BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

حانقورعان قالاشىعى اسپان استىنداعى مۋزەيگە اينالماق

وڭتۇستىك قازاقستان وبلىسىنداعى حانقورعان قالاشىعى الداعى ۋاقىتتا تولىق ارحەولوگيالىق قازبا، رەستاۆراسيا جانە كونسەرۆاسيا جۇمىستارى جۇرگىزىلىپ، اشىق اسپان استىنداعى مۋزەيگە اينالاتىن بولادى. بۇگىن بۇل تۋرالى سايرام اۋدانىنداعى حانقورعان قالاشىعىندا وڭتۇستىكتەگى ارحەولوگيالىق تاريحي ەسكەرتكىشتەردى قالپىنا كەلتىرۋ بويىنشا وتكەن جيىندا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ٴمالىم ەتتى، دەپ حابارلايدى baq.kz اقپاراتتىق اگەنتتىگى.

ەلباسىنىڭ «بولاشاققا باعدار: رۋحاني جاڭعىرۋ» ماقالاسىنداعى «قازاقستاننىڭ كيەلى جەرلەرى» جوباسى بويىنشا ارحەولوگيالىق تاريحي ورىنداردى دامىتۋدى ناقتىلاپ، پىسىقتاپ الۋ ماقساتىندا وتكەن جيىنعا وڭىردەگى ٴتيىستى باسقارما باسشىلارى، ماماندار مەن ٴبىر توپ ارحەولوگ-عالىمدار قاتىستى.

وڭتۇستىك قازاقستان وبلىسىندا ەلىمىزدىڭ تاريحى مەن مادەنيەتى ٴۇشىن ايرىقشا ماڭىزى بار ساۋلەت جانە ارحەولوگيا ەسكەرتكىشتەرىنىڭ ۇلكەن شوعىرى ورنالاسقان. تاريحىمىزدى تۇگەندەپ، تامىرىمىزدى تانىپ، بىلۋدە حالىقتىڭ وتكەن تاريحىنان ناقتى ماعلۇمات بەرەتىن ارحەولوگيا ەسكەرتكىشتەرىنىڭ الار ورنى دا ەرەكشە.

«بۇگىن «حانقورعان» قالاشىعىن ارالاپ كورىپ، ەلباسىنىڭ «بولاشاققا باعدار: رۋحاني جاڭعىرۋ» ماقالاسىن وبلىسىمىزدا جۇزەگە اسىرۋ ماقساتىندا جينالىپ وتىرمىز. وبلىسىمىزدا ەسەپكە الىنعان تاريح پەن مادەنيەت ٴۇشىن ماڭىزى زور 1281 تاريحي-مادەني مۇرا ەسكەرتكىشتەرى بار. ونىڭ ىشىندە ساۋلەتتىك ەسكەرتكىشتەر 218، ارحەولوگيا ەسكەرتكىشتەرىنىڭ سانى ٴ1063-تى قۇرايدى. وسى تاريحي ورىندارىمىزعا كەزەڭ-كەزەڭىمەن ارحەولوگيالىق زەرتتەۋ جۇمىستارىن جۇرگىزىپ، قالپىنا كەلتىرۋىمىز قاجەت»، - دەدى وبلىس اكىمى.

وقو-دا تۋريزم سالاسىن دامىتۋ ماقساتىندا جەرگىلىكتى وڭىرلەر بويىنشا تاريحي ورىنداردى قالپىنا كەلتىرۋ ٴۇشىن ارنايى باعدارلاما دايىندالىپ، كەزەڭ – كەزەڭىمەن ىسكە اسىرىلاتىن بولادى. ٴبىرىنشى كەزەكتە قازىعۇرت، ورداباسى تاۋلارىن، ورتاعاسىرلىق وتىرار، وقسىز، ساۋران، سيداق، مارتوبە، حانقورعان قالاشىقتارى، جۋانتوبە، قاراسپان، كۇلتوبە سياقتى ەجەلگى ەلدى مەكەندەرىنە ارحەولوگيالىق زەرتتەۋ جۇمىستارىن جۇرگىزىپ، قالپىنا كەلتىرۋ جۇمىستارى باستالماق. سونىمەن قاتار، بۇگىندە جويىلىپ كەتكەن ارحەولوگيا جانە ساۋلەت ەسكەرتكىشتەرىنە جاتاتىن قوشقار اتا، كەرۋەن ساراي، سوزاق اۋدانىنداعى جۇسىپبەك، جاكەل داتقا كەسەنەلەرىن جانە تاعى باسقا دا تاريحي نىسانداردى دا قالپىنا كەلتىرۋ جۇمىستارى جۇرگىزىلمەك.

جيىندا ٴا.مارعۇلان اتىنداعى ارحەولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى، اكادەميك باۋىرجان بايتانايەۆ حانقورعان قالاشىعىنا ارحەولوگيالىق قازبا جۇمىستارىن جۇرگىزۋ تۋرالى بايانداما جاسادى.

مۇنان سوڭ ٴسوز العان «ساۋلەت بيۋرو» كمم-نىڭ ديرەكتورى باقىتجان اشىربايەۆ وبلىستاعى ارحەولوگيالىق تاريحي ورىنداردى قالپىنا كەلتىرۋ، اباتتاندىرۋ تۋرالى ٴسوز قوزعادى.

جيىندا تۇركىستان قالاسىنداعى ارحەولوگيالىق ەسكەرتكىشتەردىڭ جاي-كۇيى دە تالقىلاندى. بۇل تۋرالى «ازىرەت سۇلتان» مەملەكەتتىك تاريحي-مادەني قورىق-مۋزەيى ارحەولوگيا ٴبولىمىنىڭ مەڭگەرۋشىسى مارات تۇياقبايەۆ بايانداپ بەردى.

جيىندى قورىتىندىلاعان وبلىس اكىمى وڭىردەگى تاريحي ەسكەرتكىشتەردى قالپىنا كەلتىرۋ جونىندە سالا باسشىلارىنا ناقتى تاپسىرمالار جۇكتەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي