BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ىزگىلىك تۇنعان جۇرەكپەن («اتىراۋ» گازەتى)

فوتو: «Атырау» газеті

ادامزات قوعامىنىڭ باسقا تىرشىلىك يەلەرىنەن باستى ەرەكشەلىكتەرىنىڭ بىرى-الەۋمەتتىك جاعىنان از قورعالعاندارعا مۇمكىندىگىنشە جاردەمدەسۋ. قازىرگى وركەنيەتتىك زاماندا مۇقتاج جاندارعا جەكە ادامدار تاراپىنان قولۇشىن بەرۋ، مەملەكەت تاراپىنان قولداۋ كورسەتۋ-گۋمانيزم، رۋحاني-ادامگەرشىلىك قاعيدالارىمەن كەلىپ توعىسىپ جاتادى. جەتىمدەر، قارتتار، مۇگەدەكتەر، اسىراۋشىسىنان ايرىلعاندار بۇرىنعى قازاق قوعامىندا بەلگىلى ٴبىر دەڭگەيدە وزدىگىنەن-اق شەشىمىن تاۋىپ جاتاتىن، دەپ جازادى «اتىراۋ» گازەتى.

جەتىمدەردى تۋىسقاندارى اسىراپ الىپ، امانات رەتىندە ولاردى ەر جەتكىزىپ، ٴوزىن-وزى قامتاماسىز ەتە الاتىنداي كۇيگە جەتكەنشە باعىپ قاققان، ال، قارتتار ونسىز دا قوعامداعى فيزيولوگيالىق جاسى بويىنشا الەۋمەتتىك مارتەبەسى جوعارى، ٴقادىرلى، سىيلى توپتار بولاتىن.

ال، قازىرگى تاڭدا رۋحاني-ادامگەرشىلىك قۇندىلىقتاردىڭ وزگەرۋىنە بايلانىستى: جەتىمدەر ٴۇيى، قارتتار ٴۇيى، مۇگەدەكتەر قوعامى سەكىلدى مەكەمەلەر پايدا بولدى. ولار «ٴوز قوعامىنداعى ٴاربىر كومەككە ٴزارۋ تۇلعانى مەملەكەت قامقورلىقسىز قالدىرا المايدى» دەگەن گۋمانيستىك قاعيداعا قۇرىلعان.

دەگەنمەن، بۇگىن دە جۇرەگى مەيىرىمدى 100 شاقتى ٴسابيدى اسىراپ الىپ، ٴوز قاراجاتىمەن جەتىمدەر ٴۇيىن اشىپ، تاربيەلەپ وتىرعان ٴامينا انامىز سياقتى جاندار جوق ەمەس. ٴبىز باق-تاردان كەيبىر جاعدايدا رۋحاني-ادامگەرشىلىگى تومەن، ٴومىرىن بۇرىس جولعا ارناپ، ونى كوپشىلىككە ناسيحاتتايتىن جانداردى دا جارنامالايمىز، ال، ٴامينا اپامىزدى «قازاق انالارىنىڭ ٴمىنسىز ۇلگىسى» رەتىندە ايگىلەۋىمىز قاجەت. كونە زامانداعى ساق ويشىلى اناحارسيس گرەك دانىشپاندارىمەن سۇحبات قۇرىپ وتىرعان ساتىندە، ٴوتىپ بارا جاتقان قارت ادامدى ٴىس-قيمىلىنا قاراپ كەلەكەلەگەن ەكەن. سوندا اناحارسيس «كۇلمەڭدەر، ەرتەڭ-اق ٴبارىمىز دە وسىنداي بولامىز» دەپ قاسىنداعىلاردى تيىپ تاستايدى. شىندىعىندا، ەشكىم دە، ەشقاشان كەپىلدىك بەرىپ قورعالماعان.

قازىرگى تاڭدا الەۋمەتتىك جۇمىس – قوعامدىق عىلىمدار جۇيەسىندەگى گۋمانيتارلىق ٴبىلىمنىڭ دەربەس سالاسى. بۇل – ٴححى عاسىردىڭ شىعارماشىل، كرەاتيۆتى، قايىرىمدى جانە ادال جۇرەكتى جانداردىڭ ماماندىعى دەسە دە بولادى. وسىناۋ ماماندىق يەلەرى وزدەرىنىڭ يگىلىكتى جانە ىزەتتى ارەكەتتەرىمەن، بىلىمدەرىمەن ادامداردىڭ باسىنا تۇسكەن ٴارتۇرلى پروبلەمالاردىڭ ٴتۇيىنىن تارقاتۋعا كومەكتەسەتىن، كاسىبي تۇرعىدان اقىل-كەڭەس بەرەتىن، ولاردىڭ مۇڭ-مۇقتاجىن ٴتيىستى مەملەكەتتىك ورگاندارعا جەتكىزەتىندىگىمەن ەرەكشەلەنەدى. ەلىمىزدىڭ الەۋمەتتىك-ەكونوميكالىق دامۋىنىڭ ۇزاق مەرزىمدى ستراتەگيالىق ۇستانىمدارىندا دا بۇل باعىت جانداندىرىلۋى قاجەت ىستەردىڭ ٴبىرى رەتىندە اتالادى.

سونداي-اق، حالىقتىڭ ٴارتۇرلى الەۋمەتتىك توپتارىنا قاتىستى بالالار، جاستار، ەگدە ادامدار، مۇگەدەكتەردىڭ وتباسى جاعدايلارى ەلىمىزدى ودان ٴارى دامىتاتاتىن مەملەكەتتىك باعدارلامالاردا دا كوكەيكەستى بولىپ تابىلادى. تاۋەلسىزدىك العاننان كەيىن، مەملەكەتتىڭ الەۋمەتتىك قورعاۋ جۇيەسىندە تۇبەگەيلى رەفورمالار جۇزەگە اسىرىلدى. نارىقتىق ەكونوميكانى قۇرۋعا باعىت العان ەلىمىزدىڭ باستى ماقساتى – حالىقتىڭ ٴال-اۋقاتىن ارتتىرۋ، تۇرمىس دەڭگەيىن كوتەرۋ بولىپ بەلگىلەندى.

جالپى، «الەۋمەتتىك جۇمىس» ۇعىمىنىڭ شىعۋ توركىنى – كونە گرەكيا. «فيلانتروپيا» گرەك تىلىنەن اۋدارعاندا «ادام بالاسىنا دەگەن ماحابباتتى كورسەتۋ»، «ادامدى ٴسۇيۋ» سىندى ۇعىمداردى بىلدىرەدى. قازاقستاندا حح عاسىردىڭ 90-جىلدارىنان باستاپ الەۋمەتتىك جۇمىس جەكە ٴبىر سالا بولىپ قالىپتاستى. ياعني، الەمدەگى ساياسي-الەۋمەتتىك وزگەرىستەر ٴبىزدىڭ ەلىمىزدە دە بۇل ماماندىققا دەگەن قاجەتتىلىكتى تۋعىزدى. ٴبىزدىڭ ەلىمىزدە الەۋمەتتىك جۇمىس ماماندىعىن ارنايى كاسىبي ٴبىلىم رەتىندە وقىتاتىن وقۋ ورىندارى، قوعامدىق ٴومىردىڭ سۇرانىستارىنا قاراماستان، تىم از. بۇل ساناتتا قازاق مەملەكەتتىك قىزدار پەداگوگيكالىق ۋنيۆەرسيتەتى مەن ٴال-فارابي اتىنداعى قازاق ۇلتتىق ۋنيۆەرسيتەتىن اتاۋعا بولادى.

الەۋمەتتىك جۇمىس ماماندىعىن بىتىرگەن تۇلەكتەر ەلىمىزدىڭ تۇكپىر-تۇكپىرىندە ٴارتۇرلى مەملەكەتتىك سالالاردا قىزمەت ەتەدى. جەرگىلىكتى حالىققا كىزمەت كورسەتۋ ورتالىقتارىنان باستاپ، ٴارتۇرلى دەڭگەيدەگى الەۋمەتتىك بەيىمدەۋ ورتالىقتارىندا مامان كادرلارىمىز جەمىستى ەڭبەك ەتۋ ۇستىندە. ماسەلەن، قازاق مەملەكەتتىك قىزدار پەداگوگيكالىق ۋنيۆەرسيتەتى وركەنيەتتى ەلدەردىڭ وقۋ ورىندارىمەن سەرىكتەستىك ورناتىلىپ، الەۋمەتتىك جۇمىس سالاسى بويىنشا دا تاجىريبە الماسۋ اۋقىمىن دا كەڭەيىپ كەلەدى.

بۇل ماماندىقتىڭ باستى ماقساتى – ادامدارعا كومەك قولىن سوزۋ بولسا، فۋنكسيونالدىق قىزمەتى سان-سالالى بولىپ تابىلادى. ەڭ الدىمەن، ول بەلگىلى ٴبىر توپتىڭ ەرەكشەلىكتەرىن زەرتتەپ الەۋمەتتىك كومەك ٴتۇرىن انىقتايدى. ويتكەنى، كومەك تۇرلەرى سان الۋان. ەڭ ماڭىزدىسى الەۋمەتتىك اقپاراتتىق كوممۋنيكاتيۆتىك فۋنكسيا، ياعني، اتاۋلى كومەكتى قاجەت ەتەتىن ادامدار تۋرالى مالىمەت جيناۋ جانە ونى قاراستىراتىن مەملەكەتتىك ورگاندارعا وسى دەرەكتەردى جەتكىزۋ. سونداي-اق، الدىن الۋ جۇمىستارى دا قۇقىقتىق، پسيحولوگيالىق، پەداگوگيكالىق، مەديسينالىق بولىپ بولىنەدى.

الەۋمەتتىك جۇمىس ماماندىعىن بىتىرگەن تۇلەك، ەڭ الدىمەن، ٴوزى جان-جاقتى كوممۋنيكابەلدى بولۋى كەرەك. بۇل ماماندىق – بىرنەشە كاسىبي قىزمەتتى قامتيتىن، امبەباپ كەشەندى مامان يەلەرىنىڭ توعىسىندا تۇرعان جاڭا قىزمەت سالاسىنىڭ ٴبىر ٴتۇرى. الەۋمەتىك جۇمىس ماماندىعىنىڭ قازىرگى كەزەڭدە ەلىمىزدە قولدانىس اياسى مەن ەڭبەك ەتۋ اۋقىمى كەڭ. اتاپ ايتقاندا، اۋداندىق، قالالىق حالىققا قىزمەت كورسەتۋ ورىندارى، ادامداردى قالىپتى ومىرگە بەيىمدەۋ جانە ساۋىقتىرۋ ورتالىقتارى، ەمحانالار مەن اۋرۋحانالار، دەمالىس ورىندارى، بالالار قالاشىقتارى، بالاباقشالار مەن بالالار ۇيلەرى تاعى دا باسقا مەكەمەلەر كىرەدى. قازىرگى كەزەندە الەۋمەتتىك جۇمىس ماماندىعىنا دا قويىلاتىن تالاپ پەن بىلىكتىلىك قاجەتتىلىگى دە جوعارى بولىپ وتىر. ەڭ الدىمەن، كاسىبي قىزمەتتەگى تەوريالىق ٴبىلىمىن پراكتيكادا پايدالانۋعا ماشىقتانۋ، ەلدىڭ الەۋمەتتىك-ەكونوميكالىق ماسەلەلەرىن، الەۋمەتتىك قامقورلىعىن قوعامنىڭ ٴالجۋاز توپتارىنا كومەك بەرۋدە قولدانۋ – ماڭىزدى قادام.

ادامزات قوعامىنداعى گۋمانيزم، ادامگەرشىلىك، ىزگىلىك قاعيدالارىنىڭ نەگىزىندە جۇمىس جاسايتىن بۇل ماماندىق يەسى تابيعاتىنان قايىرىمدى، وزگەلەرگە كومەك قولىن سوزۋعا قۇشتار، اياۋشىلىق سەزىمى تىم نازىك جاندار بولىپ كەلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي