BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تيمۋر راحيموۆ: ادالدىق – ماراپاتتان دا ماڭىزدى ەكسكليۋزيۆ

فوتو: Нұржас Жақсыбай

بيىل قاڭتار ايىندا استانا قالاسىندا بەيتانىس قىزدى توناپ، قاشىپ كەتپەك بولعان وزبەكستان ازاماتى ۇستالعان. وقيعانىڭ جالعىز كۋاگەرى تيمۋر رىسقالي ۇلى كۇدىكتىنى ۇستاپ، پوليسيا قىزمەتكەرلەرىنە تاپسىرعان. «وتان قورعاۋشىلار» كۇنى قارساڭىندا baq.kz ٴتىلشىسى تيمۋر راحيموۆپەن سۇحباتتاستى.

- تيمۋر مىرزا، قاي ولكەنىڭ تۋماسىسىز؟ اسكەري قىزمەتكە قالاي كەلدىڭىز؟

- شىعىس قازاقستان وبلىسى، بەسقاراعاي اۋدانى، بەلوكامەنكا اۋىلىندا 1985 جىلى دۇنيەگە كەلدىم. جاس ۇلان ليسەيىنە ٴتۇسۋدى انام ۇسىندى. ەگەر سول كەزدە انام ايتپاعاندا بۇگىن كىم بولاتىنىمدى مۇلدە ەلەستەتە المايمىن. 11 جاسىمنان باستاپ ٴومىرىمدى اسكەري قىزمەتپەن بايلانىستىردىم. سەمەي قالاسىنداعى ش.ۋاليحانوۆ اتىنداعى «جاس ۇلان» مەكتەبىندە ٴۇش جىل وقىدىم. وتباسىلىق جاعدايلارعا بايلانىستى وقۋىمدى قاراپايىم مەكتەپتە جالعاستىرۋعا تۋرا كەلدى. مەكتەپ بىتىرگەن سوڭ، پەتروپاۆل قالاسىنا اسكەري ۋچيليششەگە وقۋعا ٴتۇستىم. 2003 جىلى «كومانديردىڭ تاربيە جانە الەۋمەتتىك جۇمىستار بويىنشا كومەكشىسى» ماماندىعىمەن ۋچيليششەنى ٴتامامدادىم. سودان كەيىن، ۋچيليششەنى اياقتاعان جاس اسكەريلەردى ايماقتارعا قىزمەتكە ٴبولدى. مەن پاۆلودار قالاسىنا جۇمىسقا ورنالاستىم.

- مايور شەنىن العان كەزگە دەيىنگى ٴجۇرىپ وتكەن جولىڭىزدى ايتىپ بەرسەڭىز؟!

- ٴۇش جىل بويى پاۆلودار قالاسىنداعى اسكەري بولىمدە جۇمىس ىستەگەن سوڭ وسكەمەن قالاسىنا اۋىستىم. شىعىس قازاقستان وبلىسىنىڭ شەمونايحا اۋدانىندا قىزمەتتە ٴجۇرىپ، كاپيتان شەنىن الدىم. ودان كەيىن وسكەمەن قالاسىندا تاربيە جۇمىستارى بويىنشا باتالون كومانديرىنىڭ ورىنباسارى بولدىم. 2015 جىلى قىزمەتىم استانا قالاسىنا اۋىسىپ، 2016 جىلى مايور شەنىن الدىم. 2017 جىلى ۇلتتىق ۇلاننىڭ باس قولباسشىسى 3660 اسكەري ٴبولىمىنىڭ كومانديرىنىڭ تاربيە جانە الەۋمەتتىك-قۇقىقتىق جۇمىستارى جونىندەگى ورىنباسارى قىزمەتىنە كىرىسۋىمدى بۇيىردى.

- قىستا بولعان وقىس وقيعا جايلى ٴوز اۋزىڭىزدان ەستىسەك...

- 29 قاڭتار كۇنى بولىمدەگى جۇمىستاردىڭ كەش اياقتالۋى سەبەبىنەن سول كۇنى ۇيگە كەش قايتتىم. تۇنگى 12-گە قاراي ۇيگە كىرمەس بۇرىن تەلەفونمەن سويلەستىم. سول كەزدە بەيتانىس قىز بەن جىگىتتىڭ ۇرسىسىپ جاتقانىن ەستىدىم. جىگىت قىزدى جۇلقىلاپ، قىز بولسا ايقالاپ جاتتى. كەز كەلگەن ەر ازاماتتىڭ باراتىنىنداي مەن دە ولاردىڭ قاسىنا جۇگىرىپ باردىم. سول كەزدە جىگىت قىزدىڭ بەتىنەن ۇرىپ جىبەردى. قۇلاپ قالعان قىزدىڭ جاعدايىنا كوز جەتكىزگەن سوڭ كۇدىكتىنىڭ سوڭىنان قۋدىم. «توقتا»، - دەپ قانشا ايقالاسام دا بولمادى. الدىمىزدان بىرەۋ شىعىپ، كومەكتەسەر دەپ ويلادىم. ٴبىراق قاقاعان قىستىڭ تۇنىندە ونداي ەشكىم بولمادى. ايتەۋىر، جەتىپ، ۇستاپ الدىم. جاساق كەلىپ، قولىنا كىسەن سالدى. وقيعا ورنىنا كەلگەندە جەردە قىزدىڭ سومكەسى مەن پىشاق جاتقانىن كوردىم. قىزدى جەدەل-جاردەم قىزمەتى الىپ كەتىپتى. مەنىڭ جەكە دەرەكتەرىمدى پوليسيا قىزمەتكەرلەرى جازىپ الدى. كۋاگەر رەتىندە بولىمشەگە شاقىرعاندا ونىڭ وزبەكستان ازاماتى ەكەنى جانە وعان قاتىستى رەسەي فەدەراسياسىندا قىلمىستىق باپ بويىنشا ٴىس قوزعالعانى انىقتالدى. جاقىندا سارىارقا اۋداندىق سوتىنا كۋاگەر رەتىندە شاقىردى. قىلمىسكەر سول كۇنى قىزدان بولەك ەكى ازاماتتى توناعان ەكەن. قاراقشىلىق بابىمەن بەس جىل التى ايعا باس بوستاندىعىنان ايىرىلدى.

- العان ماراپاتتارىڭىز ٴسىز ٴۇشىن قانشالىقتى قۇندى؟

- «وتان قورعاۋشىلار» مەرەكەسى قارساڭىندا باسشىلىق «ەرلىگى ٴۇشىن» مەدالىمەن ماراپاتتادى. قىستا بولعان وقيعادا ىستەگەن ٴىسىمدى قانداي دا ٴبىر ەرلىك دەپ ويلامايمىن. سەبەبى، مەن سەكىلدى ەلىمىزدىڭ وزگە ازاماتتارى دا ىستەي الار ەدى. دەگەنمەن، بۇل ماراپاتتى ۇلتتىق ۇلان باس قولباسشىسى گەنەرال-لەيتەنانت رۋسلان فاتيح ۇلى جاقسىلىقوۆتىڭ، تاربيە جانە الەۋمەتتىك-قۇقىقتىق جۇمىستارى جونىندەگى باس قولباسشىنىڭ ورىنباسارى مۋحامەتقالي ساتوۆتىڭ ماعان بىلدىرگەن سەنىمى دەپ بىلەمىن. وسكەمەن قالاسىندا قىزمەت ىستەگەندە «قوعامدىق ٴتارتىپتى ساقتاعانى» ٴۇشىن جانە «تاربيە جانە الەۋمەتتىك-قۇقىقتىق» ينستيتۋتىنىڭ 25 جىلدىعى مەدالدارىمەن ماراپاتتالعان ەدىم. ٴيا، ارينە، ٴارقايسىسى مەن ٴۇشىن قىمبات. ماراپاتتان دا ماڭىزدى دۇنيە – ادالدىق دەر ەدىم. قيىن ساتتەردە وڭتايلى شەشىم قابىلداي بىلسەڭ، ماماندىعىڭا ادال بولساڭ – سول قىمبات.

- اسكەري كافەدرا مەن اسكەرگە بارۋدىڭ تەڭەسۋى تۋرالى نە ايتاسىز؟

- اسكەري كافەدرانى بىتىرگەن ازاماتتىڭ بەلگىلى ٴبىر دەڭگەيدە ٴوز دارەجەسى جانە اسكەري ٴبىلىمى بولارى انىق. ٴبىراق، اسكەرگە بارعان ادامنىڭ «ٴومىردىڭ ۇلكەن مەكتەبىندە» تاجىريبە جيناپ، شىڭدالىپ كەلەرى ٴسوزسىز. دەمەك، ەكەۋىنىڭ اراسىندا ايىرماشىلىق كوپ. ناعىز ەر ازامات رەتىندە قالىپتاسۋ ٴۇشىن، ياعني قيىندىقتى كورۋ ارقىلى جەتىلۋ ٴۇشىن اسكەرگە بارۋ كەرەك.

- وتباسىڭىز تۋرالى ايتساڭىز؟ ەر ازاماتتى قالاي تاربيەلەگەن دۇرىس؟

- ال-تاير جانە نۇر-تاير ەسىمدى ەكى ۇلىم بار. وتباسىندا كەز كەلگەن اكە سەكىلدى بالالارىمنىڭ اناسىن جانە ۇلدارىمدى جاقسى كورەمىن. جۇمىستاعى قىم-قۋىت تىرشىلىكتەن شارشاپ كەلگەنىڭدە ۇلدارىڭ موينىڭا اسىلىپ، قۇشاقتاسا بار شارشاعانىڭدى ۇمىتاسىڭ. ٴبىراق، ٴبىر وكىنشتىسى، جۇمىستان تىس تەك دەمالىس كۇندەرى عانا بالالارعا ۋاقىت بولەمىن. قىزمەتتە قانشا قاتالدىق كەرەك بولسا دا، ۇلدارىما جۇمساقپىن. ماعان قاراعاندا، انالارى سابينا قاتتى تالاپ قويادى. ەر ازاماتتى جىعىلعان-سۇرىنگەنىنە شاعىمدانبايتىنداي جانە ىزاقورلىق پەن كورسەقىزارلىقتان اۋلاق ەتىپ تاربيەلەگەن ٴجون.

- تيمۋر رىسقالي ۇلى، التىن ۋاقىتىڭىزدى قيىپ، سۇحبات بەرگەنىڭىزگە العىس ايتامىز. «وتان قورعاۋشىلار» مەرەكەسىمەن قۇتتىقتايمىز!

ۆيدەو: نۇرجاس جاقسىباي


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي