BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەكسپو قوناقتارى ۇمىت بولعان ورتەكە ٴبيىن تاماشالادى

فوتو: Майгүл Сұлтан

«ەكسپو-2017» حالىقارالىق كورمەسىنە ارناپ سالىنعان «ەتنواۋىل» مادەني قالاشىعىندا جامبىل وبلىسىنىڭ شەبەرلەرى كورمە وتكىزدى. كوزدىڭ جاۋىن الاتىن ۇلتتىق بۇيىمدار الەمدىك كورمەگە كەلگەن قوناقتاردىڭ نازارىنا ۇسىنىلىپ قانا قويماي، شەبەرلەر قالا قوناقتارى مەن تۇرعىندارىنا ونەرلەرىن كورسەتىپ، شەبەرلىك ساباقتارىن وتكىزدى. سولاردىڭ اراسىندا اعاشتان ٴتۇيىن تۇيەتىن شەبەر قازىم امانقوسوۆتىڭ قولىنان شىققان ۇلتتىق اسپاپتار جۇرت نازارىن اۋداردى. اسىرەسە، ۇمىت بولعان ورتەكە بيىنە تاڭ قالعانداردىڭ قاتارىندا ٴبىز دە بولدىق.

ورتەكە ‒ قازاقتىڭ كونە قۋىرشاق تەاترى. اعاشتان جاسالعان تاۋ تاعىسىن تەك دومبىرامەن عانا ەمەس، ىشەكتى اسپاپتاردىڭ بارلىعىندا ويناۋعا بولادى. بۇگىنگى كۇنى ۇمىت بولعان سول تاريحي مۇرانى جاڭعىرتىپ، حالىق اراسىندا تانىتىپ جۇرگەن شەبەر تارازدىق قازىم امانقوسوۆ ورتەكەنىڭ جەتىلدىرىلگەن نۇسقاسىن جاساپ، ەكسپو قوناقتارىنا ۇسىندى.

– ەلىمىز تاۋەلسىزدىك العان العاشقى جىلدارى قازاقتىڭ ۇلتتىق اسپاپتارىن جاسايمىن دەپ شەشتىم. ٴسويتىپ قىلقوبىزدار جاساپ ٴجۇردىم. كەيىننەن ۇمىتىلعان ورتەكەنى جاساعىم كەلىپ ىزدەپ ەدىم، تاپپادىم. مەحانيزمىن ٴومىرعالي دەگەن كۇيشى بىلەدى ەكەن. سول كىسىنىڭ ايتۋى بويىنشا العاش رەت ورتەكە جاسادىم. مىناۋ 1996 جىلى جاسالىنعان ورتەكەنىڭ ٴۇشىنشى نۇسقاسى، - دەگەن شەبەر بۇل ورتەكەنىڭ قازاقستانداعى بىردەن-بىر دامىتىلعان نۇسقاسى ەكەنىن ايتتى.

ونىڭ ايتۋىنشا، ورتەكە كوبىنەسە 1-2 بۋىننان اسپايتىن كورىنەدى. جامبىلدان كەلگەن قولونەر شەبەرى وعان 3 بۋىنعا دەيىن قوسىپ، فيزيكانىڭ تەپە-تەڭدىك زاڭدىلىعىن 2 ەسەلەي وتىرىپ جاساپتى.

– ادەتتە، ورتەكە 1-2 بۋىنمەن عانا جاسالىپ، ٴبىر قىرىنان عانا بيلەيدى. مەن تابيعي قوزعالىستى ساقتاي وتىرىپ، ٴار اياعىنا 3 بۋىننان قوستىم. بىرنەشە جىل ىزدەنۋىمنىڭ ناتيجەسىندە ونى 360 گرادۋسقا اينالا الاتىن ەتىپ جاسادىم. بۇندا فيزيكانىڭ تەپە-تەڭدىك زاڭدىلىعى قولدانىلادى. ال مەن سول فيزيكالىق زاڭدىلىقتى ەكى ەسەگە دەيىن ارتتىرىپ قولداندىم، - دەيدى قازىم بەيسەن ۇلى.

ورتەكە ارنايى جاسالعان تۇعىرعا ورناتىلادى دا، دومبىراشىنىڭ ساۋساعىنا جىپپەن بايلانادى. كۇيشى اسپاپتا ويناي باستاعاندا، پەرنە باسقان ساۋساقتاردىڭ قوزعالىسىمەن قۋىرشاق اسەم بيگە باسا جونەلەدى. ٴبىراق، كونە كوز قارتتار ەرتە كەزدەردە كۇيشىلەردىڭ ٴبىر جولدا 5-6 ورتەكەگە دەيىن تۇعىرسىز بيلەتكەنىن جەتكىزەدى. ٴبىراق، قازىم بەيسەن ۇلى بۇگىنگى كۇنى سونىڭ بارلىعى ۇمىت بولا باستاعانىن، ماقساتى سول – ورتەكە ونەرىن جاس ۇرپاقتارعا جەتكىزىپ، ۇمىت بولعان ۇلتتىق مۇرانى ناسيحاتتاۋعا ۇلەسىن قوسۋ ەكەنىن ايتادى.

– ورتەكەنى ٴالى دە كوپ ادامدار بىلە بەرمەيدى. مەن تارازدا مادەنيەت جانە ونەر كوللەدجىندە ساباق بەرگەن كەزىمدە جاستارعا ونىڭ جاسالۋى مەن قولدانىلۋىن ۇيرەتتىم. مەنەن كورىپ جاساپ جۇرگەن شەبەرلەر الماتى مەن استانادا دا بار، - دەيدى شەبەر.

بۇدان بولەك، كەسكىندەمە، ساندىك جانە ٴمۇسىن ونەرىنىڭ شەبەرى قازىم امانقوسوۆ قوس ىشەكتى قىلقوبىزدار جاساۋمەن جانە سۋرەتشىلىكپەن دە اينالىسادى. ونىڭ قولىنان شىققان ۇلتتىق اسپاپتار ەۋروپانىڭ فرانسيا، گەرمانيا، يسپانيا جانە اقش سياقتى بىرنەشە ەلىندەگى جەكە كوللەكسيالاردا ساقتالعان.

فوتو، ۆيدەو: اۆتوردىكى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي