەر ۇستاز كوشكىنباي ەلىكبايەۆتىڭ اتالعان ماسەلە توڭىرەگىندەگى وي تولعاۋىمەن ٴبولىسىپتى.

«وڭتۇستىك قازاقستان» گازەتىنىڭ وسى جىلعى 48-نومىرىندە جارىق كورگەن «ەر مۇعالىمدەردى كوبەيتۋ كەرەك نەمەسە بۇگىنگى ۇرپاقتىڭ بويىندا جىگىتكە ٴتان مىنەز جوعالىپ بارادى» (27.03.2018) اتتى ماقالا كوپتەن بەرى جۇرتتىڭ كوكەيىندە جۇرگەن ماسەلەنى كوتەرىپتى. بۇگىنگى قوعامداعى وزەكتى ماسەلەنى ٴسوز ەتكەندىكتەن، بايىرعى ۇستاز رەتىندە قولىما قالام الىپ، ٴوز پىكىرىمدى جەتكىزگىم كەلدى، دەيدى زەينەتكەر ۇستاز كوشكىنباي ەلىكبايەۆ.

بۇگىندە مەكتەپتەردە ەر مۇعالىمدەردىڭ ازايىپ بارا جاتقانى مەنى دە الاڭداتادى. وقۋشىلار اراسىنداعى قىلمىس، بۇزاقىلىق، تارتىپسىزدىكتىڭ ازايماي وتىرعانى، ەر بالالاردىڭ ٴبىلىم الۋعا دەگەن ىقىلاسىنىڭ تومەندەپ، ەر جىگىتكە ٴتان مىنەزىنىڭ جوعالىپ بارا جاتقانى دا وسى ەر مۇعالىمدەردىڭ ازدىعىنان دەپ ويلايمىن.

پەداگوگ عالىمداردىڭ، پسيحولوگتاردىڭ پايىمداۋىنشا، تۋعان كۇنىنەن باستاپ ٴوز اناسىنىڭ تاربيەسىندە بولاتىن بالانىڭ بالاباقشادا، مەكتەپتە ايەل ٴمۇعالىمنىڭ تاربيەسىنە قايتا ٴتۇسۋى ولاردىڭ ەركەكتەرگە ٴتان مىنەزىنىڭ قالىپتاسۋىنا كەرى اسەرىن تيگىزەدى ەكەن. بايقاپ قاراساق، ايەل مۇعالىمدەر تاربيەلەگەن ەر بالالار قىز مىنەزدى بولىپ بارادى. مەكتەپتە بالالار ەلىكتەيتىن، يدەال تۇتاتىن ەر مۇعالىمدەر از، ٴتىپتى جوقتىڭ قاسى.

بۇگىنگىدەي سوعىسسىز، بەيبىت زاماندا ورتا ٴبىلىم بەرۋ مەكەمەلەرىندەگى ەر ازاماتتاردىڭ ۇلەس سالماعىنىڭ 18-اق پايىز بولۋى وتە تومەن كورسەتكىش. دابىل قاعاتىن جاعداي. بۇل ۇلتتىڭ بولاشاعىنا الاڭداعان ٴاربىر زيالى ازاماتتىڭ ماسەلە كوتەرەتىندەي جاعدايى. وتكەن عاسىردىڭ الپىسىنشى، جەتپىسىنشى جىلدارى مەن ٴمۇعالىم بولعان ۋاقىتتا تولەبي اۋدانىندا ٴبىر عانا ايەل «مانكەنت» مەكتەبىنىڭ ديرەكتورى بولاتىن. ال، ٴقازىر...

قانشا دەگەنمەن، ەر مۇعالىمدەر مەكتەپتە تەمىردەي ٴتارتىپتى تالاپ ەتە الادى. ەر مۇعالىمدەرى كوپ مەكتەپتىڭ وقۋشىلارى ساباققا، قوعامدىق جۇمىستارعا بەلسەنە قاتىسادى. ۇستازداردىڭ كوبى ەر ازامات بولعان سوڭ دا مۇعالىمدىك ەڭ بەدەلدى ماماندىق ەدى. وقۋشىلار دا، اتا-انالار دا ٴمۇعالىمدى قاتتى سىيلاپ، قۇرمەتتەيتىن. ٴمۇعالىمنىڭ توبەسى كورىنگەننەن وقۋشىلار باس كيىمىن قولىنا الىپ، شەتكە ىعىسىپ امانداساتىن. ۇستازدىڭ كيگەن كيىمى، سويلەگەن ٴسوزى، ٴجۇرىس-تۇرىسى بۇكىل اۋىلعا ۇلگى ەدى. قانشاما اۋىل بالالارى سولارعا ەلىكتەپ ٴوستى.

مۇعالىمگە بالا تۇگىلى اتا-انا دا قارسى كەلمەيتىن. ونىڭ سوزىنە قۇلاق اسىپ، قۇرمەتپەن قارايتىن. «مۇعالىمدىكى ٴجون» دەگەن ۇعىمدى سول ەر مۇعالىمدەر كوپ بولعان زامان قالىپتاستىردى دەپ ويلايمىن.

ٴقازىر ٴمۇعالىم سول بەدەلدەن ايرىلىپ قالدى. قيت ەتسە كىم جامان – ٴمۇعالىم جامان. ٴيىنى جۇمساق ايەل مۇعالىمدەر جىلاپ-سىقتاپ شىعا كەلەدى. «ويباي، كۇن بەرمەي جاتىر...» دەپ ايەلدىك بايبالامعا سالادى. وسىدان بارىپ، مەكتەپتەن بەرەكە كەتىپ، ۇستازدان بەدەل قاشتى. بالالارىنىڭ تاربيەسىزدىگىنە اتا-انا باس سالىپ، ٴمۇعالىمدى كىنالايدى. ٴمۇعالىم قوعامداعى ەڭ قاۋقارسىز، قۇقىعى تاپتالعان ادامعا اينالدى.

كەڭەس وكىمەتى كەزىندە جوعارى سىنىپ وقۋشىلارى كۇزدە 2-2،5 اي مەرزىمىن اۋىل شارۋاشىلىعى جۇمىستارىندا، ماقتا تەرىمدە وتكىزەتىن. مۇنداي جۇمىستارعا ەر مۇعالىمدەردى جىبەرەتىن. بالاعا باس-كوز بولا الاتىندىعى، ٴتارتىپتى قاتاڭ باقىلايتىندىعى ٴۇشىن. ەر بالالار قيا باسپايتىن. وسىنىڭ ٴوزى مەكتەپكە ەر مۇعالىمدەردى كوبەيتۋ كەرەكتىگىنە مىسال بولىپ تۇرعان جوق پا؟!

ماقالاداعى «... مەكتەپتەگى ەر مۇعالىمدەردى كوبەيتۋ ٴۇشىن الدىمەن پەداگوگيكالىق ٴبىلىم بەرەتىن جوعارى وقۋ ورىندارىنا ەر بالالاردى كوپتەپ تارتۋ كەرەك» دەگەن پەداگوگ عالىم ز.قابىلبەكوۆانىڭ پىكىرىن قۋاتتايمىن. ونىڭ ۇستىنە ٴبىلىم جانە عىلىم مينيسترلىگى ەر بالالاردىڭ مۇعالىمدىك ماماندىققا ٴتۇسۋى ٴۇشىن جىل سايىن ارنايى جەڭىلدىكتەر: گرانت، كۆوتا ٴبولىپ تۇرسا دەيمىن. سونداي-اق، مەكتەپكە ەر مۇعالىمدەردى تارتۋ ٴۇشىن ٴبىرسىپىرا شارالاردى قاراستىرۋ كەرەك. مۇعالىمدەردىڭ جالاقىسى تومەن بولعاندىقتان، ەر مۇعالىمدەر وتباسىن اسىراۋ ٴۇشىن جالاقىسى جوعارى باسقا سالالارعا كەتىپ جاتادى. مەكتەپتە ولاردى تۇراقتاندىرۋ ٴۇشىن جالاقىسىن مەملەكەتتىك قىزمەتشىلەردىڭ جالاقىسىنا تەڭەستىرۋ كەرەك جانە ماتەريالدىق-الەۋمەتتىك جاعدايىنا كومەكتەسكەن ٴجون (تۇرعىن ٴۇي ماسەلەسى، جىلىنا ٴبىر رەت كۋرورت، پروفيلاكتورييلەرگە تەگىن جولداما بەرۋ، ت.ب.).

سونىمەن بىرگە مەكتەپتەردە مۇعالىمدىك ماماندىقتىڭ ەلىمىزدە اسا قۇرمەتتى، مارتەبەلى، قاسيەتتى ماماندىق ەكەنىن شاكىرتتەر ساناسىنا جەتكىزۋدىڭ شارالارى: اڭگىمەلەر، ٴبىلىم سالاسىندا جەمىستى ەڭبەك ەتكەن ۇستازدارمەن كەزدەسۋلەر جۇيەلى تۇردە وتكىزىلىپ تۇرسا، مەكتەپ بىتىرگەن تۇلەكتەردىڭ وسى ماماندىققا بارۋىنا كادىمگىدەي ىقپال ەتەر ەدى. اكىمدىكتەر، ٴبىلىم بولىمدەرى جاس ەر ۇستازداردى مەكتەپ ديرەكتورلىعىنا باتىل تارتۋى كەرەك. وسىنداي ٴىس-شارالاردىڭ بارلىعى مەكتەپكە ەر مۇعالىمدەردىڭ تارتىلۋىنا سەبەپشى بولماق. تۇپتەپ كەلگەندە، بۇل شارالار وقۋشى ەر بالالاردىڭ تاربيەسىنە ىقپال ەتىپ، بولاشاقتا ومىردەن قينالماي ورىندارىن تابۋىنا ىقپالى تيمەك.

ەلباسى سوزىمەن ايتقاندا «بولاشاقتا ەڭبەك ەتىپ، ٴومىر سۇرەتىندەر – بۇگىنگى مەكتەپ وقۋشىلارى. ٴمۇعالىم ولاردى قالاي تاربيەلەسە، قازاقستان سول دەڭگەيدە بولادى». ولاي بولسا، بولاشاعىمىزعا بەي-جاي قارامايىق.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي