تۇرمىسقا قاجەت دەگەن دۇنيەنىڭ ٴبارىن تاباسىز...

باسىقارا اۋىلىنداعى №182 مەكتەپتىڭ تابالدىرىعىنان اتتاي قالساڭىز، كوركى كوزدىڭ جاۋىن الاتىن كەرەمەت كورىنىسكە كۋا بولاسىز. كولدە جۇزگەن كوكقۇتاندار بەينەسى مەكتەپ ەمەس، قۇددى ٴبىر ەرتەگىلەر ەلىنە كىرىپ كەلگەندەي اسەر قالدىرادى. بۇل – وسى ٴبىلىم ورداسىندا قىرىق جىلعا جۋىق ۋاقىت تەحنولوگيا ٴپانىنىڭ ٴمۇعالىمى ابدۋل ٴدۇيىسوۆتىڭ قولىنان شىققان تۋىندىلاردىڭ ٴبىرى. ٴوز ىسىنە تياناقتى، جاۋاپكەرشىلىگى مول ٴمۇعالىم وقۋشىلارعا بىلگەنىن ۇيرەتۋدەن جالىققان ەمەس. ٴتىپتى، ولارمەن بىرگە ٴوزى دە ۇنەمى ىزدەنىس ۇستىندە جۇرەدى. اعاش ويىپ، تەمىر بالقىتىپ، ٴتۇرلى تۋىندىلاردى ومىرگە اكەلگەن. زاماناۋي ۇلگىدە سالىنعان جاڭا مەكتەپتىڭ ٴبىر بولمەسى مەكتەپ وقۋشىلارىنىڭ قولىنان شىققان قولونەر بۇيىمدارىمەن جاساقتالعان. مۇندا تۇرمىسقا قاجەت دەگەن دۇنيەنىڭ ٴبارىن تاباسىز. «جىل ٴمۇعالىمى»، «تاڭداۋلى اۋىل ٴمۇعالىمى» اتاقتارىن يەلەنگەن ابدۋلدىڭ جاساعان بۇيىمدارى وبلىس، رەسپۋبليكا كولەمىندە كورمەلەرگە قويىلىپ، قولونەر تۋىندىلارى البومدار- دا جيناقتالعان. ٴتۇرلى بايقاۋلاردىڭ جەڭىمپازى اتانىپ جۇرگەن ۇستازدىڭ ىزىنە ەرگەن شاكىرتتەرى دە جۇلدەسىز ەمەس. ماسەلەن، رەسپۋبليكالىق «ەكويدەيا» جاس سۋرەتشىلەر بايقاۋىندا ٴتورت وقۋشىسى ەرمەك تالاسباي، اسقار رىسقۇل، جالعاس قاراباتىر، ارداق بازارالى ديپلوممەن ماراپاتتالسا، وبلىستىق «بالالىق شاق ەلى!» اتتى قولدانبالى ساندىك ونەر بايقاۋىندا ازامات ابيبۋللايەۆتىڭ شىعارماسى ۇزدىك دەپ تانىلدى.

ال، دوسجان ٴادىلدىڭ قازاق حاندىعىنىڭ 550 جىلدىعىنا وراي اعاشتان جاساعان بۇيىمى اۋداندىق بايقاۋدا ەكىنشى ورىندى جەڭىپ الىپ، مەكتەپ ابىرويىن اسىردى. اۋداندىق، وبلىستىق سۋرەتشىلەر مەن قولونەرشىلەردىڭ بايقاۋىندا الدارىنا قارا سالمايتىن ابدۋلدىڭ كىشكەنتاي شەبەرلەرىنىڭ شىعار شىڭى ٴالى الدا. «ونەرلىنىڭ قولىن ۇستا، ونەگەلىنىڭ جولىن ۇستا» دەگەن قاناتتى ٴسوزدى قاشاندا جادىندا ۇستايتىن ون ساۋساعىنان ونەرى تامعان شەبەر بۇل ناقىلدى كورنەكى ەتىپ جازىپ، شەبەرحانانىڭ تورىنە ٴىلىپ قويعان. كوركەمدەپ جازۋ-سىزۋ، بەينەلەۋ، ويىپ، ورنەكتەپ، تەمىر بالقىتۋ، اعاش جونۋ سەكىلدى جۇمىستاردى ەش قيىندىقسىز ىستەي بەرەتىن امبەباپ ۇستاز: – مەكتەپ قابىرعاسىندا-اق شاكىرتتەرگە سۋرەت سالۋ مەن اعاشتان ٴتۇرلى بەينە قاشاۋدان وزگە، دانەكەرلەۋ جۇمىستارى، تەمىر بالقىتۋ، ونى بىرىكتىرۋ ودان تۇرمىستىق زات جاساپ شىعارۋدى ۇيرەتەمىز. بۇنىڭ ٴوزى ٴبىر ماماندىق. وقۋشىلاردىڭ جۇمىس كەزىندەگى بارلىق قاۋىپسىزدىك ەرەجەلەرى قاتاڭ ەسكەرتىلگەن. بار ماقساتىم – بالالارعا ومىرىنە قاجەتتى ٴبىر دۇنيەنى ۇيرەتۋ، – دەيدى.

ۇلبولسىن تالاپبايەۆا.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!