استانا: 
ەلىمىزدىڭ 9 وبلىسىندا اۋسىل اۋرۋىنا قارسى ەگۋ جۇمىستارى جۇرگىزىلمەيتىن بولدى. وسىلايشا، 2013 جىلى قىتاي اۋماعىنا ەت جانە ونىمدەرىن ەكسپورتتاۋعا قويىلعان شەكتەۋ الىنىپ تاستالدى. ەندى وتاندىق شارۋالار ٴوز ونىمدەرىن سىرتقا شىعارا الادى. بۇل تۋرالى ارنايى ٴباسپاسوز ٴماسليحاتىندا قر اشم ۆەتەرينارلىق قاداعالاۋ جانە باقىلاۋ كوميتەتى ٴتوراعاسىنىڭ ورىنباسارى ولجاس اۋسابايەۆ مالىمدەدى، دەپ حابارلايدى baq.kz ٴتىلشىسى.
«21 قازاندا قر اۋىل شارۋاشىلىعى ۆيسە-مينيسترى گۇلميرا يسايەۆا قىتايعا رەسمي ساپارمەن باردى. ساپار بارىسىندا ۆيسە-مينيستر مەن قحر ساپانى قاداعالاۋ، ينسپەكسيا جانە كارانتين جونىندەگى باس ٴتوراعاسىنىڭ ورىنباسارى مەي كەباومەن كەلىسسوز جۇرگىزدى. ناتيجەسىندە قوس تاراپ ماڭىزدى كەلىسىمگە قول جەتكىزدى. قازاقستاننىڭ 9 وبلىسىندا اۋسىل اۋرۋىنا قارسى ەگۋ جۇمىستارى جۇرگىزىلمەيدى. بۇل – اقمولا، اقتوبە، باتىس قازاقستان، قاراعاندى، قوستاناي، ماڭعىستاۋ، پاۆلودار، سولتۇستىك قازاقستان وبلىستارى. بۇلار قولايلى اۋماق رەتىندە تانىلدى. وسى وبلىستاردان ەت جانە ەت ونىمدەرىن شىعارۋعا قويىلعان شەكتەۋ الىنىپ تاستالدى»، - دەدى ول.
سونىمەن قاتار، ولجاس اۋسابايەۆ اتالعان وڭىرلەردە قىتايلىق ماماندار ارنايى تەكسەرىس جۇرگىزەتىنىن اتاپ ٴوتتى.
«بۇل كەلەشەكتە وسى ايماقتاردا ورنالاسقان ەت جانە ەت ونىمدەرىن وندىرەتىن كاسىپورىنداردىڭ قىتاي اۋماعىنا ەكسپورتتاۋعا قۇقىعى بار كاسىپورىندار تىزىمىنە ەنۋىنە مۇمكىندىك بەرەدى. بۇل وتاندىق شارۋالار ٴۇشىن ۇلكەن مۇمكىندىك. قازىرگى تاڭدا وسى وڭىرلەردە ورنالاسقان كاسىپورىنداردىڭ ٴوندىرىس پروسەستەرىندە تاماق قاۋىپسىزدىگىن قامتاماسىز ەتۋ دەڭگەيىن تەكسەرۋ ماقساتىندا قىتاي ساراپشىلارى كەلەدى. وسى باعىتتا ٴتيىستى جۇمىستار جۇرگىزىلەدى»، - دەپ تۇيىندەدى ٴسوزىن و.اۋسابايەۆ.
سونداي-اق، قر اۋىل شارۋاشىلىعى ۆيسە-مينيسترى گۇلميرا يسايەۆا قوس تاراپ اراسىنداعى كەلىسىمنەن سوڭ، قىتايعا جىلىنا 60 مىڭ توننا ەت ەكسپورتتالاتىنىن ايتتى.
«ٴبىز ەكولوگيالىق تازا ەت تاسىمالداۋ ماسەلەسىن قاراستىرىپ جاتىرمىز. الداعى ۋاقىتتا جىلىنا 50 000-نان 60 000-عا تونناعا دەيىن سيىر جانە 300 000 تونناعا دەيىن قوي ەتىن قىتايعا ەكسپورتتاۋدى جوسپارلاپ وتىرمىز. بۇل سيفرلار وتاندىق ەت وڭدەۋشى كاسىپورىنداردان الىندى. بۇل ورىندار ٴتيىستى تەكسەرىستەن وتكەن سوڭ، قىتايعا ەتتى ەكسپورتتاۋ قۇقىعى بار كاسىپورىندار تىزىمىنە ەنەدى»، - دەدى ول.
ٴباسپاسوز ٴماسليحاتى بارىسىندا ۆيسە-مينيستر وسى جىلدىڭ اياعىنا قاراي قىتايعا ەت ونىمدەرى شىعارىلا باستايتىنىن جەتكىزدى. ونىڭ ايتۋىنشا، جىل باسىنان بەرى كورشى مەملەكەتكە 10 000 توننا ەت، ونىڭ ىشىندە 3 500 توننا سيىر ەتى ەكسپورتتالعان ەكەن.
ايتا كەتەيىك، 2013 جىلدان بەرى قازاقستاننىڭ بارلىق وڭىرىنەن قىتايعا ەت پەن ەت ونىمدەرىن تاسىمالداۋعا تىيىم سالىنعان بولاتىن. بۇل شقو-دا اۋسىل اۋرۋىنىڭ تارالۋىنا بايلانىستى قولعا الىنعان شارا ەدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1524 
0
3000
0