BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلىن سۇيگەن، ەلى سۇيگەن ازامات

مۇحامەدقاليمەن تانىسپاس بۇرىن ول جايىندا ەل ازاماتتارىنان كوپ ەستىگەنمىن. «ٴبىر تەرىنىڭ پۇشپاعىن بىرگە يلەپ» دەگەندەيىن اۋداندىق گازەتتە كوپ جىل بىرگە ىستەگەن دوسىم قايىردى نازىربايەۆ سۇلتانماحمۇت تورايعىروۆ اتىنداعى شىڭعىستاي ورتا مەكتەبىندە وقىعان كەزدەرىن ەسكە العاندا ينتەرناتتا بىرگە تۇرعان دوستارى كيبەرنەتيكا عىلىمدارىنىڭ دوكتورى، پروفەسسور مارقۇم تولەۋحان بياروۆ، قر ەڭبەگى سىڭگەن مادەنيەت قايراتكەرى ٴانشى رامازان ەلۋبايەۆتارمەن بىرگە مۇحامەدقالي بۇلعىنوۆتى دا ەرەكشە ٴبىر ىستىق سەزىممەن اتايتىن. ەكى اۋدان قوسىلعاننان كەيىن مۇحامەدقالي زامانداسىمىز جايلى ماعلۇماتتاردى كوپ الاتىن بولدىم. «اراي» گازەتىندە بىردە ول باسقارىپ وتىرعان «بۇلعىنوۆ» جشس ماۋسىمدىق جۇمىستارىنان ماتەريالدار، ەندى بىردە مۇحامەدقاليدىڭ اۋداندىق دەڭگەيدە وتكىزىلگەن جينالىستاردا سويلەگەن سوزدەرى، رەسپۋب ليكامىزدا بولىپ جاتقان ٴارتۇرلى الەۋمەتتىك-ساياسي جاعدايلارعا ازامات رەتىندە بىلدىرگەن پىكىرلەرى، اۋىلداستارىنىڭ ونىڭ اتىنا ايتقان ريزاشىلىقتارى باسىلىپ تۇردى. پەندەشىلىك قوي، ول جايىندا مەندە وسىنشاما ماعلۇمات بولا تۇرا العاش رەت م. بۇلعىنوۆتىڭ ٴوزىن كورگەندە بۇرىنعى ەستىگەندەرىمە سەنىڭكىرەمەي دە قالدىم. اۋداندىق اكىمشىلىكتىڭ الدىندا «دجيپ» ماشيناسىنان ٴتۇسىپ كەڭسەگە قاراي نىق باسىپ كەلە جاتقان، ۇستىنە شىمقاي قارا ٴتۇستى كوستيۋم مەن پالتو كيگەن، اتجاقتى جۇزىنە جاراسىمدى ەتىپ ساندەپ ساقال قويعان ول ماعان شارۋاشىلىق باسشىسى ەمەس ونەر ادامى سياقتى بولىپ كورىنگەن. ادامدى جۇرە، سويلەسە كەلە تانيسىڭ.مۇقامەتقالي زامانداسىمىز ومىردە ەلىم، جەرىم دەپ سوققان جۇرەگى بار، جانى دا قولى دا اشىق اڭقىلداعان جان بولىپ شىقتى. بۇكىل عۇمىرىن اۋىلشارۋاشىلىعىن وركەندەتۋگە، اۋىلداستارىنىڭ الەۋمەتتىك ماسەلەلەرىن شەشۋگە ارناپ، قوعامدىق جۇمىستارعا دا ٴجۇردىم-باردىم قاراماعان. ٴقازىر دە ول التىنبەل اۋىلدىق وكرۋگىنەن سايلانعان اۋداندىق ٴماسليحاتتىڭ دەپۋتاتى رەتىندە دە اۋداننىڭ مادەني-الەۋمەتتىك ومىرىنە ارالاسىپ ٴوز سايلاۋشىلارىنىڭ مۇددەلەرى ٴۇشىن بارىن دا جانىن دا سالىپ ٴجۇر. ياعني، ول دەپۋتاتتىق كورپۋسقا كىرگەننەن بەرگى ۋاقىت ىشىندە مايەمەر ورتا مەكتەبىنە سۋ تارتىلدى، كوشەلەرگە جارىقشامدار ورناتىلىپ، اۋىل ىشىندە سۋ شۇمەگى ىسكە قوسىلدى. التىنبەل اۋىلدىق وكرۋگىنە كىرەتىن وزگە دە ەلدىمەكەندەردە جولدار، كوپىرلەر جوندەلىپ سايلاۋالدى باعدارلاماسىندا بەلگىلەنگەن ماقساتتارىنىڭ باسىم بولىگىن ابىرويمەن ورىنداپ ۇلگەردى. جاستاردى ەڭبەككە، يماندىلىققا تاربيەلەۋ، تۋعان اۋىلى مايەمەردىڭ تۇرعىندارىن تۇراقتاندىرۋ م. بۇلعىنوۆتىڭ جاتسا-تۇرسا ويىنان دا ىسىنەن دە تىس قالمايدى. اۋىلدا وتكىزىلەتىن مادەني-كوپشىلىك شارالارعا، ٴال-اۋقاتى تومەن وتباسىلارىنا دەمەۋشىلىك جاساپ وتىرۋدى دا ول ٴوزىنىڭ ازاماتتىق ٴىسى، تۋعان جەرىنە دەگەن تاعزىمى دەپ سانايدى، مۇقامەتقالي بۇلعىنوۆتى وسىن- داي بيىك ازاماتتىق دەڭگەيگە جەتكىزگەن ەڭ الدىمەن جوعارى سانا، ٴوز حالقىنا، ۇلتىنا، تۋعان جەرگە دەگەن سۇيىسپەنشىلىك سەزىمى مەن ٴومىر اتتى ۇلكەن مەكتەپ ەكەنى ايدان انىق. بۇعان ونىڭ ٴاربىر ٴىس-قيمىلىنان، سويلەگەن سوزىنەن، ٴومىر جولىنان انىق كوز جەتكىزۋگە بولادى. -مايەمەردەن سەگىزجىلدىقتى بىتىرگەننەن كەيىن ٴبىر جىل شىڭعىستايدا ينتەرناتتا تۇرىپ وقىدىم. ال، ورتا ٴبىلىمدى كوكتەرەكتەن الدىم،- دەيدى م. بۇلعىنوۆ. - وتباسىمىز ۇلكەن ەدى. ون ٴبىر بالا ەسەپشى بولىپ ىستەيتىن اكەمنىڭ ەڭبەكاقىسىمەن كۇن كوردىك. انامىز وتباسىمىزدىڭ بەرەكە- بىرلىگىن ساقتاپ، جەكەمەنشىگىمىزدەگى مالىمىزدىڭ ونىمدەرىن ىسكە جاراتىپ، ٴۇي تىرلىگىمەن اينالىستى. ۇلكەن وتباسىندا تۋىپ، باردى دا جوقتى دا ٴبىلىپ وسكەن مۇقاڭ مەكتەپتى بىتىرگەننەن كەيىن «مەن ۇلكەن قالالارعا بارىپ وقيمىن» دەپ اتا-اناسىن قينامادى. اكەسىنىڭ اقىلىمەن وسكەمەنگە با- رىپ ٴوزى قالاعان ينستيتۋتىنا ٴتۇستى دە ٴبىر جىلدان كەيىن وتباسىلىق جاعدايىنا بايلانىستى وقۋىن ٴۇزىپ، اۋىلعا قايتىپ كەلىپ كولحوزدا قاتارداعى جۇمىسشى بولدى. اسكەر قاتارىندا ٴوزىنىڭ وتان الدىنداعى ازاماتتىق بورىشىن وتەگەننەن سوڭ، وندىرىستەن قول ۇزبەي ٴجۇرىپ ساراتوۆكانىڭ اۋىلشارۋاشىلىعى تەحنيكۋمىن ٴبىتىردى. العاشىندا «لەنين» اتىنداعى كولحوزدىڭ مايەمەر وندىرىستىك ۋچاسكەسىندە مەحانيك، ودان سوڭ، ەگىس بريگاداسى بريگاديرىنىڭ كومەكشىسى، كول- حوز ورتالىعىندا ينجەنەر بولىپ قىزمەت ىستەگەننەن سوڭ مايەمەردە وندىرىستىك ۋچاسكەنىڭ مەڭگەرۋشىلىگىنە تاعايىندالدى. «ۇستازى جاقسىنىڭ ۇستانىمى جاقسى»،-دەيدى حالىق. اۋىلشارۋاشىلىعى ٴوندىرىسىنىڭ بىلگىرلەرى، كولحوز باستىقتارى بولعان سوسياليستىك ەڭبەك ەرى بوشاي كىتاپبايەۆ پەن سايلاۋ حان اۋحاديەۆتىڭ مەكتەبىنەن وتكەن ول باسشىلىق جۇمىسقا شىڭدالىپ كەلدى. بۇل قىزمەتتى م. بۇلعىنوۆ مەملەكەتتىك مەنشىك جويىلعانشا، ۇزبەي ون بەس جىل اتقاردى. زامان اعىمىن تۇسىنەتىن، اۋىلشارۋاشىلىعى ٴوندىرىسىنىڭ قىر-سىرىن بەس ساۋساقتاي بىلەتىن، باسشىلىق جۇمىستان دا مول تاجىريبە جيناعان مۇقامەتقاليعا جاڭا قوعامعا بەيىمدەلۋ ەش قيىندىق ەتپەدى. وزىمەن بىرگە بۇرىننان وندىرىستىك ۋچاسكەدە بىرگە ەڭبەك ەتكەن جىگىتتەرمەن اقىل قوسىپ، «بۇلعىنوۆ» اتتى جاۋاپكەرشىلىگى شەكتەلگەن سەرىكتەستىك قۇرىپ تەحنيكالىق بازالارىن تالان-تا- راج ەتپەي ساقتاپ قالدى. جەكە كەتىپ، ٴوز كاسىبىمدى جاسايمىن دەگەندەردىڭ دە قولىن قاقپادى. سول بەتتە ول قاراماعىنا العان 420 گەكتار ەگىستىك جەرىنە استىق سەۋىپ ٴوزىنىڭ جەكە شارۋاشىلىعىن باستاپ كەتتى. «ٴوزىم دەگەندە وگىز قارا كۇشىم بار» دەپ اتام قازاق تەگىن ايتپاعان عوي، - دەيدى م. بۇلعىنوۆ.- قولىمىزدا بار تەحنيكا كۇشىمەن اگروتەحنيكالىق شارالاردى تولىعىمەن ساقتاۋعا ۇمتىلىپ ەڭبەك ەتتىك. توگىلگەن ماڭداي تەرىمىز تەككە كەتپەدى، مولىنان ٴوز جەمىسىن بەردى. بىرنەشە جىل قاتارىنان استىق داقىلدارىنىڭ ٴار گەكتارىنان 30-40 سەنتنەردەن ٴونىم جينادىق. قامبامىز دانگە تولعان سوڭ كوڭىل كۇيىمىز دە كوتەرىلىپ، ەڭبەككە دەگەن قۇلشىنىسىمىز دا ارتتى. ٴقازىر سول بەتىمىزبەن ەڭبەك ەتىپ كەلەمىز. ٴوزى تۋرالى ايتقاندى ونشا ۇناتا بەرمەيتىن م. بۇلعىنوۆتىڭ قول جەتكىزگەن جەتىستىكتەرىنىڭ، تۋعان اۋىلىنا جاساپ وتىرعان كوپ جاقسىلىقتارىنىڭ، ونىڭ ۇزاق جىلدارداعى ەڭبەگىنىڭ وتەۋى- بيىلعى تاۋەلسىزدىك مەرەكەسى قارساڭىندا قر اۋىلشارۋاشىلىعى مينيسترلىگىنىڭ قۇرمەت گرامو- تاسىمەن، اۋداندىق، وبلىستىق دەڭگەيلەردەگى باسشىلىقتاردىڭ ماداقتاما قاعازدارىمەن، باعالى سىيلىقتارىمەن باعالانعاندىعى دەپ بىلگەن ٴجون. ادام ٴومىرى ماحابباتتان تۇرادى. ول تۋعان جەرگە، وسكەن ەلگە، ٴوز ۇلتىنا، سۇيگەن ادامىنا دەگەن ماحاببات. ەندەشە ەلىن سۇيگەن، ەلى سۇيگەن مۇحامەدقاليدىڭ جۇدىرىقتاي جۇرەگى ونداي ماحابباتقا تولى.

 

جانىبەك قىزىر. سۋرەت اۆتوردىكى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي