ەسىموۆ: بايقوڭىردىڭ تۋريستىك الەۋەتى وبلىستاعى بارلىق مۇناي كەن ورىندارىنان دا ارتىق تابىس اكەلەر ەدى - ەكونوميكا|06 قىركۇيەك 2016، 18:21
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەسىموۆ: بايقوڭىردىڭ تۋريستىك الەۋەتى وبلىستاعى بارلىق مۇناي كەن ورىندارىنان دا ارتىق تابىس اكەلەر ەدى

بايقوڭىر عارىش ايلاعىنىڭ تۋريستىك الەۋەتى قىزىلوردا وبلىسىنداعى بارلىق مۇناي كەن ورىندارىنان دا ارتىق تابىس اكەلەر ەدى. بۇگىن «ەكسپو-2017» حالىقارالىق مامانداندىرىلعان كورمەسىن ۇيىمداستىرۋ جانە وتكىزۋ جونىندەگى قوعامدىق كەڭەستىڭ ٴۇشىنشى وتىرىسىندا «استانا ەكسپو-2017» ۇك» اق باسقارما ٴتوراعاسى احمەتجان ەسىموۆ وسىلاي ٴمالىم ەتتى.
كەڭەس بارىسىندا سويلەگەن كومپانيا باسشىسى حالىقارالىق كورمەنىڭ «بولاشاق ەنەرگياسى» اتتى تاقىرىبىنا الەمدىك قىزىعۋشىلىق ارتىپ وتىرعانىن ايتتى.
«بۇل تاقىرىپ الەمدىك ەكونوميكانى كۇيزەلتە باستاعان جاھاندىق داعدارىس اياسىندا دا وزەكتى بولىپ وتىر. ويتكەنى، بۇگىنگى داعدارىس كومىرسۋتەك شيكىزاتتارىنا الەمدىك باعانىڭ قۇلدىراۋى سالدارىنان ورىن العانى بەلگىلى. سوندىقتان دا، بالاما ەنەرگەتيكا بۇگىنگى الەمنىڭ ەڭ وزەكتىسى. ٴبىر عانا مىسال: داعدارىس سالدارىنان مۇناي جانە گاز سەكتورىنا ينۆەستيسيا 450 ملرد دوللارعا تەجەلگەن. ال كەرىسىنشە، بىلتىرعى جىلى جاڭارتىلاتىن ەنەرگيا كوزدەرىنە ينۆەستيسيا سالۋ 339 ملرد دوللاردى قۇرادى»، - دەپ اتاپ ٴوتتى ا.ەسىموۆ.
ونىڭ ايتۋىنشا، جالپى ەنەرگەتيكا ۇلەسىندە جاڭارتىلاتىن ەنەرگيانىڭ ۇلەسى 15 پايىز بولسا، 2050 جىلعا قاراي بۇل 50 پايىزعا جەتەتىن بولادى. سونىمەن قاتار، كوستو-ريكا سەكىلدى مەملەكەتتەر 100 پايىز جاڭارتىلاتىن ەنەرگەتيكاعا كوشىپ وتىر. بۇدان بولەك، فينليانديا بۇعان دەيىن حالىقارالىق كورمەلەرگە نەگىزىنەن ٴبىر پاۆيلوندا باسقا ٴبىر مەملەكەتپەن بىرلەسىپ قاتىساتىن ەدى. «ەكسپو-2017» كورمەسىنىڭ تاقىرىبىنا قىزىعۋشىلىق بىلدىرگەن ولار كەلەسى جىلى ٴوز الدىنا جەكە پاۆيلون سۇراعان.
«ەكسپو - تۋريزم الەۋەتىنە جول اشاتىن داڭعىل بولۋى كەرەك. مەن جاقىندا ٴبىزدىڭ بايقوڭىردى امەريكانىڭ كاناۆەرال مۇيىسىندەگى ايلاقپەن سالىستىرعان ماقالانى وقىدىم. اقش ايلاعىنا جىل سايىن 3 ملن تۋريست كەلەدى ەكەن. ەگەر ٴاربىر تۋريست ورتا ەسەپپەن مىڭ دوللار «قالدىراتىن» بولسا، وندا 3 ملن ٴتۋريستى كوز الدىڭىزعا ەلەستەتىڭىزشى؟ ٴبىزدىڭ قىزىلوردا وبلىسىنداعى بايقوڭىرعا وسىنشاما تۋريست كەلەتىن بولسا شە؟ جالپى بايقوڭىر الەۋەتى وبلىستاعى قۇمكول سەكىلدى باسقا دا بارلىق مۇناي كەن ورىندارىنان دا ارتىق تابىس بەرەتىن ەدى»، - دەدى ا. ەسىموۆ.

kyzylorda-news.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي