BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اعابەك قازانباي، تەلەوپەراتور: ەلباسىنىڭ ٴوزى قۇشاعىن ايقارا اشىپ شاقىرعانى ەسىمنەن كەتپەيدى

تەلەارنا سالاسىندا كوپشىلىكتىڭ كوزايىمىنا اينالاتىن تەلەجۇرگىزۋشى، جۋرناليست، رەداكتوردان بولەك، تەلەوپەراتورلاردىڭ ەڭبەگى وراسان. ولار ۇنەمى كادر سىرتىندا قالادى، ٴبىراق كورەرمەننىڭ كورسە كوزى توياتىن كەرەمەت كورىنىستەردى سىيلايدى. سونىسىمەن ولاردىڭ ەڭبەگى باعالى، جۇمىسى قۇندى. قازىرگى تاڭدا تاۋەلسىزدىك جىلدارىنان بەرى قاراي ەسەپتەگەندە ەلىمىزدە تەلەوپەراتورلاردىڭ ۇلكەن ٴبىر مەكتەبى قالىپتاسقان. ولار – ەلىمىز ەگەمەندىك العان جىلداردىڭ جارشىسى، كەرەگەمىز كەڭەيىپ، ۋىعىمىز نىعايا تۇسكەن شاقتىڭ جارقىن كۋاگەرلەرى. كۇنى-تۇنى كامەراسىن كوتەرىپ، الۋان ٴتۇرلى تاقىرىپتاعى تۇسىرىلىمدەر مەن قايناعان ەڭبەكتىڭ ورتاسىندا جۇرەتىن تاسپاگەرلەردىڭ ەڭبەگى ەشقاشان ەسكەرۋسىز قالۋعا ٴتيىستى ەمەس. جوعارىدا ايتىپ وتكەن ەلىمىزدىڭ تەلەوپەراتورلار مەكتەبىن قالىپتاستىرعان كاسىبي مامانداردىڭ كوش باسىندا اعابەك قازانبايدىڭ ەسىمى اتالادى. ول ەڭسە تىكتەپ، ەر جەتكەن 20 جاسىنان باستاپ «ٴبىر كوزدى باتىرعا» اينالىپ، كامەرانى سەرىك ەتكەن. بىرەر جىل بۇرىن جاسى 63-كە كەلىپ، زەينەت جاسىنا جەتسە دە سۇيىكتى كاسىبىمەن قوشتاسقىسى جوق. ەلگە ٴالى تالاي تىلسىم كادرلار مەن سۇيكىمدى كورىنىستەر سىيلاسام دەيدى. «حابار» ارناسىنىڭ بەدەلدى ەكس-تاسپاگەرىمەن اقپارات جانە بايلانىس قىزمەتكەرلەرىنىڭ ٴتول مەرەكەسى قارساڭىندا سۇحباتتاستىق.

– اعا، تەلەوپەراتورلىق سالامەن بىتە قايناسىپ كەلە جاتقانىڭىزعا 40 جىلدان اسىپ كەتىپتى. ەڭبەك جولىڭىز قاشان، قالاي باستالىپ ەدى؟

مەنىڭ ەڭبەك جولىم نەبارى ٴۇش فوتواپپاراتتان باستالعان. العاش رەت 80 جىلدارى «وڭتۇستىك قازاقستان» وبلىستىق گازەتىندە شتاتتان تىس ٴفوتوتىلشى قىزمەتىن اتقاردىم. سول جەردە ٴجۇرىپ فوتوونەردىڭ قىر-سىرىنا قانىعىپ، شىڭدالدىم دەپ ايتۋعا بولادى. ودان كەيىن 1986 جىلدان باستاپ 1990 جىلعا دەيىن وبلىستىق كاسىپوداق ۇيىمىنا قارايتىن وڭتۇستىك قازاقستان وبلىستىق كينواۋەسقويلار كلۋبىنا كىرىپ، ادىسكەر قىزمەتىن دە اتقاردىم. ول جەردە كينو تۇسىرۋگە قىزىعاتىن بالالاردى ۇيرەتتىم. ٴقازىر سول بالالاردىڭ ٴبىرازى رەسپۋبليكالىق جەتەكشى ارنالار دا بىلىكتى تاسپاگەرگە اينالدى. ٴسويتىپ جۇرگەندە 1990 جىلى قايتادان وبلىستىق تەلەۆيزيا اشىلىپ، مەنى سوندا شاقىرتتى. مەن ٴوزىم عانا بارماي، ٴوزىم ۇيرەتكەن، جەتىلدىرگەن بالالارىمدى دا ەرتە باردىم. ٴوزىمنىڭ دە، شاكىرتتەرىمنىڭ دە وبلىستىق تەلەارنادا جۇمىس ىستەۋىنە سول كەزدەگى ارنا باسشىسى ٴبايدىلدا قونىسبەكوۆ ۇلكەن ىقپال ەتتى. سول ۋاقىتتان باستاپ تاسپاگەرلىك تىرشىلىك باستالىپ كەتتى. 1992 جىلى سول جەردە باس وپەراتور بولدىم. 1996 جىلى «حابار» تەلەارناسى اشىلعان ساتتەن باستاپ، جاڭالىقتار قىزمەتى مەنىڭ تۇسىرىلىمدەرىمدى پايدالانا باستاعان ەدى. سول جىلى مەن «حابار» ارناسىنا تەلەوپەراتور بولىپ جۇمىسقا تۇردىم. قاسىمدا جۋرناليست قالىبەك اتجان بولدى. ەكەۋمىز وسىلايشا «حابار» ارناسىنىڭ وڭتۇستىك قازاقستان وبلىسىنداعى تىلشىلەر قوسىنى رەتىندە جۇمىستى باستاپ كەتتىك.

– ٴسىزدىڭ ەلباسى نۇرسۇلتان نازاربايەۆپەن كەزدەسىپ، ٴتىپتى ول كىسىمەن اڭگىمەلەسكەنىڭىز تۋرالى دا جۋرناليستەر اراسىندا اڭىزعا بەرگىسىز وقيعالار بار. وسىنى ٴوز اۋزىڭىزدان ەستىسەك دەپ ەدىك؟

1991 جىلى ەلباسى شىمكەنتكە كەلدى. سول كەزدە نۇرسۇلتان ابىش ۇلىمەن كەزدەسىپ، سالەمدەستىك. ول كەزدە مەن وبلىستىق تەلەارنادا ىستەيمىن. قاسىمدا ٴقازىر مارقۇم بولىپ كەتكەن قوجابەك جاقسىبايەۆ دەگەن جۋرناليست جىگىت بولدى. ەكەۋمىز العاش رەت سول كەزدە پرەزيدەنتتەن سۇحبات الدىق. سوندا پرەزيدەنتتىڭ مىسى باسىپ تۇردى ما، قوجابەكتىڭ ميكروفونى دىرىلدەپ تۇردى. قوجەكە دەپ قولىن ۇستاسام تىنىشتالادى دا، جىبەرىپ قالسام قايتادان دىرىلدەپ كەتەدى (كۇلىپ). ەندى العاش رەت قىزمەت بارىسىندا مەملەكەت باسشىسىمەن سويلەسۋ تولقىنىس تۋدىرماي قويمايدى عوي. جالپى، ٴوزى شىمكەنتكە ەلباسى كەلسە بولدى، ول كىسىنىڭ ٴىسساپارىن ٴوزىم باستان-اياق ٴتۇسىرىپ، ٴوزىم ەفيرگە دايىنداپ بەرەتىنمىن. ودان كەيىن 2002 جىلى وبلىستى بەردىبەك ماشبەك ۇلى باسقارىپ تۇرعان تۇستا «كەڭ بابا» دەپ اتالاتىن ەتنو ساياباق اشىلدى. ٴىشىنىڭ قۇرىلىمى وتە كەڭ، بالالار ٴۇشىن پايدالى دەمالىس ورىنى ەكەن. سونىڭ اشىلۋ سالتاناتىنا پرەزيدەنتتىڭ ٴوزى ارنايى كەلگەن. سودان وبلىس باسشىلارى «اعابەك، سۇحباتقا دايىندال» دەدى بىردەن. ونداي شۇعىل تۇسىرىلىمدەرگە ابدەن دايىن بولىپ العان ٴبىز، اپ-ساتتە جارىقتى ورناتىپ، كەرەك-جاراعىمىزدىڭ ٴبارىن سايلاپ، جۋرناليست ەكەۋمىز ساقاداي-ساي تۇرا قالدىق. كوپ ۇزاماي سۇحبات تا باستالىپ كەتتى. ەلباسىمەن ٴبىراز اڭگىمەلەسكەننەن كەيىن پىكىرلەسۋ اياقتالدى. ەندى ۇزىننان ۇزاق كوسىلىپ وتىرۋعا ول كىسىنىڭ دە ۋاقىتى ساناۋلى عوي. سوسىن پرەزيدەنتتىڭ ٴوزى «كىمدە قانداي تاعى سۇراق بار؟» دەدى. سودان سۋىرىلىپ ورتاعا شىقتىم دا «نۇر اعا، سىزبەن قول الىسىپ سالەمدەسسەم بولا ما؟» دەدىم. «نەگە بولماسىن، كەل» دەپ ەلباسىنىڭ ٴوزى قۇشاعىن ايقارا اشىپ، شاقىردى. سودان مەن بارىپ امانداستىم، ٴبىر قاراسام مەنىڭ ارتىمنان بۇكىل جۋرناليستەر جاپىرلاي امانداسىپ جاتىر پرەزيدەنتپەن. ٴقازىر وسى جاعداي ەسىمە تۇسسە، ەزۋىمە كۇلكى ۇيىرىلەدى، ٴارى ٴبىر جاعىنان سول ساتتەگى باتىلدىعىما دا تاڭعالامىن.

– ٴسىزدىڭ ەسىمىڭىز وڭتۇستىك قازاقستان وبلىسىنىڭ جاڭالىقتارى شىققان سايىن بىرگە ايتىلىپ، قالىڭ كورەرمەننىڭ قۇلاعىنا ابدەن ٴسىڭىپ قالدى. ٴجيى ەستىلگەنىنە قاراعاندا، كۇن-تۇن دەمەي ەڭبەك ەتكەن سياقتىسىزدار؟

شىمكەنتتە مەنشىكتى تىلشىلەر قوسىنى رەتىندە ەڭبەك ەتىپ جۇرگەن كەزىمىزدە ۇلكەن كۇشپەن جۇمىس ىستەدىك. ادەتتەگى جوسپار بويىنشا اي سايىن 10-11 سيۋجەت وتكىزۋ كەرەك بولسا، ٴبىز قالىبەك ەكەۋمىز كۇن-تۇن دەمەي ەڭبەك ەتىپ، ايىنا 28-31 سيۋجەتكە دەيىن بەرەتىن ەدىك. سوندا كۇنىنە ورتا ەسەپپەن 1-2 سيۋجەت، 1 «پودچيتكا» بەرىپ وتىرامىز. بۇل كۇن سايىن جاڭالىقتار لەگى توقتاماي اينالىپ جاتاتىن، زاۋىت سەكىلدى جۇمىس ىستەيتىن تەلەارنا ٴۇشىن ۇلكەن كومەك، ۇلكەن جەتىستىك بولدى. سوندا جىل سايىن ارنامىزدىڭ سول كەزدەگى باسشىسى داريعا نۇرسۇلتانقىزى وڭىر-وڭىردەگى مەنشىكتى تىلشىلەردى جيناپ، العا وزعاندارىن ماراپاتتاپ، شابانداپ قالعاندارىن جۇمىس ىستەۋگە شاقىرىپ ۇندەپ تۇراتىن. سونداي كەزدەردە ٴبىزدىڭ وڭتۇستىك قازاقستان وبلىسى بىردە-بىر وبلىستى الدىمىزعا شىعارعان جوقپىز. وبلىستا قانداي ٴىرى شارا بولادى، ٴتۇرلى مەكتەپ، اۋرۋحانالاردىڭ اشىلۋ سالتاناتى، مادەنيەت جانە دەنساۋلىق ساقتاۋ، سپورت سالاسىنداعى ٴتۇرلى جەتىستىكتەر، اۋىلشارۋاشىلىق سالاسىنداعى سوڭعى جاڭالىقتاردىڭ بارلىعى ٴبىزدىڭ نازارىمىزدان تىس قالعان ەمەس. قاي جەردە جاڭالىق بار دەيدى، سول جەردەن ٴبىرىنشى بولىپ تابىلۋعا تىرىساتىن ەدىك. تاۋلىكتىڭ قانداي مەزگىلى ەكەنىنە قاراماستان. ارينە، ٴبىزدىڭ دە وتباسىمىز، تۋىستارىمىز بار، ولارعا دا ۋاقىت تابۋ كەرەك. ٴبىراق، ەلىمىزدەگى ٴىرى تەلەارنانىڭ قىزمەتكەرى بولعاندىقتان جانە ەل-حالىقتىڭ جاڭالىعى مەن تالاپ-تىلەگىن جەتكىزۋ ٴبىزدىڭ موينىمىزدا بولعاندىقتان قاي ۋاقىتتا بولماسىن جۇمىس ىستەۋگە دايىن بولدىق. سول ەڭبەگىمىز شۇكىر، اقتالدى. باسشىلار دا، حالىق تا ٴبىزدىڭ ەڭبەگىمىزدى ٴدايىم ەلەپ وتىردى. وسى تاسپاگەرلىك قىزمەتىم بارىسىندا شىمكەنتتە قالىبەك اتجاننان كەيىن بەلگىلى جۋرناليست ابدەز راحمان ۇلىمەن، تاتيانا ناپولسكايا، ولگا كاپلينالارمەن جۇمىس ىستەدىم. تاعى ٴبىر ايتا كەتەر نارسە، وسى وبلىستا جۇمىس ىستەپ جاتقان مەن وقىتقان، دايىنداعان وتىزدان استام شاكىرتىم بار. اتاپ ايتار بولسام، وبلىستىق ارنادان «قازاقستان» ۇلتتىق ارناسىنا اۋىسقان نۇرمان نۇربەكوۆ بار. تاعى ٴبىر شاكىرتىم قايسار شەرىمدى ايتا الامىن. سودان كەيىن ەرنار سايلاۋبايەۆ دەگەن جىگىت بار ەدى. الماتىعا كەلگەن كەزىمدە ول بالا جارىق قويۋشى بولىپ ىستەيتىن. سول ايتتى ٴبىر كۇنى «اعا مەنى تەلەوپەراتورلىققا ۇيرەتىڭىزشى، ۇلكەن قىزىعۋشىلىعىم بار» دەپ. سودان سول بالانى ۇيرەتىپ-ۇيرەتىپ تاسپاگەر ەتىپ تاربيەلەپ شىقتىق. ٴسويتىپ ەرنار از ۋاقىتتىڭ ىشىندە «حابارداعى» بىلىكتى تەلەوپەراتورعا اينالىپ كەتتى. ونىڭ جۇمىسىنا جۋرناليستەر دە، باسشىلار دا جاقسى باعا بەرەتىن. مىنە، سول جىگىت از ۋاقىت بۇرىن پرەمەر-مينيستردىڭ جانىندا جۇرەتىن تەلەوپەراتورلىق قىزمەتكە اۋىستى. قۋانىپ، ٴوزىم حابارلاسىپ قۇتتىقتادىم. وسىنداي شاكىرتتەرىمنىڭ بار ەكەنى، ولاردىڭ ەڭبەك ەتىپ، بيىك بەلەستەردى باعىندىرىپ جاتقانى مەنى مارقايتادى.

– بەرتىن كەلە الماتىعا اۋىستىڭىز عوي. بۇل جاقتاعى ۇجىم قالاي بولدى؟ كىمدەرمەن بىرگە قىزمەت ەتتىڭىز؟

الماتىدا بىرگە ىستەگەن قىزمەتتەستەرىمدى «التىن بۋىن» دەپ اتاسام بولادى. 2007 جىلى الماتىداعى باس كەڭسەگە شاقىرىلىپ، جۇمىس ىستەي باستادىم. «حابار» ارناسىندا جۇمىس ىستەگەن جىلدارىمدى ٴومىرىمنىڭ ەڭ ٴبىر قىزىق كەزدەرى دەپ بىلەمىن. قانشاما الىس-جاقىن شەتەلدەرگە ٴىسساپارلارعا شىقتىم. جۇمىس بارىسىمەن بۇكىل قازاقستاندى ارالاپ شىقتىم دەسەم بولادى. قانشاما تانىس تاپتىم، مىقتى-مىقتى جۋرناليست اعا-اپا مەن ىنى-قارىنداستارمەن ارالاستىم. ٴسويتىپ جۇمىس-جۇمىس دەپ ٴجۇرىپ، قالايشا زەينەت جاسىنا جەتكەنىمدى دە بىلمەي قالىپپىن. ول جاقتا قايرات اتاكەلديەۆ باستاعان مىقتى ۇجىم جۇمىس ىستەدى. ودان كەيىن نيكولاي كيشەنين، عالىم شالبايەۆ سىندى مىقتى وپەراتورلار بولدى. بىزدەن كەيىنگى تولقىننان ەرلان ٴابجانوۆ، قانات كيگىزبايەۆ، دارحان ايتقازين، ٴقازىر «اسىل ارنادا» باس تەلەوپەراتور بولىپ جۇرگەن مانات ەشباي، ەرنات ايتباي سىندى جاستاردى ايتا كەتۋگە بولادى. ٴقازىر ٴبارى بىردەي اۋىزعا تۇسپەيدى، ولاردان وزگە دە مىقتى جىگىتتەر جۇمىس ىستەدى. ٴبىزدىڭ وپەراتورلاردىڭ اۋىزبىرشىلىگى وتە مىقتى بولدى. ۇلكەن دەمەي، كىشى دەمەي ٴبارى بىر-بىرىنە كومەكتەسۋگە دايىن تۇراتىن، بىرلىگى مىقتى ۇجىمدا جۇمىس ىستەدىم. ٴبىزدىڭ ۇجىمنىڭ جىگىتتەرىنىڭ جۇمىستارىنا ەشبىر جۋرناليست سىن ايتىپ، ٴمىن تاققان ەمەس. وسىنىڭ ٴوزى «حاباردا» قانداي مىقتى مامانداردىڭ جۇمىس ىستەگەنىنەن حابار بەرەدى. ال «حابار» ارناسىنىڭ استانا قالاسىنداعى باس بولىمشەسىندە ەدىل ەرمەكبايەۆ جەتەكشىلىك ەتەتىن تاسپاگەرلەر توبى بار. ول جاقتا كوبىنەسە جاستار. دەگەنمەن، قازاق «جاس كەلسە ىسكە» دەيدى عوي. سوندىقتان تەلەوپەراتورلىق سالا ەشقاشان ماڭىزىن جويمايدى، تەك قارىشتاپ دامي بەرەدى.

– الىس-جاقىن شەت ەل مەن قازاقستاننىڭ ايماق-ايماعىنا ات باسىن بۇردىڭىز عوي. سونداي ساتتەردە باسىڭىزدان ٴتۇرلى قىزىقتار دا وتكەن شىعار. ٴقازىر ەسىڭىزدە بار ما؟

1993 جىلى شىمكەنتتە ناۋرىز مەرەكەسىن ٴتۇسىرىپ جاتقانبىز. مەرەكەنى بارلىق قىرىنان ٴتۇسىرىپ بولعانمىن. تاۋەلسىزدىك العاننان كەيىنگى العاش رەت تويلانىپ جاتقاندىقتان حالىقتىڭ قاراسى وتە كوپ. ٴبىر قاراسام، اناداي جەردە اۋە شارى تۇر ەكەن. سوعان ٴمىنىپ، ناۋرىز مەرەكەسىن توبەدەن ەرەكشە ەتىپ تۇسىرگىم كەلدى. سودان يەسى سەرگەي دەگەن جىگىت ەكەن، سونى تاۋىپ الىپ اۋە شارىمەن جوعارى كوتەرىلدىك. ايتەۋىر توبەدە قالىقتاپ ٴجۇرىپ نەبىر كەرەمەت كادرلاردى نىساناما ٴىلىپ، كۇشتى كورىنىستەردى تاسپاعا باسىپ جاتىرمىن. توي تويلانىپ جاتقان جەر بۇرىنعى لەنين، قازىرگى ٴال-فارابي الاڭى عوي. ادامدار ەسىكتەرىنىڭ الدىنا دا داستارقان جايىپ تاستاعان. ٴبارى مارە-سارە بولىپ جاتىر. سولارعا دا قولىمدى بۇلعاپ، «اعايىندار ناۋرىز قۇتتى بولسىن» دەپ سالەم جولداپ قويىپ ۇشىپ كەلە جاتقانبىز. ٴبىر كەزدە الگى سەرگەي «اعا، ٴبىز قۇلاپ بارا جاتىرمىز» دەيدى. سويتسەم، اۋە شارىنىڭ گازى تاۋسىلىپ قالعان ەكەن. سودان نە بولسا دا كونەلىك دەپ، قۇلاۋعا دايىندالدىق. قولىمداعى قىمبات قازىنا كامەرا بولعاندىقتان، وعان زيان تيمەۋ ٴۇشىن جاقسىلاپ قۇشاعىما قىسىپ، ٴوزىم كورزينانىڭ ىشىنە شالقالاپ جاتىپ الدىم. شار قۇلديلاپ وتىرىپ قالاداعى جانگەلدين كوشەسىندە ورنالاسقان ٴبىر ٴۇيدىڭ ەسىگىنىڭ الدىنا قۇلادى عوي. ابىروي بولعاندا ٴبىر عيماراتتىڭ توبەسىنە، نە بولماسا اعاشقا قۇلاماي، جەرگە تۇسكەنىمىزگە قۋاندىق. ٴبىراق، 450-500 مەتردەن قۇلاۋ وڭاي بولسىن با، 6 قابىرعام سىنىپ كەتىپتى. سەرگەي دە ازداپ جارالانعان. ٴبىر اپتاداي اۋرۋحانادا جاتىپ، كەيىن قايتادان اتتاي شاۋىپ جۇمىسقا قوسىلىپ كەتكەن ەدىك.

– اعا، تەلەوپەراتور بولۋ ٴۇشىن ادام قانداي بولۋى كەرەك. قانداي مىنەز، قانداي بىلىكتىلىك قاجەت دەر ەدىڭىز؟

تەلەوپەراتور بولۋ ٴۇشىن ادامعا ۇلكەن مادەنيەت كەرەك جانە جۇرەك قاجەت. سودان كەيىن البەتتە ول ٴۇشىن قىزىعۋشىلىق پەن ىقىلاس بولۋ كەرەك. اناۋ كامەراعا، ونىڭ كىشكەنتاي ەكرانىنان كوزىڭدى ايىرماي، ٴوزىڭ تۇسىرگەن ٴبىر كادردان ۇلكەن ٴلاززات الماساڭ، سەنەن شىنايى تەلەوپەراتور، كينووپەراتور شىقپايدى. بالا كەزىمنەن كينو سالاسىندا، تەلەارنا سالاسىندا تاسپاگەر بولسام، ٴتۇرلى كورىنىستەردى ٴتۇسىرىپ، ونى ۆيدەو تىلىندە سويلەتسەم دەگەن اياۋلى ارمانىم بار بولاتىن. اقىرى سول ارمانىما جەتتىم، ٴوز ورتامدا ۇلكەن سىي-قۇرمەتكە بولەندىم. ٴالى كۇنگە تاسپاگەرلىك جولدى جالعاستىرىپ كەلە جاتىرمىن. 2015 جىلى زەينەتكە شىعار كەزدە باسشىلىقتىڭ باستاماسىمەن ٴبىر جىل استانا قالاسىنداعى «حاباردا» قىزمەت اتقاردىم. سودان كەيىن ٴبىرجولا زەينەت دەمالىسىنا شىقتىم. ٴبىراق، قولىمنان كامەرامدى تۇسىرسەم، وزىمنەن ٴوزىم جابىرقاپ، كوڭىل-كۇيىم ٴتۇسىپ قالادى. بار ٴومىرىم وسى ٴبىر تاسپا قۇرىلعىسىنا تاڭىلىپ قويعانداي قۇددى. سودان مەنىڭ بۇل كاسىپتى زەينەتكە شىقتىم ەكەن دەپ تاستاپ كەتكەنىم بولماس دەپ، ٴقازىر وڭتۇستىك قازاقستان وبلىسىندا «ايعاق» تەلەارناسىندا ەڭبەك ەتىپ ٴجۇرمىن. بويىمدا كۇش-قايراتىم بولسا، جاستارعا ٴالى دە ۇيرەتەرىم بار بولسا، نەگە ەڭبەكتى دوعارۋىم كەرەك. كەرىسىنشە بويدان كۇش كەتكەنشە جۇمىس ىستەپ، جاستارعا بىلگەنىڭدى ۇيرەتكەن ٴجون دەپ سانايمىن. بۇل ۇلكەن شىعارماشىلىق جۇمىس. ٴوزىڭ تۇسىرەتىن نىساندى جان-جاقتى قىرىنان الىپ، ونىڭ كەرەمەتىن كورەرمەنگە پاش ەتە ٴبىلۋ كەرەك. ازداعان مينۋتتاردا ەكراننان وتە شىقسا دا، كورەرمەن سول ٴبىر كورىنىستەن ٴلاززات الاتىنداي، بىردەڭە ۇعىناتىنداي بولۋى كەرەك.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي