BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تەگىن بىلگەن («قوستاناي تاڭى» گازەتى)

فوتو: Қостанай таңы газеті

وزىندىك ٴبىر سۇيكىمدىلىگى بار ٴانشى قۋاندىق راقىمنىڭ سۇيكىمدى اندەرى دە بار. سونىڭ ٴبىرى «مەن قازاقپىن»، ونى تىڭداعاندا قانىڭدى قىزدىراتىن ٴبىر قۇدىرەتىن سەزەسىڭ. سەزە وتىرىپ، وسى ٴان ٴسوزىنىڭ العاشقى جولى «قازاق بولىپ تۋماعاندا نەتەر ەم» دەپ باستالىپ ٴارى وسى ٴبىر اۋىز ٴسوز شۋماق سايىن قايتالانعاندا، كەلمەسكە كەتكەن كەڭەس زامانىنداعى قاي-قايداعىنى ەسكە تۇسىرەدى. بۇل تۋرالى قوستاناي تاڭى گازەتىنىڭ باس رەداكتورى ج.ايازبەكوۆ ٴوزىنىڭ بلوگىندا جازدى، دەپ حابارلايدى baq.kz اقپارات اگەنتتىگى.

جەرگىلىكتى جەتىمحاناداعى قازاق بالالارىنىڭ اراسىندا «قاي ۇلتتىڭ وكىلى بولۋدى قالار ەدىڭ؟» دەگەنگە باسىم كوپشىلىگى قازاق بولۋدان باس تارتقانىن، ول-ول ما، ٴبىر تانىسىمنىڭ: «مەنەن ٴبىر قاتەلىك ٴوتتى، اتتەڭ كەزىندە قوساعىمدى ورىستان الماعان ەكەنمىن. وندا ٴتور دە، ٴور دە مەنىكى بولاتىن ەدى»، – دەپ شىنىمەن-اق كۇيىنگەن. قانشاما ٴتۇرى قازاقتاردان سەن قازاق ەمەسسىڭ بە دەگەنىمىزدە «كاكايا رازنيسا؟»، – دەپ تىجىرىنا، بيولوگيالىق قازاق تۇرىنە وكىنەتىن سىڭايىن سەزگەندە تالاي شوشىنىپ ەك. ٴيا، ٴتۇرى دەمەسەڭ، قازاق بولىپ تۋماعاندار كوپ بولدى. ەڭ باستىسى – ۇلت تىلىنەن دە، دىلىنەن دە ماقۇرىم ەدى…

باياعىدا جولبارىستىڭ بۋاز تاۋتانى (ۇرعاشىسى) تاۋ تاسىندا سەكىرىپ ٴجۇرىپ، اياق استىنان تۋىپ قالادى. جاڭا تۋعان شونجىك قاس-قاعىمدا تاۋدان دومالاي جونەلىپ، سوناۋ ەتەكتەگى جايىلىپ جاتقان قويلاردىڭ اراسىنا تۇسەدى. ٴوزىنىڭ كىم ەكەنىن بىلمەستەن شونجىك قويلاردىڭ اراسىندا قويلارشا تىرشىلىك جاسايدى. ال كۇشىگىنەن قاپەرىمدە كوز جازىپ قالعان تاۋتان ٴوز بەتىنشە ٴومىر سۇرە بەرەدى. كۇندەردىڭ كۇنى كارى تاۋتان اڭعا شىعىپ، قوي جايىلاتىن دالاڭقايعا كەلەدى. بايقاسا، جايىلىپ جاتقان قويلاردىڭ ىشىندە ٴبىر جولبارىستىڭ شونجىگىن كورەدى. ول دا قويلارشا ٴشوپ جەپ جۇرەدى. تاۋتان بىردەن ٴوز بالاسى ەكەنىن سەزىپ، تاپ بەرىپ جەلكەسىنەن تىستەپ الىپ، بۇلاققا قاراي الىپ جۇرەدى. شونجىك: «مەنى وتارىما جىبەرشى»، - دەپ قويشا ماڭىراپ جالىنادى. ال تاۋتان بولسا، جاس شونجىككە: «سەن الدىمەن سۋداعى تۇرىڭە قارا»، - دەپ بۇيىرادى. بالا جولبارىس سۋعا قاراسا، قاسىنداعى جولبارىسقا ۇقسايتىن سۇلباسىن كورىپ، تاڭىرقاپ قاراپ تۇرىپ، ٴبىر ۋاقىتتا جولبارىسشا اقىرىپ جىبەرەدى. تاۋتان بولسا شونجىككە: «مەن ٴوز مىندەتىمدى ورىندادىم، ەندىگىسى ساعان بايلانىستى»، - دەيدى. سوندا شونجىك: «مەن ٴوزىم تۋرالى بىلمەيدى ەكەنمىن. ساعان كىم ەكەنىمدى بىلۋگە كومەكتەسكەنىڭىز ٴۇشىن راحمەت»، - دەپتى.

ٴيا، كىم ەكەنىن بىلۋگە…

«ٴتۇرىم قازاق، ٴتىل قازاق،

مەن قازاقپىن، مەن ايتاتىن جىر قازاق.

سۇيەۋ بولسىن، تىرەۋ بولسىن، مىڭ قازاق،

سۇرىنگەندە، بۇلىنگەندە ٴبىر قازاق» – دەيدى قۋاندىق راقىم.

سۇرىنگەن دە، بۇلىنگەن دە از با، ٴقازىر. سۇيەمەيمىز، تىرەمەيمىز، سەلسوقپىز. ويتكەنى، كوبىمىز وتار ورتاسىنا دومالاپ كەلگەن شونجىكتەيمىز…

قازاق – ادامزات تەگىنىڭ ٴبىر بولىگى. ونىڭ قانمەن بەرىلىپ، عاسىرلار بويى تۇقىم قۋالايتىن قازاقى وزىندىك بولمىسى بار. "تەكتى" دەگەن ۇعىم قانداي ٴدارىپ بولسا، "تەكسىز" دەگەن جەتپىس جەتى اتاسىنا دەيىن جەتەتىن اۋىر ٴسوز. "كىمنەن كىم تۋادى؟" – دەگەنگە مايقى بي: "تۇلپاردان تۇلپار تۋادى، سۇڭقاردان سۇڭقار تۋادى، اسىلدان اسىل تۋادى. جالقاۋدان ماسىل تۋادى، ماسىلدان مال باقپاس تۋادى، ٴتىلازاردان قىلجاقپاس تۋادى، تازدان جارعاقباس تۋادى. ساراڭنان بەرمەس تۋادى، سوقىردان كورمەس تۋادى. مىلجىڭنان ەزبە تۋادى، قىدىرمادان كەزبە تۋادى» – دەسە كەرەك. قالاي بولعاندا دا تەگىن ٴبىلىپ، ٴقادىرىن تۇسىنگەنگە نە جەتسىن!


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي