BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تىڭ يدەيالار دەكرەتتىك دەمالىسىمدا پايدا بولدى – سۋرەتشى  ەكسكليۋزيۆ

ادام بالاسى ٴوز بويىنداعى قانداي دا ٴبىر دارىنى مەن قاسيەتىن شىڭداي تۇسپەسە، ۋاقىت وتە كەلە الگى دارىننىڭ دا سولعىن تارتىپ، عايىپ بولۋى حاق. جالپى، ٴاربىر ازامات اركەز ىزدەنىس ۇستىندە بولۋى كەرەك. سوندا عانا ول دىتتەگەن ماقساتىنا جەتە الادى. baq.kz ٴتىلشىسى سۇحبات العان سۋرەتشى، جاس سۋرەتشىلەر وداعىنىڭ مۇشەسى، ديزاينەر ايدانا مىڭايداروۆا ٴدال وسىنداي ۇستانىممەن ەڭبەكتەنىپ كەلەدى.

- شىعارماشىلىق جولىڭىز قالاي باستالدى؟

- جوعارى وقۋ ورنىن ٴتامامداعان سوڭ، ٴبىر جىل بويى ەركىن سۋرەتشى رەتىندە اينالىسپاعان شارۋام جوق. مىسالى، بودي ارت، قابىرعالارعا سۋرەت سالۋ، ديزاين، اشەكەي بۇيىمدارىنىڭ ديزاينى سياقتى سالالاردا قىزمەت ەتتىم. مەن وسى ۋاقىت كەزەڭىندە بەينەلەۋدىڭ وزىمە ٴتان تەحنيكاسىن ىزدەگەن سياقتىمىن. الايدا، ول جاقتا شىعارماشىلىققا بولەتىن ۋاقىت تاپشى بولعان سوڭ جانە قاتاڭ ٴبىر شەڭبەر اياسىندا عانا قىزمەت ەتۋ تالاپ ەتىلگەننەن كەيىن ول قىزمەتتەردىڭ ەشقايسىسى ماعان ۇنامادى. ارتىنشا-اق، وسى «اربيس-art» ستۋدياسىنا جۇمىسقا كەلدىم. ٴدال وسى ستۋديادا مەندە ٴوزىمنىڭ بارلىق مۇمكىندىكتەرىمدى پايدالانۋعا، بار تاجىريبەمدى ىسكە قوسىپ ەڭبەكتەنۋگە دەگەن قۇلشىنىس پايدا بولدى. بۇل مەنىڭ ٴوز دامۋىمدى قولعا الۋعا دەگەن تاپتىرماس مۇمكىندىك بولاتىن.

- سوندا كيىمدەرگە سۋرەت سالۋدى دا وسى ستۋديادان باستادىڭىز با؟

- ٴيا، شامامەن ەكى جىل بۇرىن مەن ٴدال وسى ستۋديادا كيىم-كەشەككە سۋرەت سالۋدى العاش رەت جاساپ كوردىم. ماعان وتە ۇنادى. الايدا، مەن وعان اسا قاتتى كوڭىل اۋدارمادىم. سەبەبى، بۇل ٴبىر تولقىن سەكىلدى، ۋاقىت وتە كەلە ادامداردىڭ مۇنداي حەند-مەيدكە دەگەن قىزىعۋشىلىعى ازايا تۇسەتىندەي كورىندى. قالاي ايتسام ەكەن، بۇل مەن ٴۇشىن جاي ەرمەك سياقتى بولاتىن. الايدا، ٴقازىردىڭ وزىندە كوپتەگەن ادامدار سۋرەت سالعان كيىمدەردى سۇراپ جاتادى. اسا كوڭىل بولە قويماعانىممەن، ارا-تۇرا اينالىسىپ ٴجۇردىم. سول ارالىقتا مەن جۇكتىلىگىمە بايلانىستى ەڭبەك دەمالىسىنا شىقتىم. ٴدال وسى دەكرەتتىك دەمالىستا مەن شىعارماشىلىقتاعى ٴوز بيىگىمە قول جەتكىزۋگە ٴتيىس ەكەنىمدى، شىندىعىندا ەش نارسەمەن اينالىسپايتىن دەكرەتتىك دەمالىستا ٴبىر نارسەمەن اينالىسۋ كەرەك ەكەنىمدى ٴتۇسىندىم. سول ۋاقىتتا مەن كيىمگە سۋرەت سالۋعا دەن قويا باستادىم. ەگەر، وعان دەيىن تەك تاپسىرىس بەرگەن بىردى-ەكىلى ادامنىڭ تاپسىرىسىن ورىنداسام، بۇل كەزدە جاڭا كيىمدەردى ارنايى ساتىپ الىپ، سولاردى ساندەۋگە كوشتىم.

- تاپسىرىستار كوپ بولدى ما؟ باستاپقىدا قانداي كيىمدەرگە سۋرەت سالدىڭىز؟

- تاپسىرىستار بولدى. الايدا، بۇل ٴىس ماعان قاراجات جاعىنان ەشقانداي تابىس اكەلگەن جوق. بۇل وزىندىك مەنىڭ ٴبىر پورتفوليوم بولدى دەگەن دۇرىس شىعار. وسى باعىتتا وزىندىك ٴبىر جاڭا ويلارىمدى جۇزەگە اسىرۋعا تالپىندىم. مەندە جاعالاردى ساندەۋ يدەياسى پايدا بولدى. ياعني، جاعالارعا سۋرەت سالىپ، ولاردى وزىندىك ٴبىر اكسەسسۋارعا اينالدىردىم. كوپشىلىك ۇناتتى. وسى ۋاقىت ىشىندە مەن اليا ۆالەرەۆنا اتتى ديزاينەرمەن («av» برەندىنىڭ يەسى – اگەنتتىك ەسكەرتپەسى) تانىسىپ، ونىڭ شوۋ-رۋمىندا ٴوز دۇنيەلەرىمدى تۇتىنۋشىلار نازارىنا ۇسىندىم. ول كىسى كوزىلدىرىك پەن باس كيىم ديزاينەرى. سوندىقتان، ٴبىز ەكەۋمىز بىرلەسىپ كوزىلدىرىكتەرگە كولابراسيا جاسادىق. كەيىننەن ول كوزىلدىرىكتەر ميلانداعى كورمەگە قويىلدى. بۇل مەن ٴۇشىن جاقسى تاجىريبە بولدى. ۋاقىت وتە كەلە، كۇز مەزگىلى قارساڭىندا مەن جاعالاردى ساندەۋدى ىسىرا تۇرىپ، ورامالدارعا سۋرەت سالۋعا كىرىستىم. وسى ۋاقىتتا ترانسفورمەر-ورامال پايدا بولدى. تۇتىنۋشىلار بۇل ورامالداردى جاقسى قابىلداپ، تاپسىرىستار تۇسە باستادى. ٴبىراق، ٴوز باسىم تاپسىرىس الماۋعا تىرىسامىن. ارينە، تاپسىرىسپەن جۇمىس جاساساڭ، بۇل اقشا دا، كۇنكورىس تە. ٴبىراق، ول تاپسىرىستا سۋرەتشى رەتىندە مەنىڭ ٴوز قىزىعۋشىلىعىم بولۋى كەرەك. ولاي بولماعان جاعدايدا، تاپسىرىستار سۋرەتشىنىڭ بويىنداعى سۋرەتشىنى ولتىرەدى. سوندىقتان، ۋاقىت وتە كەلە مەن تاپسىرىس الۋدى مۇلدە دوعاردىم. تەك ٴوز شابىتىممەن، شىن قالاپ تۇرسام عانا كيىم ساندەۋگە كىرىسەمىن دەپ شەشتىم.

- ال ٴقازىر قانداي دا ٴبىر جاڭا ٴارى تىڭ يدەيالار بار ما؟

- ٴقازىر مەن اشەكەي تاستارمەن كومكەرىلگەن تۇيرەۋىشتەر توپتاماسىن ازىرلەۋدەمىن. ٴقازىر دايىندالىپ جاتىر. ازىرشە، استانادا كۇن جىلي قويماعاندىقتان، ناعىز كوكتەم كەلگەنشە، ۇلگەرەمىز دەپ ويلايمىن. سول سياقتى، باس كيىمدەردى نەمەسە قىسقا جەڭ جەيدەلەردى ساندەۋدى دە قولعا العىم كەلەدى. ازىرشە، ناقتى تاڭداۋ جاساعان جوقپىن. جالپى، مەن ەكسكليۋزيۆتى دۇنيەلەردى جاساعىم كەلەدى.

- ٴبىر كيىمگە سۋرەت سالۋ قانشا ۋاقىتتى تالاپ ەتەدى؟

- جالپى، كيىمگە سۋرەت سالۋ ەشقاشاندا جىلدام بولا قويمايدى. سەبەبى، ٴسىز ماتاعا سۋرەت سالۋىڭىز كەرەك. ال، ٴوزىڭىز بىلەسىز، ماتانىڭ سىڭىرگىشتىگى وتە جوعارى. سوندىقتان، سۋرەت قانىق ٴتۇستى بولىپ شىعۋى ٴۇشىن بوياۋدى بىرنەشە رەت جاعۋعا تۋرا كەلەدى. شامامەن، 3-4 كۇن ۋاقىت كەتەدى.

- ال سۋرەت سالىنعان كيىمدەردى قالاي جۋۋ كەرەك؟ قانداي دا ٴبىر كۇتىمدى قاجەت ەتەدى مە؟

- البەتتە، بۇل كيىمدەردى تەك قولمەن جۋۋ كەرەك. سەبەبى، كىر ماشيناسىندا ٴجيى جۋۋ قالاي بولعاندا دا سۋرەتتىڭ وڭىپ كەتۋىنە الىپ كەلەدى. ارينە، ەگەر، كيىمىڭىز ۇزاق ۋاقىت سانىنەن ايىرىلماسىن دەسەڭىز، كيىمدى قولمەن جۋىپ، ٴبىرشاما اۋرەلەنۋگە تۋرا كەلەدى.

- ٴسىز ارلەپ-ساندەگەن دۇنيەلەردىڭ باعالارى جونىندە نە ايتا الاسىز؟

- جاعا 15 مىڭ، شارف پەن ترانسفورمەر ورامال 30 مىڭ تەڭگە تۇراتىن. ٴقازىر مەن تابىس تابۋدى ەمەس، ٴوز اتىمدى قالىپتاستىرۋدى ويلاپ ٴجۇرمىن. اقشا مەن ٴۇشىن تەك جۇمسالعان شىعىنداردىڭ ورنىن تولتىرۋ عانا. جالپى، دەكرەتتىك دەمالىس ايەل بالاسىنا ٴوزىن جوعالتىپ الماۋعا بارىنشا تىرىسۋى ٴۇشىن تۇرتكى بولادى ەكەن. مەن دە ادامدار مەنى ۇمىتىپ كەتەدى مە دەپ قورىقتىم. ارينە، مەن سونشالىقتى ۇلكەن جەتىستىككە قول جەتكىزە قويعان جوقپىن. سوندا دا، مەندە ٴبىر قورقىنىش بولدى. وسى قورقىنىش مەنىڭ يدەيالارىمدى جۇزەگە اسىرۋىما كۇش بەردى.

- ٴسىز سۋرەتشىسىز عوي. سوندىقتان، شىعارماشىلىعىڭىز كيىمدەردىڭ اينالاسىندا شەكتەلىپ قالماعان بولار. بۇدان بولەك، ٴقازىر قانداي كارتينامەن جۇمىس جاساپ جاتىرسىز؟

- ارينە، مەن جاس سۋرەتشىلەر وداعىنىڭ مۇشەسى بولعاندىقتان، ول جاقتى دا قامتۋىم كەرەك، قولدى سىلتەپ قويۋعا بولمايدى. الداعى ۋاقىتتا استانادا وداقتاعى جاس سۋرەتشىلەردىڭ كورمەسى وتەدى. سول كورمەگە مەنىڭ ەكى كارتينام قويىلادى. سوندىقتان، قىزۋ ەڭبەك ۇستىندەمىن دەسەم دە بولادى. جالپى، ٴوزىمدى الەۋمەتتىك پروبلەمالارعا كوزى اشىق ادام رەتىندە كورسەتكىم كەلەدى. ارينە، سيرياداعى سوعىس سەكىلدى تىم اۋقىمدى دۇنيەلەردى ٴوز تۋىندىلارىمدا كورسەتۋگە ماعان ٴالى ەرتە شىعار. ايتكەنمەن، الىسقا بارماي-اق، ٴوز ەلىمىزدەگى ٴبىرقاتار الەۋمەتتىك پروبلەمالاردى قوزعاعىم كەلەدى. ولار جوق ەمەس، بار، مويىنداۋ كەرەك. ٴقازىر سول كارتينالاردى كورمەگە دايىنداپ جاتىرمىن.

- اڭگىمەڭىزگە كوپ راحمەت!


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي