BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

زاينوللا ساماشەۆ، تاريحشى-ارحەولوگ

زاينوللا ساماشەۆ – ارحەولوگ، تاريح عىلىمدارىنىڭ دوكتورى، پروفەسسور، قر عىلىمىنا ەڭبەگى سىڭگەن قايراتكەر، جالپىۇلتتىق تاۋەلسىز «پلاتينالى تارلان» سىيلىعىنىڭ يەگەرى، گەرمان ارحەولوگيا ينستيتۋتىنىڭ كوررەسپوندەنت مۇشەسى.

ول 1947 جىلى 17 قاراشادا شىعىس قازاقستان وبلىسى ۇلان اۋدانى بەستەرەك اۋىلىندا دۇنيەگە كەلگەن. 1970 جىلى وسكەمەن پەداگوگيكالىق ينستيتۋتىن تاريح ماماندىعى بويىنشا اياقتاپ، ارحەولوگيا سالاسىنداعى عىلىمي ەڭبەك جولىن باستاعان. وتاندىق جانە كورشىلەس ولكەلەردىڭ ارحەولوگياسى تاقىرىبىندا جازىلعان 400-دەن استام عىلىمي ەڭبەكتىڭ، 37 كىتاپتىڭ اۆتورى.

زەينوللا ساماشەۆ قازاقستاننىڭ ٴار وڭىرلەرىندە ورنالاسقان، تاس داۋىرىنەن قازاقتاردىڭ ەتنوگرافيالىق سۋرەتتەرىنە دەيىنگى ۋاقىتتى قامتيتىن جۇزدەن استام پەتروگليف وشاقتارىن زەرتتەۋشى جانە العاش عىلىمي اينالىمعا ەنگىزۋشى.

زاينوللا ساماش ۇلى قازاق دالاسىن ەرتە تەمىر داۋىرىندە مەكەن ەتكەن جانە دۇنيەجۇزىلىك تاريح تولقىنىنا اسەر ەتكەن ساق، سارماتتاردىڭ بىرەگەي ەسكەرتكىشتەرىن كەشەندى تۇردە، بارلىق جاراتىلىستانۋ عىلىمدارىنىڭ سوڭعى جەتىستىكتەرىن قولدانا وتىرىپ، تۇڭعىش زەرتتەۋدى باستاعان عالىم.

وتاندىق ارحەولوگيا عىلىمىنا قوسقان ايرىقشا ۇلەسى رەتىندە – قازاق التايىنداعى توڭ باسقان بەرەل وبالارىن اشۋى مەن زەرتتەۋىن ەرەكشە اتاۋعا بولادى. بۇل ەسكەرتكىش بۇگىندە مادەني لاندشافتىسىمەن بىرگە جاڭعىرتىلىپ، ەلدىڭ كوزايىمى مەن ماقتانىشىنا اينالعان «مەملەكەتتىك بەرەل مۋزەي-قورىعى» قۇرىلىپ، ناتيجەلى جۇمىستار جاساپ كەلەدى. سونىمەن قوسا قاراقابا تاۋ اڭعارىنداعى توڭنىڭ استىنداعى ەجەلگى تۇركىلىك بەس قارۋلى جاۋىنگەرلەرىنىڭ اشىلۋى مەن سول زامانداعى قوبىز ٴتارىزدى مۋزىكالىق اسپاپتىڭ تابىلۋى دا الەمدىك سەنساسيالىق جاڭالىقتار قاتارىنا جاتادى.

زاينوللا ساماشەۆ وتكەن عاسىردىڭ 80 جىلدارىنان باستاپ قازاقستاننىڭ باتىسىندا كەشەندى زەرتتەۋلەر ۇيىمداستىرىپ، ەنەوليتتىك توقسانباي قونىسىنان باستاپ سارماتتىق بايتە، قىزىلۇيىك، تاساستاۋ جانە ورتاعاسىرلىق استانا - سارايشىق قالاسىن جانە ت.ب. زەرتتەۋلەردىڭ باسىندا تۇردى.

جايىق بويىنداعى التىن وردا حاندارىنىڭ جازعى ورداسى مەن قازاق حاندىعىنىڭ استاناسى بولعان سارايشىق قالاسىنىڭ بۇگىندە تابيعي اسەردەن ساقتالىپ، زەرتتەۋلەردىڭ جالعاسا ٴتۇسۋى مەن وبەكتىلەردىڭ قايتا جاڭعىرتىلا باستاۋى عالىم ەڭبەگىنىڭ جەمىسى ىسپەتتى.

زاينوللا ساماش ۇلىنىڭ جەتەكشىلىگىمەن قازاقستاننىڭ ەجەلگى مادەنيەتى مەن تاريحى، مەملەكەتتىلىگى، تاۋ-كەن ٴىسى تاقىرىپتارىندا كوپتەگەن حالىقارالىق جوبالار اتقارىلىپ، بىرلەسكەن ەكسپەديسيالار (قازاق-فرانسۋز، قازاق-گەرمان، قازاق-موڭعول، قازاق-كورەي) ۇيىمداستىرىلىپ، ٴوزىنىڭ ٴتيىمدى عىلىمي ناتيجەلەرىن بەرۋدە.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي