استانا: 
قر پرەمەر-مينيسترى كارىم ٴماسىموۆ وڭتۇستىك قازاقستان وبلىسىنا جۇمىس ساپارى بارىسىندا كاسىپكەرلەرمەن اۋىل حالقىن ميكرونەسيەلەۋ جانە جۇمىسپەن قامتۋ ماسەلەلەرىن تالقىلادى. سوننىمەن بىرگە، وڭدەۋ كاسىپورىندارىنىڭ پروبلەمالارىن شەشۋ ٴۇشىن پرەمەر-مينيستر اۋىل شارۋاشىلىعى مينيسترلىگىنە مۇددەلى مەملەكەتتىك ورگاندارمەن بىرگە كاسىپورىنداردىڭ ۇسىنىستارىن جيناۋدى تاپسىردى - دەپ حابارلايدى baq.kz ٴتىلشىسى وقو اكىمىنىڭ ٴباسپاسوز قىزمەتىنە سىلتەمە جاساپ.
سوڭعى جىلدارى وڭتۇستىك قازاقستان وبلىسىندا اوك-نىڭ بارلىق باعىتتارى بويىنشا تۇراقتى ٴوسۋ بايقالۋدا. ايماقتىق يندۋستريالاندىرۋ كارتاسىنىڭ 165 جوباسىنىڭ 65% اۋىلدىق جەرلەرگە نەگىزدەلگەن. قازاقستاندا اۋىل شارۋاشىلىعىنىڭ نەگىزگى كولەمىن جەكە قوسالقى شارۋاشىلىقتار شىعارادى (شامامەن ەتتىڭ 70% جانە ٴسۇتتىڭ 80%). سونىمەن قاتار، اۋىل شارۋاشىلىعى تاۋارلارىن وندىرۋشىلەرگە تۇتاس ٴبىر پروبلەمالار كەشەنى كەدەرگى كەلتىرەدى، وزەكتى ماسەلەلەردىڭ ىشىندە نەسيە قاراجاتىنىڭ جەتىسپەۋشىلىگى جانە اۋىل شارۋاشىلىعى شيكىزاتىن دايىنداۋ جانە جيناۋدىڭ ٴالسىز دامىعان جۇيەسى بولىپ وتىر.
شاعىن بيزنەستى، ونىڭ ىشىندە شاعىن اگروقۇرىلىمداردى قولداۋ ٴۇشىن ەلىمىزدە «جۇمىسپەن قامتۋدىڭ جول كارتاسى-2020» باعدارلاماسى جۇمىس جاسايدى، ونى جۇزەگە اسىرۋعا ۇكىمەت باسا نازار اۋدارادى. 2016 جىلى جقجك-2020 اياسىندا وڭتۇستىك قازاقستان وبلىسىنداعى اۋىل كاسىپكەرلىگىن دامىتۋعا ميكرونەسيە بەرۋگە 7 237،5 ملن تەڭگە بەرىلگەن. ٴبىرىنشى جارتىجىلدىقتا باعدارلامانىڭ 736 قاتىسۋشىسى زاەمدار الۋشىلار بولدى، ونىڭ ورتاشا مولشەرى 2،6 ملن تەڭگەنى قۇرادى.
پرەمەر-مينيسترمەن كەزدەسۋدە اگرارلىق سەكتور وكىلدەرى اۋىل شارۋاشىلىعى ونىمدەرىن جەتكىزۋ جانە ساقتاۋعا، سونداي-اق كولىك تاريفتەرىنە قاتىستى ماسەلەلەردى كوتەردى. بۇدان وزگە، اۋىل شارۋاشىلىعىن وڭدەۋشىلەر ساپالى شيكىزات تاپشىلىعى جايلى ايتتى، سونىڭ كەسىرىنەن ايماقتاعى كوپتەگەن كاسىپورىندار تولىق قۋاتتىلىقتا جۇمىس ىستەي الماي وتىر. اتاپ ايتقاندا، وبلىستاعى ٴسۇت زاۋىتتارىنىڭ جۇكتەمەسى 81% (قۋاتتىلىعى 10،7 مىڭ توننا 17 كاسىپورىن)، ەت كومبيناتتارىنىڭ – 73% (قۋاتتىلىعى 10،7 مىڭ توننا 16 كاسىپورىن). اۋىل شارۋاشىلىعى تاۋارلارىن وندىرۋشىلەر ٴۇشىن وزەكتى ماسەلەلەر بويىنشا اۋىل شارۋاشىلىعى ۆيسە-مينيسترى ق. ايتۋعانوۆ، دەنساۋلىق ساقتاۋ جانە الەۋمەتتىك دامۋ ۆيسە-مينيسترى ب. نۇرىمبەتوۆ ٴسوز سويلەدى. ايماقتا تۋىنداعان پروبلەمالاردى شەشۋگە جانە وتاندىق ونىمدەردىڭ باسەكەگە قابىلەتتىلىگىن ارتتىرۋعا كولىك-لوگيستيكالىق ورتالىقتار اشۋ كومەكتەسەتىنى اتاپ ٴوتىلدى.
وڭتۇستىك قازاقستان وبلىسى اكىمى ب. اتامقۇلوۆتىڭ مالىمەتىنشە، قازىرگى ۋاقىتتا شىمكەنتتە حالىقارالىق ستاندارتتار بويىنشا كولىك-لوگيستيكالىق ورتالىق قۇرىلىسى بويىنشا جوبا ازىرلەنۋدە. كەشەننىڭ جالپى اۋدانى 90 گەكتاردان اسادى، مۇندا اۋىل شارۋاشىلىعى ونىمدەرىن ساقتاۋعا، وراۋعا جانە جونەلتۋگە بارلىق جاعداي جاسالادى. وسىنداي قويمالاردى ماقتاارال جانە سارىاعاش اۋداندارىندا جانە تۇركىستاندا سالۋ جوسپارلانعان.
اوك وكىلدەرىمەن كەزدەسۋلەردىڭ ناتيجەسىن قورىتىندىلاي كەلە، كارىم ٴماسىموۆ وڭتۇستىك قازاقستان وبلىسىنىڭ جوعارى اگرارلىق الەۋەتىن اتاپ ٴوتتى. وڭدەۋ كاسىپورىندارىنىڭ پروبلەمالارىن شەشۋ ٴۇشىن پرەمەر-مينيستر اۋىل شارۋاشىلىعى مينيسترلىگىنە مۇددەلى مەملەكەتتىك ورگاندارمەن بىرگە كاسىپورىنداردىڭ ۇسىنىستارىن جيناپ، ۇكىمەتكە قاراۋعا ەنگىزۋدى تاپسىردى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1206 
1
2998
0