استانا: 
استانانىڭ 20 جىلدىعىنا ارنالعان ٴىس-شارالار اياسىندا، «kazakh tourism» ۇلتتىق كومپانياسى مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ تاپسىرماسى بويىنشا قازاقستاننىڭ 20 شىڭىنا ەكسپەديسيا ۇيىمداستىردى، دەپ حابارلايدى baq.kz اقپارات اگەنتتىگى.
الپينيستەر باعىندىراتىن (3446م) تۇركىستان وبلىسىنىڭ سايرام-وگەم ۇلتتىق پاركىندە ورنالاسقان سوڭعى 20-شى شىڭ ەلوردانىڭ 20 جىلدىعىنا وراي - «استانانىڭ 20-جىلدىعى» اتاۋىن الدى.
وسى ەكسپەديسيانى ۇيىمداستىرۋ بارىسىندا تۋريستىك، ەكسترەمالدىق سپورت تۇرلەرىن دامىتۋعا، ەكوتۋريزم جانە ترەكينگ باعدارلارىن ۇيىمداستىرۋ ٴۇشىن الەۋەتى جوعارى 3 ٴوڭىر تاڭدالىپ الىندى (الماتى، تۇركىستان، شىعىس قازاقستان وبلىستارى). ەكسپەديسيا اياسىندا وسى باعدارلاردىڭ بارلىعى تىڭعىلىقتى زەرتتەلدى. ول ٴۇشىن كاسىپقوي الپينيستەر شاقىرىلعان بولاتىن. جالپى العاندا شاراعا 100-دەن استام ادام، ونىڭ ىشىندە كاسىبي الپينيستەر جانە تاجىريبەلى ساياحاتشىلار، تانىمال ينتەرنەت - بلوگەرلەر قاتىستى. ەكسپەديسيا ناتيجەسى بويىنشا ولار وسى مارشرۋتتاردا ينفراقۇرىلىمدى دامىتۋ بويىنشا ٴوز ۇسىنىستارىن ازىرلەيدى.
«ەكسپەديسيا قازاقستاننىڭ 5 نەگىزگى تاۋلى ايماقتارىن – ورتالىق تيان-شان، ىلە الاتاۋى، جوڭعار الاتاۋى، التاي مەن وگەم جوتاسىن قامتىدى. ولاردىڭ ناتيجەسى بويىنشا جاڭا تۋريستىك جانە الپينيستىك باعدارلار اشىلادى، ال جيناقتالعان فوتو- جانە ۆيدەوبانك جارنامالاۋعا، جەرگىلىكتى حالىقتى ىشكى تۋرويزم مەن الپينيزمگە شاقىرۋعا قولدانىلاتىن بولادى»، - دەپ اتاپ ٴوتتى «kazakh tourism» ۇك» اق باسقارما ٴتوراعاسى راشيد كۇزەمبايەۆ.
سوڭعى 20-شى شىڭدى باعىندىرۋعا جاپپاي الپينيادانىڭ باستالۋىنا ارنالعان ٴىس-شاراعا قازاقستان رەسپۋبليكاسىنىڭ پارلامەنتىنىڭ ٴماجىلىسى دەپۋتاتتارى پاۆەل كازانسەۆ پەن سەرىك ساپيەۆ، سونداي-اق تۇركىستان وبلىسى اكىمىنىڭ ورىنباسارى ەربول تاسجۇرەكوۆ قاتىستى.
«ٴبىز قازاقستاندى تاۋ دەرجاۆاسىنا قايتا اينالدىرۋ جولىندامىز. بۇل ٴۇشىن تاۋ ٴتۋريزمنىڭ بارلىق تۇرلەرىن دامىتۋعا كەلەتىن ەلىمىزدىڭ شىعىسىنا دا، وڭتۇستىگىندە دە كەرەمەت تاۋلار بار»، - دەپ ايتتى پاۆەل كازانسەۆ.
ٴوز كەزەگىندە، سەرىك ساپيەۆ وتكىزىلىپ جاتقان ەكسپەديسيانىڭ ىشكى ٴتۋريزىمدى دامىتۋعا، جاسوسپىرىمدەردى پاتريوتتىق جانە سپورتتىق تۇرعىدا تاربيەلەۋە ماڭىزىن اتاپ ٴوتتى.
جوبا جەتەكشىسى ارمان حاسەنوۆ، بۇل ەكسپەديسيا قازاقستان ٴۇشىن ماڭىزدى ەكەنىن ايتىپ ٴوتتى. «جوبا تاۋلاردىڭ ارالارىن زەرتتەۋگە، تۋريستىك الەۋەتكە باعا بەرۋ مەن ينفراقۇرىلىمدى جاقسارتۋعا كەڭەس بەرۋ جانە جاڭا قازاقستان تۋريستىك ٴونىمىن قۇرۋعا باعىتتالعان»، - دەدى ارمان حاسەنوۆ.
بۇگىنگى تاڭدا تيان-شان تاۋلارىنىڭ قازاقستان جاعى ايتارلىقتاي تانىمال ەمەس، سوندىقتان وسى شارانىڭ ماقساتى قازاقستاندىقتار مەن دۇنيە جۇزىنە ەلىمىزدە تاۋ ٴتۋريزمىن دامىتۋعا الەۋەتى بار ەكەنىن كورسەتۋ. كەلەشەكتە ەكسپەديسيا بارىسىندا جينالعان ماتەريالدار تۋريستىك باعدارلامالار مەن ٴتيىستى حالىقارالىق گايبۋكتەرگە ەنگىزىلەتىن بولادى.
ەستەرىڭىزگە سالايىق، ەكسپەديسيا تان-شان تاۋلارىنىڭ سولتۇستىگىنەن نۇرسۇلتان شىڭىنان باستالدى. ونىڭ بيىكتىگى - 4330،9 م. ەكسپەديسيا بارىسىندا قامتىلعان تاۋلار 3200 م تومەن ەمەس، ونىڭ ەڭ بيىگى - التاي تاۋلارىندا ورنالاسقان مۇزتاۋ شىڭى - 4506 م. باتىس تيان-شانداعى جاڭا «استانانىڭ 20-جىلدىعا» اتاۋىن الاتىن شىڭ ەكسپەديسيا قامتىعان سوڭعى تاۋ شىڭى بولادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2278 
0
5426
0