BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جاس مەرگەندەر انىقتالدى

جاقىندا بورودۋليحا اۋداندىق كوللەدجىندە العاشقى اسكەري دايىندىق ٴپانىنىڭ ٴمۇعالىمى، وتستاۆكاداعى پودپولكوۆنيك دايروۆ مارات كەنجەش ۇلىنىڭ جانە كىتاپحاناشى بايانوۆا ساۋلەت التىبايقىزىنىڭ ۇيىمداستىرۋىمەن ۇلى جەڭىستىڭ 70 جىلدىعىنا ارنالعان مەرگەندەر بايقاۋى مەن كىتاپتار كورمەسى بولىپ ٴوتتى.

بولاشاقتا وتان قورعايتىن، سارباز بولاتىن بۇگىنگى جاستاردىڭ تۇلا بويىندا پاتريوتتىق سەزىمدەر قالىپتاستىرۋ، ولاردى ەلجاندىلىققا تاربيەلەۋ، نامىس-جىگەرلەرىن جانۋ ماقساتىندا وتكىزىلگەن بۇل شاراعا كوللەدجدىڭ م-1 جانە پ-1 توپتارىنىڭ ستۋدەنتتەرى قاتىستىرىلدى.

مەرگەندەر سايىسى باستالار الدىندا مارات كەنجەش ۇلى وسى ٴىس-شارانىڭ ماقساتتارى تۋرالى ايتا كەلىپ، ستۋدەنتتەرگە اتىس قارۋىمەن جۇمىس جاساعان كەزدە مىندەتتى تۇردە ساقتالۋى ٴتيىس قاۋىپسىزدىك شارالارى تۋرالى نۇسقاۋلىق وتكىزدى. ودان كەيىن سايىستىڭ شارتى تانىستىرىلدى. ەرەجە بويىنشا ٴار قاتىسۋشىعا سەگىز وق بەرىلەدى. ونىڭ ۇشەۋى – الدىن-الا داعدىلانۋ ٴۇشىن، بەسەۋى – ۇپاي ٴۇشىن.

كوللەدجدە اسكەري دايىندىقتان ٴوتىپ، اتىس قارۋلارىن (اۆتوماتتى) شاشىپ، قايتا جيناۋ جانە تاعى باسقا دا اسكەري ماشىقتارعا بەيىمدەلىپ جۇرگەن ستۋدەنتتەرگە پنەۆماتيكالىق مىلتىقتان وق اتۋ ەش قيىندىق تۋدىرعان جوق. ون مەتر قاشىقتىقتا تۇرعان نىساناعا دالدەپ تيگىزۋ شارتتارىن ورىنداعان ٴار قاتىسۋشى تۇرەگەپ تۇرىپ اتۋ قيمىلدارىن ٴساتتى ورىندادى. جاس ساربازدار قارۋ ۇستاۋ جانە نىسانا اتۋ ادىستەرىن جاقسى مەڭگەرگەندىكتەرىن كورسەتتى. ٴتىپتى، اراسىندا جاقسىلاپ تاربيەلەسە بولاشاقتا «قۇرالايدى كوزگە اتقان» مەرگەندەر شىعاتىنىنا سايىس بارىسىندا كوزىمىز جەتتى.

سايىستىڭ قورىتىندىسى بويىنشا تينگايەۆ ۆيتاليا 1-ورىندى، حولوستوۆ الەكسەي 2-ورىندى، ۆوروچيحين ەۆگەنيي 3-ورىندى يەلەندى. بۇل ٴۇش جۇلدەگەر دە م-1 توبىنىڭ ستۋدەنتتەرى ەكەن. اتالعان توپ جالپى كوماندالىق ەسەپتە دە ٴبىرىنشى ورىندى ەنشىلەدى.

اتىس الاڭىنداعى سايىس اياقتالعان سوڭ ستۋدەنتتەر كوللەدجدىڭ كىتاپحاناسىنا جينالدى. كىتاپحاناشى ساۋلەت التىبايقىزى جەڭىستىڭ 70 جىلدىعىنا ارناپ كورمە ۇيىمداستىرعان ەكەن. كورمەگە سوعىسقا قاتىسقان جەرلەستەرىمىز، وتان سوعىسىنىڭ تاريحى تۋرالى ماتەريالدار، سونداي-اق سول كەزەڭنەن سىر شەرتەتىن ادەبي شىعارمالار قويىلعان ەكەن. ساۋلەت التىبايقىزى ستۋدەنتتەرگە كورمەنى تانىستىرا وتىرىپ، جاستاردى وتكەندى قۇرمەتتەۋگە، تاريحتى بىلۋگە ۇندەدى.

ۇلى وتان سوعىسىنداعى جەڭىستىڭ 70 جىلدىعىنا ورايلاستىرىلعان بۇل شارا ٴساتتى ٴوتتى دەسە بولادى. ٴوز ٴىسىن بىلەتىن، بىلىكتى مامان مارات كەنجەش ۇلى بۇل ٴىس-شارا تۋرالى: «پاتريوتتىق تاربيە – تاربيەنىڭ نەگىزى. ۇرپاعىمىزدى كەۋدەسىندە نامىسى بار، تۋعان ەلىن، جەرىن سۇيەتىن ونەگەلى ۇرپاق ەتىپ وسىرگىمىز كەلسە، بار نازاردى كەلەشەك ۇرپاقتىڭ تاربيەسىنە اۋدارۋىمىز قاجەت. قازىرگى ٴبىلىمىنىڭ بولاشاعى پاتريوتتىق تاربيەدە. ەلىمىزدىڭ پرەزيدەنتى نۇرسۇلتان ٴابىش ۇلى نازاربايەۆ ٴبىلىم سالاسىندا پاتريوتتىق تاربيە مەن پاتريوتيزمگە ماڭىزدى ورىن بەرەدى. ەلباسىمىز كەلەشەك ۇرپاقتى «قازاقستاندىق» ەكەنىنە ماقتاناتىنداي ەتىپ تاربيەلەۋ ٴۇشىن پاتريوتتىق تاربيەگە سۇيەنۋ كەرەكتىگىن ايتادى. مىنە، سوندىقتان دا ٴوزىمىزدىڭ وقۋ ورنىمىزدا وسى باعىتتاعى شارالاردى اتقارىپ جاتىرمىز»،- دەپ وي ٴبولىستى.

«ٴبىر جىلعا جوسپار قۇرساڭ – ەگىن ەك،

ٴجۇز جىلعا جوسپار قۇرساڭ – اعاش ەك،

مىڭ جىلعا جوسپار قۇرساڭ – ۇرپاعىڭدى تاربيەلە»، - دەپ شىعىس ماقالىندا ايتىلعانداي، جاس ۇرپاقتى پاتريوتتىق تاربيە نەگىزىندە وسىرسەك، ەگەمەندى ەلىمىزدىڭ بايراعى تۇعىردان تايماسى كامىل.

ا.تلەۋعازين


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي