BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اقىلبايدىڭ شوپشەگى ايدوس تۋرالى ٴبىز نە بىلەمىز؟

بۇعان دەيىن ابايتانۋشىلارعا، سونىڭ ىشىندە اباي مۇراجايىنىڭ شىراقشىلارىنا دا ۇلى اقىننىڭ ۇرپاقتارى دەگەندە ويىمىزعا الدىمەن ورالارى اقىلبايدىڭ نەمەرەسى باعفۋردان تارايتىن ايدار مەن ونىڭ ۇلى دانيار بولاتىن. ەكەۋىنىڭ دە ٴقازىر الماتىدا ەكەنىنەن جانە ٴناپاقاسىن مۇناي سالاسىنان تاۋىپ جۇرگەندەرىنەن حاباردارمىز.

جالپى، اقىلبايەۆ باعفۋر ٴالىمقۇل ۇلىنىڭ ەرنەست، باۋەر جانە ايدار اتتى ٴۇش ۇلى بولعان. ابايدىڭ شوپشەكتەرى بولىپ كەلەتىن ۇشەۋدىڭ ورتانشىسى – باۋەر دۇنيەدەن ەرتە وزىپتى. جوعارى ٴبىلىمدى بيولوگ رەتىندە كانديداتتىق ديسسەرتاسيا جازا باستاعان ەكەن. تۋىستارى باۋكەن اتاپ كەتكەن ودان ۇرپاق جوق. ال، ايداردان دانيار دەگەن ۇل، ودان دانا، كاميلا، مەرۋەرت دەگەن ٴۇش قىز بالا بار.

سونىمەن قاتار اقىلبايدىڭ دانياردان باسقا تاعى ٴبىر شوپشەگى، ياعني ابايعا نەمەنە بوپ كەلەتىن ايدوس تۋرالى ەمىس-ەمىس قانا بىلەتىنبىز. ەسىمىنىڭ ٴوزى-اق اسىل تەگىن مەگزەيتىن ازاماتتىڭ مۇراجايمەن بۇعان دەيىن، ونىڭ ٴوزى ايتقانداي، بايلانىسى بولا قويماعان. ولاي بولسا، اقىلبايەۆ ايدوس ەرنەس ۇلى تۋرالى ٴبىز نە بىلە الدىق؟

سونىمەن ايدوسپەن ونىڭ ۇلى اتاسىنىڭ ەسكەرتكىشى تۇبىندە كەزدەسۋگە كەلىسكەنبىز. ول ۋاعدالى ۋاقىتتان كەشىكپەدى. ۇلى اقىننىڭ ۇرپاعىن سىرت كەلبەتىنەن-اق تاس تۇعىرداعى حاس مۇسىنگە ۇقساتتىم. بۇل رەتتە ونىڭ ۇلى اقىنعا قانشالىقتى ۇقسايتىنىن وقىرمان ٴوزى اجىراتا جاتار. ٴبىراق، ٴجۇزى العاش جارق ەتكەندە-اق ول ٴبىزدى ەرەكشە جىلى اسەرگە بولەدى. قارسى الدىمدا وتىرىگى جوق، سابىرلى دا بايسالدى ازامات وتىردى. ونىڭ باسقاداي ەمەس، تاپ وسىنداي بولىپ شىققانىنا ابدەن قۋانىشتى ەدىم.

ەڭ اۋەلى، اباي ەسكەرتكىشىنىڭ جانىندا سۋرەتكە تۇسە باستادىق. تاڭەرتەڭگى ساعات توعىزدار شاماسىندا جارقىراي شىققان مامىرداعى كۇن شاپاعى فوتواپپاراتقا شاعىلىسىپ، ٴبىراز اۋرەگە سالسا دا ايدوس قاباعىن شىتپادى. ول فوتوگرافتىڭ كورسەتكەن جەرىنە جەڭىل بارىپ، دارحاندىق تانىتقان. بۇدان سوڭ، اڭگىمەمىز داستارحان باسىندا جالعاستى. ەكەۋارا «ول ٴوزى مەن تۋىستارى تۋرالى ايتادى، مەن بولسام ٴسوزىن بولمەي تىڭدايمىن» دەپ كەلىستىك. «1967 جىلعى 7 اقپاندا دۇنيەگە كەلىپپىن، - دەپ ساباقتادى ايدوس ٴوز ەستەلىگىن. - اكەم ەرنەست ٴ1983-شى جىلى قايتىس بولعان، تالعار مەحانيزاسيا تەحنيكۋمىنىڭ تۇلەگى. ال، باعفۋر ودان ٴتورت جىل بۇرىن ول دۇنيەلىك بولعان ەكەن. الماتىنىڭ ىرگەسىندەگى قازاق مال شارۋاشىلىعى عىلىمي-زەرتتەۋ ينستيتۋتىندا باھفۋر اتامىز سەلەكسيا مەكتەبىنىڭ ديرەكتورى لاۋازىمىن اتقارعان.

بالا كەزىمىزدە دانيار جانە باسقالارى بار اتامنىڭ ۇيىندە ٴجيى باس قوساتىنبىز. ونىڭ اكەسى – ايدار اعا مۇنايشى، ٴقازىر ول كىسىنىڭ كاسىبىن دانيار جالعاستىرۋدا. انام – اقىلبايەۆا ەلنۋرا احمەتقىزى وسى الماتىدا تۇرىپ جاتىر. ٴوز باسىم الماتىداعى ورتا مەكتەپتى بىتىرگەن سوڭ، ۋكراينانىڭ كريۆوروجسك قالاسىنداعى اۆياۋچيليششەگە وقۋعا تۇسكەن ەدىم.

ٴبىرىنشى جارىم سۆەتلانامەن دە سوندا تابىستىم، تبيليسيدە كەڭەس ارمياسى قاتارىندا بولدىم. اتالمىش وقۋ ورنىندا اۆياقۇرالداردىڭ تەحنيك- ەلەكتريگى ماماندىعىن العان سوڭ، الماتى اەروپورتىنىڭ بىرىككەن اۆياوتريادىندا قىزمەت ەتتىم. كەيىن وسىنداعى يتالياندىق قۇرىلىس فيرماسىندا جۇمىس جاساپ، اەروپورتتىڭ قارجىلىق جاعدايى قوجىراعاندا جەكە كاسىپكەرلىكتى تاڭداپ، قۇرىلىس سالاسىندا ەڭبەك ەتىپ كەلەمىن. ٴبىرىنشى نەكەدەن الەكساندرا ستاريكوۆا – اقىلبايەۆا دەگەن قىزىم جانە ودان نيكا اتتى نەمەرەم بار. ولار ٴقازىر ساراتوۆ وبلىسىنىڭ بالاكوۆو قالاسىندا تۇرادى، قىزىمنىڭ ينتەرنەتتە جەكە پاراقشاسى بار. ال، قازىرگى جارىم باتىربەكوۆا تامارا اۋەزحانقىزى (اكەسى- قازاق، اناسى-تاتار) ەكەۋىمىزدىڭ ورتاق بالامىز جوق. اللانىڭ ٴامىرى سولاي شىعار، جاس كەزىمدە بارشا تۋىستارىم ٴبىر جاققا شىققاندارىندا سابيلەرىن ەرجەتىپ قالعان ماعان تاستاپ كەتۋشى ەدى. بۇل ورايدا اباي اتامىزدىڭ ۇرپاق جالعاستىعىن ٴۇزىپ الماۋ، بىزدەن «تۇقىم» الىپ قالۋ تۋرالى اڭگىمەلەرگە كۇلگەننەن باسقا امالىم جوق. سەبەبى، ەڭ الدىمەن «ادامنىڭ بالاسى بولۋعا، ادامزاتتى سۇيۋگە» ۇندەگەن ۇلى ادامنىڭ ارتىندا قالدىرعان اسىل مۇراسىنا تەڭ كەلەر ەشتەڭە جوق».

ۇلى اقىننىڭ ۇلاعاتتى ۇرپاعىمەن ٴۇنسىز كەلىستىم.

بولات جۇنىسبەكوۆ،

ابايدىڭ«جيدەباي–بورىلى» مەملەكەتتىك

تاريحي-مادەني جانە ادەبي-مەموريالدىق

قورىق-مۋزەيىنىڭ ديرەكتورى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي