حالىق قامى — باستى نازاردا - ەكونوميكا|08 قاراشا 2016، 10:58
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

حالىق قامى — باستى نازاردا

بۇگىن قوستانايعا قر پرەمەر ٴمينيسترىنىڭ ٴبىرىنشى ورىنباسارى اسقار مامين ىس-ساپارمەن كەلدى. ول ۇشاقتان تۇسىسىمەن اۋەجايدا از-كەم ايالدادى. ونىڭ سەبەبى دە جوق ەمەس. توبىل ٴوڭىرىنىڭ اۋە قاقپاسىنا كەلەسى جىلى كۇردەلى جوندەۋ جاسالادى. اۋقىمدى جوباعا رەسپۋبليكالىق بيۋدجەتتەن 15 ملرد.تەڭگەدەن استام قارجى جۇمسالاتىن بولادى. ٴقازىر قۇرىلىس نىسانىنىڭ جوبالىق-سمەتالىق قۇجاتتارى دايىن. ۇكىمەت باسشىسىنىڭ ٴبىرىنشى ورىنباسارى نىساننىڭ جاڭا ۇلگىسىمەن تانىسىپ، جوبانىڭ جاي-جاپسارىن سۇراپ ٴبىلدى. اۋەجاي باستىعى يۋريي كيم قۇرىلىس جۇمىستارى ەكى كەزەڭمەن جۇرگىزىلەتىندىگىن، العاشقى كەزەكتە لاينەرلەردىڭ ۇشۋ-قونۋ جولاقتارى كەڭەيتىلەتىندىگىن باياندادى. — تەك ۇشۋ-قونۋ جولاقتارىن ۇزارتۋ ٴۇشىن عانا 10،6 ملرد.تەڭگە قاجەت. ال عيماراتتى قايتا جاڭعىرتۋ 5 ملرد.تەڭگەگە باعالانىپ وتىر،-دەدى يۋريي كيم. ونىڭ ايتۋىنشا، اۋەجاي حالىقارالىق ستاندارتقا تولىق جاۋاپ بەرەتىن بولادى.-اۋەجاي ۇستىمىزدەگى جىلى 140 مىڭداي ادامعا قىزمەت كورسەتتى. جاڭا نىسان ەل يگىلىگىنە اينالعاندا ساعاتىنا 300 جولاۋشى قالاعان باعىتتارىنا ۇشا الادى،-دەدى ول.

ال اسقار مامين ەڭ باستىسى اۋەجاي قىزمەتىن مەيلىنشە جەتىلدىرە ٴتۇسۋ قاجەتتىگىن باسا ايتتى. — قوستاناي اۋە قاقپاسىنىڭ مۇمكىندىكتەرىن جان-جاقتى پايدالانعان ٴجون. قوسىمشا رەيستەر اشۋ قاجەت. جۇك تاسىمالىن دا قاراستىرىڭىزدار. بارلىق جولاۋشىلار ٴۇشىن لايىقتى جاعداي تۋعىزۋدى دا ويلاستىرىڭىزدار. ٴبارى قولجەتىمدى بولعانى دۇرىس. قالايدا، اۋەجايدىڭ جاڭا كەيىپكە ەنۋىنە از ينۆەستيسيا تارتىلىپ وتىرعان جوق، ول ٴوزىن-وزى اقتاۋى ٴتيىس،-دەدى ۇكىمەت باسشىسىنىڭ ورىنباسارى. «بۇعان دەيىن نىسان ساپاسىنىڭ تومەندىگىنە بايلانىستى ماسكەۋ باعىتى كەيىنگە شەگەرىلدى. اۋەجايدى قايتا قالپىنا كەلتىرگەندە جاڭا اۋە باعىتتارى اشىلاتىن بولادى»،-دەدى وبلىس اكىمى ارحميەد مۇحامبەتوۆ.

مارتەبەلى مەيمان بۇدان سوڭ سول ماڭداعى قۇرىلىس قارقىندى ٴجۇرىپ جاتقان «اۋەجاي» شاعىن اۋدانىنداعى قۇرىلىس جۇمىستارىمەن كەڭىرەك تانىستى. جالپى، وبلىس ورتالىعىندا تۇرعىن ٴۇي سالۋ جۇمىسى كۇش الا باستادى. قوستانايدىڭ ىرگەسىندەگى «يۋبيلەينىي»، «سەۆەرنىي»، «يۋجنىي» ٴتارىزدى شاعىن اۋداندارىندا كوپ قاباتتى تۇرعىن ۇيلەر سالۋ ٴۇشىن ينجەنەرلىك-كوممۋنيكاسيالىق جۇيەلەر تارتىلىپ، زاماناۋي ۇلگىدەگى ٴزاۋلىم ۇيلەر بوي كوتەرىپ جاتىر. ال «قوناي» شاعىن اۋدانىندا جەكەمەنشىك باسپانا سالامىن دەۋشىلەرگە جەر تەلىمدەرى بەرىلەدى. بۇگىندە قالادا جەر تەلىمىن الۋعا ون جەتى مىڭنان استام ادام كەزەكتە تۇر. جوبا «نۇرلى جەر» باعدارلاماسى بويىنشا جۇزەگە اسادى. الداعى ٴتورت جىلدىڭ بەدەرىندە 1 ملن. شارشى مەتر اۋماقتا 15 مىڭنان استام پاتەر سالىنادى. ياعني، قالا اۋماعى بارىنشا ۇلعايتىلىپ، زامان تالابىنا ساي ۇيلەر تۇرعىزىلماق. بۇل تۋرالى وبلىس اكىمىنىڭ ورىنباسارى روزا كەمالوۆا مەن قالا اكىمى بازىل جاقىپوۆ جان-جاقتى ايتىپ بەردى. اسقار مامين سونداي-اق، «اگراماشحولدينگ» اق-ىندا جانە «ەۆرازكاسپيانستال» سەرىكتەستىگىندە بولدى. سوڭىرا قر پرەمەر ٴمينيستردىڭ ٴبىرىنشى ورىنباسارى كەڭەيتىلگەن كەڭەس وتكىزىپ، اۋقىمدى ماسەلەلەردى شەشۋ جولدارىن تالقىعا سالدى. تولىعىراق گازەتىمىزدىڭ الداعى نومىرىنەن وقي الاسىزدار.

الىبەك ىبىراي سۋرەتتەردى تۇسىرگەن باعدات احمەتبەكوۆ
www.kostanaytany.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي