BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

الەكسەي ني: لوندوندا ٴيليننىڭ جەڭىسىنەن سوڭ «سەندەردىڭ بۇلارىڭدى الەم كەشىرمەيدى» دەگەندەر بولعان

ونىڭ بۇعان دەيىن اتقارعان جۇمىسىنا ٴتانتى بولۋعا بولادى. رەنجىپ، سىنايمىن دەسەڭىز دە سەبەپ تاباسىز. ٴار ٴىرى جارىستان سوڭ ونىڭ ەڭبەگىن ەش ەتەتىندەر دە، ٴوز ٴىسىنىڭ ناعىز بىلگىرى دەپ تانيتىندار قاتارى دا ارتا تۇسەدى. سەبەبى، ول ەلىمىزدە تانىمالدىلىعى بوكستان كەم تۇسپەيتىن اۋىر اتلەتيكاعا جاۋاپتى. ريو الامانىندا دا ونىڭ قىزمەتتەن كەتۋىن تالاپ ەتكەندەر از ەمەس. دوپينگ داۋىنا كىنالى دەپ تە ايىپتالدى. ٴبىراق برازيليا دوداسى قارساڭىنداعى قىسىم الەكسەي ٴنيدى قايتا جىگەرلەندىرە تۇسكەن سىڭايلى. قازاقستاننىڭ مۇمكىندىگىن، ٴساتىن سالسا، توكيودا كورسەتپەك.

– الەكسەي گەننادەۆيچ، وليمپياداعا ەكىنشى قۇراممەن بارىپ تابىستى ورالدىڭىزدار، اسىرەسە، ٴسىزدىڭ «مەنەن ٴبىر التىن مەن كۇمىس» دەپ، ٴسوزىڭىزدى ورىنداعانىڭىز تاڭ قالدىرماي قويعان جوق. سوندا نيجاتتىڭ التىن الاتىنىن الدىن الا سەزدىڭىز بە؟

– راس، راحيموۆ مۇنداي سالماقتى جاتتىعۋلاردا ەشقاشان كوتەرگەن ەمەس. باسىندا بىزدە راحيموۆ التىن الادى دەگەن سەنىم بولدى. ٴبىراق قىتايلىقتار نيجاتتى ابدەن زەرتتەگەن. ياعني ولار راحيموۆتىڭ جۇلقا كوتەرۋدە مىقتى ەكەنىن بۇعان دەيىن ٴبىلىپ العان. سوندىقتان ماسەلەنى سەرپە كوتەرۋدە شەشىپ تاستاۋدى كوزدەدى. نەگىزى جوسپارلارى جۇزەگە استى دا. الگى قىتايلىق 177 كەلىنى ەڭسەرىپ، رەكورد جاڭارتقاندا، بىرەر ساتكە ەندى كۇمىسكە عانا تالاسا الامىز دەگەن قورقىنىش پايدا بولدى. ٴبىراق بىردەن ويىمدى جيناقتاپ، نيجاتتىڭ نۇكتەنى جۇلقا كوتەرۋدە قوياتىنىنا سەندىم. ول دا بارىن سالدى.

ماقساتىمىزدا ٴبىر ەمەس، بىرنەشە التىن بولعانىن ايتقانمىن. دەگەنمەن جازيرا كۇمىسپەن شەكتەلۋدى قۇپ كوردى. الەم چەمپيوناتىندا جاپپارقۇل ەكى رەت كۇمىس العان. وليمپيادا دا كۇمىس. ٴوسۋ جوق دەگەن ٴسوز. ول وليمپيادادا مەدال العان العاشقى ەتنيكالىق قازاق قىزى شىعار، دەگەنمەن ونىڭ ٴوزىن ريودا وليمپيادا ويىندارىندا جەڭىمپاز اتانعان تۇڭعىش قازاق قىزى رەتىندە تانىتۋعا الەۋەتى جەتىپ تۇردى. تەك سول مۇمكىندىگىن پايدالانبادى.

– ەگەر وليمپيادا الدىندا ٴتورت سپورتشىمىز ريوعا بارۋ مۇمكىندىگىنەن ايىرىلىماعاندا، التىن سانى الدەقايدا كوپ بولار ەدى. تىيىم سالىنعان پرەپاراتتار قولداندى دەگەن سپورتشىلاردى جارىستان شەتتەتىپ، ٴتىپتى، جۇلدەلەرىن تارتىپ الدى. ال ولاردى كەزىندە تەكسەرىپ، «تازا» دەپ تاپقان زەرتحانالاردى نەندەي جازا كۇتىپ تۇر؟

– سۇراعىڭىز وتە ورىندى. ٴبىراق مۇندا ٴبىز جاۋابىن تابا المايتىن تۇيتكىلدەر كوپ. وزدەرىڭىز بىلەسىزدەر، ٴاربىر وليمپيادالىق سيكل الدىندا – بەيجىڭ، ودان كەيىنگى لوندون الاماندارىنىڭ قارساڭىندا سپورتشىلار تۇگەلدەي دوپينگتىك تەكسەرىستەن ٴوتتى.

ۇشاقتان تۇسكەن بويدا الىنعان، وليمپيادا كەزىندەگى قانشاما ساراپتامالار قورىتىندىسى بويىنشا يليا يلين مەن كوماندامىزداعى ەشبىر زىلتەمىرشىدەن تىيىم سالىنعان پرەپاراتتار تابىلعان جوق. باقىلاۋ دەگەن سۇمدىق بولدى. سوعان قاراماستان ٴبىزدىڭ سپورتشىلار تاپ-تازا بولعان. ەندى كەلىپ ارادا 8 نە 4 جىل وتكەن سوڭ ٴبىزدىڭ كوماندانى دوپينگ قولداندى دەپ ايىپتاپ وتىر. بۇل پرەپاراتتى قابىلداۋ سپورتشى ٴۇشىن وز-وزىنە ۇكىم شىعارۋ، بىلايشا ايتقاندا، وز-وزىنە قول جۇمساۋمەن تەڭ. ول وتە مىقتى ستەرويد. سوندا ونى وسى ۋاقىتقا دەيىن ەشكىم قالاي انىقتاي الماعان؟ ەندەشە بارلىق زەرتحانالاردىڭ جۇمىسىن جوققا شىعارۋ قاجەت ەمەس پە؟! حوك زەرتحاناسى وزگە مەكەمەلەر تابا الماعاندى انىقتاپ جاتىر.

ٴبىزدىڭ، گەرمانيانىڭ كولن قالاسىنداعى، الەمنىڭ وزگە ەلدەرىندە زەرتحانالار دا تالاي رەت تەكسەردى. ازيا ويىندارىندا دا ٴاربىر باسقان ٴىزىمىز نازاردا بولدى. سوندىقتان مۇنىڭ ٴبارى الگى زەرتحانالاردىڭ زاڭدىلىعىنا كۇمان كەلتىرەدى. مەنىڭ تۇسىنبەيتىنىم، سويتە تۇرا بۇكىلالەمدىك انتيدوپينگتىك اگەنتتىك مالىمەتتەرىن راستامايتىن، قاتە دەپ تانيتىن زەرتحانالاردى قالايشا اككرەديتتەپ كەلگەن؟.. ونداعىلار رەسمي قۇجات بەرۋگە قۇقىلى. تيىسىنشە، ەشكىم دە ۆادا-عا قارسى شىقپايدى. اتالعان ۇيىم اككرەديتتەگەن زەرتاحانالار سانى الەم بويىنشا 35. ليسەنزيانى الۋ ٴۇشىن 10 جىلعا جۋىق ۋاقىت قاجەت، تالاپتارى وتە قاتال. ال قانداي دا ٴبىر قاتەللىككە بوي الدىرسا، الگى ليسەنزيامەن قوش ايتىسا بەرۋگە بولادى. نەگىزى سولاي ەدى. ٴقازىر تەك باسشىلىق اۋىستى دا، قالعانى سول كۇيى جۇمىستارىن جالعاستىرىپ جاتىر. سۇراق وتە كوپ...

سوندىقتان ٴبىزدىڭ سپورتشىلار ستانوزولول قولدانعان جوق دەپ سەنىممەن ايتا الامىن. پسيحوتروپتىق نە جىگەرلەندىرەتىن دارىلەردىڭ ٴبىرى دەسە دە سەنەر ەم. سەبەبى، تولىپ جاتقان باد-تار مەن جاقپامايلاردىڭ قۇرامىندا ونداي نارسەلەردىڭ بولۋى ابدەن مۇمكىن. ال ستانوزولولدىڭ كۇشتىلىگى سونداي، ونىڭ «ىزدەرى» ادام بويىندا ٴبىر جىل بويى ساقتالادى. ەندەشە مانەزا، يلين، چينشانلو، پودوبەدوۆالار وسىعان دەيىن قالايشا ۇستالماي ٴجۇردى؟! مۇنى ورتا بەلدەن باسۋ دەپ اتايدى. جولدان تايدىرعىسى كەلگەن ەكەن، انابوليكتەر مەن ستەرويدتەردى ەمەس، باسقا، ادامنىڭ اقىلىنا قونىمدى كورىنەتىن پرەپاراتتاردى تابۋلارى كەرەك ەدى.

– ٴسىزدىڭ كوكەيىڭىزدە ٴبىراز ويدىڭ بارىن ٴتۇسىنىپ تۇرمىز. ەندەشە بۇل نەگە بايلانىستى؟

– مەن ساياساتكەر ەمەسپىن، باپكەرمىن. ٴبىزدىڭ لوندونداعى ەڭبەگىمىز بارلىعى ٴۇشىن، اسىرەسە، اۋىر اتلەتيكا الەمى ٴۇشىن «شوك» بولعانى ٴسوزسىز. ٴتورت التىندى ۇلى دەيتىن بولگارلاردىڭ ٴوزى العان ەمەس. قىتايلىقتار – بەس، ٴبىز ٴتورت التىن يەلەندىك. شىنى كەرەك، مەن سول كەزدە-اق، وليمپيادا اياقتالاتىن تۇستا قانداي دا ٴبىر سانكسيالاردىڭ ٴقاۋىپ توندىرەتىنىن سەزگەم. «سانكسيا» دەپ جۇمسارتىپ ايتىپ وتىرعان ٴتۇرىم. لوندوننان كەيىن سىزگە سۇحبات بەرگەندە ايتقانىم ەسىڭىزدە مە؟ ٴيليننىڭ جەڭىسىنەن سوڭ كەيبىرەۋلەر جانىما كەلىپ، «سەندەردىڭ بۇلارىڭدى الەم كەشىرمەيدى» دەگەن. وليمپيادالىق سيكل بارىسىندا دا وسىنى سەزىنىپ كەلدىم. ٴبىراق وليمپياداعا ەكى اي قالعاندا باستالعان «اشىق شابۋىل» ادامگەرشىلىككە جاتپايدى. اياقتان شالعىسى كەلگەن ەكەن، ٴبىر جىل بۇرىن نە جىل باسىندا نەگە كىرىسپەدى؟! سوندا ٴبىز قۇراما مۇشەلەرىن الماستىرىپ، ولاردى دايارلاپ ۇلگەرەتىن ەدىك. ەكى اي بۇرىن «ا» سىناماسىن الىپ، ارادا 12 كۇن وتكەندە شۆەيساريادا «ۆ» سىناماسى اشىلدى. ياعني ول ەلگە بارىپ ماسەلەنىڭ انىق-قانىعىن ٴبىلۋ ٴۇشىن ۆيزا الۋىڭ كەرەك، ول ۇدەرىس ٴبىراز ۋاقىت الادى. ال ولار ٴبىزدىڭ قاتىسۋىمىزسىز، ٴبارىن وزدەرى ىستەپ جاتىر. نەگە؟ بۇل سۇراق تا جاۋاپسىز قالادى. سوراقىسى، ولار «ب» سىناماسىن اشقان سوڭ، ٴۇش اي بويى سوڭعى شەشىمدە ايتپا ٴجۇرىپ الدى. سپورتشىلاردى شەتتەتىپ تاستادى، ال الگى سىنامانىڭ قورىتىندىسى بىزگە ٴالى دەيىن بەلگىسىز. لوگيكاعا سۇيەنسەك، بۇل ادەيى، سپورتشى دا، ونىڭ باپكەرلەرى دە كەلىپ ۇلگەرمەس ٴۇشىن جاسالىپ وتىرعان ارەكەت ەكەنىن ٴتۇسىنۋ قيىن ەمەس. ياعني ولار سىنامالاردى قايتا تەكسەرۋدى ەرتەرەك باستاعاندا، ٴبىز، سپورتشىلار مەن زاڭگەرلەر، جابىلىپ ٴجۇرىپ ٴوزىمىزدىڭ كىناسىز ەكەنىمىزدى دالەلدەپ ۇلگەرەتىن ەدىك. تيىسىنشە نەگىزگى قۇرامنىڭ ٴتورت سپورتشىسى دا ريودا ونەر كورسەتۋگە مۇمكىندىك الاتىن ەدى...

حالىقارالىق فەدەراسيا سىنامالاردى ادەتتە سپورتشىنىڭ قاتىسۋىمەن اشادى. سەبەبى، «ب» سىناماسى – سپورتشى ٴۇشىن ۇكىم. ياعني وعان الدىن الا ەسكەرتىلىپ، ونىڭ قاتىسۋى تالاپ ەتىلەتىن. ال بۇل جەردە ٴبارى كەرىسىنشە بولىپ تۇر. ٴبىز سوتقا بارعان جوقپىز، ٴبىراق ۇكىم شىعىپ قويعان. مۇنىڭ بۇرىستىعىن زاڭگەرلەر دە راستاپ وتىر. بىردە-بىر وكىلىمىز، ادۆوكاتىمىز دا قاتىسىپ ۇلگەرگەن جوق. جۇرەگىڭدى تىلىمدەيتىن، مۇلدە تۇسىنىكسىز ٴارى اۋىر جايت. قالاي دەگەنمەن بۇل وليمپيادا چەمپيوندارىنىڭ تاعدىرى.

– چەمپيونداردى ٴدال وسىلاي اياقتان شالۋ قانشالىقتى ٴجيى تاراعان؟

– بۇل ٴۇردىس تاجىريبەگە ەنگىزىلگەلى قاشان. كۇرەس نە بوكس سەكىلدى جەكپە-جەك بارىسىندا تورەشىلەردىڭ تىكەلەي «اتسالىسۋىنىڭ» ارقاسىندا ەمەس، اۋىر اتلەتيكادا ناتيجەڭ قانشا كەلى كوتەرگەنگە بايلانىستى. ياعني جارىس باستالعانعا دەيىن شەشىلۋى ٴتيىس. اركىم قولىنان كەلگەنىن جاساپ باعادى. ال پوموستقا جەتۋ – سەنىڭ تابىسىڭنىڭ 50 پايىزى. قالعان 50 پايىزىنا تۇعىردا تۇرىپ قول جەتكىزەسىڭ.

– سوندا ٴسىز مۇنىڭ ار جاعىندا جەمقورلىقتىڭ جاتقانىن مەڭزەپ تۇرسىز عوي...

– مەن مۇنى داۋىستاپ ايتا المايمىن...

– وسى كۇنگە دەيىن قانشا سپورتشى دوپينگ داۋىنا بايلانىستى جارىستان شەتتەتىلدى. ٴبىز مىنا جاقتا قىزىل كەڭىردەك بولىپ ولاردى جاقتاپ-اقتاپ جاتامىز. ال رەسمي، جاۋاپتى ورگانداردان قورعايتىن بىرەۋ بار ما ٴوزى؟

– فەدەراسيا ٴقازىر شەتەلدىك تاجىريبەلى زاڭگەرلەردىڭ كومەگىنە جۇگىنۋدە. فەدەراسياداعىلار قولدارىنان كەلگەننىڭ ٴبارىن جاسايدى دەپ ۇمىتتەنەمىن... وليمپيادا بىتكەنىمەن، ناعىز شايقاس ەندى باستالادى.

بىلۋىمشە، قىركۇيەكتەگى حوك-تىڭ تارتىپتىك كوميتەتىندە ناگرادالار بويىنشا شەشىم قابىلدانادى، وسىدان سوڭ سوڭعى ۇكىم شىعارىلادى.

– بولىپ جاتقان كەلەڭسىزدىكتەردە ٴسىزدىڭ كىناڭىز بار دەپ ويلايسىز با؟ ٴقازىر عالامتوردا ٴسىزدىڭ تاراپىڭىزعا ايتىپ جاتقان سىندار از ەمەس...

– ەگەر ٴوزىمدى كىنالى سەزىنسەم، ارىزىمدى جازىپ جۇمىستان شىعىپ كەتەر ەم. ولاردىڭ بارلىق باقىلاۋدان وتكەندىگىن بىلگەندىكتەن دە ٴوزىمدى كىنالى سەزىنبەيمىن. يلين 12 جاسىنان باستاپ زىلتەمىردى باسىنان اسىرىپ كەلەدى. ول مۇمكىن بولعان جۇلدەنىڭ ٴبارىن يەلەندى. ەشقاشان دوپينگ داۋىنا ىلىككەن ەمەس. ەندى كەلىپ ونىڭ قان قۇرامىنان ستانوزولول تاۋىپ وتىر. بۇل پرەپاراتتى ٴبىزدىڭ سپورتشىلاردان ەشكىم قولدانعان جوق. سوندىقتان بالالاردىڭ دا، مەنىڭ دە كانىم جوق دەپ سەنىممەن ايتا الامىن.

– ٴبىر سۇحباتىڭىزدا توكيوعا لوندوندا جوققا شىعارىلعان، ريودا تارتىپ الۋعا تىرىسقان اتاقتى قايتارۋ ٴۇشىن بارعىڭىز كەلەتىنىن ايتىپسىز.

– سولاي ايتقانىم راس. ٴبىراق ول ورىندالا ما، ۋاقىت كورسەتەدى. توكيوعا بارعىم كەلگەنى – حالىقارالىق ۇيىمداردىڭ ٴارى قارايعى ارەكەتىن كورۋ. بەيجىڭدى، مىنە، ەندى لوندونداعى جۇلدەلەردى تارتىپ الماقشى. ٴساتى تۇسسە، وسىلاردىڭ ٴبارىن توكيودا قايتارسام دەگەن ماقساتىم بار. ٴقازىر ٴبىز ٴۇشىن ماڭىزدىسى، ٴتورت زىلتەمىرشىمىزدى قانشا مەرزىمگە سپورتتان شەتتەتكەنى. ەگەر ٴتورت جىل دەسە، ولاردىڭ ەشقايسىسى ليسەنزيالىق تۋرنيرلەرگە قاتىسا المايدى. سوندىقتان شەتتەتىلۋ مەرزىمى از بولادى دەپ ۇمىتتەنەمىز.

– مۇنداي ارەكەتتەردەن سوڭ جاستار وزدەرى ەمەس، ولار ٴۇشىن شەشەتىنىن كورگەن جاستارعا سپورتتى تاستاپ كەتپەس ٴۇشىن نە ايتار ەدىڭىز؟

– يلين – كوپشىلىك ٴۇشىن ٴالى كۇنگە دەيىن ٴپىر. سولاي بولىپ قالعانىن قالار ەدىم. ومىردە ٴتۇرلى جايتتار بولىپ جاتادى. سىنايدى، بىرەۋلەر سەنى جەك كورەدى، جولىڭدى كەسكىسى كەلەدى. ٴبىراق مىقتىنىڭ اتى قاشان دا مىقتى. ايتالىق، مايكل دجەكسون كوزى تىرىسىندە تالاي سىنعا ۇشىرادى، كۇيە دە از جاعىلعان جوق. ٴبىراق ونىڭ جانكۇيلەرى، تىڭدارماندارى سول كەزدە دە بولعان، ٴالى دە بار.

يلين جەڭىمپاز اتانعاندا ەلىمىزدە اۋىر اتلەتيكاعا باراتىنداردىڭ قاتار كۇرت ٴوستى. ونىڭ مۇمكىندىكتەرىنە الەم تاڭعالدى. ٴقازىردىڭ وزىندە شەتەلدە يليانىڭ جاقتاۋشىلارى از ەمەس. ريودا قانشاما ساراپشىلاردان «ٴيلينسىز اۋىر اتلەتيكادان ادەمىلىك كەتتى. ونىڭ نۋرۋددينوۆپەن تارتىسىن ٴبارىمىز كۇتتىك. ال ۆادا يليانى جارىستان شەتتەتىپ تاستادى» دەگەن پىكىردى سان رەت ەستىدىم.

– نيجاتتىڭ التىنى قورجىنىمىزعا تۇسكەن العاشقى جوعارى دارەجەدەگى جۇلدە بولعانىمەن، قازاقستاندىقتار وعان سونشالىقتى قۋانا قويماعان سەكىلدى. ٴوزىمىزدىڭ سپورتشىلارىمىزدىڭ اراسىنان لەگيونەرلەردىڭ ورنىن باساتىن سپورتشىلار بار ما؟

– ريوعا بار رەزەرۆتىڭ ىشىندەگى ەڭ ۇزدىكتەرى باردى. ەگەر راحيموۆ بولماعان كۇيدىڭ وزىندە يەلىگىمىزدە ٴبىر كۇمىس پەن ٴۇش قولا مەدال بولاتىن. تيىسىنشە قازاقستان جالپىمەدالدىق ەسەپتە وتىزدىققا دا ەنبەس ەدى. سوندىقتان نيجاتتىڭ التىنى دا وتە ماڭىزدى.

– سوندا ٴسىز لەگيونەرلەر تارتۋعا ٴالى دە قارسى ەمەسسىز عوي؟

– ماسەلە سپورتشىنىڭ قاي دەڭگەيدە ەكەندىگى. ەگەر ٴاۋ باستا ونىڭ الەۋەتى جەڭىمپاز اتانۋعا جەتەتىنىنە كوز جەتكىزسەك، وندا لەگيونەرلەردى شاقىرۋعا بولادى. ال تەك جۇلدەدەن دامەلى بولسا، ۇزدىك ۇشتىككە ەنەتىن سپورتشىلارىمىز وزىمىزدە دە بار. چينشانلو، مانەزا، پودوبەدوۆالار دا سونداي ماقساتتا الىنعان. ولار التىن جۇلدە اكەلىپ قانا قويماي، «اسحانامىزدا» باسەكەلەستىك تۋدىرادى.

يلين تۋرالى اڭگىمە بولەك، ول – تۋما تالانت. مۇنداي سپورتشىلار عاسىردا ٴبىر دۇنيەگە كەلەتىن شىعار. مىسالى، ٴبىز وليمپيادالىق سيكلدە ٴار سالماقتا 50 شاقتى زىلتەمىرشى ىرىكتەيمىز. ۋاقىت وتكەن سايىن ولاردىڭ قاتارى ازايىپ، اراسىنان ساۋساقپەن سانارلىعى، ناعىز تارتىسقا دايىندارى عانا قالادى. ال لەگيونەر وزگە ەلگە كەتۋ شەشىمىن تاڭداۋ ارقىلى ۇلكەن تاۋەكەلگە بارادى. ازاماتتىعىن اۋىستىرىپ، تۋعان ەلىنەن، تۋىستارىنان جىراق كەتۋ، باپكەرلەرىنەن، فەدەراسياسىمەن بايلانىسىن ٴبىرجولا ٴۇزۋ ارقىلى ونىڭ وزگە ەلدە جەڭىسكە دەگەن ۇمتىلىسى سۇمدىق بولادى. سەبەبى، ونىڭ قاتەلەسۋگە حاقى جوق.

جازيرا جاپپارقۇلعا قىتايلىقتى جەڭەتىنىن قۇلاعىنا ابدەن قۇيدىم. حيۋستوندا دا سولاي ايتقانمىن. ناتيجەسىندە جاتتىعۋلارداعى كورسەتكىشىنەن 10 كەلىگە از كوتەردى. ويتكەنى ونىڭ بويىندا سەنىم بولعان جوق. ول ىشتەي كۇمىستى قاناعات تۇتتى. ەندى تۇعىرعا شىعىپ كورىپ، جەڭىستىڭ ٴدامى وزگەشە بولاتىنىن سەزگەننەن كەيىن عانا «توكيودا جەڭىسكە جەتەمىن» دەپ وتىر. لايىم سولاي بولسىن. مەن دە جازيرانىڭ ٴوز مۇمكىندىگىن شىنىمەن ٴتۇسىندى دەپ ۇمىتتەنەمىن. ٴبىراق ۋاقىت دەگەن زۋلاي بەرەدى. ادامنىڭ جوسپارى وزگەرەدى، قارسىلاستار تا قاراپ جاتپايدى. سوندىقتان بەرىلگەن مۇمكىندىكتى ۋاقتىلى پايدالانىپ ۇيرەنۋ قاجەت. بىزدىكىلەردىڭ قولىنان دا التىن الۋ كەلە مە دەپ سۇرايسىزدار. كەلەدى. تەك ٴبىزدىڭ بالالارعا سونداي ماقسات كەرەك.

– ال جۇلدەسىز قايتقان ارلي چونتەيدىڭ الدىنا قانداي مىندەت جۇكتەلىپ ەدى؟

– ٴبىز ودان جەڭىس نە جۇلدە كۇتتىك دەپ ايتا المايمىن. ول ٴۇشىن ارلي قۇرلىقتىق نە الەم بىرىنشىلىكتەرىندە كوزگە ٴتۇسۋى كەرەك ەدى. چونتەي الەم چەمپيوناتىندا التىنشى ورىننان كورىنگەن. سوندىقتان ونىڭ وليمپيادا ويىندارىندا جۇلدىزى جانىپ كەتەدى دەۋ ارتىق. ٴبىز باپكەر رەتىندە شاكىرتتەرىمىزدىڭ مۇمكىندىكتەرىن بىلەمىز. بالكىم، جانكۇيەرلەر جۇلدە كۇتكەن شىعار. لەگيونەر بولعان سوڭ ونىڭ جۇلدەگەر اتانۋى مىندەتتى دەپ تە ويلاعان بولۋى مۇمكىن.

حاركي مەن گوريچەۆا بۇعان دەيىنگى جارىستاردا، دايىندىقتاردا جۇلدەنىڭ ماڭايىندا جۇرگەن. ال چونتەي مەن حاركيدى ەلىمىزدە 56 جانە 62 كەلى سالماق دارەجەلەرىندە سپورتشى بولماعان سوڭ شاقىرتتىق. باسەكە 69 كەلىدەن باستالادى. سوندىقتان بۇعان دەيىنگى وليمپيادالاردىڭ بىردە-بىرىنە تولىق قۇراممەن بارعان ەمەسپىز. قانشاما بالالاردى تارتتىق، ٴبىراق ناتيجە كورىنبەدى. ساراپتاي كەلە وسى ولقىلىقتىڭ ورنىن لەگيونەرلەر ارقىلى تولتىرۋعا بەل بۋدىق.

– اڭگىمەڭىزگە راقمەت!

اڭگىمەلەسكەن – ٴمادينا اسىلبەك،

«sport» گازەتى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي