BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جەز تاڭداي انشىلەر تارباعاتاي تورىنە جينالدى

كەز-كەلگەن ەلدى جەر-جاھانعا مادەنيەتى پەن سپورتى تانىمال ەتەدى دەسەك، قازىرگى تاڭدا وسى ەكى سالامەن تارباعاتاي اۋدانىنىڭ اتى دۇركىرەپ تۇر. ايتىس پەن قازاق كۇرەسىنىڭ "وتانى" سانالاتىن ٴوڭىرىمىز انشىلەردىڭ دە داۋىسىن التى قىردان اسىراتىن ونەر ورداسىنا اينالىپ كەلەتىنىنە كۇمان جوق. ولاي دەيتىنىمىز، وتكەن اپتادا تاۋەلسىزدىكتىڭ 25 جىلدىعىنا بايلانىستى اقسۋاتتاعى اۋداندىق مادەنيەت ۇيىندە حالىقارالىق "تارباعاتاي جۇلدىزدارى" ەسترادالىق ٴان فەستيۆالى ٴوتتى.

«بۇعان دەيىن اۋداندىق، وبلىستىق دەڭگەيدە وتكىزىلىپ كەلگەن "تارباعاتاي جۇلدىزدارى" ٴان فەستيۆالىنىڭ مىنەكي، حالىقارالىق دارەجەگە جەتكەندىگىنىڭ كۋاسى بولىپ وتىرمىز. "ونەردە شەكارا جوق" دەگەن وسى بولار. جالپى، بۇل مادەني شارا اۋىل تۇرعىندارىنىڭ ەستەتيكالىق قاجەتتىلىگىن وتەۋگە، ەلباسىنىڭ ماڭگىلىك ەل يدەياسىنا ٴۇن قوسۋعا باعىتتالعان»،-دەدى اۋدان اكىمى دىلدابەك ورازبايەۆ قۇتتىقتاۋ سوزىندە. ساحنا ساڭلاقتارىنىڭ ونەرىن تاماشالاۋعا كەلگەن حالىقتا ەسەپ بولمادى. "قۇلاقتان كىرىپ، بويدى الاتىن" اسەم اندەرگە تولى فەستيۆالعا تارباعاتاي، كوكپەكتى، اباي، ٴۇرجار، زايسان، كۇرشىم اۋداندارى مەن وسكەمەن، سەمەي، شىمكەنت، كۋرچاتوۆ، الماتى، پاۆلودار، قىزىلوردا، تالدىقورعان، تاراز، كوكشەتاۋ قالالارى جانە رەسەي، قىتاي، تۇركيا، موڭعوليا، وزبەكستان، قىرعىزستان مەملەكەتتەرىنەن كۇمىس كومەي انشىلەر قاتىستى. ٴوز قاتارلارىنان سۋىرىلىپ العا شىققان جيىرماعا جۋىعى جۇلدەلى ورىندار ٴۇشىن بارىن سالدى. "ٴان ايتساڭ، جانىڭدى جەپ ايت" دەگەندەي، ونەرپازداردىڭ ساحنا تورىندە ەشقايسىسى ايانىپ قالمادى.

قىستىڭ قولايسىز اۋا-رايىنا قاراماستان جۇزدەگەن، مىڭداعان شاقىرىمداردى ارتقا تاستاپ كەلگەندەردىڭ بارلىعى جاقسى ونەر كورسەتتى. ٴان بايگەسىنە قر مادەنيەت قايراتكەرلەرى، رەسپۋبليكالىق كونكۋرستاردىڭ لاۋرەاتتارى سياقتى ونەر مايتالماندارى قازىلىق ەتتى. سايىس قورىتىندىسى بويىنشا مىقتىلار انىقتالدى. قاتىسۋشىلاردىڭ ٴبىرازى العىس حاتقا يە بولسا، تاعى بىرنەشەۋى فەستيۆالدىڭ ديپلومانتتارى اتاندى. ال، "ۇزدىك ورىنداۋشىلىق شەبەرلىگى ٴۇشىن" ارنايى ماراپاتىنا ابايلىق نۇربەك ومىربەكوۆ، رەسەيدەن كەلگەن گۇلنۇر مامىربەكوۆا، موڭعوليادان قاتىسقان ايتولقىن باقىتقىزى، قحر-دان باقىت قابىلداي، كەرەكۋلىك ەراسىل ەگىنباي، الماتى وبلىسىنان ۇكىلەنگەن باۋىرجان ٴادىلوۆ يە بولدى. اسەم داۋىسىمەن كورەرمەندى ٴتانتى ەتكەن ايگۇل اديحانوۆا (ۇلان اۋدانى)، گۇلميرا تەمىربەكوۆا (ٴۇرجار اۋدانى)، ەربول سۇلەيبەك (قحر)، رۋستام رۋسلانوۆ (قىرعىزستان) ٴان بايقاۋىنىڭ ٴۇشىنشى ورنىنا جايعاستى. بابى مەن باعى قاتار شاپقان ايدىن ومىربەكوۆ (سەمەي)، قىرىم مەدەتبەك (وسكەمەن)، داۋرەن تاكيروۆ (تارباعاتاي اۋدانى) جۇلدەلى ەكىنشى ورىندى ەنشىلەدى. ال، جۇزدەن جۇيرىك شىققان "زاڭعار" توبى (قىرعىزستان)، ساياحات تۇرلىبەكوۆ (كوكپەكتى اۋدانى) جانە ماقسات دۇيسەنبەكوۆ (وڭتۇستىك قازاقستان) ٴبىرىنشى ورىندى جەڭىپ الدى. كوپ ۇزاماي كوپشىلىك تاعاتسىزدانا كۇتكەن باس جۇلدەنىڭ يەسى دە بەلگىلى بولدى. حالىقارالىق ٴان بايگەسىنىڭ گران-پري جۇلدەسىن زايساننان كەلگەن ىسپەك ناۋرىزحان قانجىعاسىنا بايلادى. وڭىرىمىزدەن شىققان ىسكەر ازاماتتاردىڭ، اۋدان اكىمشىلىگىنىڭ دەمەۋشىلىگىمەن وتكەن ٴان فەستيۆالى ەستە قالارلىقتاي بولدى.

ەرلان باپانوۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي