BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جەڭىستى جاقىنداتقان جاندار

ادامزات تاريحىنداعى سۇم سوعىستىڭ بولىپ وتكەنىنە، مىنە 70 جىل تولادى. ۇلى جەڭىستىڭ ۇمىتىلمايتىنى سياقتى، سوعىس تا ۇمىتىلماستاي ٴىز قالدىردى. جەڭىس كۇنى - بۇل سان مىڭداعان ۇرپاق ٴۇشىن مەرەكە. بۇل مەرەكە - وتان قورعاعان جاۋىنگەرلەر مەن تىلداعى جەڭىستى جاقىنداتقان جۇمىسشىلاردىڭ ەرەن ەڭبەكتەرىنىڭ ماڭگى وشپەيتىنىن دالەلدەيتىن بەلگى بولىپ قالماق.

وسى ۇلى جەڭىستىڭ 70 جىلدىعىنا وراي ٴار ەلدى مەكەندەردە ٴتۇرلى ٴىس-شارالار وتكىزىلۋدە. سونداي ٴىس-شارالار ٴبىزدىڭ قۇيعان اۋىلىنداعى №32 ورتا مەكتەپتە دە وتىلۋدە.

جەڭىستى جاقىنداتقان جانداردىڭ ٴبىرى قۇيعان اۋىلىنىڭ تۇرعىنى، تىل ارداگەرى، 92 جاستاعى ارداقتى انا مۇقايەۆا تىلەپالدى اجەمىزدى ۇلى  جەڭىستىڭ 70 جىلدىعىنا وراي اڭگىمەگە تارتقان ەدىك.

- مەن، 1923 جىلى 15 اقپاندا كەگەن اۋدانىندا قاراپايىم وتباسىندا دۇنيەگە كەلدىم. ون ٴتورت جاسىمنان باستاپ جۇمىسقا ارالاستىم، تۇسكە دەيىن ساباققا بارىپ، تۇستەن كەيىن اكەمنىڭ ٴىنىسى كەگەنباي دەگەن كىسى كولحوز پرەدسەداتەلى بولىپ جۇمىس ىستەدى، سول كىسىگە كومەكتەسىپ كولحوزشىلاردىڭ ەڭبەك كۇنىن قورىتاتىنمىن. 1942 جىلدان باستاپ سەلسوۆەتتە حاتشى بولىپ جۇمىس ىستەدىم. مەن سول كەزدە 9-سىنىپتى اياقتادىم. اتقا ٴمىنىپ 15 كۇندە 1 رەت اۋىل-اۋىلدى ارالاپ، سوعىسقا تاماق، كيىم-كەشەك جينايتىنبىز. كۇپايكە، قولعاپ، باس كيىم، ش ۇلىق، كەي كەزدەرى ماقتالى كورپەدەن دە كيىمدەر تىكتىرىپ، جىبەرىپ وتىردىق. التى كولحوز بولدى، ۇشەۋى تاۋدىڭ ارعى جاعىندا، ۇشەۋى تاۋدىڭ بەرگى جاعىندا بولدى. ەرىنبەي اتقا ٴمىنىپ سول اۋىلداردى ارالاپ ازىق جينادىق. اكەم  جارقىنباسوۆ مۇقا جىلقىشى بولدى. سوسياليستىك ەڭبەك ەرى، التىن بەلگى يەگەرى بولعان. ەڭ مىقتى دەگەن اتتاردى دايىنداپ سوعىسقا جىبەرىپ وتىردىق. سول كەزدە بۋدەننىيدىڭ ٴوزى اكەمە: «دايىنداعان اتتارىڭىز سوعىسقا وتە ٴتوزىمدى، مىقتى اتتار ەكەن، راحمەت!» - دەپ العىس حات جاريالاعان. سوعىس بىتكەنشە نەبىر قيىندىقتاردى كوردىك. سوعىستىڭ بىتكەنىن ەستىگەندە قاتتى قۋاندىق، قۋانعانىمىز سونشالىق: «اقىرى وسى كۇنگە دە جەتتىك-اۋ»، - دەپ بوركىمىزدى اسپانعا لاقتىردىق. 1945 جىلى تامىز ايىندا تۇرمىس قۇردىم. جولداسىم توقتاسىن كولحوز پرەدسەداتەلى، ٴوزىم ەسەپشى بولىپ جۇمىس ىستەدىم. 1947 جىلى ۇلكەن قىزىم راۋحاندى، ودان كەيىن 1949 جىلى باتيحاندى، 1951 جىلى ٴناسىلحاندى، 1953 جىلى ورالحان، 1955 جىلى ۇلىم رابات، 1960 جىلى كەنجە قىزىم وڭال دۇنيەگە كەلدى. جولداسىم 1942 جىلى سوعىستا قاتتى جارالانىپ، ٴىى-توپتاعى مۇگەدەك بولىپ ورالىپ، 1960 جىلى 5 قاڭتاردا دۇنيەدەن ٴوتتى. 1979 جىلدان باستاپ اۋىلدا ساتۋشى بولىپ 25 جىل جۇمىس ىستەدىم. قىزدارىمنىڭ ٴبارى جوعارعى وقۋ ورىندارىن بىتىرگەن. ٴقازىر ٴتورت قىزىم دا زەينەتكەر، وزدەرىنىڭ جەكە كاسىپتەرى بار. قازىرگى ۋاقىتتا ۇلىم - رابات، قىزدارىم - ٴناسىلحان، وڭال اۋىلىمىزداعى مەكتەپتە قىزمەت ىستەيدى. ٴقازىر 18 نەمەرە، 14 شوبەرە ٴسۇيىپ وتىرمىن. ەلىمىزگە تىنىشتىق، اسپانىمىز اشىق، ەلباسىمىز امان بولسىن -دەپ جۇرەكجاردى لەبىزىن ٴبىلدىردى.

ەلىنە ەلەۋلى، حالقىنا قالاۋلى بولعان ارداقتى اجەمىزدىڭ ٴومىر جولى، تالىم-تاربيەسى كەلەر ۇرپاققا ۇلگى بولارى ٴسوزسىز.

 

گۇلميرا بەرگەنتاي. قۇيعان اۋىلى.  


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي