BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ول پرەزيدەنت بولسا دا، ۇستازدارىنىڭ الدىندا ٴوزىن شاكىرت سەزىنەدى – ەلباسى سىنىپتاسى ەكسكليۋزيۆ

«تاريح ٴوزى جاسالمايدى، ونى جاسايتىن جەكەلەگەن تۇلعالار» دەگەن پىكىر ٴجيى ايتىلادى. ەندەشە قازاق حالقىنىڭ، قازاقستان مەملەكەتىنىڭ دە تاريحىن جاساپ جاتقان جەكەلەگەن تۇلعالار بار. ولار از با، كوپ پە ونى ەرتەڭگى ۋاقىت كورسەتەدى. دەگەنمەن ٴبىر انىق دۇنيە بار، ول – تاۋەلسىز قازاقستاننىڭ دامىعان، دامۋشى كەزەڭىندە وسى ەلدىڭ تاريحىمەن بىتەقايناسىپ، «بالتالاساڭ اجىراماستاي» بولىپ كەتكەن ٴبىر تۇلعانىڭ بار ەكەندىگى. ول – تاۋەلسىز قازاقستاننىڭ تۇڭعىش پرەزيدەنتى نۇرسۇلتان ٴابىش ۇلى نازاربايەۆ.

1 جەلتوقسان – تاريحتا العاش رەت قازاقستان تاۋەلسىز مەملەكەت رەتىندە سايلاۋ وتكىزگەن كۇن. وسى سايلاۋدا 98،2 پايىز داۋىس جيناعان نۇرسۇلتان ٴابىش ۇلى ازات قازاقتىڭ العاشقى پرەزيدەنتى بولىپ سايلاندى. بۇل – 1991 جىل بولاتىن. ارعا 20 جىل سالىپ، 2011 جىلى 10 جەلتوقسان كۇنى تۇڭعىش سايلاۋ وتكەن كۇندى تۇڭعىش پرەزيدەنت كۇنى مەرەكەسى رەتىندە اتاپ ٴوتۋ تۋرالى شەشىم شىقتى. 2012 جىلدان بەرى مەملەكەتتىك دەڭگەيدەگى مەرەكە رەتىندە تويلاناتىن بۇل مەيرام بيىل بەسىنشى رەت وتەدى.

وسىعان وراي ەلباسىنىڭ جاستايىنان قاتار وسكەن قۇرداسى، ٴارى ٴبىر سىنىپتا بىرگە وقىعان سىنىپتاسى بولاتجان ابدىحان ۇلىن اڭگىمەگە تارتقان ەدىك. ٴبىر كەزدەگى بالا شاكىرت، قازىرگى قارت پروفەسسور بولاتجان ەلباسىنىڭ ەرەكشە قىرلارىن ەسكە الىپ، بالالىق شاقتاعى ۇمىتىلماس ساتتەردى اڭگىمە قىلدى.

«مەكتەپتە بىرگە وقىدىق. بۇل كىسى سول كەزدىڭ وزىندە جەكە-دارا كورىنىپ تۇراتىن ەدى. كومسومول كوميتەتىنىڭ باسشىسى بولدى. سول كەزدىڭ وزىندە ٴبىز سەكىلدى بالا بولىپ، ويىن قۋعانىن كورمەپپىن. ۇلكەن كىسىلەرمەن بىرگە ٴجۇرىپ، بىزدەن الدەقايدا ۇلكەن ويلار ايتاتىن ەدى. ويىن بالاسى بولساق تا، ونىڭ بولاشاعىنان ۇلكەن ٴۇمىت كۇتتىرەتىن ازامات بولارىن ٴبارىمىز دە بايقايتىن ەدىك. ٴتىپتى ٴبىزدىڭ ۇستازداردىڭ ٴبىرى: «سەنىڭ بولاشاعىڭ ۇلكەن» دەگەندى سول كەزدە بۇل كىسىگە ٴجيى ايتاتىن» - دەيدى ەلباسىنىڭ سىنىپتاسى.

ەلباسىنىڭ ەرەكشە قابىلەتتىلىگىن، ٴوز ورتاسىندا ۇنەمى كوشباسشى بولا بىلەتىن العىرلىعىن ٴسوز ەتكەن سىنىپتاسى نۇرسۇلتان ٴابىش ۇلىنىڭ بالا كەزىنەن سپورتتى جاقسى كورەتىنىن ايتادى.

«ول وتە جاقسى سپورتشى بولاتىن. شامالعان مەن ٴبىز وقيتىن مەكتەپ اراسى 15-16 شاقىرىم جەر ەدى، سوعان ۇنەمى شاڭعىمەن كەلەتىن. جولدىڭ ويلى-قارلىسىنا قاراماستان تاڭەرتەڭ وقۋعا كەلىپ، ٴتۇس قايتا قايتىپ كەتەتىن. نۇرسۇلتان ٴابىش ۇلى ادەبيەتكە دە وتە العىر بولدى. دومبىرامەن ٴان ايتۋعا قۇشتار ەدى. مەكتەپتە جينالىپ الىپ دومبىرامەن ٴان ايتاتىن ەدىك. زامان قازىرگىدەي ەمەس، توي-تومالاقتا، جيىنداردا ٴان ايتىپ، قىزدارمەن ايتىسا كەتەتىن ەدىك. سونداي كەزدە ٴبارىمىز دە بۇل كىسىنىڭ اۋزىنا قارايتىنبىز. ونداي ساتتەردە ونىڭ دارىندىلىعى دا، ٴازىلقويلىعى دا، ٴسوز تابا بىلەر شەشەندىگى مەن سۋىرىپ سالمالىعى دا بايقالاتىن. ول قاشاندا ٴوز كۇرداستارىنان كوش ىلگەرى تۇراتىن» - دەيدى بالالىق شاعىن ەسكە العان پروفەسسور.

بالالىق شاقتىڭ ۇمىتىلماس جىلدارىن ەسىنە تۇسىرگەن قارت پروفەسسور سول كەزدە بالا نۇرسۇلتانعا جاسالعان قياناتتى دا ايتتى.

«ول كىسى مەكتەپتى «التىن مەدالعا» ٴبىتىرۋى كەرەك ەدى. ٴبىراق ٴبىر مۇعالىمدەردىڭ كەسىرىنەن التىنعا بىتىرە الماي قالدى. وندا دا قازاق ٴتىلىنىڭ جوعىن جوقتاعانى ٴۇشىن، نەگە قازاق ٴتىلى وقىتىلمايدى دەگەنى ٴۇشىن كەيبىر ۇستازدارى باعاسىن شەگەرىپ تاستاعان ەدى. «كۇمىس مەدالمەن» اياقتادى، ٴبىراق التىن المادىم دەپ وكىنگەن ەمەس. جانە ول كەزدە وقۋ ەمەس، ەڭبەك ٴبىرىنشى ورىندا ەدى عوي. ونجىلدىقتى بىتىرگەن سوڭ، مەكتەپ بىتىرۋشىلەرى ٴبىر جەرگە جيىلىپ، ەڭبەككە اتتانۋ كەرەك بولاتىن. سول جۇمىسقا بارعان جەردە ٴوزىڭدى كورسەتىپ، سول ارقىلى جاڭاعى جەر جولداما بەرىپ، سودان كەيىن ولار وزدەرى اقشاسىن تولەپ، وقىتاتىن ەدى. سونداي جۇيە بويىنشا ٴبىز مال باعۋعا كەتتىك، بۇل كىسى تەمىرتاۋعا تارتتى. قوي باققاندار وقۋعا 4-5 جىلدان كەيىن عانا تۇستىك، بۇل كىسى ٴبىر جىلدان سوڭ وقۋعا اتتانىپ كەتتى» - دەيدى بولاتجان مۇستافايەۆ.

بولاتجان ابدىحان ۇلى بالالىق شاقتى وسىلاي سۇحباتتاردا عانا ەمەس، كەزدەسىپ، جولىعىسىپ، بارلىعى دا باس قوسىپ وتىرىپ ەسكە الاتىندارىن ايتادى.

«ٴبىزدىڭ سول كەزدەگى مەكتەپ ديرەكتورىمىز ومىردەن ٴوتىپ كەتتى. ديرەكتوردىڭ ورىنباسارى 98 جاسقا كەلدى، ٴالى بار. بارلىعىمىز باس قوسقان كەزدە ول كىسى دە ورتامىزدا بولادى. سوندايدا نۇرسۇلتان ٴابىش ۇلى ٴوز مانسابىنىڭ جوعارى ەكەنىنە، ەل باسقارىپ وتىرعان پرەزيدەنت ەكەنىنە قاراماستان ، سىنىپتاستارىمەن قاتار وتىرىپ، ۇستازدارىنا قىزمەت كورسەتىپ، ولاردىڭ الدىندا ٴوزىن سول باياعى شاكىرت قالپىندا سەزىنەدى. ٴبىز ول كىسىنىڭ سول قاسيەتىنە ٴتانتى بولامىز. ٴبىزدىڭ ٴار قايسىمىزدىڭ جاعدايىمىزدى سۇراپ، بارلىق جاعدايىمىزدان حاباردار بولىپ وتىرادى» - دەيدى پرەزيدەنتتىڭ سىنىپتاسى.

«مۇنداي كەزدەسۋلەر كوپ بولا بەرمەيدى. ٴبىز دە ٴوز كەزەگىمىزدە ول كىسىنى قولداپ، ٴاربىر باستاماسىنا تىلەكشى بولىپ وتىرامىز» - دەگەن پروفەسسور «ەلباسىنىڭ سىنىپتاستارى» كىتابىنىڭ قالاي جارىق كورگەنىن ايتتى.

«ەلباسى جايلى ەلىمىزدە جارىق كورگەن كىتاپتار كوپ. وسىنى ەسكەرە وتىرىپ ٴبىز، «ەلباسىنىڭ سىنىپتاستارى» دەگەن كىتاپتى قۇراستىرىپ شىقتىق. ارينە، ٴبىزدىڭ ورتامىزدا جازۋشى جوق، ٴبىراق عىلىمي قىزمەتكەرلەر، ٴتۇرلى سالادا ۇلكەن-ۇلكەن قىزمەتتە بولعان كىسىلەر بار. سونىڭ بارلىعى بىرلەسە وتىرىپ، «ٴۇشقوڭىر – التىن بەسىگىم» دەگەن تاعى ٴبىر ۇلكەن كىتاپ شىعاردى» - دەيدى بولاتجان ابدىحان ۇلى ەستەلىگىنىڭ سوڭىندا.

بولاتجان ابدىحان ۇلى مۇستافايەۆ – س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پروفەسسورى، اۋىل شارۋاشىلىق عىلىمىنىڭ كانديداتى، بيوكونۆەرسيا عىلىمي-تاجىريبەلىك ورتالىعىنىڭ جەتەكشىسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي