BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پاۆلودارلىقتار جەلتوقسانشىلاردى ەسكە الدى

فوتو: pavlodarnews.kz

استانا، baq.kz. پاۆلودارلىقتار ساياسي قۋعىن-سۇرگىن قۇرباندارى مونۋمەنتىنە بارىپ «جەلتوقسان كوتەرىلىسىندە» جانىن قيعان بوزداقتاردى ەسكە الدى. بۇل تۋرالى pavlodarnews.kz سايتى حابارلايدى.

شارانى ۇيىمداستىرۋشىلاردىڭ ٴبىرى، اقىن، قازاقستان جازۋشىلار وداعى پاۆلودار وبلىستىق فيليالىنىڭ ٴتوراعاسى، «الاش» سىيلىعىنىڭ يەگەرى، قوعام قايراتكەرى ارمان قاني جەلتوقسانشىلاردى ەسكە الۋشىلاردىڭ سانى جىل سايىن ارتىپ كەلە جاتقانىن اتاپ ٴوتتى.

«بۇگىنگى شاراعا جەلتوقسانشىلار، قوعام بەلسەندىلەرى، شىعارماشىلىق ادامدارى جينالىپ، جەلتوقسانشىلاردى، وزگە دە تاۋەلسىزدىك جولىندا قۇربان بولعان قاھارمانداردى ەسكە الىپ جاتىر. وعان قوسا، بالالار، جاستار دا قاتىسۋدا. الداعى ۋاقىتتا ۇرپاق ساباقتاستىعى بولا بەرەدى دەپ ويلايمىز. بۇنى قوعام بەلسەندىلەرى وزدەرى ۇيىمداستىرىپ وتىر. 30-دان استام ادام كەلىپ، ٴوز ويلارىن، پىكىرلەرىن ٴبىلىدىردى. ونىڭ ىشىندە سول وقيعاعا قاتىسقان، ۇيىمداستىرۋشىلاردىڭ ٴبىرى رەتىندە باس بوستاندىعىنان ايىرىلعان قۇرمانعازى ايتمىرزايەۆ الماتىدان ارنايى كەلىپ وتىر. 2012 جىلى ون ٴتورت-اق ادام جينالعانبىز. جىل سايىن 16 جەلتوقسان كۇنى جينالۋدى داستۇرگە اينالدىرعانبىز. الايدا، 16 جەلتوقسان – «تاۋەلسىزدىك كۇنى» مەرەكەسى بولعاندىقتان، ول كۇندى قارالى جيىننان باستاعان دۇرىس ەمەس دەپ شەشتىك. ەلباسىمىزدىڭ جارلىعىمەن 17 جەلتوقسان – «دەموكتراتيالىق جاڭارۋ كۇنى» دەپ بەكتىلىگەن. ەندى جىل سايىن 17 جەلتوقساندا جينالىپ، بوزداقتارىمىزدى ەسكە الىپ وتىرامىز»، - دەيدى ارمان قاني.

جيىنعا قاتىسۋشىلار ەلىمىزدىڭ ەگەمەندىگى جولىندا قازا تاپقان قاھارماندار مەن جەلتوقسانشى بوزداقتاردى ەسكە الىپ، ٴوز ويلارىمەن ٴبولىستى. سونداي-اق ەرلىكتەرىنە تاعزىم ەتىپ گۇل شوقتارىن قويدى. جەلتوقسان كوتەرىلىسىنە قاتسىسۋشى، فيلولوگيا عىلىمدارىنىڭ كانديداتى، س.تورايعىروۆ اتىنداعى پمۋ قازاق ٴتىلى كافەدراسىنىڭ مەڭگەرۋشىسى ايمان زەينۋلينا دا ٴوز پىكىرىن ورتاعا سالدى.

«جىل سايىن ەسكە الۋشىلاردىڭ سانى ارتىپ، ادامداردىڭ سانالى تۇردە كەلىپ جاتقانىنا قاراپ قۋانامىز. ۇلكەندەر ۇلگى كورسەتىپ جاتقاننان كەيىن ۇرپاق ساباقتاستىعى بولاتىنى انىق. قازاق ەلىنىڭ تاۋەلسىزدىگى ٴۇشىن قاندارىن توگىپ، انا دۇنيەگە ٴوتىپ كەتكەن جەلتوقسانشىلاردىڭ جاندارى ٴجانناتتا بولسىن! ولار ٴبىز ٴۇشىن ۇلكەن ەرلىك جاسادى. ەندى ٴبىزدىڭ مىندەت ەلىمىزدىڭ تاۋەلسىزدىگى نىعايۋىنا جۇمىس جاساۋ. ول ٴۇشىن ٴتىلىمىز، ٴدىنىمىز بەرىك بولسىن. جەلتوقسانشىلاردىڭ ەرلىگى بۇقارالىق اقپارات قۇرالدارىندا جاريالانىپ، انگە قوسىلىپ، اقىنداردىڭ ولەڭدەرىنە ارقاۋ بولىپ جاتىر. سوندىقتان زامانىمىز تۇزەلدى-اۋ دەپ ويلايمىن. جەلتوقساننىڭ ٴالى دە اشىلماعان اقيقاتى ۋاقىت وتە اشىلاتىنىنا كامىل سەنەمىن. ەلىمىزدە بۇنداي قايعى ەندى بولماسىن. ازاتتىعىمىز ماڭگى بولسىن!»، - دەيدى ايمان زەينۋلينا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي