BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا قۇسنيحات كورمەسى ٴوتتى

فوتو: Майгүл СҰЛТАН

قر ۇلتتىق اكادەميالىق كىتاپحاناسىندا يسلام تاريحى، ونەر مەن مادەنيەت عىلىمي-زەرتتەۋ ورتالىعىنىڭ ۇيىمداستىرۋىمەن قۇران اياتتارى مەن كوركەم سوزدەر جازىلعان قۇسنيحات كورمەسى ٴوتتى، دەپ حابارلايدى baq.kz ٴتىلشىسى.

«قۇشتارمىن سۇلۋ حاتقا جانىم تۇنىپ،

حاتكەرگە ٴىشىم جىلىر، ٴدىلىم ەرىپ،

ٴداريعا-اي، سودان ارتىق ٴلاززات بار ما،

حوش حاتپەن جازساڭ سوزدەن گاۋھار تەرىپ»، - دەپ اسەت نايمانباي ۇلى جىرلاعانداي اسىل ٴسوزدى قىلقالاممەن قۇبىلتىپ، جازۋدان ويۋلى ورنەك سالا ٴبىلۋ ەكىنىڭ ٴبىرىنىڭ قولىنان كەلە بەرمەيدى. جازۋدى جاقۇتشا جارقىراتاتىن سۋرەت ونەرىنىڭ بۇل سالاسى يسلام مادەنيەتىنىڭ بولىنبەس ٴبىر بولشەگى. تاريحقا كوز جۇگىرتەك، قۇسنيحات ونەرىنىڭ قازاقستانعا xv عاسىردا، شامامەن ٴامىر تەمىر بيلىگىنىڭ تۇسىندا سامارقاند پەن بۇقارا ارقىلى يراننان كەلگەنىن بىلەمىز. ياعني، تۇركىستان شاھارىنداعى جانە ەلىمىزدىڭ باتىس وڭىرىندە ساقتالعان كونە نىسانداردان وسى كوركەم جازۋدى كوبىرەك بايقايمىز. زەرتتەۋشىلەردىڭ ايتۋىنشا، 3800 جىلداي ۋاقىت بۇرىن نەگىزى قالانعان بۇل ونەردىڭ العاش قالىپتاسقان تۇستا ٴۇش جۇزگە تارتا نۇسقاسى بولىپتى.

«قۇسنيحات» – سۇلۋلىق، ادەمىلىك، كوركەمدىك دەگەن ماعىنانى بەرەتىن اراب تىلىندەگى «حۇسن» سوزىنەن ەنگەن. ول اراب ارىپتەرىمەن جازىلاتىن، مەڭگەرىلۋى قيىن، جازۋدى ناقىشتاۋ ماقساتىمەن مەشىتتەردە، قۇران جانە ٴدىني كىتاپتاردا قولدانىلاتىن بەلگىلى ەرەجەلەرى بار بەينەلەۋ ونەرىنىڭ ٴبىر ٴتۇرى. ال، كالليگرافيا بولسا لاتىن ارىپتەرمەن كوركەم جازۋ ونەرى بولماق.

ەلىمىزدىڭ باس قالاسىندا وتكەن بۇگىنگى كورمەگە قۇسنيحاتتىڭ ەڭ ايشىقتى 7 جازۋ ۇلگىسىندە جازىلعان 30 شىعارما قويىلدى. ولاردىڭ بارلىعى يسلام كونفەرەنسياسى ۇيىمىنا كىرەتىن يسلام تاريحى، ونەر مەن مادەنيەت عىلىمي-زەرتتەۋ ورتالىعى (ٴيتومعو) 1986 جىلدان بەرى ٴۇش جىل سايىن ۇيىمداستىرعان حالىقارالىق قۇسنيحات سايىستارى جەڭىمپازدارىنىڭ تاڭداۋلى تۋىندىلارى ەكەن.

«ٴبىزدىڭ ۇيىم بۇنداي كورمەنى قازاقستاندا تۇڭعىش رەت وتكىزىپ وتىر. ٴبىز وسى جولى 30 شىعارمانى الىپ كەلدىك. ولاردىڭ بارلىعى ٴبىز وتكىزگەن حالىقارالىق سايىستاردىڭ جەڭىمپازدارىنىڭ ەڭبەكتەرى»، - دەدى ٴيتومعو باس ديرەكتورى ەرەن حاليت.

شەتەلدىك عالىم ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىنىڭ تەك قازاق ەلى ٴۇشىن عانا ەمەس، ورتا ازياداعى بارلىق تۇركى ەلدەرى ٴۇشىن ماڭىزدى ەكەندىگىن ايتا كەلىپ، قۇسنيحات ونەرىن وسى توپىراقتا جاڭعىرتۋدىڭ ۇلت جوسپارىنا قوسقان تۋىسقاندىق ۇلەس ەكەندىگىن ايتتى.

«قازاقستان پرەزيدەنتىنىڭ «بولاشاققا باعدار: رۋحاني جاڭعىرۋ» باعدارلاماسى وسى ايماقتاعى بارشا تۇركى جۇرتشىلىعى ٴۇشىن ماڭىزدى. بىزدە: «قۇران كارىم مەككەدە ٴتۇسىرىلدى، كايردە وقىلدى، ىستامبۇل قالاسىندا جازىلدى» دەگەن ٴسوز بار. ياعني، ەڭ كوركەم جازۋلار وسمان يمپەرياسى كەزىندە جارىققا شىقتى. قازاقستاندا دا الەمگە ٴماشھۇر حات ۇستالارى بولعان. ٴبىزدىڭ بۇل ٴىس-شارامىز سولاردىڭ مۇراسىن قايتا جاڭعىرتۋ بولماق. وسى ماقساتقا جەتۋ ٴۇشىن ٴبىز ۇلتتىق اكادەميالىق كىتاپحانامەن ٴبىرقاتار كەلىسىم-شارتتار جاساسپاقپىز. وسى كىتاپحانادان ٴيتومعو-نىڭ فيليالىن اشۋ دا ويىمىزدا بار»، - دەدى ەرەن حاليت مىرزا.

كورمە سوڭىندا ٴيتومعو باس ديرەكتورى ەرەن حاليت ۇلتتىق اكادەميالىق كىتاپحانانىڭ باسشىسى ٴۇمىتحان مۇنالبايەۆاعا «ورتالىق ازياداعى يسلام مادەنيەتى» دەگەن ەجەلگى كىتاپتى تابىستادى جانە كورمەنى تانىستىردى.

فوتو اتوردىكى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي