BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا «كوشپەندىلەر قالاسى» بوي كوتەردى

فوتو: Абзал Қалиев

قالا كۇنىنە وراي «حان شاتىر» سوسو ماڭىندا «كوشپەندىلەر قالاسى» تاريحي ەتنوگرافيالىق، مادەني، ويىن-ساۋىق كەشەنى بوي كوتەردى. ول 6 شىلدەدەن باستاپ 10 قىركۇيەككە دەيىن جۇمىس ىستەيدى، دەپ حابارلايدى baq.kz ٴتىلشىسى.

«حان شاتىر» ماڭىنان بوي كوتەرگەن ەتنومادەني كەشەندە جۇمىس ىستەيتىن زارينا سۇلەيمەنوۆا وسىندا كەلگەن ازاماتتار قازاقتىڭ سالت-داستۇرىمەن تانىسا الاتىنىن اتاپ ٴوتتى.

«قالا ورتا عاسىرلارداعى شاھارلاردىڭ ۇلگىسىندە جاسالعان. مۇندا كوپتەگەن دەكوراسيا قويىلعان. ناقتىراق ايتسام، وندا حاننىڭ ورداسى مەن تاعى، ساۋكەلە پىشىنىندە جاسالعان عيمارات، مەيرامحانا بار. قازاقتىڭ ۇلتتىق اسحاناسىمەن تانىسا الاسىزدار. سونداي-اق، مۇندا شەبەرلەردىڭ جارمەڭكەسى ٴوتىپ جاتىر. كەلگەن قوناقتار ٴۇشىن قازاقتىڭ تەرەڭ تاريحىنان سىر شەرتەتىن بەرەل قورعانىنان تابىلعان ات ابزەلدەرى قويىلعان. بۇل زاتتاردىڭ كەزىندە ساقتارعا تيەسىلى بولعانى بەلگىلى. ەتنوقالاشىعىمىز 6-شى شىلدەدەن 10-شى قىركۇيەككە دەيىن جۇمىس ىستەيدى»، - دەدى ول.

سونىمەن قاتار قىزمەتكەر «كوشپەندىلەر قالاسىنا» كەلگەن شەتەلدىك قوناقتارعا قيىندىق بولمايتىنىن ايتتى.

«مۇندا ەكى گيد جۇمىس ىستەيدى. ٴبىز قازاق، ورىس، اعىلشىن تىلدەرىندە سويلەيمىز»، - دەدى زارينا سۇلەيمەنوۆا.

سونىمەن قاتار ەتنومادەني كەشەنگە كەلگەن قوناقتاردىڭ ۇلتتىق ناقىشتا جاسالعان اشەكەيلەر مەن بۇيىمداردى ساتىپ الۋعا مۇمكىندىگى بار.

«ٴبىز مۇندا قىزدارعا ارنالعان ۇلتتىق ناقىشتاعى اشەكەي بۇيىمدارىمىزدى الىپ كەلدىك. بىلەزىك، سىرعا، القامەن قوسقاندا اشەكەيدىڭ باعاسى 20 مىڭ تەڭگە بولادى. وعان 12 ميكرون كۇمىس جالاتىلىپ، تابيعي تاستارمەن بەزەندىرىلگەن. ال بىلەزىكتەردىڭ باعاسى 16 مىڭ تەڭگەدەن جوعارى. ٴتىپتى 30 مىڭعا دەيىن بارادى»، - دەدى ساتۋشى جازىلگۇل بەكداۋلەتقىزى.

ال «مۇگەدەكتەر قوعامىنىڭ» مۇشەسى قاديشا قىرعىزبايقىزى وسىنداي جارمەڭكەگە مۇمكىندىگى شەكتەۋلى جانداردىڭ قاتىسۋى وتە ورىندى دەگەن پىكىردە. ونىڭ ايتۋىنشا، تاعدىردىڭ قيىندىعىن كورىپ جۇرگەن جاندار كورمەگە قولدان جاسالعان ساپالى زاتتارىن الىپ كەلگەن.

«جارمەڭكەگە قولدان تىگىلگەن كويلەكتەرىمىزدى، اشەكەيلەرىمىزدى الىپ كەلدىك. قىسقا جەڭدى كويلەكتەر 15 مىڭنان، ال ۇزىندارى 25 مىڭ تەڭگەدەن. «ەكسپو-2017» لوگوتيپىمەن قولدان جاسالعان ٴامياندار 700-1200 تەڭگە ارالىعىندا. ال جىگىتتەرگە ارنالعان تاقيا 2 مىڭ تەڭگە، ال قىزداردىكى 3 مىڭ تەڭگە»، - دەدى ول.

«كوشپەندىلەر قالاسىن» تاماشالاۋعا ەلىمىزدىڭ تۇكپىر-تۇكپىرىنەن دە ازاماتتار كەلگەن ەكەن. سونىڭ ٴبىرى – وتارباي شەن ەسىمدى اقساقال.

«مەن جۇبايىممەن بىرگە تالدىقورعانان كەلدىم. ەتنوكەشەنگە ۇلىمدى دا، نەمەلەرىمدى دە الىپ كەلدىم. بارلىعى ۇناپ جاتىر»، - دەدى ول.

اسىلاي باقىتجانقىزى ەسىمدى ٴبۇلدىرشىن اناسىمەن بىرگە تاراز قالاسىنان كەلىپتى.

«مەن كونە تاراز شاھارىنان كەلدىم. مۇندا باتىرلاردى، قازاقشا كويلەك كيگەن ٴبيشى قىزداردى كوردىم. اجەلەر مۇندا ٴان ايتتى. كەشە «ەكسپو-2017» كورمەسىنە باردىم. وندا سۋرەت سالدىم. استانا ماعان ۇنادى»، - دەدى ٴبۇلدىرشىن.

سۋرەتتەردى تۇسىرگەن: ابزال قاليەۆ


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي