BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەرلىك پەن ەڭبەك ساباقتاستىعى

  ۇلى جەڭىس كۇنىنە 70 جىل وتكەنىمەن، قان مايداندا جان اياماي سوعىسقا قاتىناسقان، ەلگە امان-ەسەن قايتقان سوڭ ەرەن ەڭبەگىمەن ەل ەكونوميكاسىن كوتەرۋگە ەلەۋلى ۇلەس قوسقان اتالارى- مىز جايلى اڭگىمەلەگى تولاستار ەمەس. شىندىعىندا، وتكەن كۇندەر تاريحىنىڭ ۇزىلگەنى ەشبىر جانعا دا قاجەت ەمەس. اسىرەسە سوڭعى جىلدارداعى الاساپىران زاماندا ۇرپاقتار ساناسىن اداستىرماس باعدارشامداي شىنتۋايت تاريحتىڭ قاجەتتىلىگى كۇن ساناپ ارتۋدا. وكىنىشكە وراي، اۋداندىق گازەت رەداكسياسى ۇجىمىنا سوناۋ سۇراپىل جىلدار جايلى اقپارات تام-تۇمداپ تۇسۋدە. وتان سوعىسى جاۋىنگەرلەرىنىڭ ٴبىرى سامامبايەۆ زابيحالىق اقساقال جايلى اقپارات مايدانگەر نەمەرەلەرىنىڭ قولىنان الىنعان بولاتىن. ساقتالعان ماتەريالداردى اقتارا وتىرىپ انىقتاعانىمىز، وتكەن عاسىر باسىندا (1904 جىلى) قورعالجىن اۋدا- نى قوڭىرتۇبەك اۋىلىندا كوپبالالى وتباسىندا دۇنيەگە كەلگەن زابيعالىق اتامىز ماكسيم گوركيي اتىنداعى سوۆحوزدا جيىرما التى جىل ەڭبەك ەتكەن. سۇراپىل سوعىس جىلدارى اسكەر قاتارىنا العاشقىلاردىڭ ٴبىرى بولىپ شاقىرىلىپ، وتانىن قورعاۋدا ايانباي ەرلىك كورسەتكەن. مايدان دالاسىندا 1946 جىلعا دەيىن اسكەري بورىشىن وتەگەن. وكىنىشكە وراي قاي جىلدارى قاي مايداندا سوعىسقاندىعى جايلى اقپارات تولىق ساقتالماعان ەكەن. بۇگىنگى كۇنگە بىزگە جەتكەن رەسمي قاعازداردا سامامبايەۆ زابيعالىق قان مايداندا كورسەتكەن ەرلىگى ٴۇشىن كەڭەستەر وداعى پرەزيديۋمىنىڭ جارلىعىمەن وتان سوعىسىنىڭ ەكىنشى دارەجەلى وردەنىمەن ماراپاتتالعانى جانە 1945 جىلدىڭ 10 اقپانى مەن 29 ناۋرىز اراسىندا سول قولىنىڭ القانىنان جاراقات الىپ №95946 اسكەري ٴبولىمنىڭ گوسپيتالىندا ەم الىپ، جازىلعان سوڭ قايتادان جاۋىنگەرلەر قاتارىنا باعىتتالعانى جايلى اقپارات بار. سول قۇجاتتاردىڭ اراسىندا اسكەري دالا كارتاسىنىڭ ساقتالعان ٴبىر بولىگىندە ورەحوۆكا ەلدى مەكەنىنىڭ ورنى كورسەتىلگەن. شاماسى، مايدانگەر ماسكەۋ باعىتىنداعى اسكەري بولىمدەردە سوعىسقان سياقتى. اسكەردەن ەلگە ورالعان جاۋىنگەر ەل ەكونوميكاسىن كوتەرۋ جولىندا تالاي تەر توككەن كورىنەدى. ەڭبەك كىتاپشاسىندا م. گوركيي جانە ە. تەلمان اتىنداعى سوۆحوزداردا كوپ جىل قوي باققاندىعى جونىندە ەكى جول عانا حابارلاما بار. دەگەنمەن، سول جىلدارى قازاق سسر جوعارعى سوۆەتى پرەزيديۋمىنىڭ ٴتوراعاسى ج. تاشەنوۆ قول قويعان قۇرمەت گراموتاسىندا «قازاق سسر سوسياليستىك مال شارۋاشىلىعىنىڭ ەڭبەك سىڭىرگەن شەبەرى» دەگەن قۇرمەتتى اتاعى مەن باعالى سىيلىقتار، قۇرمەت گراموتالارى 1957 جانە 1958 جىلدارى تاپسىرىلعانى جايلى، مولوتوۆ اۋداندىق اتقارۋ كوميتەتىنىڭ 1953 جىلى تابىستاعان قۇرمەت گراموتاسى، سونداي-اق، تاپ سول جىلى اقمولا وبلىستىق اتقارۋ كوميتەتىنىڭ گراموتاسى زابيعالىق اتامىزدىڭ ەرەن ەڭبەگىنىڭ تاتىمدى باعالانعاندىعىنىڭ كۋاگەرلەرى. وزات قويشى 1959 جىلى پرەوبرەجەنسك سەلولىق ەڭبەككەرلەر كەڭەسىنىڭ دەپۋتاتى بولىپ سايلانۋى اۋىل جانە اۋدان جۇرتشىلىعىنا تانىمالدىعىنىڭ بەلگىسىندەي. زەينەتكەرلىك جاسقا جەتسە دە قويشى تاياعىن تاستاماعان اتاي 1971 جىلى جانۇيا جاعدايىمەن جاقسى اۋدانى رەنتابەلنىي سوۆحوزىنا قونىس اۋدارعان. قارت مايدانگەردى جاس مامان بىزدەر سول مەزگىلدەن بەرى بىلەتىن ەدىك. سوۆحوز مۇلكىن باقىلاپ، ەگىستىك جەرلەرگە مال تۇسپەۋىن قاتال كۇزەتكەن اقساقال ەڭبەككە دەگەن ىنتاسىمەن، اسقان جاۋاپكەرشىلىگىمەن اۋىل جۇرتشىلىعىنا تانىمال بولاتىن. بايىپتى مىنەزىمەن، ادال ىسىمەن، پاك كوڭىلىمەن جاستارعا ۇلگى كورسەتكەن قارت مايدانگەر سەكسەن جاستىڭ ەكەۋىندە باقيلىق جايعا اتتانعان ەدى. ارتىندا قالعان بالاسى، نەمەرە، شوبەرەلەرى اۋدانىمىزدىڭ وركەندەۋىنە ٴوز ۇلەستەرىن قوسىپ، مايدانگەر اتىنا جامانات كەلتىرمەۋگە تىرىسۋدا. قاھارمان ارداگەرلەردىڭ ۇلى وتان سوعىسىنداعى ەرلىگى، ودان كەيىنگى جىلدارداعى ەرەن ەڭبەگى ەشقاشان ۇمىت بولماق ەمەس. ەلدىڭ ەلدىگىن، ەردىڭ ەرلىگىن تاعلىمدى باعالاپ، كوزى ٴتىرى جاۋىنگەرلەرىمىزگە قۇرمەت كورسەتۋ بۇگىنگى ۇلانداردىڭ مىندەتى ەكەندىگىن ەستە ساقتايىق، وتانداستارىم.

 

جايساڭ نۇرجاقسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي