BAQ.kz - Қазақстан жаңалықтары USD 375.9 BAQ.kz - Қазақстан жаңалықтары EUR 426.65 BAQ.kz - Қазақстан жаңалықтары RUB 5.82
استانا:

تاريحي ٴساتتىڭ كۋاگەرى بولعانىمدى ماقتان ەتەمىن – ٴجانادىلوۆ

كوكشەتاۋ، baq.kz ٴتىلشىسى. قازاقستاندى تاۋەلسىز مەملەكەت دەپ جاريالاۋ، ەلىمىزدىڭ نەگىزگى اتا زاڭى كونستيتۋسياسىن قابىلداۋ، تۇڭعىش پرەزيدەنت سايلاۋى سياقتى تاريحي تۇستىڭ بەل ورتاسىندا بولعان تۇلعالاردىڭ ٴبىرى – بولات ٴجانادىلوۆ.

كوكشە وڭىرىندە ۇزاق جىلدار دەنساۋلىق ساقتاۋ سالاسىندا ابىرويلى ەڭبەك ەتىپ، ەلىمىزدىڭ مەديسينا سالاسىن نىعايتۋعا ەلەۋلى ۇلەس قوسقان بولات ٴجانادىلوۆ تاۋەلسىز ەلىمىزدىڭ دامۋ جولىندا نەبىر قيىندىقتاردى كوزبەن كورگەن، يگىلىكتى ىستەردىڭ باسى-قاسىندا جۇرگەن ساتتەرىن استە ۇمىتپايدى.

«اعا بۋىن – بىزدەر قوعام دامۋىنىڭ سوڭعى جيىرما بەس جىلىندا ٴۇش ۇيىقتاساق تۇسىمىزگە ەنبەيتىندەي بىرنەشە عالامات وزگەرىستەرگە ٴتۇسۋىنىڭ كۋاسى بولدىق. ٴبارى كۇنى كەشەگىدەي ەسىمدە. 1991 جىلى ەلىمىز ٴوزىنىڭ تۇڭعىش پرەزيدەنتىن تاڭدادى. 98،7 پايىز داۋىسپەن نۇرسۇلتان ٴابىش ۇلى نازاربايەۆ مەملەكەت باسشىسى بولىپ سايلاندى. جالپى، حح عاسىردىڭ سوڭعى ايلارى اقمولالىقتار، سونىڭ ىشىندە كوكشەتاۋلىقتار ٴۇشىن اسا ٴبىر قۋانىشتى ٴسات بولدى دەسەك ارتىق ايتقاندىق بولماس. كوكشەتاۋ وبلىسى تاراتىلىپ، پەتروپاۆلعا قاراپ قالعان قاپالى كەزدە 1999 جىلعى 9 ساۋىردە كوكشەتاۋعا پرەزيدەنت تاپسىرماسىمەن سول كەزدەگى پرەمەر-مينيستر نۇرلان بالعىمبايەۆ كەلىپ، ەلباسى جارلىعىمەن كوكشەتاۋ قالاسىنىڭ اقمولا وبلىسىنىڭ ورتالىعى بولىپ جاريالانعان قۋانىشتى حاباردى جەتكىزدى. ارادا بەس اي وتكەن سوڭ، قاراشانىڭ 5 جۇلدىزىندا ەلباسى نۇرسۇلتان نازاربايەۆ كوكشەتاۋ قالاسىنا اتباسىن تىرەدى. كيەلى ارقا توسكەيىندە، قازاق مەملەكەتتىگىمىزدىڭ نەگىزىن قالاعان كەمەڭگەر قولباسشى، ديپلومانت ابىلاي حان ەسكەرتكىشىنىڭ اشىلۋ سالتاناتىنا قاتىستى»، – دەپ ەسكە الادى بولات سۇلەيمەن ۇلى.

1990 جىلى بولات ٴجانادىلوۆ قازاق كەڭەستىك رەسپۋبليكاسىنىڭ ون ەكىنشى شاقىرىلعان جوعارعى كەڭەسىنىڭ دەپۋتاتى بولىپ سايلانعان تۇس جەر شارىنىڭ التىدان ٴبىر بولىگىن الىپ جاتقان كەڭەستەر وداعىنىڭ تۋىنىڭ جىعىلا باستاعان شاعى بولاتىن. بولات سۇلەيمەن ۇلى سول ٴبىر قىلعا بايلانعان تاعدىرى بار مەملەكەتتىڭ بۇگىنى مەن بولاشاعىن بولجاعانداردىڭ، باتىل قادام جاساعانداردىڭ، تاريحي شەشىم العانداردىڭ قاتارىندا بولدى.

«تۇڭعىش پرەزيدەنت سايلاۋىندا ەلباسىنىڭ سەنىمدى وكىلى بولۋ ۇلكەن جاۋاپكەرشىلىكتى جۇكتەدى. ٴارى بۇل ەلىمىز تاۋەلسىزدىگىن ەندى عانا الىپ، اياققا تۇرىپ كەلە جاتقان كەزەڭى بولاتىن. ەلدىڭ تۇرالاپ تۇرعان تۇسىندا مەملەكەت باسشىسىنا سەنىم ارتۋعا شاقىرۋ، حالىقتى سابىرلىلىققا، توزىمدىلىككە ۇندەۋ قاجەت بولدى. ەلباسىنىڭ پرەزيدەنت سايلاۋىندا جيىرما ٴۇش سەنىمدى وكىلىنىڭ ٴبىرى بولدىم. وسى ٴبىر تاريحي ٴساتتىڭ كۋاگەرى بولعانىمدى ماقتان ەتەمىن. ەلباسىمەن 1990-1994 جىلدارى ون ەكىنشى شاقىرىلعان قازاق كسر-ى جوعارعى كەڭەسىنىڭ دەپۋتاتى بولىپ جۇرگەنىمدە العاش رەت جۇزدەسكەن ەدىم. سول ۋاقىتتا ول قازاقستان كوممۋنيستىك پارتياسى ورتالىق كوميتەتىنىڭ ٴبىرىنشى حاتشىسى بولاتىن. كەيىن كەڭەس ۇكىمەتى ىدىرادى. ەلىمىز ەگەمەندىك الىپ، نۇرسۇلتان نازاربايەۆ مەملەكەت باسشىسى بولىپ سايلاندى. ٴار ىسىنە تياناقتى، اسىرەسە، بەرگەن ۋادەسىنىڭ ٴىزىن سۋىتپاي، بىردەن ىسكە كىرىسەتىن ادەتى سۇيسىندىرەتىن»، – دەيدى ول.

كەيىن ەلىمىز ٴۇشىن سىندارلى ۋاقىت بولسا دا، 1995 جىلى كوكشەتاۋداعى وبلىستىق اۋرۋحانا قابىرعاسىندا دياگنوستيكالىق ورتالىق اشىلىپ، ونىڭ تۇساۋكەسەرىنە مەملەكەت باسشىسى نۇرسۇلتان نازاربايەۆ قاتىسقان بولاتىن.

«سوندا ەلباسى اۋرۋحانا ۇجىمىمەن كەزدەسىپ، «حالىقتىڭ دەنساۋلىعى – مەملەكەت بايلىعى» دەگەن ۇشقىر ويىن ايتتى. بۇل بىزگە، دارىگەرلەر الدىندا ۇلكەن جاۋاپكەرشىلىك تۇرعانىن اڭعارتتى. ونىڭ ەلىمىزدىڭ شىعار بەلەسىنىڭ الدا ەكەنىن ايتقان ٴسوزى دە جۇرەكتە سەنىم ۇيالاتقان ەدى. مىنە، ۋاقىت وتە كەلە مۇنىڭ ٴدۇدامال ٴسوز ەمەستىگىنە كوزىمىزدى جەتكىزىپ وتىرمىز. ەلباسى ٴاردايىم ٴار ٴوڭىردىڭ حال-جايىن سۇراستىرىپ، تۇرعىنداردى تولعاندىرعان ماسەلەلەر جايلى اڭگىمە قوزعايتىن. سوندا ىلعي: «مەن سەندەردى وڭىرگە بارعان ساتتە تاۋىپ الامىن!» دەپ ايتىپ وتىرۋشى ەدى. شىنىمەن دە، 1999 جىلى ەلباسى ابىلاي حان ەسكەرتكىشىن اشىپ بەردى. سول ساپارىندا مەنى ىزدەستىرىپ، شاقىرتىپ الدى. بۇل ونىڭ جاقسى ەستە ساقتاۋ قابىلەتى، سونداي-اق ٴوز سوزىنە بەكەم ادام ەكەنىن اڭعارتادى»، – دەيدى ب.سۇلەيمەن ۇلى.

ب.ٴجانادىلوۆ ەلباسىنىڭ بويىنا ٴتان پاراساتتىلىق، اسقان بىلىمدىلىك، جادىنىڭ مىقتىلىعىنا ٴتانتى بولعانىن جانە ەلىمىزدىڭ گۇلدەنۋى ٴۇشىن ٴار جاستىڭ ەڭبەك ەتۋى قاجەت ەكەندىگىن ەسكە سالدى.

«مەملەكەت باسشىسى ن.نازاربايەۆپەن 2007 جىلى "نۇر وتان" پارتياسى وبلىستىق فيليالى عيماراتىنىڭ اشىلۋىندا جۇزدەسكەندە پرەزيدەنت ن.نازاربايەۆ پارتيانىڭ ماقساتى مەن قوعامداعى ٴرولىن جان-جاقتى سارالاپ، جاستاردىڭ ەلىمىزدىڭ جارقىن بولاشاعى ەكەنىن جانە ولاردى ەڭبەككە باۋلىپ، قيىندىقتان قاشپاۋعا ۇيرەتۋىمىز قاجەتتىگىن ايتقان-دى. ەلىمىز ۋاقىت وتكەن سايىن نىعايا تۇسۋدە. ال مۇنىڭ ٴبارى ەلباسىنىڭ كەمەڭگەر ساياساتىنىڭ ارقاسىندا جۇزەگە اسىپ وتىر. سوڭعى 2012 جىلى كورگەن ساتىمدە پرەزيدەنت «ابىلاي حاننىڭ ارمانىن ورىندادىم. قالا سالدىم. حالىق بەيبىت ٴومىر ٴسۇرىپ جاتىر»، دەپ ايتقان بولاتىن. بۇل ٴسوزدىڭ استارىندا قۋانىش، پاراساتتىلىق سەزىلەدى. ٴار كەزدەسۋ كەزىندە ەلباسىنىڭ كىشىپەيىل، ادامگەرشىلىك جانە ىزگىلىك قاسيەتىنە كۋا بولدىم. ول ٴوزىن ساردار ساياساتشى، تاباندى كوشباسشى، تۇعىرلى تۇلعا ەكەنىن الەمدىك دەڭگەيدە دالەلدەپ كەلەدى»، – دەيدى ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي