BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جارمەڭكە جانە تازالىق

قاراعاندىدا اۋىلشارۋاشىلىق جارمەڭكەسىن وتكىزۋ داستۇرگە اينالعالى دا ٴبىراز ۋاقىت بولىپ قالدى. جارمەڭكەنىڭ ەلگە بەرەر پايداسى مول. اۋەلى شارۋانىڭ ٴونىمىن وتكىزۋىنە مۇمكىندىك بەرەدى. ال قالاداعىلار ازىق-تۇلىكتى بازار باعاسىنان الدەنەشە ەسە ارزانعا ساتىپ الا الادى. ايتسە دە بۇل جارمەڭكەلەردىڭ كەمشىلىكتەرى دە بار. ول سانيتارلىق تالاپتىڭ دۇرىس ساقتالماۋىندا.

قازىبەك بي اۋدانىنىڭ تۇتىنۋشىلار قۇقىعىن قورعاۋ باسقارماسىنىڭ ماماندارى قالا اكىمدىگىنىڭ جانىنداعى اۋىلشارۋاشىلىعى ٴبولىمىنىڭ باسشىسى ىرىسالى سارتبايەۆپەن كەزدەسىپ، وسى ماسەلەنىڭ جايىن تالقىعا سالدى. – اۋىلشارۋاشىلىعى ونىمدەرىن ساۋدالاۋشى كاسىپكەرلەردىڭ ەپيدەميالىق اۋرۋلاردى تاراتۋ مۇمكىندىگى تومەن. ونداي ٴقاۋىپ جوق دەسەك تە بولادى. ايتسە دە ولار ٴبىزدى وزدەرىنىڭ جۇمىستارىمەن تولىق اقپاراتتاندىرىپ وتىرۋى ٴتيىس. سول كەزدە عانا ٴبىز لايىقتى باقىلاۋ ورناتا الامىز، – دەيدى تۇتىنۋشىلار قۇقىعىن قورعاۋ باسقارماسىنىڭ وكىلدەرى. ولاردىڭ جارمەڭكەنىڭ جايىنا الاڭدايتىن وزىندىك سەبەپتەرى بار. تەكسەرۋ بارىسىندا ساۋداعا سالىنعان ٴسۇت ونىمدەرىنىڭ توڭازىتقىشتا ساقتالمايتىنى انىقتالعان.

ال جازدىڭ ىستىعىندا ٴسۇت ونىمدەرى تەز بۇزىلىپ كەتەتىندىكتەن، تۇتىنۋشىلاردىڭ دەنساۋلىعىنا كەرى اسەرىن تيگىزۋى مۇمكىن. سونداي-اق جارمەڭكەلەردە ەت شاباتىن ارنايى ورىندار جوق. ەت ونىمدەرى جەرگە توسەلگەن پوليەتيلەننىڭ ۇستىندە شابىلادى. ياعني سانيتارلىق تالاپقا ساي ەمەس. دەسە دە، ىرىسالى سارتبايەۆ الاڭداۋعا ەش سەبەپ جوعىن العا تارتۋدا. ونىڭ ايتۋىنشا، جارمەڭكەگە اكەلىنگەن ونىمدەر تاڭعى ساعات 8:00- دە ساۋداعا شىعارىلىپ، كۇن قىزعانشا ساتىلىپ كەتەدى. ياعني ولاردىڭ ٴبۇلىنىپ كەتۋ ٴقاۋپى تىم تومەن. ٴبىراق اۋىلشارۋاشىلىعى ٴبولىمى باسشىسىنىڭ بۇل ٴۋاجى تۇتىنۋشىلار قۇقىعىن قورعاۋ باسقارماسىنىڭ وكىلدەرىن قاناعاتتاندىرا المادى. ولار اتالعان كەمشىلىكتەردى تەز ارادا جويۋ باعىتىندا ٴتيىستى شارالاردىڭ قولعا الىنۋىن تالاپ ەتۋدە ■


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي