BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اقتوبە وتەجاننىڭ 80 جىلدىعىن تويلاۋدى باستاپ كەتتى

قازاق پوەزياسىنىڭ كلاسسيگى، كورنەكتى اقىن وتەجان نۇرعاليەۆ 1938 جىلى 15 تامىزدا اقتوبە وبلىسىنىڭ بايعانين اۋدانىندا دۇنيەگە كەلگەن.

1964 جىلى جۋرناليستيكا فاكۋلتەتىن بىتىرگەن وتەجان مەكتەپتە ٴمۇعالىم، «قازاقستان پيونەرى» جانە «قازاق ادەبيەتى» گازەتتەرىندە ٴتىلشى، «جالىن» باسپاسىندا رەداكتور بولىپ قىزمەت اتقارعان. قازاق تەلەۆيزياسىندا ۇزاق جىلدار جەمىستى جۇمىس ىستەگەن. الپىسىنشى جىلدارى ادەبيەتكە جاڭا لەپ، جاڭا ەكپىن الا كەلگەن وتەجان نۇرعاليەۆ كوپتەگەن كىتاپتاردىڭ اۆتورى. «مەنىڭ ماحابباتىم»، «اق نوسەر»، «نوسەردەن كەيىن»، «اي استىندا اقبوز ٴۇي»، «قايىڭدى توعاي»، «سوعىستىڭ سوڭعى جازى» ٴتورت تومدىق باللادالارى، «تىنىشتىق»، «افينا مەكتەبى» سياقتى جىر جيناقتارى ونى ولەڭ سۇيەر قاۋىمنىڭ سۇيىكتى اقىنىنا اينالدىردى. ەل الدىنداعى ەلەۋلى ەڭبەگى ٴۇشىن ٴو.نۇرعاليەۆ «قۇرمەت» وردەنىمەن ماراپاتتالعان. اقىن 2011 جىلى 6 قاڭتاردا الماتى قالاسىندا دۇنيەدەن وتكەن.

بيىل 19 قازان كۇنى اقتوبە وبلىسىنىڭ اكىمدىگى، بايعانين اۋدانىنىڭ اكىمدىگى، ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى، «اقتوبە مەديا» جشس، قازاقستان جازۋشىلار وداعى اقتوبە فيليالىنىڭ بىرلەسىپ ۇيىمداستىرۋىمەن وتەجان نۇرعاليەۆتىڭ 80 جىلدىق مەرەيتويىن كەڭ كولەمدە اتاپ ٴوتۋ جوسپارلانعان. اقىننىڭ ٴومىرى مەن شىعارماشىلىعىنا ارنالعان دەرەكتى فيلم تۇسىرىلۋدە. جۇلدەگە قوماقتى قارجى تىگىلگەن رەسپۋبليكالىق جىر ٴمۇشايراسىنا قاتىسۋشىلاردى تىركەۋ 30 قىركۇيەككە دەيىن سوزىلدى. الەۋمەتتىك جەلىلەردە اقىن شىعارمالارىن مانەرلەپ وقۋدان بەينەمارافون قىزۋ تۇردە جالعاسىپ جاتىر.

مەرەيتويدى وتكىزۋ ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى بازاسىندا دەپ جوسپارلانعان. ۋنيۆەرسيتەت ۇجىمى مەن ستۋدەنتتەرى پوەزيا مەرەكەسىنە دايىندىق جۇمىستارىن تۇگەلگە جۋىق ٴبىتىردى. «قازاق ادەبيەتىنىڭ تاريحى جانە وتەجان نۇرعاليەۆ شىعارماشىلىعى» تاقىرىبىندا لەكسيالار سيكلى، اشىق تاربيە ساباقتارى باستالدى. اقىن شىعارماشىلىعى تۋرالى پىكىرلەر مەن ماقالالار جيناعى باسپاعا بەرىلدى. «ٴو.نۇرعاليەۆ اتىنداعى ٴدارىسحانا» اشىلىپ، اقىننىڭ قولادان قۇيىلعان ٴمۇسىنى قويىلادى. اقىن شىعارمالارىنا ارنالعان كورمە دايىندالۋدا. مەرەيتوي اياسىندا «وتەجان نۇرعاليەۆ شىعارماشىلىعى - قازاق پوەزياسىنىڭ رۋحاني ايناسى» حالىقارالىق عىلىمي-پراكتيكالىق كونفەرەنسياسى بولادى. تۇركيا، پولشا، تاتارستان، باشقۇرتستاننان كەلەتىن فيلولوگ، تۇركولوگ عالىمدار بار. قازاقستان جازۋشىلار وداعىنىڭ ٴتوراعاسى ۇلىقبەك ەسداۋلەت باستاعان اقىن-جازۋشىلاردىڭ ۇلكەن شوعىرى كەلەلى جيىن مەن مەرەكەلىك ٴىس-شارالاردىڭ كورىگىن قىزدىرماق. استانا، الماتى، تۇركىستان، اقتاۋ قالالارىنان كەلەتىن عىلىم دوكتورلارى مەن پروفەسسورلار قازاق ٴتىلى مەن ادەبيەتى، الەم ادەبيەتى، تۇركولوگيا عىلىمىنداعى جاڭالىقتار، لاتىن ٴالىپبيى تۋرالى سالماقتى ويلارىن ورتاعا تاستايدى.

مەرەيتويعا ٴو.نۇرعاليەۆتىڭ ۇرپاقتارى مەن تۋىستارى شاقىرىلدى.

بۇل شارالار زاماناۋي ۇلگىدە جابدىقتالعان جاڭا ٴدارىسحانالاردا، مەدياپورتال مەن مەديازەرتحانادا، «ابايتانۋ جانە ۇلتتىق رۋحانيات» عىلىمي-زەرتتەۋ ورتالىعىندا وتەدى.

كەشە ۋنيۆەرسيتەتتىڭ مەرەيتويدى ۇيىمداستىرۋ كوميتەتى جوسپارلى ٴماجىلىسىن وتكىزىپ، جاۋاپتى مەكەمەلەر مەن تۇلعالاردىڭ ەسەبىن تىڭدادى. «رۋحاني جاڭعىرۋ» باعدارلاماسى بويىنشا وتكەلى وتىرعان ٴىس-شارالاردىڭ عىلىمي-زەرتتەۋ جانە تاربيەلىك-تانىمدىق مانىنە باسىمدىق بەرىلەدى.

ايشۋاق دارمەن ۇلى، اقتوبە قالاسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي