BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پاۆلودارلىق ديقاندار جاسىمىقتى شەتەلگە ەكسپورتتايدى

فوتو: Автор

پاۆلودار وبلىسى شارباقتى اۋدانىنىڭ شارۋالارى جاسىمىقتىڭ 1500 تونناسىن شەتەلگە تاسىمالداماق، دەپ حابارلايدى baq.kz ايماقتاعى ٴتىلشىسى.

وڭىردەگى ٴىرى شارۋاشىلىقتاردىڭ ٴبىرى جاسىمىق ٴوسىرۋدى بىرنەشە جىل بۇرىن باستاعان. العاشقى تاجىريبەنىڭ ناتيجەسى جامان ەمەس. بىلتىرعى جىلى كاسىپورىن بيدايمەن شەكتەلىپ قويماي، جاسىمىق پەن قىشا وسىرە باستاعان. بىلتىر 1200 توننا جاسىمىق تۇركياعا ەكسپورتتالدى. بيىلعى جىلى وسى مەجەدەن اسۋ ٴۇشىن كورسەتكىشتى ۇلعايتپاق ويدا.

«جاسىمىق ەگۋدى ٴبىر قاپ تۇقىمنان باستادىق. وسىمدىك ٴوڭىرىمىزدىڭ توپىراعىن جاتسىنبادى، كليماتىمىزعا بەيىمدەلىپ كەتتى. وسى جىلى جاسىمىقتىڭ قىزىل جانە جاسىل سۇرىبىن وسىردىك. ٴبىرىنشى سورت ازيا ەلدەرىندە سۇرانىسقا يە بولسا، ەكىنشىسىن ەۋروپا مەملەكەتتەرىنىڭ حالىقتارى تۇتىنادى. شەتەل نارىعىنا تەك ساپالى ٴونىم كەرەك. قاجەتتىلىكتى وتەۋ ٴۇشىن بيىل فوتوسەپەراتورلىق كەشەندى ىسكە قوستىق. زاماناۋي قۇرال-جابدىق جاسىمىق داندەرىن سۇرىپتاپ، تەك جاقسىسىن ىرىكتەيدى»، - دەيدى شارۋاشىلىق باسشىسى الەكساندر پولياكوۆ.

جالپى، شارۋاشىلىقتا استىق تۇقىمى 36 000 گەكتارعا سەبىلىپ، جارتىسىنان كوبى ورىلىپ ۇلگەردى. شىعىمدىلىعى ٴارقالاي. كەي القاپتاردا گەكتارىنان 30 سەنتنەر ٴونىم الىنۋدا.

ايتا كەتەرلىگى، بيىل شارباقتىلىق ديقاندار 500 گەكتار جەرگە قىشا ەككەن. قىشا بۇعان دەيىن قار توقتاتۋ ماقساتىندا شارۋاشىلىق ماقساتتا ەگىلىپ كەلگەن. ەندىگى ماقسات – اۋىلشارۋاشىلىق نارىقتى زەرتتەپ، وسىمدىككە دەگەن سۇرانىستى بايقاۋ.

ەسكە سالا كەتسەك، بيىلعى جىلى ٴوڭىردىڭ شارۋالارى 1،055 گەكتار اۋماقتان استىق جيناۋدى جوسپارلاپ وتىر، بۇل وتكەن جىلمەن سالىستىرعاندا 5،3%-عا ارتىق. استىقتى القاپتاردىڭ باسىم بولىگىندە ٴداندى جانە مايلى داقىلدار ەگىلگەن. تارقاتىپ ايتساق، ٴداندى داقىلدار – 729 مىڭ گەكتار جانە مايلى داقىلدار - 215،9 مىڭ گەكتاردى قۇرايدى.

قازىرگى كەزدە وڭىردە 422 مىڭ گەكتار اۋماقتا استىق جينالىپ اياقتالدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي