BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«سوزبەن جەتكىزۋ مۇمكىن ەمەس». قازاقستاندىق اتاقتى سپورتشىلار تۋ كوتەرىلگەن ساتتەگى اسەرلەرىن ەسكە الدى ەكسكليۋزيۆ

فوتو: ашық дереккөзден

بۇگىن – قازاقستان رەسپۋبليكاسىنىڭ رامىزدەرى كۇنى. 1992 جىلى 4 ماۋسىمدا قازاقستان تۋى، ەلتاڭباسى جانە ٴانۇرانى قابىلداندى. سودان بەرى ەل سپورتشىلارى ٴبىر تۋدىڭ استىندا جارىستارعا قاتىسىپ، جەڭىس تۇعىرىنا كوتەرىلىپ كەلەدى. وسى ورايدا baq.kz ٴتىلشىسى قازاقستان نامىسىن حالىقارالىق جارىستاردا قورعاپ جۇرگەن سپورتشىلاردان جارىستا ولاردىڭ جەتىستىكتەرىنىڭ قۇرمەتىنە كوتەرىلەتىن تۋ مەن شىرقالاتىن ٴانۇراننىڭ ٴمانى تۋرالى سۇرادى.

ولگا رىپاكوۆا، لوندون وليمپياداسىنىڭ چەمپيونى، ريو جانە بەيجىڭ وليمپياداسىنىڭ قولا جۇلدەگەرى

سپورتشىلار ۇلكەن جارىستاردا جەڭىسكە جەتكەن كەزدە ولار تۇعىرعا كوتەرىلەدى. سول تۇعىردان جوعارىعا كوتەرىلىپ جاتقان ٴوز ەلىنىڭ تۋىن كورىپ، جەڭىمپازدىڭ قۇرمەتىنە قويىلعان ٴانۇراندى بىرگە شىرقاعان ساتتە سپورتشىنىڭ سەزىمىن تىلمەن ايتىپ جەتىزۋ مۇمكىن ەمەس. ٴارتۇرلى سەزىمدى باستان كەشەسىڭ، بىرىنشىدەن، ەلىڭمەن ماقتاناسىڭ. ەلىمىزدە سپورتتا ۇلكەن جەتىستىككە جەتۋگە بارلىق جاعداي جاسالعان. وليمپيادا ويىندارىن الساق، ماراپاتتاۋ ٴراسىمىن قانشاما ميلليون ادام كورەدى، سول كەزدە ماقتانىش سەزىمى بولادى. ەكىنشىدەن، ەلدىڭ نامىسىن، تۋىن قورعاۋ وتە زور جاۋاپكەرشىلىك، ٴار سپورتشى ٴۇشىن ۇلكەن سترەسس. جارىستاردا جەڭىمپاز اتانعان ساتتە ەلىڭنىڭ الدىندا قارىزىڭدى وتەگەندەي سەزىمدە بولاسىڭ. سەبەبى سپورتشىلار جەتىستىككە جەتۋ ٴۇشىن وتە كوپ سىننان وتەدى، قيىن جاتتىعۋلار جاسايدى. ارينە، مەملەكەتىمىز قولداۋ بىلدىرەدى، وسى ٴۇمىت پەن قولداۋىنا لايىق بولۋ ٴۇشىن مەدال جەڭىپ الۋ ۇلكەن ابىروي، ەڭبەكتىڭ اقتالعانى.

مەن ٴۇشىن رامىزدەر كۇنى پاتريوتتىق كۇن. بۇل كۇنى رامىزدەرىمىزدىڭ تاريحىنا، تاۋەلسىز ەلىمىزدىڭ تاريحىنا ەرەكشە نازار اۋدارامىز. بالالارعا وسىنداي ەلدە ٴومىر ٴسۇرۋدىڭ ٴمانىن، قالاي ەل يگىلىگى مەن گۇلدەنۋى ٴۇشىن لايىقتى ٴومىر سۇرۋگە بولاتىنىن تۇسىندىرەمىز.

ابزال اجعاليەۆ، شورت-ترەكتەن الەم كۋبوگىنىڭ جەڭىمپازى، پحەنچحان وليمپياداسىندا قازاقستان تۋىن ۇستاپ شىققان سپورتشى

جەڭىس تۇعىرىنا كوتەرىلگەندە ەڭ ٴبىرىنشى ويىما كەلگەنى ول – ارماندار ورىندالاتىنىنا سەندىم. قىسقى سپورتتا جەتىستىكتەرگە جەتۋ وتە قيىن. سول كەزدە باسقا جارىستاردا ۇتۋىم كەرەك دەگەن العا ماقسات قويدىم. ەلىمىزدىڭ كوك بايراعى حالىقارالىق جارىستاردا جەلبىرەگەندە قۋانىش سەزىمى بولدى.

بيىل پحەنچحاندا وتكەن وليمپيادا ويىندارىندا قازاقستان تۋىن ۇستاپ شىقتىم. بۇل جاڭالىقتى ماعان وليمپيادانىڭ باستالۋىنا 1 اي قالعاندا «ٴسىزدى قۇتتىقتايمىز، ٴسىز وليمپيادادا تۋ كوتەرىپ شىعاسىز» دەدى. مەن ول كەزدە گوللانديا ەلىندە وقۋ-جاتتىعۋ جيىنىندا بولدىم. مۇنداي جاۋاپتى ىسكە دايىن بولعان جوقپىن، مەن ٴۇشىن كۇتپەگەن جاعداي بولدى. ٴاۋ باستا ەستىگەننەن باس تارتقىم كەلدى، سەبەبى تۋ ۇستاپ شىعۋ – ۇلكەن جاۋاپكەرشىلىكتى قاجەت ەتەدى جانە دايىندالاتىن جارىستارىم بار. ٴبىراق شەشىم قابىلداپ، ٴبىر اي قالعاندا ٴوزىمدى ىشتەي دايىنداي باستادىم. وليمپيادانىڭ اشىلۋ سالتاناتى باستالار كەزدە ٴبىزدى اۆتوبۋسپەن ستاديونعا الىپ كەلدى. 30 مينۋت قالعان كەزدە كىشكەنە دايىندىق جاسادىق. ستاديوندا قانشاما مىڭ ادام، تىكەلەي ەفيردەن قانشاما ميلليون ادام وسى سالتاناتتى شارانى كورىپ وتىرعان سوڭ جانە سپورتشىلاردىڭ الدىندا ەڭ ٴبىرىنشى بولىپ تۋ ۇستاپ شىعاتىن بولعان سوڭ باستالار كەزدە «قالاي بولار ەكەن» دەگەن ويمەن قاتتى قوبالجىدىم. ال ستاديونعا كىرىپ كەلگەن ساتتە قوبالجىعانىم كەتتى. ەلىمىزدىڭ تۋىن كوتەرىپ شىققانىما قۋانىشتىمىن جانە دە ەندى كەلەسى وليمپياداعا تىڭعىلىقتى دايىندالامىز.

ٴاربىر ەلدىڭ ٴوز ٴانۇرانى مەن بايراعى بولۋى كەرەك. ٴانۇران ويناعاندا ٴوزىڭنىڭ قايدان شىققانىڭدى تۇسىنسەڭ، پاتريوتتىق سەزىمدى باستان كەشەسىڭ. ٴبىزدىڭ تۋىمىز ەرەكشە كەلەدى جانە ادەمى. باسقا ەلدەردىڭ تۋلارىنا قاراساڭ ٴجاي عانا ٴبىر تۇستە بولادى، كەيبىر ەلدەردىڭ تۋلارىن بىر-بىرىنەن ايىرا المايسىڭ، اسا ايىرماشىلىعى جوق. ال ٴبىزدىڭ تۋىمىز ەرەكشە جانە دە ەشقانداي ەلدىكىنە ۇقسامايدى.

اقمارال ناۋاتبەك، جاسوسپىرىمدەر اراسىندا ازيا چەمپيونى جانە جاستار اراسىندا ازيا چەمپيوناتىنىڭ كۇمىس جۇلدەگەرى

جەڭىسكە جەتىپ، قازاقستان تۋى كوتەرىلىپ جاتقان كەزدە وعان قارايسىڭ، ٴانۇران وينايدى. ماقتانىش سەزىمى بولادى. سول كەزدە قازاقستان تۋىنىڭ قانداي ادەمى ەكەنىن، قانداي ٴمان الىپ كەلە جاتقانىن تۇسىنەسىڭ. باسقا ەلدىڭ تۋىن الىپ قاراساڭىز كوبىنەسە ٴۇش ٴتۇرلى ٴتۇس بولادى. ٴانۇرانىمىزدىڭ سونشالىقتى اۋەزدىلىگى ۇنايدى. مەن ٴۇشىن وتاندىق تەلەارنالار سەنى قانشا رەت ەفيردەن كورسەتكەنى ماڭىزدى ەمەس، ەڭ ماڭىزدىسى – باسقا ەلدە جۇرگەندە سەنىڭ قۇرمەتىڭە قازاقستاننىڭ ٴانۇرانى وينالىپ، تۋىمىزدىڭ جەلبىرەگەنى. سول كەزدە عانا جەڭىمپاز اتانۋعا بار كۇش-جىگەرىڭدى سالعانىڭدى، تەر توككەنىڭدى جانە جەڭىس تۇعىرىنان كورىنگەن ساتتە بويىڭدى ماقتانىش سەزىمى بيلەيتىنىن تۇسىنەسىڭ، وزىڭە سەنىم ارتقانداردىڭ سەنىمىن اقتاعانىم ٴۇشىن قاتتى قۋانامىن. قاراپايىم مەن سەكىلدى قىزدىڭ جەتىستىكتەرىن كورگەندە باسقالار بالاسىن سپورتقا بەرسە نەمەسە بالالاردىڭ وزدەرى مەنىڭ كىشكەنتاي جەڭىستەرىمدى كورىپ جىگەرلەنسە، مۇنىڭ ٴبارى بەكەر ەمەس دەگەن ٴسوز.

دينا جولامان، بوكستان الەم چەمپيونى

قازاقستان رامىزدەرى مەن ٴۇشىن تاۋەلسىزدىكتىڭ بەلگىسى جانە مەنىڭ وتانىمنىڭ، حالقىمنىڭ ەركىندىگىنىڭ بەلگىسى. مەن سپورتشىمىن ول ەڭ ٴبىرىنشى مەملەكەت باسقاراتىن پرەزيدەنتتەر باسقا ەلگە بارعاندا، ەكىنشىدەن سپورتشى ۇلكەن حالىقارالىق جارىستاردا جەڭىسكە جەتكەندە ەل ٴانۇرانى وينالىپ، كوك بايراعىمىز كوتەرىلەدى. سپورتشى رەتىندە ايتارىم، جەڭىسكە جەتكەن ساتتە تۇعىردا تۇراسىڭ، ەلىڭنىڭ تۋى كوتەرىلىپ، ٴانۇرانىڭ شىرقالعاندا سەنەن باقىتتى جان بولمايدى، ياعني بۇدان اسقان باقىت جوق. ٴدال سول مينۋتتاردا ۇنەمى كوزىم جاسقا تولىپ، ماقتانىش سەزىمى بولادى. ٴدال سول ساتتە ٴوز ەلىمنىڭ نامىسىن لايىقتى تۇردە قورعاپ شىقتىم دەپ سەزىنەمىن.

ەلدوس سمەتوۆ، دزيۋدودان الەم چەمپيونى، وليمپيادا ويىندارىنىڭ كۇمىس جۇلدەگەرى، ازيا ويىندارىنىڭ جەڭىمپازى، ازيا چەمپيونى

بارشا قازاقستاندىقتاردى شىن جۇرەكتەن رامىزدەر كۇنىمەن قۇتتىقتايمىن. ٴارقاشان دا ەلىمىزدىڭ ابىرويى اسقاقتاي بەرسىن، كوك تۋىمىز جەلبىرەي بەرسىن دەگەن تىلەكتەمىز. ٴبىزدىڭ سپورتتاعى جەتىستىكتەرىمىزگە وراي ەلىمىزدىڭ كوك تۋى جەلبىرەپ، ٴانۇرانىمىز شىرقالاتىنى بارشاڭىزعا ٴمالىم. سول جەردە تۇرعان كەزدە عانا باستان كەشەتىن بۇل سەزىمدى سوزبەن جەتكىزۋ وتە قيىن. دزيۋدودان شەتەلدىك العاشقى جارىسىم گەرمانيادا برەمەن قالاسىندا ٴوتتى. وسى قالادا ٴالى كۇنگە دەيىن وتەتىن «ماستەرس» ٴتۋرنيرىنىڭ جەڭىمپازى بولعان كەزدە قازاقستان ٴانۇرانى شىرقالدى. بۇل سەزىمدى سوزبەن جەتكىزە المايمىز. ابىرويدىڭ اسقاقتاپ جاتقانىن، ەلىمىزدىڭ بۇكىل الەمگە تانىلىپ جاتقانىن سەزىنەسىڭ. تۇعىردا تۇرعان ساتتە بويىڭداعى كۇش-جىگەر، نامىس ويانادى. سول جارىسىمدا وتە قۋانىشتى سەزىمدە بولدىم، ويتكەنى ەڭ العاشقى باستامام التىنمەن باستالدى. اللاعا شۇكىر، قازىرگى تاڭعا دەيىن التىنمەن جالعاسۋدا.

ٴابىلحاسان باقىتجان، تاەكۆوندودان جاسوسپىرىمدەر اراسىنداعى الەم چەمپيونى

شەت مەملەكەتكە بارعان كەزدە ەلىمىزدىڭ تۋى جەلبىرەپ، ٴانۇرانىمىز ەكى ماقساتتا ورىندالادى. ٴبىرىنشىسى – مەملەكەت باسشىسى سول ەلگە ىس-ساپارمەن بارعان كەزدە ورىندالسا، ەكىنشىسى، سپورتشىلار حالىقارالىق جارىستاردا توپ جارعان كەزدە ەلىمىزدىڭ تۋى بيىككە كوتەرىلىپ، ٴانۇرانى شىرقالادى.

مەن بىلتىرعى جىلى ەگيپەتتە وتكەن الەم چەمپيوناتىندا بارلىق قارسىلاسىمنان باسىم ٴتۇسىپ، تاەكۆوندودان جاسوسپىرىمدەر اراسىندا قازاقستاننان شىققان تۇڭعىش الەم چەمپيونى اتاندىم. ارينە، ول كەزدەگى قۋانىشتى ٴساتتى سوزبەن ايتىپ جەتكىزۋ مۇمكىن ەمەس.

تۋ بيىككە كوتەرىلگەندە ادام رۋحى دا بىرگە كوتەرىلەدى. ٴانۇران مەن تۋدىڭ اسەرى مەن ٴۇشىن ۇلتتىڭ رۋxى مەن ابىرويى دەپ بىلەمىن. وليمپيادا ويىندارىنا قاتىسقىم كەلەدى. 2020 جىلى وتەتىن توكيو وليمپياداسىنا قاتىسۋعا جاسىم جەتپەيدى. دەگەنمەن 2024 وليمپيادا ويىندارىندا چەمپيون اتانىپ، ەلىمىزدىڭ كوك بايراعىن بيىككە كوتەرەتىنىمە سەنىمدىمىن.

نۇرزات سالىمبايەۆ، دزيۋدودان كادەتتەر اراسىندا الەم چەمپيوناتىنىڭ كۇمىس جۇلدەگەرى

سپورتتا جەتىستىككە جەتىپ، وزگە ەلدە ٴانۇراندى شىرقاتىپ، تۋدى بيىككە كوتەرىپ، تۇعىردا ٴبىرىنشى تۇرۋ ول – ٴار سپورتشىنىڭ ارمانى، ماقساتى. ٴانۇران شىرقالىپ، تۋ بيىككە كوتەرىلگەندە كوپ سپورتشى كوزىنە جاس الادى، ول – جەڭىستىڭ، قۋانىشتىڭ، ەلىنە، جەرىنە دەگەن سۇيىسپەنشىلىكتىڭ جاسى. تۇعىردا ٴبىرىنشى بولىپ ٴانۇران شىرقالعان ساتتە جان دۇنيەڭ تەبىرەنىپ، ەلىڭ مەن جەرىڭە دەگەن سۇيىسپەنشىلىگىڭ ويانادى. جەڭىسكە دەگەن قۇشتارلىعىڭ اشىلىپ، ەتكەن ەڭبەگىڭنىڭ ەش كەتپەگەنىن تۇسىنەسىڭ، دايىندىق جولىندا قينالعان ساتتەردىڭ بارلىعى ۇمىتىلادى. بۇرىنعى باتىر بابالارىمىز ەلىن-جەرىن قورعاپ باتىر اتانسا، قازىرگى كەزدە وزگە ەلدە جەڭىسكە جەتىپ، ٴانۇراندى شىرقاتىپ، بۇگىنگى بەيبىت كۇننىڭ باتىرى بولىپ ۇلەس قوسىپ جۇرگەنىمىزگە قۋانىشتىمىن.

تۇركيانىڭ انتاليا قالاسىندا وتكەن جاسوسپىرىمدەر اراسىندا ەۋروپا كۋبوگى جارىسىندا ەڭ العاش رەت ٴانۇراندى شىرقاتىپ، قازاقستاننىڭ كوك تۋىن كوكتە جەلبىرەتتىم. سول جارىستا جەڭىمپاز اتانىپ، ەلىمىزدىڭ ٴانۇرانىن شىرقاتتىم. بۇل ٴسات مەن ٴۇشىن تاريحتا قالادى. بارلىق قازاقستاندىق سپورتشىلاردى، قازاقستاندىقتاردى رامىزدەر كۇنىمەن شىن جۇرەكتەن قۇتتىقتايمىن! قازاقستان ٴانۇرانىن شىرقاتاتىن، تۋدى بيىككە كوتەرەتىن ۇل-قىزدار كوبەيە بەرسىن. ەلىمىز دامىپ، سپورتىمىز جاساي بەرسىن. تەك جەڭىس تىلەيمىن.

ٴاليا يۋسۋپوۆا، كوركەم گيمناستيكادان قازاقستاننىڭ باس باپكەرى، بىرنەشە دۇركىن ازيا چەمپيونى جانە ازيا ويىندارىنىڭ ەكى دۇركىن ٴابسوليۋتتى جەڭىمپازى

جارىستاردا بۇرىندارى ونەر كورسەتكەنىمدە، ازيا چەمپيوناتتارى، ازيا ويىندارىندا جەڭىسكە جەتىپ تۇعىرعا كوتەرىلگەنىمدە، ٴانۇران ويناتىلىپ، تۋىمىز كوتەرىلگەن ساتتەگى سەزىمدى ايتىپ جەتكىزۋ مۇمكىن ەمەس. سول ساتتە ەلىڭنىڭ كۇشى مەن قولداۋىن سەزىنىپ، ٴبىزدىڭ ەلىمىزدىڭ قۇرمەتى ٴۇشىن تۋ كوتەرىلىپ، ٴارقاشان قوسىلىپ شىرقايتىن ٴانۇرانىمىز اۋەلەگەنى سول جاتتىعۋلاردىڭ اقتالعانىن كورسەتەدى.

بۇگىندە كوركەم گيمناستيكادان قر باس باپكەرمىن. جاقىندا عانا ازيا چەمپيوناتىنان كەلگەندە مەنىڭ شاكىرتىم چەمپيون اتاندى. جەڭىمپاز قۇرمەتىنە تۋ كوتەرىلىپ، ٴانۇران قويىلعاندا كوماندامىزبەن قوسا شىرقاپ، ٴبىزدىڭ ەلىمىزبەن، سپورتشىلارىمىزبەن ماقتاندىق. بۇل سەزىمدەردى سوزبەن ايتىپ جەتكىزۋ مۇمكىن ەمەس. مۇنى ەل نامىسىن قورعاعان سپورتشى عانا سەزىنە الادى، سەبەبى تۇعىردا تۇرعاندا جەڭىسىڭ ٴۇشىن ٴانۇران ويناپ، تۋ كوتەرىلگەندە باقىتتان جىلاپ، قۋانىشتان ەكى ەزۋىڭ قۇلاعىڭا جەتەدى.

مەنىڭ شاكىرتتەرىم دە جارىستارعا قاتىسىپ، جەڭىسكە جەتكەندە مەندە دە بۇرىندارى ٴوزىم ونەر كورسەتكەن كەزدەگى سەزىمدەر بولادى. بارلىق سپورتشى – پاتريوتتار، سەبەبى ٴبىز ٴاردايىم ەل نامىسى ٴۇشىن جارىستاردا تۋىمىز كوتەرىلىپ، ٴانۇران ويناۋى ٴۇشىن جەڭىس تۇعىرىنان كورىنۋگە تىرىسامىز.

ازامات مۇقانوۆ، دزيۋدودان الەم چەمپيوناتىنىڭ كۇمىس جۇلدەگەرى

وتانىما ادال قىزمەت ەتىپ، تۋىن كوتەرىپ، xالقىمنىڭ بەدەلىن ارتتىرىپ، اتىن شىعارۋ بالا كەزىمنەن ارمانىم ەدى. 2005 جىلى جاستار اراسىندا الەم چەمپيوناتىندا جەڭىمپاز اتانعانىمدا سول ماقساتىما جەتتىم دەسەم جاڭىلماسپىن. مۇنداي كەزدە بويىمدى ەرەكشە ٴبىر قۋانىش پەن ايرىقشا ماقتانىش سەزىمى كەرنەيدى. ونداي ساتتەردى اتا-بابالارىمىز «قۋانىشتان توبەسى كوككە ەكى ەلى عانا جەتپەدى» دەپ سۋرەتتەگەن.

وسىدان 27 جىل بۇرىن ەگەمەندىگىمىزدى جاريالاپ، تاۋەلسىزدىككە قول جەتكىزدىك. بۇل عاسىرلار بويى قازاق xالقىنىڭ اڭساعان ارمانى ەدى. مەن ٴۇشىن ٴبىزدىڭ تاۋەلسىزدىگىمىز وتە قىمبات، نەگە دەسەڭىز مەملەكەتىمىزدىڭ سونگەن وتىن جاققانى ٴۇشىن، اتا-بابامىزدىڭ رۋxىن كوتەرگەنى ٴۇشىن، ەلىمىزدى الەمگە تانىتقانى ٴۇشىن، «قازاق» دەگەن اتاۋعا جان كىرگىزگەنى ٴۇشىن قىمبات. ەلىمنىڭ بوستاندىعىن، ەلىمنىڭ تاۋەلسىزدىگىن كورسەتەتىن بىردەن ٴبىر نىشانى، ماقتانىشى ول – ٴبىزدىڭ رامىزدەرىمىز. ٴار ٴرامىزىمىزدىڭ استارىندا وزىندىك ماعىنا بار. مىسالى، تۋىمىزدىڭ ٴوزى بەيبىتشىلىكتىڭ، تاۋەلسىزدىكتىڭ، سامعاپ ۇشقان قۇستىڭ بوستاندىعىن سۋرەتتەسە، ەلتاڭباعا قاراپ بايلىق، بەرەكە، ىرىس، ەركىندىكتى كورۋگە بولادى. ال ٴانۇراننىڭ ورنى ٴبىز ٴۇشىن تىم بولەك. ٴار جەڭىسىمىزدە تۋىمىزدى كوككە كوتەرىپ، ٴانۇرانىمىز ايتىلعاندا بويىمىزدا ماقتانىش، جۇرەگىمىزدى پاتريوتتىق سەزىم باۋلىپ، كوڭىلىمىزگە قۋانىش ورنايدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي