BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

يندونەزياداعى سۋنامي: قازا تاپقانداردىڭ سانى مىڭعا جەتۋى مۇمكىن

يندونەزيانىڭ ۆيسە-پرەزيدەنتى دجۋسۋف كاللانىڭ ايتۋىنشا، سۋلاۆەسي ارالىنداعى سۋناميدەن قازا تاپقانداردىڭ سانى مىڭ ادامعا جەتۋى مۇمكىن. ال بۇقارالىق اقپارات قۇرالدارىندا جاريالانعان سوڭعى دەرەكتەر بويىنشا، ازىرگە سۋناميدەن قازا تاپقان 420 ادامنىڭ دەنەسى تابىلعان، دەپ حابارلايدى baq.kz اقپارات اگەنتتىگى the guardian باسىلىمىنا سىلتەمە جاساپ.

ۆيسە-پرەزيدەنتتىڭ ايتۋىنشا، قۇتقارۋشىلار ٴالى 300 مىڭنان استام تۇرعىنى بار دونگگالا قالاسىنداعى سۋناميدەن كەيىنگى دەرەكتەردى جاريالاماعان. سول سەبەپتى جوعارىداعى دەرەك شىن مانىندە اناعۇرلىم كوپ بولۋى مۇمكىن. سونىمەن قاتار مەملەكەت بيلىگى كوپ ادامنىڭ دەنەسى تەڭىزگە اعىپ كەتكەن بولۋى مۇمكىن دەپ بولجاپ وتىر. سونداي-اق ۇلتتىق قاۋىپسىزدىك اگەنتتىگى وكىلىنىڭ حابارلاۋىنشا، ولاردى جاعاجاي فەستيۆالىنە دايىندالىپ جاتقان جۇزدەگەن ادامنىڭ تاعىدىرى الاڭداتىپ وتىر.

اگەنتتىك وكىلدەرى سۋناميدەن جاراقات العانداردىڭ سانى ازىرگە 540 ادامعا جەتكەنىن ايتتى. ال اۋرۋحانالار جاراقات العانداردىڭ كوپتىگىنەن اشىق اسپان استىندا ەمحانالار ۇيىمداستىرىپ جاتىر. ال ٴپالۋدىڭ كەيبىر جەرلەرىندە ازداعان جەر سىلكىنىسى قايتالانىپ جاتقاندىقتان، كەيبىر ەمدەلۋشىلەر اسكەري ەمحاناعا جىبەرىلگەن. بۇل جەردە ەم الىپ جاتقان جاراقات العانداردىڭ ٴبىرى دۆي حاريس جەر سىلكىنىسى بولعاندا قوناق ٴۇيدىڭ بەسىنشى قاباتىندا اييەلىمەن جانە بالاسىمەن بىرگە بولعانىن ايتتى.

«مەن جەر سىلكىنىسى كەزىندە ايەلىمنىڭ ايعايلاعان داۋىسىن ەستىدىم. ٴبىراق ارى قاراي ەشتەڭە ەسىمدە جوق. ەكەۋى ٴالى تابىلمادى. ولار ٴدىن امان، ٴارى ٴقاۋىپسىز جەردە شىعار دەپ ۇمىتتەنىپ وتىرمىن»، دەيدى ول.

پالۋدەگى roa roa قوناق ۇيىندە جۇمىس ىستەپ جاتقان قۇتقارۋشىلاردىڭ ايتۋىنشا، ولار ىشتە ادامداردىڭ داۋىسىن ەستىگەن. ٴبىراق قاجەتتى اۋىر قۇرالدار مەن تەحنيكانىڭ بولماۋىنان، ىشتەگى حالىققا ٴالى جەتە الماي وتىر. ال جەكسەنبى كۇنى تاڭەرتەڭ بريگادا قوناق ٴۇي سىنىقتارىنان بەس ادامدى الىپ شىققان. قوناق ٴۇي باسشىلىعىنىڭ ايتۋىنشا، جەر سىلكىنىسى كەزىندە 26 بولمەدە 50 ادام بولعان.

بۇگىن يندونەزيا پرەزيدەنتى دجوكو ۆيدودو ٴوڭىردى ارالايدى دەپ جوسپارلانىپ وتىر. كەشە پرەزيدەنت 7.5 بالدىق جەر سىلكىنىسى مەن 1،5 مەترلىك سۋناميدەن جاراقات العاندار مەن قازا تاپقانداردىڭ دەنەسىن ىزدەستىرۋ جۇمىستارىنا اسكەر جىبەرىلەتىنىن ايتقان بولاتىن.

پالۋ مەن دونگگالا قالالارى ەلەكتر جارىعىنسىز قالدى. سونىمەن قاتار بۇل قالالارعا جانارماي جەتكىزۋ دە قيىنعا سوعىپ وتىر. ال قۇتقارۋ جۇمىستارىنا قاجەتتى قۇرال-جابدىقتاردى جەتكىزىپ جۇرگەن ۇكىمەتتىك ۇشاقتار پالۋ اۋەجايىنا قوندى. دەگەنمەن، اۋەجايدىڭ جاعدايى سىن كوتەرمەيتىندىكتەن، ازىرگە رەسمي وكىلدەر كوممەرسيالىق رەيستەردىڭ توقتاتىلعانىن حابارلادى.

امان قالعان كوپتەگەن تۇرعىندار ٴوز ۇيلەرىنە قايتىپ بارىپ جاتىر. دەگەنمەن، جەر سىلكىنىسى قايتالانىپ جاتقاندىقتان، ولارعا ارنايى جاساقتالعان ورىندارعا بارۋ ۇسىنىلۋدا.

facebook الەۋمەتتىك جەلىسىندە پالۋ قالاسىنداعى جاعداي تۋرالى اقپارات تاراتاتىن پاراقشا اشىلدى. وندا ٴىز-تۇسسىز جوعالعاندار ٴتىزىمى جاريالانىپ، ٴتىپتى، حالىق ٴوز تۋعان-تۋىستارىنىڭ سۋرەتتەرىن سالىپ، ىزدەۋ جۇمىستارىنا كىرىسىپ كەتكەن. كوپشىلىك حالىق سۋنامي تۋرالى ەسكەرتۋدى جوققا شىعارعان اگەنتتىكتى قاتتى سىنعا الىپ وتىر. ال اگەنتتىك بۇل ستاندارتتى جۇمىس پروسەدۋراسى ەكەنىن ايتىپ، ەسكەرتۋ قايتا جوققا شىعارىلۋى كەرەكتىگىن ايتتى. ولاردىڭ ايتۋىنشا، ولار پالۋدەن 200 كم جەردەگى داتچيك مالىمەتتەرىنە سۇيەنە وتىرىپ وسىنداي شەشىم قابىلداعان.

«بىزدە پالۋدەگى باقىلاۋ جۇمىستارىنىڭ دەرەكتەرى جوق. سول سەبەپتى قولدا بار مالىمەتتەردى پايدالانۋعا تۋرا كەلدى»، دەيدى bmkg جەر سىلكىنىسى مەن سۋنامي ورتالىعىنىڭ باسشىسى راحمات تريونو.

ونىڭ ايتۋىنشا، تەڭىز دەڭگەيىن انىقتايتىن داتچيك الىس ورنالاسسا، تەك 6 سم تولقىندى عانا تىركەپ، ودان دا قۋاتتى تولقىندار تۋرالى ناقتى دەرەكتەر ۇسىنا المايدى.

ەستەرىڭىزگە سالا كەتسەك، ٴسۋناميدىڭ پايدا بولۋىنا قاتتى جەر سىلكىنىسى اسەر ەتكەن. جەر سىلكىنىسىنىڭ ەپيسەنترى پالۋ قالاسىندا تابيعي اپاتتان سوڭ 17 مىڭ ادام ەۆاكۋاسيالانعان.

حالىقارالىق قىزىل كرەست ۇيىمىنىڭ دجاكارتاداعى وكىلى يان گەلفاند ەكى تابيعي اپاتتىڭ قاتار كەلگەنى قيىندىق تۋعىزىپ جاتقانىن ايتتى.

«ٴبىز دونگگالا قالاسىنداعى جاعداي تۋرالى ٴالى ەشتەڭە ەستىمەدىك. قولىمىزدا ناقتى دەرەك تە جوق. وندا 300 مىڭنان استام حالىق بار. ياعني، بۇل تراگەديا قازىرگى جاعدايدان دا ناشارلاۋى مۇمكىن»، دەيدى ول.

ال تابيعي اپاتپەن كۇرەس اگەنتتىگىنىڭ وكىلى سۋتوپو پۋرۆو وتكىزگەن ٴباسپاسوز كونفەرەنسياسىندا اۋرۋحاناعا ٴبىر مەزەتتە 261 ادام اكەلىنگەنىن، ساعات سايىن جاعدايدىڭ وزگەرىپ جاتقانىن ايتتى. ونىڭ حابارلاۋىنشا، دونگگالا مەن سيگي، بۋتۋن سەكىلدى قالالارعا قۇتقارۋشىلار ٴالى كىرە الماي وتىر.

«قۇتقارۋعا قاجەتتى اۋىر تەحنيكا بولماي جاتقاندىقتان، ەۆاكۋاسيا جۇمىستارىندا ٴبىرشاما قيىندىقتار بار. ازىرگە قازا تاپقانداردىڭ سانى ٴبىزدىڭ ەسەپتەۋىمىزشە 832 ادام بولدى جانە بۇل سان ٴالى دە وزگەرەتىن بولادى. ٴبىر انىعى، پالۋ قالاسىندا جەر سىلكىنىسىنەن 61 شەتەل ازاماتى قازا تاپتى. بۇگىنگى تاڭدا ٴۇش فرانسۋز، ٴبىر مالايزيالىق جانە ٴبىر وڭتۇستىك كورەيا ازاماتى ىزدەستىرىلىپ جاتىر. جەر سىلكىنىسى مەن سۋناميدەن قايتىس بولعان 821 ادام پالۋ تۇرعىندارى، دونگگالا بويىنشا تەك 11 ادامنىڭ ٴولىمى تۋرالى دەرەكتەر بار. دەگەنمەن، 300 مىڭ تۇرعىنى بار قالاداعى قۇتقارۋ جۇمىستارىنىڭ قارقىندى ٴجۇرىپ جاتپاعانىن ەسكەرسەك، ۆيسە-پرەزيدەنت ايتقانداي، قازا تاپقاندار مەن جاراقات العانداردىڭ سانى ٴالى دە ٴوسۋى مۇمكىن. سوڭعى دەرەكتەر بويىنشا، جاراقات العاندار سانى 540 ادام" - دەيدى ول.

مالايزيا مەن اۆستراليا بيلىگى يندونەزياعا كومەك جىبەرەتىنىن حابارلادى. اۆستراليا پرەمەرى سكوتت مورريسون قانداي كومەك قاجەت بولسا دا جىبەرۋگە دايىن ەكەندىكتەرىن ايتتى.

يندونەزيا تابيعي اپاتتار ٴجيى بولىپ تۇراتىن وڭىرگە جاتادى. بيىل جەر سىلكىنىسىنەن سۋمباۆە ارالىندا 550 ادام قازا تاپقان بولاتىن. ال 2004 جىلى جەلتوقسان ايىندا 9،1 بالدىق جەر سىلكىنىسى بولىپ، ونىڭ سوڭى سۋناميگە ۇلاسقان ەدى. ناتيجەسىندە يندونەزيادا 168 مىڭ ادام، جالپى 220 مىڭ ادام قازا تاپقان بولاتىن.

ەستەرىڭىزگە سالا كەتەيىك، قر ٴسىم مالىمەتىنە قاراعاندا سۋناميدەن زارداپ شەككەندەر اراسىندا قازاقستان ازاماتى جوق.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي