BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ۇلىبريتانيادا كەدەيلىك كەسىرىنەن 4 ميلليون بالا دۇرىس تاماقتانبايدى − زەرتتەۋ

food foundation ۇيىمىنىڭ ەسەبىنە سەنسەك، ۇلىبريتانيادا 4 ميلليون بالا سالاۋاتتى ٴومىر سالتىنا جاقسى اسەر ەتەتىن جەمىس-جيدەك، كوكونىستەر مەن باسقا دا ازىق-تۇلىكتەرگە قول جەتكىزە الماي ٴومىر ٴسۇرىپ جاتىر، دەپ حابارلايدى baq.kz اقپارات اگەنتتىگى cnn باسىلىمىنا سىلتەمە جاساپ.

ۇيىمنىڭ بايانداماسىندا ٴاربىر بەسىنشى كەدەي وتباسى ٴوز تابىسىنىڭ 42%-ىن ازىق-تۇلىككە جۇمساۋعا ٴماجبۇر ەكەنى ايتىلعان. زەرتتەۋشىلەردىڭ ايتۋىنشا، بۇل ەڭ باي دەگەن وتباسىلار كەتىرەتىن 20% شىعىننان ٴتورت ەسەگە دەيىن ارتىق

باياندامادا تابىسى از ٴۇي شارۋاشىلىقتارىنىڭ دەنساۋلىققا پايدالى ازىق-تۇلىكتەردى الا الماۋى بولاشاقتا ديابەت پەن سەمىزدىككە اپارۋى مۇمكىن ەكەنى ايتىلعان. سونىمەن قاتار بۇل حالىقتىڭ دەنساۋلىق جاعدايىندا دا اناعۇرلىم تەڭسىزدىكتەردىڭ بولۋىنا اكەلەدى.

«مەملەكەتتىڭ ٴۇي شارۋاشىلىقتارىنىڭ تابىسىن ولشەۋى ۇلىبريتانياداعى ميلليونداعان وتباسىلاردىڭ ۇكىمەتتىڭ ديەتالىق باسشىلىعىنا ساي تاماقتانبايتىنىن كورسەتىپ وتىر. ۇكىمەت ۇيىمداستىراتىن شارالار مەن ۇستانىپ وتىرعان ساياساتتا دۇرىس تاماقتانۋعا قاجەتتى ازىق-تۇلىككە كەتەتىن شىعىننىڭ دا ەسكەرىلگەنى ٴجون. سوندا عانا تاماقتانۋ جۇيەسى تابىسى ازدارعا دا ٴتۇرلى اۋرۋلارعا شالدىعۋ ٴقاۋپىن ازايتاتىن بولادى»، دەيدى food foundation ۇيىمىنىڭ اتقارۋشى ديرەكتورى اننا تەيلور.

باياندامادا زەرتتەۋشىلەر ۇكىمەتكە بۇل داعدارىستى شەشۋ ٴۇشىن جاردەماقى تولەۋ كەرەكتىگىن ايتقان. سونىمەن قاتار تابىسى تومەن وتباسىنان شىققان بالالارعا مەكتەپتەردە تەگىن تاماق ۇسىنۋعا بولاتىنىن دا جازعان.

«بۇگىنگى تاڭدا ۇلىبريتانياداعى ٴۇي شارۋاشىلىقتارىنىڭ 50%-ىندا ۇكىمەت ۇسىنىپ وتىرعان eatwell تاماقتانۋ باسشىلىعىن ۇستانۋ ٴۇشىن تابىستارى جەتىسپەيدى. دۇرىس تاماقتانۋ ادامنىڭ دەنساۋلىعى مەن دامۋى ٴۇشىن وتە ماڭىزدى ەكەنى بەلگىلى. ال ول وسىنشاما ادام ٴۇشىن قولجەتىمسىز بولماۋى كەرەك. بۇل ماسەلەنى ۇكىمەت تەز ارادا شەشۋگە كىرىسەدى دەپ ۇمىتتەنەمىن»، دەدى بالالارعا ارنالعان ازىق-تۇلىكتەردى زەرتتەيتان كوميتەت باسشىسى، دەپۋتات شارون حودجسون.

ايتا كەتۋ كەرەك، ۇلىبريتانيا ۇكىمەتىنىڭ ازىق-تۇلىك قاۋىپسىزدىگىن باعالايتىن زاڭ جوباسى قازان ايىندا قاراستىرىلادى دەپ كۇتىلۋدە.

food foundation ۇيىمى اتالعان زەرتتەۋدى ۇلىبريتانيا بالالارى جازعى دەمالىستاردان سوڭ مەكتەپتەرگە ورالا باستاعاندا جۇرگىزەدى. سەبەبى التى اپتالىق ٴۇزىلىس كەيبىر وتباسىلار ٴۇشىن ۇلكەن پروبلەماعا اينالىپ، ولاردىڭ بالالارى كوپ جاعدايدا ىستىق تاماقتىڭ ٴدامىن تاتپاي كۇن كورەدى.

قايىرىمدىلىق قورلارى ۇسىنعان سوڭعى مالىمەتتەرگە سەنسەك، ۇلىبريتانيادا جاز ايلارىندا ٴۇش ميلليون بالا اشتىقتا ٴومىر سۇرەدى. trussell trust ۇيىمى ماماندارىنىڭ ايتۋىنشا، 2017 جىلدىڭ ٴساۋىر ايى مەن 2018 جىلدىڭ ناۋرىز ايلارى ارالىعىندا ولار 1،3 ميلليون ادامعا ٴۇش كۇندىك ازىق-تۇلىك تاراتقان. بۇل الدىڭعى جىلمەن سالىستىرعاندا 13%-عا كوپ. تاعى ٴبىر ايتا كەتەرلىگى، ولار تاراتقان ازىق-تۇلىكتەردىڭ ۇشتەن ٴبىرى بالالارعا بەرىلگەن.

ساۋدا ورىندارىنان مۇقتاج جاندارعا ازىق-تۇلىك تاسيتىن fareshare قايىرىمدىلىق ۇيىمى دا ٴبىر جىلدا ولار قولداۋ ٴبىلدىرىپ وتىرعان توپتاردىڭ 44%-عا وسكەنىن، سونداي-اق قوردىڭ كومەگىنە جۇگىنگىسى كەلىپ ٴوتىنىش بىلدىرەتىندەردىڭ دە بىلتىرعى جىلمەن سالىستىرعاندا 59%-عا ارتقانىن ايتتى.

ايتا كەتۋ كەرەك، 2017 جىلى unicef ەسەبىندە دە ۇلىبريتانيا تابىسى جوعارى 41 مەملەكەتتىڭ ىشىندە ازىق-تۇلىك قاۋىپسىزدىگى بويىنشا 34-ورىندا تۇر. unicef ماماندارىنىڭ ايتۋىنشا، ازىق-تۇلىك قاۋىپسىزدىگىنىڭ ىشىندە ٴقاۋىپسىز ٴارى قۇنارلى تاماققا قولجەتىمدىلىك، دەنساۋلىققا پايدالى ازىق-تۇلىكتەردىڭ قولجەتىمدى بولۋى سەكىلدى فاكتورلار ەسكەرىلەدى.

unicef مالىمەتتەرىنە سەنسەك، ۇلىبريتانياداعى 15 جاسقا دەيىنگى بالالاردىڭ 20%-عا جۋىعى ازىق-تۇلىك قاۋىپسىزدىگىنەن زارداپ شەگىپ وتىر. unicef بايانداماسىندا ۇلىبريتانيا كەدەيلىكپەن كۇرەس بويىنشا 41 مەملەكەتتىڭ ىشىندە 16، حالىقتىڭ دەنساۋلىق جاعدايى بويىنشا 15، ەكونوميكالىق ٴوسىم بويىنشا 31-ورىندا تۇر.

اعىلشىن تىلىنەن اۋدارعان التىناي قۋانىشبەك


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي