BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

مۇحتار نيازوۆ: "ادامدىق ولمەسە ەكەن جەر بەتىندە"

بيىل بەسىنشى مارتە وتكىزىلىپ وتىرعان ايتىستىڭ ەل-كلاسسيكوسى «التىن دومبىرا-2016» ٴسوز سايىسىن­دا ٴسوزى جەبە، ويى ۇشقىر جەرلەسىمىز مۇحتار نيازوۆ ەكىنشى رەت باس جۇلدەنى يەمدەنىپ، اۋىسپالى جۇلدەنى ماڭگىلىك­كە اينالدىرۋعا ٴبىر قادام جاقىنداي ٴتۇستى. كەشە سىر جۇرتشىلىعى ارامىزدا جۇرگەن «التىن بالاسىن» ارقالاپ ۇشقان سامۇرىق قۇستىڭ جو­لىن كۇتىپ اۋەجايعا جينالدى. ىستىق ىقىلاسىمەن، گۇل شوقتارىمەن كۇتكەن ارقا سۇيەر ەلىنە ارقالى اقىن ٴدان ريزا.

ال وسى ارالىقتا ٴسوز اۋىرىن كوتەرىپ يليا ٴيليننىڭ رەكوردىن (ٴبىز ٴۇشىن ماڭگىلىك چەمپيون!) قايتالاعان مۇحتاردىڭ جەڭىسىنە كۇمانمەن قارايتىن جاندار الەۋمەتتىك جەلىنى شۋلاتىپ جاتقانى دا جاسىرىن ەمەس. وسىعان وراي فەيسبۋك الەۋمەتتىك جەلىسىنىڭ بەلسەندىسى، اقىن عابيت ٴقادىربايدىڭ ٴوز پاراقشاسىنا جاريالاعان پوستىن قوسىپ بەرگەندى ٴجون كورىپ وتىرمىز.

«ايتىس سىنشىلارى نە دەگەن كوپ؟! قۇدايا توبا، وسىنشاما «سىنشىلارى» بار ٴتول ونەرىمىز قارىشتاپ دامىپ، ەكىنىڭ ٴبىرى نەعىپ دومبىرا ۇستاپ، ولەڭ قۇراپ كەتپەي ٴجۇر، ا؟ ٴاي، وسى مۇحتار قىرعىز جەرىندەگى حالىقارا­لىق ايتىستا، كەشەگى سىرداعى حالىقارالىق ايتىستا، جالپى، بيىلعى ايتىس بىتكەننىڭ بارىنەن سىپىرا ۇتقان بايگەسىنىڭ ٴبارى ادىلەتسىز بولعانى ما؟ الگى ٴبىر بلوگەرسىماق ايەل نە دەپ شۋلاتىپ جاتىر؟ بارلىق جاقسى نارسەنى كولەڭكە بەتىنەن «كورەتىن» سونداي مەشەۋلەردىڭ ايتاعىنا نەعىپ ەرگىش بۇل حالىق؟ ٴبىر اۋىز بىردەڭە دەپ بولاتبەكتىڭ ٴوزى توقتام جاساماسا، مۇحتاردىڭ ٴوزى «سونشاما شاۋىپ نەم بار ەدى؟» دەپ ىڭعايسىزدانىپ جۇرگەن شىعار...

مۇحتار باۋىرىم! كەلەسى جىلى تاعى دا وسى ايتىستى ۇت تا، انداعى ٴۇش كيلا التىندى سىرعا الىپ كەلشى! سەنىڭ دارىنىڭ ٴوزىڭ قاتىسقان بارلىق ايتىستى ۇتۋعا جەتەدى!»

بۇل سىرداعى شىن جاناشىر جانكۇيەر­لەر­دىڭ ٴبىرىنىڭ عانا نازى. ال بارلىق «داتتاۋ­شى» مەن جاقتاۋشىعا اقتىق سىندا جانسايا مۋسينا «جولىمدى بەردىم» دەگەن كەزدە مۇحتار ايتقان بىر-ەكى اۋىز ولەڭنىڭ ٴوزى-اق جاۋاپ بەرەتىندەي.

«سالماق سالىپ سويلەيىن مەن دە تىلگە،

باعىمنىڭ جانۋىنا ەل كەپىل مە؟

راxمەت، سەن جول بەرىپ جاتقانىڭا،

باقىت ول ٴوز باعاڭدى ورلەتۋ دە.

بۇل دۇنيە جالعان عوي، جانساياجان،

ٴجون ايتاسىڭ، ٴقادىردى سەن كەتىرمە.

كەشەگى شىڭعىس xانداي قاعان قايدا

جارتى الەم نۇرى ويناعان كەلبەتىندە؟

ال سولاردىڭ مىڭعىرعان مالى قايدا

كۇن سايىن جارايتۇعىن تولدەتۋگە؟

اقساق تەمىر سەكىلدى پاتشا قايدا

اينالعان ارتىنداعى قول نوپىرگە؟

ال ولاردان قاپ كەتكەن جىلقى قايدا،

جارايتىن تاۋدان تومەن سەلدەتۋگە؟

ٴبارى جوق، ٴبارى دە ولگەن، ٴبارى جالعان،

قارا دا ولگەن، ومىردەن xان دا وتۋدە.

سوندىقتان، سىيلاستىقتى جوعالتپايىق،

جاراسپاس بۇگىن بىزگە كەر كەتۋگە.

ارامىزدا سىيلاستىق قانا قالسىن،

ايدىڭ نۇرى تۇسكەندەي كول بەتىنە.

ادامداردىڭ ٴولۋى زاڭدىلىق قوي،

ادامدىق ولمەسە ەكەن جەر بەتىندە!»

ۇ.بەكۇزاق ۇلى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي