BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ٴسابيت مۇقانوۆ مۋزەيىندە 700-دەن استام جادىگەر ساقتاۋلى

سولتۇستىك قازاقستان وبلىسى جامبىل اۋدانىنا قاراستى ٴسابيت اۋىلىنداعى جازۋشى ٴسابيت مۇقانوۆتىڭ مۋزەيى قىزىلجار ٴوڭىرىنىڭ كيەلى جەرلەرى كارتاسىنا ەنگىزىلدى. قالامگەرگە تيەسىلى قۇندى جادىگەرلەر جينالعان مۇراجايدىڭ ەسىگى جىل ون ەكى اي ٴبىر رەت جابىلعان ەمەس، دەپ حابارلايدى baq.kz ٴتىلشىسى.

ايگىلى قالامگەردىڭ مۋزەيىندە 700-دەن استام جادىگەر ساقتاۋلى. سولاردىڭ ىشىندەگى بىرەگەيى – ٴسابيت مۇقانوۆتىڭ جازۋ ماشينكاسى. جارى ٴماريام مۇقانوۆا 1990 جىلى مۋزەيگە تاپسىرعان جادىگەر عيماراتتىڭ تورىنەن ورىن العان.

«ٴسابيت مۇقانوۆ مۋزەيىندەگى جادىگەرلەردىڭ بارلىعى ٴبىز ٴۇشىن قۇندى. اۋىلىمىزعا كەلگەن ٴاربىر مەيمان جازۋشىنىڭ قارا شاڭىراعىنا سالەم بەرمەي كەتپەيدى. ٴبىز قوناقتاردىڭ ٴارقايسىسىن ىلتيپاتپەن قارسى الىپ، مۋزەي جايىندا، اۋىلىمىز تۋرالى ماقتانىشپەن ايتىپ بەرەمىز. ماسەلەن، ٴبىرىنشى زالدا ٴسابيت اتامىزدىڭ تۋعان ٴۇيىنىڭ كوشىرمەسى قويىلعان. ول كەدەي وتباسىنان شىققان، جەتىمدىكتى دە، جوقشىلىقتى دا كورگەن. تۋما تالانتىنىڭ ارقاسىندا بيىك شىڭعا كوتەرىلدى. ٴبىز بالالارىمىزعا ٴسابيت مۇقانوۆتىڭ ٴومىر جولىن ۇلگى ەتىپ ايتىپ بەرەمىز. جازۋشىنىڭ ەسىمىن ماقتان ەتەمىز. سوڭعى جىلدارى حالىق اراسىندا مۋزەيگە دەگەن قىزىعۋشىلىقتىڭ ارتقاندىعى بايقالادى. قازاقستاندى بىلاي قويعاندا كورشىلەس رەسەيدەن مەيماندار كەلىپ تۇرادى»، - دەيدى ٴسابيت مۇقانوۆ مۋزەيىنىڭ مەڭگەرۋشىسى ٴاليا سارسەكوۆا.

دەرەكتەرگە سۇيەنسەك، 1959 جىلى ٴسابيت مۇقانوۆ جيەن اعاسى شايكەن مۇستافينمەن بىرگە تۋعان اۋىلىندا ٴۇي سالعان. جازۋشىنىڭ 90 جىلدىق مەرەيتويىنا وراي 1990 جىلى بۇرىنعى ٴۇيدىڭ ورنىنا مەموريالدىق مۋزەي سالىندى. جالپى اۋماعى 180 شارشى مەتردەن تۇراتىن عيمارات – جاتىن بولمە، قوناق بولمە، زال، اس ٴۇي مەن كىرەبەرىسكە بولىنگەن. مۋزەيدە ٴسابيت مۇقانوۆتىڭ كوزى تىرىسىندە پايدالانعان جەكە زاتتارى قويىلعان. مۇندا قالامگەردىڭ ساپتاما ەتىگى، بىرنەشە باس كيمى، كوستيۋم، شاپان، تەمىر كەرەۋەت سىندى جادىگەرلەرى ساقتاۋلى. كەلۋشىلەردىڭ كوپشىلىگى، اسىرەسە، جازۋشىنىڭ جاتىن بولمەسىنە قىزىعادى ەكەن.

«مەن بلاگوۆەششەنكا اۋىلىنداعى كىتاپحانادا قىزمەت اتقارامىن. بۇگىن ەڭ بەلسەندى وقىرماندارىمدى ٴسابيت مۇقانوۆ مۋزەيىنە ەكسكۋرسياعا اكەلدىم. الدىمەن قوجابەرگەن جىراۋ كەسەنەسىنە باردىق. بۇل ەكى نىسان دا سولتۇستىك قازاقستان وبلىسىنىڭ كيەلى جەرلەرىنىڭ كارتاسىنا ەنگىزىلدى. جاس ۇرپاق ٴبىزدىڭ ەلىمىز، جەرىمىز، ونىڭ قاسيەتى تۋرالى ٴبىلۋى شارت. سوندىقتان دەمەۋشىلەردىڭ كومەگىمەن وسىنداي ساياحاتقا شىقتىق. بالالارعا جازۋشىنىڭ مۋزەيى ۇنادى. ٴوزىم دە ۇمىتىلماس اسەر الدىم»، - دەيدى مۋزەيگە كەلۋشى ٴلايلا ساقتاعانوۆا.

«ماعان بۇگىنگى ساياحات وتە ۇنادى. مۋزەيدەن كوپ رۋحاني ازىق الدىق. ٴسابيت مۇقانوۆ سىندى جازۋشىنىڭ سولتۇستىك قازاقستان وبلىسى جامبىل اۋدانىندا دۇنيەگە كەلگەنى ٴبىز ٴۇشىن زور ماقتانىش. ونىڭ تۋعان جەرىن، جەكە زاتتارى تاماشا كوڭىل-كۇي سىيلادى. قوناقتارعا ارنالعان كىتاپتا ٴوز قولتاڭبامىزدى قالدىردىق. وندا كوپتەگەن اقىن-جازۋشىلاردىڭ جازبالارى بار. اسىرەسە ٴسابيت مۇقانوۆتىڭ جازۋ ماشينكاسى قاتتى ۇنادى. جازۋشى ونىڭ كومەگىمەن تالاي شىعارمالاردى دۇنيەگە اكەلگەن ەكەن. ونى ٴوز قولىمىزبەن ۇستاپ كورىپ، ٴتىپتى سۋرەتكە تۇستىك»، - دەپ العان اسەرىمەن ٴبولىستى ٴسابيت مۇقانوۆ مۋزەيىنە ەكسكۋرسياعا كەلگەن بلاگوۆەششەنكا 2-ورتا مەكتەبىنىڭ وقۋشىسى ماقپال ناۋرىزقۇلوۆا.

مۋزەي اۋماعىندا قوناق ٴۇي، قازاقى شوشالا مەن، دەمالۋعا ارنالعان كۇركە بار. كىرەبەرىس الاڭقايدا جازۋشىعا ارنالعان ەسكەرتكىش ورناتىلعان. 1990 جىلى قويىلعان تاس ٴمۇسىننىڭ كوپتەن بەرى كۇردەلى جوندەۋ كورمەگەنى اڭعارىلىپ تۇر.

فوتو: اۆتوردىكى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي