ەل ەرىمەن ەڭسەلى

فوتو: Елдар Жақыпбек

بەيسەنبى كۇنى جامبىل اۋداندىق ىشكى ىستەر بولىمىندە ەلباسى نۇرسۇلتان ٴابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا پوليسيا ساپىندا جۇمىس جاساپ، قىزمەت بارىسىندا قازا تاپقان ىشكى ىستەر ٴبولىمى قىزمەتكەرلەرىنە ەسكەرتكىش تاقتا قويىلدى.

بۇل شاراعا الماتى وبلىسى بويىنشا ىشكى ىستەر دەپارتامەنتىنىڭ باسقارما باسشىلارى، قالالىق، اۋداندىق ىشكى ىستەر باسقارما باسشىلارى، جامبىل اۋداندىق ىشكى ىستەر ٴبولىمىنىڭ جەكە قۇرامى، قىزمەت بابىندا قازا تاپقان ىشكى ىستەر ٴبولىمى قىزمەتكەرلەرىنىڭ اتا-انالارى مەن زەينەتكە شىققان ٴىىب-نىڭ زەينەتكەرلەرى قاتىستى. وبلىستىق ٴىىد باستىعىنىڭ ورىنباسارى، پوليسيا پولكوۆنيگى بەيبىت كەلگەنبايەۆ جەكە قۇرامدى ساپقا تۇرعىزىپ، وبلىستىق ٴىىد-نىڭ باستىعى، گەنەرال-مايور مۇرات ۇرمۇحانوۆقا بايانداما جاسادى. بايانداما جاساعاننان كەيىن ٴسوز العان مۇرات ۇرمۇحانوۆ: «بۇگىن ٴبىز اقىندار مەن باتىرلار ەلى اتانعان قىزىر مەن قۇت دارىعان جامبىل اۋدانىنا كەلىپ، بىرنەشە قۋانىشتى ٴساتتىڭ كۋاگەرى بولىپ وتىرمىز. سونىڭ ٴبىرى قىزمەت بابىندا قازا تاپقان پوليسيا قىزمەتكەرلەرىنە ارنالعان ەسكەرتكىش بولسا، ەكىنشىسى اتىس-تير عيماراتى، ٴۇشىنشىسى ارنايى جابدىقتاردى ساقتاۋ قويماسى جانە كوشى-قون پوليسياسى قىزمەتكەرلەرىنىڭ ازاماتتاردى 5 تەرەزەدە ٴبىر مەزگىلدە قابىلداۋعا مۇمكىندىك بەرەتىن حالىققا قىزمەت كورسەتۋ بولمەسى. اۋداندىق ىشكى ىستەر بولىمىنە كوڭىل ٴبولىپ، وسىنداي ٴسانى مەن سالتاناتى جاراسقان عيمارات سالىپ بەرۋگە اتسالىسقان اۋدان اكىمى مەن دەمەۋشىلەرگە بارلىق قىزمەتكەرلەرىمىزدىڭ اتىنان العىس ايتامىن. ەلىمىز امان، جۇرتىمىز تىنىش بولسىن»، – دەپ تىلەگىن ٴبىلدىرىپ، وسى يگى ٴىس-شاراعا اتسالىسقان، دەمەۋشىلىك بىلدىرگەن ازاماتتار مەن قىزمەت بارىسىندا جاقسى ناتيجە كورسەتكەن بىرنەشە پوليسيا قىزمەتكەرلەرىن، زەينەت جاسىنداعى پوليسيا زەينەتكەرلەرىن العىس حاتتارمەن، قۇرمەت گراموتالارمەن ماراپاتتادى.
گەنەرال-مايوردان كەيىن ٴسوز العان اۋدان اكىمىنىڭ ورىنباسارى نۇرلان ەرتاس: «بۇگىنگى اشىلىپ وتىرعان ەسكەرتكىش رۋحىمىزدىڭ جاسامپازدىعى مەن جارقىن بولاشاققا جول سىلتەر كوكجيەگىمىزدىڭ ۇيلەسىمدىگى، جالپىۇلتتىق ٴپاتريوتيزمنىڭ وزەگى ىسپەتتەس. « ۇلى تاۋلار الاسارمايدى، ۇلى ەسىمدەر ۇمىتىلمايدى»، – دەپ دانا حالقىمىز ايتپاقشى، وسىنداي ەسكەرتكىشتەر ارقىلى بۇگىنگى ۇرپاق وتكەندى ۇمىتپاي، كەلەشەككە باعدار الىپ، ماڭگىلىك جاڭعىرا بەرەدى. بۇل ەسكەرتكىش ايبىندىلىق پەن ٴپاتريوتيزمنىڭ وشپەس ۇلگىسى، وتانعا دەگەن سۇيىسپەنشىلىك پەن ادالدىقتىڭ سيمۆولى بولىپ قانا قويماي، جاس بۋىنعا ٴور رۋح بەرەتىنى ٴسوزسىز. بۇگىن ٴبىز ەسكەرتكىش تاسپەن قاتار، زاماناۋي تالاپتارعا ساي كەلەتىن اتقىشتار ٴتيرىنىڭ، جاساقتىڭ كيىم ساقتايتىن ارناۋلى ورنىنىڭ، كوشى-قون پوليسياسى قىزمەتكەرلەرىنىڭ ازاماتتاردى 5 تەرەزەدە ٴبىر مەزگىلدە قابىل-داۋىنا مۇمكىندىك بەرەتىن حالىققا قىزمەت كورسەتۋ بولمەسى مەن پوليسيا قىزمەتكەرلەرى ساپقا تۇراتىن الاڭشانىڭ سالتاناتتى اشىلۋ قۇرمەتىنە كەلىپ وتىرمىز. وسىنداي ىستەرگە مۇرىندىق بولىپ، قارجىلاي قولداۋ كورسەتكەن «اقتەرەك» شق-نىڭ باسشىسى، «قۇرمەت» وردەنىنىڭ يەگەرى، اۋدانىمىزدىڭ قۇرمەتتى ازاماتى، اۋداندىق ٴماسليحاتتىڭ دەپۋتاتى تەمىرلان شاينۇسىپوۆكە، «دورتەح-مونتاجسەرۆيس» ٴجشس-نىڭ ديرەكتورى، «قۇرمەت» وردەنىنىڭ يەگەرى، اۋدانىمىزدىڭ قۇرمەتتى ازاماتى ۆيتاليي گرينچەنكوعا، «جول» ٴجشس-نىڭ ديرەكتورى سەرگەي گەيداروۆقا، «تاۋەكەل گاز» ٴجشس-نىڭ ديرەكتورى دانيار نۇربايەۆقا زور ىقىلاسپەن العىس ايتا وتىرىپ، ريزاشىلىعىمىزدى بىلىدىرەمىز»، – دەپ العىس ايتىپ، كەلگەن قوناقتاردى قۇتتىقتادى.
اۋدان اكىمىنىڭ ورىنباسارىنان كەيىن الماتى وبلىسىنىڭ ىشكى ىستەر دەپارتامەنتى-نىڭ وڭتۇستىك ٴوڭىرى بويىنشا ارداگەرلەر كەڭەسىنىڭ ٴتوراعاسى جۇماعالي بۇيەنبايەۆ پەن ىشكى ىستەر ورگانى قىزمەتكەرلەرى اتا-انالارىنىڭ اتىنان ايگۇل سماعۇلوۆالار ٴسوز سويلەپ، جينالعان كوپشىلىككە انالىق العىستارىن ايتىپ، باتالارىن بەردى.
ەسكەرتكىش تاقتا مەن اتىس-تير عيماراتىن، ارنايى جابدىقتاردى ساقتاۋ قويماسىن، كوشى-قون پوليسياسى ٴۇشىن سالىنعان ٴبىر مەزەتتە 5 تەرەزەدەن قىزمەت كورسەتەتىن حالىققا قىزمەت كورسەتۋ بولمەسىن سالتاناتتى تۇردە اشقان وبلىستىق ٴىىد-نىڭ باستىعى، گەنەرال-مايور مۇرات ۇرمۇحانوۆ پەن اۋدان اكىمىنىڭ ورىنباسارى نۇرلان ەرتاس كەلگەن قوناقتارعا عيماراتتاردى تانىستىرىپ ٴوتتى. ٴوز كەزەگىندە مۇرات ۇرمۇحانوۆ اتىس ٴتيرىنىڭ ساپاسىن باقىلاۋ ماقساتىندا سىناقتان وتكىزىپ، جوعارى باعا بەردى.

ەلدار جاقىپبەك.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!