BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قىتايدا الەمدەگى ەڭ ۇزىن كوپىر قۇرىلىسى باستالدى

گونكونگ-چجۋحاي-ماكاو كوپىرى دەلتا تەڭىزىنىڭ ەكى جاعالاۋىن بىرىكتىرۋ ماقساتىندا سالىنۋدا. ونىڭ قۇنى – 20 ملرد دوللار، ال ۇزىندىعى – 55 شاقىرىم. بۇل تۋرالى baq.kz اقپارات اگەنتتىگى cnn باسىلىمىنا سىلتەمە جاساپ حابارلايدى.

گونكونگتا سالىنىپ جاتقان الەمدەگى ەڭ ۇزىن تەڭىز كوپىرى جوباسىنىڭ ديرەكتورى گۋو حينگلين قۇرىلىسشىلار تەڭىز بەتىنەن بيىك جەرلەردە، اسا ٴقاۋىپتى ايماقتاردا كوپىر قۇرىلىسىن سالىپ جاتىر دەيدى. بۇل كوپىر قىتايدىڭ ەڭ ٴىرى قالالارى گونكونگ پەن ماكاونى بىر-بىرىمەن بايلانىستىرادى.

2003 جىلى العاش رەت وسى كوپىردىڭ قۇرىلىسى ۇسىنىلعان كەزدە، كوپتەگەن شەنەۋنىكتەر وعان قارسى شىققان بولاتىن. دەگەنمەن، كەيىننەن قىتاي ۇكىمەتىنەن بۇل كوپىر قۇرىلىسى قولداۋ تاپتى. رەكوردتى مەگاقۇرىلىس - قىتايدىڭ گەوساياسي قۇلشىنىسى مەن ەل حالقىنىڭ ەڭبەكقورلىعىن بىلدىرەدى دەيدى تۇرعىنداردىڭ وزدەرى.

ال ساراپشىلار بۇل كوپىر ارقىلى قىتاي ٴوز بيلىگىن نىعايتادى دەپ بولجاۋدا. ويتكەنى، وڭتۇستىك قىتاي تەڭىزىندەگى داۋلى ايماققا گونكونگ، تايۆان جانە پەكيننىڭ تالاسىپ وتىرعانى كوپكە ٴمالىم. سىنشىلار بۇل جوبا ەكولوگيالىق جانە ادامي فاكتورلارعا كەرى اسەر ەتەدى دەيدى.

گونكونگ-چجۋحاي-ماكاو كوپىرى قىتاي ۇكىمەتىنىڭ ايتۋىنشا، سان-فرانسيسكو، نيۋ-يورك جانە توكيوداعى كوپىرلەرمەن باسەكەگە تۇسە الادى. ويتكەنى، ونىڭ تەحنولوگيالىق يننوۆاسياسى مەن ەكونوميكالىق ٴساتتى سالىنىپ جاتقانىن ساراپشىلار العا تارتۋدا.

گونكونگتاعى كوممەرسيالىق جىلجىمايتىن مۇلىك زەرتتەۋ ورتالىعىنىڭ جەتەكشىسى ماركوس چان اتالعان ايماق ديناميكالىق جانە ەكونوميكالىق جاعىنان دامۋدا دەيدى. «كوپىر سالىنىپ جاتقان شىعاناق قىتاي تەرريتورياسىنىڭ 1 پايىزىن قۇرايدى، ال حالىقتىڭ 5 پايىزى وسى جەردى مەكەن ەتەدى. قىتاي جالپى ىشكى ٴونىمىنىڭ 12 پايىزىن وسى ايماقتا وندىرەدى. الەمنىڭ بارلىق مەملەكەتتەرىمەن سالىستىرعاندا، شىعاناق ايماعى ەكونوميكالىق دامۋى جاعىنان 11-ورىنعا يە» دەدى ماركوس چان.

بۇل كوپىردىڭ تەز ارادا سالىنىپ بىتپەۋىنە بىرنەشە ماسەلە كەدەرگى بولدى. سونىڭ ٴبىرى – اتالعان ايماقتا ٴۇش مەملەكەتتىڭ شەكاراسى تىركەلگەن. ولار: گونكونگ/قىتاي; ماكاو/قىتاي; گونكونگ/ماكاو. ٴۇش مەملەكەتتىڭ قۇقىقتىق جۇيەسى مەن ۆاليۋتاسى ٴار ٴتۇرلى. تۇرعىنداردىڭ ٴتولقۇجاتتارى مەن جەكە كۋالىكتەرى دە سايكەس ەمەس. سونداي-اق ٴۇش مەملەكەت تۇرعىندارى ەكى ٴار ٴتۇرلى ٴتىلدى قولدانادى (كانتون جانە ماندارين ٴتىلى).

«باسقا مەملەكەتتەردەگى ٴىرى كوپىرلەرمەن باسەكەگە ٴتۇسۋ ٴۇشىن قىتاي ۇكىمەتى اتالعان ماسەلەلەر مەن كەدەرگىلەردى جويۋى قاجەت. قالالار اراسىنداعى ينتەگراسيانىڭ دامۋىنا ىقپال ەتۋى ٴتيىس» - دەدى چان.

كوپىر اتالعان ٴۇش قالا اراسىنداعى كولىك قاتىناسىن 3 ساعاتتان 30 مينۋتقا دەيىن قىسقارتادى. چاننىڭ ايتۋىنشا، كوپىردىڭ ەكى بەتىندەگى قالالاردىڭ ەكونوميكالىق جاعدايى بىر-بىرىنە ساي ەمەس. «گونكونگ، شەنچجەن جانە دۋنگۋان قالالارى شىعىستا ورنالاسقان. ولار باتىستاعى چجۋحاي، سزيانمەن، چجۋنشان قالالارىنا قاراعاندا دامىعان» دەيدى چان.

ساراپشىلاردىڭ ٴبىر توبى بۇل كوپىر قۇرىلىسى اياقتالعان سوڭ، تاۋار تاسىمالى جۇيەسى جەڭىلدەپ، گونكونگ حالىقارالىق اۋەجايى الەمدەگى ەڭ كوپ جۇك تاسىمالدايتىن اۋەجاي ستاتۋسىنان ايىرىلادى دەپ بولجاپ وتىر.

كوپىر سونداي-اق ٴتۋريزمدى دامىتادى دەپ بولجانۋدا. ويتكەنى، كوپىر اشىلعان سوڭ تۋريستەر گونكونگ اۋەجايىنان ماكاوعا 45 مينۋتتا جەتە الادى. سونداي-اق جولدا دەلتا وزەنىن تاماشالاپ، قىتاي ٴتۋريزمىن دامىتادى دەپ سەنەدى.

ال ساراپشىلاردىڭ ەكىنشى توبى «كوپىر – بوسقا اقشا شاشۋ جولى» دەپ باعا بەردى. تاۋەلسىز ساراپشى كلاۋديا مو گونكونگتىڭ دەموكراتياسىن قولدايدى. «قىتاي مەن گونكونگتى بايلانىستىرۋ ٴۇشىن اۋە، تەڭىز جانە قۇرلىق بايلانىس جۇيەسى بۇرىننان بار. قوسىمشا جوبانىڭ نە قاجەتى بار؟» دەيدى مو.

بۇل ساراپشىلار توبى كوپىردىڭ ساياسي اكت قانا بولعانىن ايتۋدا. گونكونگتاعى 2014 جىلعى دەموكراتيالىق كوتەرىلىستەردەن سوڭ، پەكين ٴوز بيلىگىن كۇشەيتۋ ٴۇشىن كوپىر قۇرىلىسىنا رۇقسات بەردى دەيدى. «گونكونگ جارىلۋعا جاقىن قالدى. ۇلىبريتانيادان دا كوپ تۋريستەردى قابىلداپ جاتىر. 2016 جىلى 56،7 ملن تۋريست كەلگەن بولاتىن. ال ۇلىبريتانيانى بار بولعانى 37،6 ملن شەتەلدىك ازامات ارالاپ قايتقان. سوندىقتان كوپىر قۇرىلىسىنا مۇقتاج ەمەسپىز» دەدى مو.

ايتا كەتەرلىگى، كوپىر قۇرىلىسىنىڭ قاراجاتىن ٴۇش ايماقتىق ۇكىمەت ٴوز مويىندارىنا العان. دەگەنمەن، قاراجاتتىڭ ەڭ كوپ بولىگىن گونكونگ بيلىگى بولگەن.

كوپىر قۇرىلىسى بىرنەشە ايدان كەيىن اياقتالادى. بۇل كوپىر ارقىلى جۇرەتىن اۆتوكولىكتەر ساعاتىنا 100 شاقىرىم جىلدامدىقتى ساقتاۋى ٴتيىس.

اعىلشىن تىلىنەن اۋدارعان التىناي قۋانىشبەك


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي