BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ارمان ٴاشىموۆ: جەڭىلمەگەن سپورتشىنى نوكاۋتقا تۇسىرگەن كەزدە ٴۇش مىڭ ادام قوڭىراۋ شالدى

ەلىمىزدە سوڭعى ۋاقىتتا ەرەجەسىز جەكپە-جەككە دەگەن قىزىعۋشىلىق ارتىپ، سپورتتىڭ وسى تۇرىمەن اينالىساتىن جاستاردىڭ قاراسى كوبەيىپ كەلە جاتىر. سپورتتىڭ بۇل سالاسىندا باس بارماقپەن باعالايتىن، الەمدىك ارەنالاردا قارسىلاستى قاھارىمەن قايمىقتىرعان تارلاندارىمىز از ەمەس. قۋات حاميتوۆ، ارمان وسپانوۆ، ارداق نازاروۆ، بەيبىت نازاروۆ، قايرات احمەتوۆ سىندى جامپوزداردىڭ ەرلىگىن ٴقازىر جۇرت جاتقا سوعىپ ٴجۇر.

جاقىندا ينگۋشەتيا جەرىندە الەمگە ايگىلى m1 global ٴتۋرنيرى ٴوتىپ، سول تۋرنيردە ارمان ٴاشىموۆ ەسىمدى قازاق بالاسى كەرەمەت نوكاۋتىمەن كوپشىلىكتىڭ نازارىن اۋداردى. ونىڭ وسى ٴبىر جەكپە-جەگىن youtube بەينە-پورتالىندا قاراعاندار سانى ميلليوننان اسىپ كەتكەن. 25 جاستاعى قازاق بالاسىنىڭ ەرلىگىن وزگەلەر جارىسا جازىپ جاتقان ساتتە، بىزدە بىرەر اۋىز سۇحبات الىپ، ارمان-ماقساتتارىن تىڭداساق دەگەن ەدىك.

ارمان، تاياۋدا جەتكەن ٴىرى جەڭىسىڭىزبەن قۇتتىقتايمىن. وسى m1 global ٴتۋرنيرى تۋرالى اڭگىمەلەپ بەرىڭىزشى؟

  • راحمەت! m1 global ٴتۋرنيرى – تانىمالدىلىعى جاعىنان الەمدەگى ۇزدىك بەستىككە كىرەتىن ٴىرى حالىقارالىق جارىس. سوندىقتان بۇل سايىسقا قاتىسىپ، باق سىناۋ وتە ۇلكەن مارتەبە دەپ ايتار ەدىم. ماعان دا وسىنداي ٴىرى الەمدىك دوداعا قاتىسۋ كەرەك بولىپ جۇرگەن. ويتكەنى، ٴوزىڭىز بىلەسىز، سپورتشى ٴبىر ورىندا تۇرىپ قالماۋ كەرەك، ۇنەمى فيزيكالىق دايىندىعىن شىڭداپ جۇرمەسە وسپەيدى. سودان وسىنداي ۇسىنىس ٴتۇستى، ٴبىز دە بىردەن ويلانباستان كەلىسىم بەردىك. دەگەنمەن، جارىسقا نەبارى ەكى اپتا قالعاندا ۇسىنىس العاندىقتان، دايىندالۋعا كوپ ۋاقىتىمىز بولمادى. ٴبىراق، باپكەرىم ەكەۋمىز وسى ەكى اپتا ۋاقىتتىڭ ٴوزىن ٴتيىمدى پايدالانۋعا بارىمىزدى سالدىق. تاڭەرتەڭ 10-15 شاقىرىمنان جۇگىردىم، قالعان ۋاقىتتى دەنە جاتتىعۋلارىنا جانە سپاررينگ سايىستارعا ارنادىق. ارينە، فيزيكالىق تۇرعىدان جارىسقا 100 پايىز دايىن بولدىم دەي المايمىن، ويتكەنى، ٴبارىبىر ەكى اپتا از ۋاقىت. دەسە دە پسيحيولوگيالىق تۇرعىدان دايىن بولدىم. ويتكەنى، وزىمدە وسىنداي جارىستى اڭساپ جۇرگەن بولاتىنمىن.

سٴىزدى ينگۋشەتيا قالاي قارسى الدى؟ قارسىلاستارىڭىز الدىن الا انىقتالدى ما؟

  • ينگۋشەتيا ەل ۇشاقتان تۇسكەن ساتتەن باستاپ اياعىمىزدى جەرگە تيگىزبەي كۇتىپ الىپ، ەڭ كەرەمەت دەگەن قوناقۇيلەرىنە ورنالاستىردى. جارىسقا دەيىنگى بارلىق جاعدايىمىزدى جاسادى. قارسىلاستار ٴار كەزدە ٴارقالاي. ٴبارى جەرەبەگە بايلانىستى. ەگەر الدىن الا انىقتالىپ جاتسا، وندا ينتەرنەت ارقىلى ونىڭ جەكپە-جەكتەرىن كورىپ دايىندالامىز. بۇل جارىسقا وسال سپورتشى كەلمەيدى. جالپى، مما تۋرنيرلەرىنىڭ ىشىندە ufc مىقتى سانالادى عوي. ونىڭ ەرەكشەلىگى جەكپە-جەكتەرى سەگىز بۇرىشتىڭ ىشىندە وتكىزىلەدى. ال m1 global جارىستارى كادىمگى بوكس سەكىلدى شارشى الاڭدا وتەدى. دەگەنمەن، ەرەجەلەرى، ۇپاي بەرۋ زاڭدىلىقتارى، قولداناتىن ادىس-تاسىلدەرى بويىنشا وتە ۇقساس، ٴتىپتى بىردەي دەسە دە بولعانداي.

سٴىز سۇلاتقان جىگىت وسى كۇنگە دەيىن جەڭىلمەي كەلگەن ەكەن. ونىڭ وسال تۇسىن قالاي تاپ باستىڭىز؟

  • ارينە، بۇل جولى ماعان ساتتىلىك سەرىك بولدى دەسەم بولادى. ونىڭ ۇستىنە جەڭىسكە دەگەن ىنتا-جىگەر دە تۇلا بويىمدى جاۋلاپ العان سەكىلدى. البەتتە، قارسىلاسىم گادجيمۋراد اليەۆتىڭ دە جەڭىلۋ ٴۇشىن كەلمەگەنى انىق قوي. ٴبىراق، مەن بارىنشا ونىڭ كەمشىن تۇستارىن تەز بايقاپ، ٴادىس قولدانۋعا تىرىسىپ باقتىم. اليەۆ وسىعان دەيىن m1 global تۋرنيرىندە 3-4 كەزدەسۋ وتكىزگەن، بىر-ەكى رەت اسۆ دوداسىندا دا سىنعا تۇسكەن. تىكەدەن تىك تۇرىپ توبەلەسكەندە دە، پارتەردە دە ونىڭ باسىمدىعى بايقالىپ تۇردى. ٴبىراق، مەن ونى نوكاۋتقا تۇسىرەتىن كەزدى ٴساتتى پايدالانىپ كەتتىم.

جەڭگەننەن كەيىنگى كوڭىل-كۇيدىڭ كوتەرىڭكى بولاتىنى تۇسىنىكتى. وسى جەڭىستەن سوڭ قولداۋشىلارىڭىز بەن جانكۇيەرلەرىڭىزدىڭ قاتارى ارتقان شىعار؟

  • ٴيا، بۇل جەڭىس مەنىڭ اتاق-دارەجەمدى كوتەرۋگە ۇلكەن مۇمكىندىك بەردى. ٴوزىم ٴتىپتى بۇلاي بولادى دەپ كۇتپەگەن ەدىم. جەكپە-جەكتەن كەيىن تەلەفونىم قوڭىراۋلار مەن قۇتتىقتاعان حابارلامالارعا تولىپ قالدى. اۋەلى اتا-انام حابارلاسىپ، قۇتتىقتادى. ارتىق ايتقانىم ەمەس، جەكە وزىمە قوڭىراۋ شالىپ 3000-داي ادام حابارلاستى-اۋ دەيمىن. وسىنىڭ ٴبارى ماعان ۇلكەن كۇش-قۋات سىيلايدى. ەندى تەك ەڭبەكتەنۋ كەرەك. ٴوزىمنىڭ ارمانىم – الەم مويىنداعان چەمپيونعا اينالۋ. مەيلىنشە بيىك ماقسات قويساق، سوعۇرلىم سوعان جەتۋ وڭايىراق بولادى. سوندىقتان قازاقتىڭ اتىن شىعارار سپورتشى بولسام دەپ ارماندايمىن. جانە وعان جەتەتىن مۇمكىندىكتەر مەندە بار.

ال جەكپە-جەكتەرگە تاكتيكانى قالاي تاڭداپ الاسىز؟

  • ەگەر قارسىلاسىم بالۋان بولسا وندا ونىمەن بارىنشا تىك تۇرىپ توبەلەسۋگە تىرىسامىن. سەبەبى بالۋاندار پارتەردە، ياعني، جاتىپ توبەلەسكەن كەزدە ٴوز ىڭعايىنا قاراي جىعىپ الىپ، جەڭىپ كەتۋى مۇمكىن. ال نەگىزىندە ٴوزىم قورعانىستا ٴجۇرىپ العاندى، سىلبىر توبەلەسكەندى، ٴتۇرلى قيتۇرقى ايلا-ارەكەتتەردى قولدانعاندى قالامايمىن. مەيلىنشە، اشىق توبەلەس كورسەتپەۋگە تىرىسامىن. سوندا جەڭىلگەن قارسىلاس تا جەكپە-جەكتەن كەيىن اناۋ-مىناۋ دەپ ٴسوز ايتپايدى.

ال ٴوزىڭىز وسىعان دەيىن سپورتتىڭ قاي تۇرلەرىمەن اينالىستىڭىز؟ قازىرگى سپورتتىق فورماڭىز بەن جەتىستىگىڭىزگە كوڭىلىڭىز تولا ما؟

  • پاۆلودار وبلىسى، باياناۋىل اۋدانى، جوسالى دەگەن اۋىلدا دۇنيەگە كەلدىم. ٴبىراق 3 جاسقا تولعان كەزىمدە وتباسىمىزبەن الماتى وبلىسى بەساعاش قالاسىنا كوشىپ كەتتىك. ٴقازىر وسىندا تۇرامىز. بەساعاشتا وقىپ جۇرگەن كەزىمىزدە 7-سىنىپتان باستاپ بوكسقا قىزىقتىم. العاشقىدا مەنى ازات حاسانوۆ دەگەن باپكەر جاتتىقتىرعان. كەيىن ەرلان تاتتىبايەۆتىڭ قول استىندا جاتتىقتىم. التى جىل بويى ەرلان اعايىم جاتتىقتىردى، باپتادى، جارىستارعا الىپ باردى. شارشى الاڭدا شىڭدالۋىما كومەكتەستى. ٴبىراق، بوكستا كوپ تۇراقتاپ قالا المادىم. سەبەبى كوپتەگەن جارىستا ادىلەتسىزدىكتەرگە تاپ بولدىم، كوپە-كورنەۋ قارسىلاستارىمنىڭ قولىن كوتەرگەن ساتتەر كوبەيىپ كەتتى. وسىدان كەيىن بوكستى تاستاپ، دجي-دجيتسۋمەن اينالىستىم. سپورتتىڭ بۇل تۇرىنەن قازاقستان چەمپيوناتىن ٴۇش رەت جەڭگەننەن كەيىن كيكبوكسقا كوشتىم. بۇل جەردە دە قازاقستان بويىنشا قارسىلاس شاق كەلتىرمەگەن ەدىم. سودان 2014 جىلى ٴبىر كۇنى سپورت زالدا جاتتىعىپ جاتقان كەزىمدە پەتروپاۆل قالاسىندا مما ەرەجەسىز جەكپە-جەگىنەن قازاقستان چەمپيوناتى وتەتىنىن ەستىپ قالدىم. كەلىپ، تىركەلىپ، سالماق ولشەگەننەن كەيىن العاشقى جەكپە-جەكتەردى قاراپ تۇرعانمىن. ٴبىر كەزدە ەكى جىگىت بىرىنەن سوڭ ٴبىرى ٴبىر-بىرىن وڭدىرماي تەۋىپ قۇلاتىپ ٴتۇسىردى. وسى كورىنىستەن سوڭ مەندە ٴبىرتۇرلى قورقىنىش پايدا بولىپ، ٴسال قوبالجىپ قالدىم. ويتكەنى، قانشا دەگەنمەن ەرەجەسىز عوي. دەگەنمەن، جەكپە-جەككە شىققان كەزدە بويىمدا سەنىمدىلىك پايدا بولىپ، تەك جەڭىسكە ۇمتىلۋمەن بولدىم. بۇل ماقساتىم ناتيجەسىز بولعان جوق، سول جولعى تۋرنير كۋبوگىن جەڭىپ العان بولاتىنمىن ٴوز سالماعىمدا. ال قازىرگى ٴوزىمنىڭ سپورتتىق جاعدايىما كوڭىلىم تولادى. بۇل ەندى بولدىم-تولدىم دەۋ ەمەس، دەسە دە بارلىعىنا سابىرمەن بىرتىندەپ جەتۋدى قالايتىن اداممىن. وسى ٴىرى جەڭىسكە جەتكەننەن كەيىن m1 global ۇيىمداستىرۋشىلارى ماعان وزدەرى كەلىپ، «سەنىمەن كەلىسىمشارتقا وتىرامىز» دەپ ايتتى. ٴقازىر سول كەلىسىمشارتتى كۇتىپ وتىرمىز.

سپورتشى رەتىندە اتاق پەن قاتار اقشا دا كەرەك عوي. تابىس جاعىن قالاي رەتتەپ جاتىرسىز؟

  • قازىرگى تاڭدا مەن «مۇستافا وزتۇرىك» سپورتتىق كلۋبىنىڭ مۇشەسىمىن، سول جەردە قىزمەت اتقارامىن. سول ورتالىقتىڭ پرەزيدەنتى مەيىربەك قايىر سەيسەبەك دەگەن اعامىز ۇنەمى قولداۋ كورسەتىپ وتىرادى. ول كىسى رۋحاني قولداۋ ٴبىلدىرىپ، جول كورسەتىپ، اقىلىن اياماي، قاراجات جاعىن دا ٴوز مويىنىنا الىپ، كومەك كورسەتەدى. سوندىقتان ول كىسىگە دەگەن العىسىم شەكسىز. وسىنداي جاعداي جاساپ وتىرعاندا مەن تەك جەڭىستەرگە جەتۋىم كەرەك. قازىرگى كەزدە نۇرلان امانقۇلوۆ جانە نۇرلان مامىراليەۆ دەگەن بىلىكتى باپكەرلەرىممەن بىرگە جاتتىعىپ ٴجۇرمىن. وتباسىم دا قولداۋشىلارىم رەتىندە اركەز قاسىمنان تابىلادى. اكەم كەڭەس وداعى كەزىندە سامبومەن اينالىسقان. سپورتقا دەگەن قىزىعۋشىلىق، جەڭىسكە دەگەن جىگەر سول كىسى ارقىلى قانمەن كەلگەن قاسيەت شىعار دەپ ويلايمىن. ال انام بولسا باستاپقىدا سپورتقا كەلۋىمە قارسى بولدى. ونىڭ ۇستىنە جەكپە-جەك وتە قيىن سپورت ٴتۇرى. اياعىڭدى اۋىرتىپ الاسىڭ، جاراقات الىپ قالاسىڭ دەپ ۇنەمى الاڭداپ وتىرادى. ٴدال قازىرگى ساتتە ەشقانداي جاتتىعۋ جۇمىستارى ٴجۇرىپ جاتقان جوق. سەبەبى، اللا قالاسا 16 تامىزعا ۇيلەنۋ تويىمدى جوسپارلاپ وتىرمىن. سودان كەيىن بىردەن سپورتتىق كۇن تارتىبىنە كوشەمىن.

راحمەت ارمان! ساعان ساتتىلىك تىلەيمىز!


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي