استانا: 
1758 
0
ماقتارال اۋدانىندا قازىرگى تاڭدا جەمىس-جيدەك ٴپىسىپ جەتىلىپ، ديقاندار ٴونىم جيناۋ كەزەڭىن باستاپ كەتتى. ولار جالپى كولەمى 1005 گەكتار جەرگە ەگىلگەن جەمىس-جيدەك پەن جۇزىمنەن بۇگىننىڭ وزىندە 2766 توننا ٴونىم جينادى. ديقاندار وتاندىق نارىقتى قامتاماسىز ەتۋمەن قاتار جەمىس-جيدەكتەردى شەتەلدەرگە ەكسپورتتاۋدا، دەپ حابارلايدى baq.kz اقپارات اگەنتتىگى.
وسىنداي ٴىرى جەمىس-جيدەك وندىرۋشىلەردىڭ ٴبىرى «ارسەنال ساد» وندىرىستىك كووپەراتيۆى. جەر اۋماعى 350 گەكتاردى قۇرايتىن باقتا جەمىستەردىڭ بارلىق ٴتۇرى وسىرىلەدى. ماسەلەن، باقتىڭ 110 گەكتارىنا ٴجۇزىم، 100 گەكتارىنا الما، 22 گەكتارىنا شابدالى، 25 گەكتارىنا قارا ورىك، 10 گەكتارىنا شيە ەگىلگەن.
كۇنى كەشە 60 توننا ٴجۇزىمدى رەسەيگە جىبەرگەن كووپەراتيۆ قازىرگى ۋاقىتتا شابدالى جيناۋ ناۋقانىن باستاپ جىبەرگەن. شابدالى ٴونىمىنىڭ باسىم بولىگى رەسەي فەدەراسياسىنا جىبەرىلەتىن بولسا، قالعانى ىشكى نارىقتا ساۋدالاناتىن بولادى.
ٴجۇزىمنىڭ ونىمدىلىگى گەكتارىنا 22 توننا ەكەنىن ايتقان شارۋا بۇرىن ٴجۇزىمنىڭ بلەكمەيدجيك، ۆيكتوريا سورتتارى تۋرالى قازاقستاندىق كاسىپكەرلەر بىلمەيتىن، ساتىپ الۋعا سەسكەنەتىن ەدى،- دەيدى. ال، بيىل ٴدال وسى سورتتارعا دەگەن قىزىعۋشىلىق ارتىپتى. ويتكەنى باعاسى قولجەتىمدى، ٴدامى ٴتىل ۇيىرەدى. ەۋروپادان كەلەتىن ونىمدەرگە قاراعاندا الدەقايدا ارزان ەكەن.
مۇندا تۇراقتى 150 ادام جۇمىسپەن قامتىلسا، ناۋقان كەزىندە 500-گە تارتا جۇمىسشىلار جۇمىسقا تارتىلادى. ونىمدەردى جيناپ، ساراپتاپ، سورتتاپ، ەكسپورتتىق جاشىكتەرگە جايعاستىرعانعا دەيىنگى جۇمىستى تۇگەلدەي تەرىمشىلەر اتقارادى. ٴاربىر ٴونىم ۇزاق جولدا جارامسىزدانباۋى ٴۇشىن ولاردىڭ جاشىكتەردە دۇرىس ورنالاسۋى ەرەكشە ماڭىزعا يە.
«ارسەنال ساد» وندىرىستىك كووپەراتيۆىنىڭ باۋ-باقشاسىندا جاس كوشەتتەر دايىندالاتىن ارنايى ٴتالىمباقتا بار. مۇندا المانىڭ، المۇرتتىڭ، الشانىڭ، قارا ورىكتىڭ بىرنەشە سورتتارى مەن دەكاراتيۆتى اعاشتاردىڭ كوشەتتەرى وسىرىلۋدە. كوشەتتەرگە سۇرانىس وتە جوعارى. ەندى قازاقستاندىق ديقاندار كوشەت الىپ كەلۋ ٴۇشىن شەتەل اسپايتىن بولادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3000
0