BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پرەزيدەنت كۇنىن اتاپ وتەتىن ەلدەردى بىلەسىز بە؟

پرەزيدەنت كۇنىن اتاپ وتەتىن ٴبىرىنشى ەل ٴبىز ەمەس. الەمنىڭ بىرنەشە ەلىندە بۇرىنعى جانە قازىرگى مەملەكەت باسشىلارىنىڭ قۇرمەتىنە وراي تويلاناتىن ۇلتتىق مەيرامدار بار. ٴبىرى بۇل كۇنى ٴبىرىڭعاي سارعىلت ٴتۇستى كيىم كيسە، ەندى ٴبىرى ەل باسشىلارىنىڭ پورترەتىن ٴىلىپ، حالىقتىق سەرۋەنگە شىعادى. baq.kz ٴتىلشىسى الەمنىڭ قاي ەلىندە مۇنداي مەرەكە بارىن جانە قالاي تويلاناتىنىن انىقتادى.

قازاقستان

1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى. بۇل مەيرام 2011 جىلى مەملەكەت باسشىسى نۇرسۇلتان نازاربايەۆتىڭ قۇرمەتىنە بەلگىلەندى. قازاقستاننىڭ تۇڭعىش پرەزيدەنتى 1991 جىلدىڭ 10 جەلتوقسانىندا سايلاندى. قر كونستيتۋسياسىندا «ٴبىر ادام قاتارىنان ەكى رەتتەن ارتىق رەسپۋبليكا پرەزيدەنتى بولىپ سايلانا ايلمايدى» دەگەن تارماق بار. دەگەنمەن 2007 جىلى پارلامەنت «بۇل شەكتەۋ قازاقستان رەسپۋبليكاسىنىڭ تۇڭعىش پرەزيدەنتىنە قولدانىلمايدى» دەپ وزگەرتۋ ەنگىزدى. قازاقستاندىقتار 2012 جىلى العاش رەت پرەزيدەنت كۇنىن تويلادى.

اقش

امەريكالىقتار اقپاننىڭ ٴۇشىنشى دۇيسەنبىسىندە دەمالادى. بۇل كۇنى 1885 جىلى تۇڭعىش پرەزيدەنت دجوردج ۆاشينگتوننىڭ قۇرمەتىنە بەلگىلەنگەن پرەزيدەنت كۇنىن اتاپ وتەدى. 1782 جىلى العاش رەت ۆيرگينيا شتاتىندا جۇرتشىلىق ۆاشينگتوننىڭ تۋعان كۇنىن اتاپ وتكەن. ولار بۇل كۇنى بالل، پاراد، تۇسكى قوناق اسىن ۇيىمداستىرعان. بىرنەشە شتاتتا بۇل ٴداستۇر جالعاسىن تاۋىپ، 1855 جىلى جالپى ۇلتتىق مەيرام دەپ جاريالاندى.

دجوردج ۆاشينگتون 1732 جىلى 22 اقپاندا دۇنيەگە كەلگەن. 70-جىلداردىڭ باسىنا دەيىن مەيرام وسى كۇنى عانا اتالىپ ٴوتتى. الايدا پرەزيدەنت نيكسون اقپاننىڭ ٴۇشىنشى دۇيسەنبىسىنە اۋىستىرىپ، پرەزيدەنت كۇنىن تەك ۆاشينگتوننىڭ عانا ەمەس، اقش-تىڭ 16-پرەزيدەنتى اۆراام لينكولننىڭ دە قۇرمەتىنە اتاپ ٴوتۋدى ۇسىندى.

بۇل كۇنى ۆاشينگتون مۋزەي-ۇيىندە كوستيۋمدى قويىلىمدار بولادى. سونىمەن بىرگە قوناقتارعا «قۇرۋشى اكە» دەپ اتالاتىن بال جانە ماي قوسىلعان جۇگەرى تابا نانى ۇسىنىلادى.

ۇلىبريتانيا

ۇلىبريتانيا 8 ماۋسىمدا پاتشايىمنىڭ تۋعان كۇنىن تويلايدى. بريتان مونارحى ٴىى ەليزاۆەتا ساۋىردە دۇنيەگە كەلگەن. الايدا vii ەدۋارد بەكىتكەن ٴداستۇر بويىنشا بىرىككەن كورولدىگى بۇل كۇندى ماۋسىمنىڭ ەكىنشى سەنبىسىندە اتاپ وتەدى. پاتشانىڭ پىكىرىنشە بۇل كۇنى اۋا رايى مەرەكەنى بۇزا المايدى.

ٴىى ەليزاۆەتا – اۆستراليا، كانادا، جاڭا زەلانديا، سولومون ارالدارى، يامايكا سەكىلدى 15 مەملەكەتتىڭ پاتشايىمى. الايدا ول ەلدەردىڭ وزدەرىنىڭ «پاتشايىم كۇنى» بار.

مىسالى، 24 مامىردا كانادالىقتار ۆيكتوريا پاتشايىمنىڭ تۋعان كۇنىن اتاپ وتەدى. اۆستراليادا شاڭعى ماۋسىمى باستالاتىن كەزدە ماۋسىمنىڭ ەكىنشى دۇيسەنبىسىندە تويلايدى. جاڭا زەلانديادا پاتشايىم كۇنىن تاۋ شاڭعىسى ماۋسىمى باستالاتىن ۋاقىتتا، ياعني ماۋسىمنىڭ ٴبىرى​​​نشى دۇيسەنبىسىندە اتاپ وتەدى.

يسلانديا

پرەزيدەنت كۇنى بۇل ەلدە 14 مامىردا دۇنيەگە كەلگەن يسلانديانىڭ بەسىنشى پرەزيدەنتى ولاۆۋر راگنار گريمسسوننىڭ قۇرمەتىنە بەكىتىلگەن. 1966 جىلى بيلىككە كەلگەن گريمسسون 2016 جىلدىڭ ٴبىرىنشى تامىزىندا ورنىن گۆيۋدني يوۋحاننەسسونگە بوساتتى. يسلانديادا پرەزيدەنتتىڭ تۋعان كۇنى مەملەكەتتىك مەرەكە. بۇل كۇنى يسلانديادا مەملەكەتتىك تۋ كوتەرىلىپ، ٴارتۇرلى كوڭىل كوتەرۋ شارالارى مەن حالىقتىق شەرۋ ۇيىمداستىرىلادى.

نيدەرلاند كورولدىگى

نيدەرلاند – كورول (پاتشايىم) باسقاراتىن كونستيتۋسيالىق مونارحيا. ۇلتتىق مەيرام پاتشا كۇنى ۆيللەم الەكساندردىڭ تۋعان كۇنى 27 ساۋىردە اتالىپ وتەدى. وسىعان دەيىن 31 تامىز بەن 30 ساۋىردە تويلانىپ كەلگەن. بۇل كۇنى سونىمەن بىرگە ۇلتىق بىرلىك كۇنى اتالىپ وتەدى. وسى كۇنى گوللاندتىقتار وران اۋلەتىنەن كەلە جاتقان سارعىلت ٴتۇستى كيىم كيەدى. قالالاردا روكتان رەيۆكە دەيىن ٴارتۇرلى جانردا مۋزىكالىق كونسەرتتەر وتەدى. بارلىق جەردەن كوشە مۋزىكانتتارىن كەزدەستىرۋگە بولادى. گااگا سەكىلدى قالالاردا ٴتۇن اۋعان شاقتا koningsnacht دەپ اتالاتىن پاتشايىم ٴتۇنى تويلانادى. كوشەلەردى سارعىلت ٴتۇستى لەنتا، گيرلياندا، شارمەن بەزەندىرىپ، قازىرگى مونارحتىڭ پورترەتى مەن ۇلتتىق تۋىن ىلەدى. بۇل كۇنى ەلدەگى دۇكەندەرگە تاۋارلارىن ققس-سىز (قوسىلعان قۇن سالىعى) ساتۋعا رۇقسات بەرىلەدى جانە بۇل مەرەكەدە كەز كەلگەن ادام كوشەگە شىعىپ ٴوز تاۋارىن ەركىن ساتا الادى. بارلىعى جىلدىڭ «سارعىلت» مەيرامىن شات-شادىمان اتاپ وتەدى.

مەرەكە تاريحى 1885 جىلدان باستالادى. ەڭ ٴبىرىنشى ليبەرالدى پارتيا حالىقتار بىرلىگى كۇنىن بەلگىلەۋدى دۇرىس دەپ تابادى. 31 تامىزدا ۆيلگەلمينا حانشايىمنىڭ تۋعان كۇنىنە وراي حانشايىم كۇنى تويلانعان. حانشايىم پاتشايىمعا اينالعان كەزدە مەيرام اتاۋى پاتشايىم كۇنى دەپ وزگەرتىلدى.

1948 جىلى تاققا يۋليانا پاتشايىم كەلگەن سوڭ مەيرام 30 ساۋىرگە اۋىستىرىلدى. بۇل كۇن يۋليانانىڭ تۋعان كۇنى ەدى. پاتشايىمنىڭ قىزى بەاتريكس اناسىنىڭ ورنىنا وتىرعان سوڭ بۇل مەيرامدى ٴوزىنىڭ تۋعان كۇنىنە اۋىستىرماعاندى ٴجون كوردى. اناسىن ەسكە الۋ ٴۇشىن 30 ٴساۋىردى مەرەكە كۇنى دەپ قالدىردى، ٴارى ٴوزى تۋعان كۇن 30 قاڭتار مەيرامدى تويلاۋ ٴۇشىن قولايسىز ەدى. 2013 جىلى بەاتريكس تاققا ۆيلگەلم-الەكساندردى وتىرعىزدى. كورلدىڭ تۋعان كۇنى 27 ٴساۋىر بولعان سوڭ پاتشايىم كۇنى «كورول كۇنى» دەپ وزگەرتىلدى.

انگولا

انگولا حالقى دا تۇڭعىش پرەزيدەنت كۇنىن تويلايدى. انگولانىڭ تۇڭعىش پرەزيدەنتى اگوشتينيۋ نەتۋدىڭ قۇرمەتىنە وراي باسقاشا اتاۋمەن «ۇلت باتىرلارى كۇنىن» اتاپ وتەدى.

ول 1922 جىلى 17 قىركۇيەكتە پروتەستانتتار شىركەۋى قىزمەتكەرلەرىنىڭ وتباسىندا دۇنيەگە كەلگەن. 1950 جىلدارى نەتۋدىڭ قاتىسۋىمەن پورتۋگاليادان تاۋەلسىزدىگىن الۋ ٴۇشىن كۇرەسكەن انگولانى ازات ەتۋ حالىقتىق قوزعالىسى قۇرىلدى. 1975 جىلى انگولا تاۋەلسىزدىك العان سوڭ نەتۋ ونىڭ العاشقى پرەزيدەنتى اتاندى.

ۇلت باتىرلارى كۇنى نەتۋدىڭ قۇرمەتىنە عانا اتالىپ وتپەيدى. 20 جىلعا جۋىق ەل تاۋەلسىزدىگى جولىندا كۇرەسكەن انگولانى ازات ەتۋ حالىقتىق قوزعالىسىنىڭ بارلىق مۇشەلەرىنىڭ جانە 1975-2002 جىلدار ارالىعىنداعى ازاماتتىق سوعىسقا قاتىسۋشىلاردىڭ قۇرمەتىنە تويلانادى. مەرەكە كۇنى ۇلت باتىرلارىنىڭ سىڭىرگەن ەڭبەگى ايتىلىپ، حالىق قوشەمەت بىلدىرەدى. ەلدە سپورتتىق شارالار مەن ەسكە الۋ شارالارى وتەدى.

مارشالل ارالدارى

بۇل ەلدىڭ مەملەكەتتىك مەيرامدارىنا پرەزيدەنت كۇنى دە كىرەدى. 17 قاراشادا حالىق تۇڭعىش پرەزيدەنتتەرى اماتا كابۋانىڭ تۋعان كۇنىن اتاپ وتەدى. مارشالل حالقى ەل تاۋەلسىزدىگى جولىندا ٴبىرقاتار كەلىسسوزدەر جۇرگىزىپ، تاۋەلسىزدىكتىڭ نەگىزىن قالاعان كابۋانى ەرەكشە قۇرمەتتەيدى.

ول 1979 جىلى مارشالل ارالدارىنىڭ پرەزيدەنتى بولىپ سايلاندى. 1996 جىلعا دەيىن اقتىق دەمى قالعانشا بەس پرەزيدەنتتىك مەرزىمدە مەملەكەت باسشىسى قىزمەتىن اتقاردى.

اماتا كابۋا ەلدىڭ تۇڭعىش پرەزيدەنتى عانا ەمەس، «مارشالل ارالدارى ماڭگىلىك» اتتى ۇلتتىق ٴانۇراننىڭ ٴانى مەن ٴسوزىن جازعان.

بوتسۆانا

وڭتۇستىك افريكاداعى ەڭ دامىعان ەلدەردىڭ ٴبىرى. مەرەكە ەكى كۇنگە سوزىلادى. تۇڭعىش پرەزيدەنت سەرەتسە كحاما قۇرمەتىنە پرەزيدەنت كۇنىن شىلدەنىڭ ٴۇشىنشى دۇيسەنبىسىندە اتاپ وتەدى. ول ٴومىرىنىڭ سوڭىنا دەيىن ەلدى 14 جىل باسقارعان (1966 جىلدان 1980 جىلعا دەيىن). جەمقورلىقپەن ايانباي كۇرەستى، سالىقتىڭ ەڭ تومەنگى دەڭگەيىن ۇستاپ تۇردى جانە تۇراقتى دەموكراتيالىق رەجيمدى قۇردى.

ۇلىبريتانيادان تاۋەلسىزدىگىن العان كەزدە بوتسۆان الەمدەگى ەڭ كەدەي ەلدىڭ ٴبىرى ەدى. 1966 جىلى ەل ەگەمەندىگىن الدى. كەلەسى 35 جىلدا ەلدىڭ ٴجىو قارقىندى تۇردە ٴوسىپ، ەكونوميكاسى جىلدام وسكەن ەلدەردىڭ ىشىندە ەكىنشى ورىن الدى.

تاجىكستان

1994 جىلى 6 قاراشادا ەموموالي راحمون تاجىكستان رەسپۋبليكاسىنىڭ پرەزيدەنتى بولىپ سايلاندى. 2016 جىلى 15 ساۋىردە تاجىكستان پارلامەنتىنىڭ تومەنگى پالاتاسى 16 قاراشانى پرەزيدەنت كۇنى دەپ بەكىتتى. پارلامەنت بۇل شەشىمدى جەكە تۇلعانى دارىپتەۋ ەمەس، قوسىمشا شىعىندى قاجەت ەتپەيتىن مەيرام ەكەنىن ايتقان بولاتىن.

16 قاراشادا ەمومالي ٴراحموناليدىڭ قايراتكەرلىگىن دارىپتەيتىن كىتاپحانا، كورمە زالدارى مەن ٴبىلىم بەرۋ مەكەمەلەرىندە تاقىرىپتىق شارالار وتەدى. تاجىكستان كوشەلەرى مەن الاڭدارى «ٴبىزدىڭ پرەزيدەنت – ٴبىزدىڭ ليدەر» دەگەن جازۋى بار ەمومالي راحموننىڭ ۇلكەن پورترەتتەرىمەن بەزەندىرىلەدى.

تايلاند

جىل سايىن 23 قازاندا تايلاند حالقى v راما كورولىن ەسكە الۋ كۇنى جالپىحالىقتىق مەرەكەسىن اتاپ وتەدى. 1868 جىلى 16 جاسىندا v راما تاققا وتىردى. 42 جىلدىق بيلىگى كەزىندە تايلاندتا بىرنەشە رەفورما جۇزەگە استى. كورول باتىستىڭ باسقارۋ جۇيەسىن زەرتتەپ، ۇلىبريتانيا، فرانسيا، امەريكا جانە رەسەي سەكىلدى دەرجاۆالارمەن دوستىق بايلانىس ورناتتى. كورول بالالارىن سول ەلدەرگە وقۋعا جىبەرىپ وتىردى.

v راما قۇلدىقتان باس تارتۋ، تەمىرجول سالۋ ارقىلى بايلانىستى شەشۋ، پوشتا مەن تەلەگراف قۇرۋ، سونداي-اق 1892 جىلى مينيسترلىك جۇيەسىن قۇرۋ سەكىلدى تاي حالقىنىڭ جاعدايىن وزگەرتۋ جولىندا ماسەلەلەر كوتەردى. ٴبىلىم بەرۋ مەن دەنساۋلىق ساقتاۋ سالاسىندا قوعامدىق ينستيتۋتتار اشقانىن دا ايتا كەتەيىك. 1910 جىلى 23 قازاندا كورول قايتىس بولىپ، تاي حالقى اۋىر قازاعا ۇشىرادى. كورول پورترەتىن ٴار مەكەمەدەن نەمەسە جەكە فيرمالاردان كورۋگە بولادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي