BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا قانداي نىساندار سالىنادى

استانا، baq.kz. باس قالانىڭ بولاشاقتا قالاي سالىناتى تۋرالى «استانا باس جوسپارى» عزجي» ٴجشس-نىڭ باس ساۋلەتشىسى ارسەنيي پيروجكوۆ ەلوردا ينفو تىلشىسىنە ايتىپ بەردى.

بۇعان دەيىن استانا اكىمدىگى جالپى اۋدانى 3300 گەكتار بولاتىن قالانىڭ بولاشاقتاعى قۇرىلىسىنىڭ ٴتورت پەرسپەكتيۆتى ايماعىن بەكىتكەن بولاتىن. سونداي-اق قالانىڭ ەسكى بولىگىن رەنوۆاسيالاۋ باعدارلاماسى بەكىتىلدى.

ٴبىرىنشى ايماق – مىڭجىلدىقتار اللەياسى، قۇرىلىس اۋدانى بەيبىتشىلىك جانە كەلىسىم سارايىنان جاڭا «نۇرلى جول» تەمىرجول ۆوكزالىنا دەيىنگى اۋماقتى قامتىدى. قازىرگى كۇنى استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسى ساياباق كەڭىستىگى مەن ورتالىق اللەيانىڭ جوباسىنا كونكۋرس جاريالادى.

«بۇل ٴقازىر ينۆەستورلار جۇمىس ىستەپ جاتقان وتە ۇلكەن اۋدان: ٴارقايسىسى جەكە جوبا جاساپ، ساۋلەتشىلەرمەن جۇمىس ىستەۋدە. بۇل ايماقتا جاپپاي قۇرىلىس جۇرگىزىلىپ، نۇرجول بۋلۆارى سياقتى بولادى. بەس جىلدىڭ ىشىندە ٴبىز كوپتەگەن وزگەرىستەردى كورەتىن بولامىز»، - دەدى باس ساۋلەتشى.

ونىڭ ايتۋىنشا، ينۆەستورلار تۇرعىن ۇيلەر مەن بيزنەس ورتالىقتار سالادى.

ەكىنشى ايماق تۇران داڭعىلىنىڭ بويىنشا «حان شاتىر» وسو-نىڭ ارتىندا «جاعالاۋ» شاعىن اۋدانىنا دەيىن بولادى. بۇل ايماق قابانباي باتىر مەن تۇران داڭعىلدارى اراسىنداعى استانا ارەنا، بارىس ارەنا، الاۋ جانە «سارىارقا» ۆەلوترەگىن قامتيتىن «sport city» اۋدانىمەن قيىلىسادى.

«ٴبىز بۇل اۋداندى «sport city» دەپ اتادىق، سەبەبى بۇل جەردە بىرنەشە سپورت نىساندارى بار. ايتا كەتەيىك، بۇل ايماق بۋلۆارلىق اينالىمعا ٴدوپ كەلەدى، «sport city» بوتانيكالىق باق پەن كىشى تالدىكول كولىنە قاراما قارسى ورنالاسقان»، - دەدى ول.

تالدىكول جانە كىشى تالدىكول كولدەرىنىڭ اۋماعى الداعى ۋاقىتتا اباتتاندىرىلادى، بۇل اۋداننىڭ تۇرعىندارى جاعالاۋدا سەرۋەندەپ، ساياباق پەن گۇلزاردا دەمالۋ مۇمكىندىگىنە يە بولادى. ٴقازىر ول جەرلەردە ساياجاي تەلىمدەرى ورنالاسقان. ولاردىڭ ورنىنا تومەن قاباتتى جايلى ورتانى قالىپتاستىرۋ كوزدەلگەن. ٴبىرىنشى قاباتتارىندا قىزمەت كورسەتۋ ورىندارى، ال جوعارى قاباتتارىندا تەاتر، گالەرەيا مەن مەيمانحانالار بولادى.

«ٴبىز مايبالىق كولىنە اپاراتىن جول سالىپ، اۋماعىن بوتانيكالىق باقتىڭ اۋماعىمەن بايلانىستىرىپ، بولاشاقتا بارلىق نىساندى سونىڭ بويىندا سالۋ قاجەت دەپ ويلادىق. بۇگىنگى كۇنى اۋماقتىڭ بارلىق جەرىنە سپورت نىساندارى سالىنعان، تۇرعىن ٴۇي الاپتارى جوق. سول سەبەپتى ادامدار ۇنەمى جۇرمەيتىن جەر جاعىمسىز، قاراپايىم تىلمەن ايتقاندا كريمينالدىق سيپاتقا يە بولادى. سول سەبەپتى ونىڭ اۋماعىن ادامدارعا تولتىرىپ، تۇرعىن اۋدانعا اينالدىرۋدى قالايمىز. بۇعان قوسا، ٴبىز ٴبىرىنشى رەت بۇل اۋداننىڭ ۇيلەرىنىڭ قاسبەتتەرىنە قاتىستى تالاپ قويۋدى كوزدەپ وتىرمىز. بۇعان دەيىن ٴبىز ولاي ىستەمەگەن بولساق، بۇگىن سول دەڭگەيگە جەتتىك»، - دەدى ساۋلەتشى.

بۇعان قوسا، ول بولاشاقتا «sport city»-دە شامامەن 10 مىڭ ادام تۇراتىنىن اتاپ ٴوتتى.

ٴۇشىنشى ايماق – ماڭگىلىك ەل داڭعىلىنان «استانا» حالىقارالىق قارجى ورتالىعىنا دەيىنگى اۋماق. بۇل جەردە ۇلكەن ساياباق پەن جاڭا مەشىت سالىنادى.

«ساۋلەت باسقارماسى ٴبىر جاعىنان ماڭگىلىك ەل داڭعىلى، ال ەكىنشى جاعىنان قابانباي باتىر داڭعىلىمەن شەكتەلەتىن ساياباق جوباسىنا بايقاۋ جاريالادى. ولشەمى جاعىنان ول بوتانيكالىق باقتان كىشى بولادى. سونىمەن بىرگە ساياباقتىڭ جانىندا 15 مىڭ ادامدىق جاڭا مەشىت ورنالاسادى. قالاداعى ەڭ ۇلكەن مەشىت وسى جەردە بولادى»، - دەپ قوستى ارسەنيي پيروجكوۆ.

تەلمان كەنتىندە بوي كوتەرەتىن ٴتورتىنشى ايماق ەلوردانىڭ پوليورتالىعىنىڭ ٴبىرى بولادى.

«بۇل جەردە كەرەي جانە جانىبەك حاندار كوشەسىنىڭ جالعاسى رەتىندە جاڭا كوشە بوي كوتەرەدى. ەسكى تەلمان كەنتىنىڭ جانىندا جاسىل جەلەگى كوپ جاڭا زاماناۋي شاعىن اۋدان پايدا بولادى. ياعني، ول قيىلىستاعى جيناقى شاعىن اۋدان بولماق»، - دەدى ول.

قالانىڭ دامۋىنداعى جاڭا ۆەكتوردىڭ ٴبىرى پوليورتالىقتىق. تۇرعىنداردىڭ جايلىلىعى ٴۇشىن ەلوردانىڭ وڭ جاعالاۋىنداعى اكىمدىكتىڭ جانىندا، نۇرجول جانە ەكسپودان بولەك، بىرنەشە پوليورتالىقتار قالىپتاسادى.

«بولاشاقتا پوليورتالىقتاردى ۆوكزال، بەيسەكوۆا پەن قورعالجىن تاسجولى، تىلەنديەۆ پەن بەيسەكوۆا كوشەلەرىنىڭ قيىلىسى جانە تەلمان كەنتىنىڭ اۋماعىندا جاساۋدى جوسپارلاپ وتىرمىز»، - دەدى مامان.

بۇل قالانىڭ وڭ جاعالاۋىنان سول جاعالاۋىنا قاتىنايتىن كولىك ترافيگىن ازايتۋعا مۇمكىندىك بەرەدى. تۇرعىندارعا ساۋدا جاساپ، سپورتپەن شۇعىلدانىپ، كوڭىل كوتەرۋ ٴۇشىن ٴبىر اۋداننان ەكىنشىسىنە بارىپ ٴجۇرۋ قاجەتتىلىگى بولمايدى.

ساۋلەتشىنىڭ سوزىنشە، س-409 كوشەسىندەگى جاڭا مەشىتتىڭ اۋدانىنداعى جاعالاۋدىڭ قۇرىلىسى باستالىپ كەتتى.

«جاڭا مەشىتتىڭ اۋدانىنداعى جەكە سەكتوردى كۇرەۋ كوزدەلگەن، ٴبىراق بۇل ماسەلەنىڭ شەشىمى ينۆەستورلارعا بايلانىستى. جوسپاردا ادەمى ايماقتار، قالالىق جاعاجاي، وزەن پورتى مەن پيرس سالۋ كوزدەلگەن»، - دەدى ول.

«استانا باس جوسپارى» مەكەمەسىنىڭ بۇل جوبانى جۇزەگە اسىرۋى قالالىق بيۋدجەتكە بايلانىستى، سەبەبى وزەن ارناسىن كەڭەيتۋ جۇمىستارىن جۇرگىزۋ قاجەت.

ارسەنيي پيروجكوۆ قازىرگى كۇنى قالا شەكاراسىن شەكتەۋ باعدارلاماسى بارىن اتاپ ٴوتتى.

«جاقىندا قالانىڭ شەكاراسىن يگەرۋ قاۋلىسى بەكىتىلدى جانە ەندى ٴبىز قۇرىلىستى سونىڭ ىشىندە جۇرگىزەمىز. قالانىڭ ىشىندەگى اپاتتى ۇيلەردى كۇرەۋدى كوزدەيتىن جوبا بار»، - دەدى ساۋلەتشى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي