وقو-دا تاۋەلسىزدىك جىلدارىنداعى ەڭ ۇلكەن رەكوردتىق كورسەتكىشكە قول جەتكىزىلدى

وڭتۇستىك قازاقستان وبلىسىنىڭ شارۋالارى ەلىمىز ەگەمەندىك العان شيرەك عاسىردا ٴداندى داقىل جيناۋ بويىنشا ۇزدىك كورسەتكىشكە قول جەتكىزىپ، رەكورد ورناتتى، دەپ حابارلايدى baq.kz.

وبلىستىق اۋىل شارۋاشىلىعى باسقارماسى ماماندارىنىڭ مالىمەتىنشە، بيىل ٴوڭىر ديقاندارى 676 مىڭ توننا (وتكەن جىلمەن سالىستىرعاندا 95 مىڭ تونناعا كوپ) ٴونىم جيناپ، بۇرىن-سوڭدى بولماعان ناتيجەنى بەرىپ وتىر. مۇنى ورتاشا تۇسىمدىلىككە شاقساڭىز، گەكتارىنا 26 سەنتنەر ٴداندى داقىلدان كەلەدى ەكەن. سونىمەن قاتار، بيىلعى ماۋسىم شارۋالاردىڭ وزگە دە ونىمدەردى كوپتەپ ٴوسىرىپ، جيناۋدا وڭ جامباسىنان كەلىپتى. ماسەلەن، وسى ماۋسىمدا جينالعان كوكونىس كولەمى 109 مىڭ تن. ارتىپ، 963 مىڭ تن. بولسا، باقشا ونىمدەرى 30 مىڭ تن. ارتىپ، 1 ملن. 413 مىڭ تن، كارتوپ 22 مىڭ تن. ارتىپ، 277 مىڭ تن، جەمىس-جيدەك 64 مىڭ تن. ارتىپ، 126 مىڭ تن، ٴجۇزىم 22 مىڭ تن. ارتىپ، 63 مىڭ توننانى كورسەتتى.

مۇنان بولەك، سوڭعى ٴۇش جىلدا جەردى جاڭا ادىسپەن يگەرۋ جۇمىستارى جۇرگىزىلۋدە. وسى جىلى تەرەڭ قوپسىتۋ تەحنولوگياسى 86 مىڭ گا ەنگىزىلدى. بۇعان دەيىن تاجىريبە جۇزىندە ماقتادان ورتاشا ەسەپپەن 26–27 س/گا. ٴونىم الىنسا، تەرەڭ قوپسىتۋ تەحنولوگياسىن ەنگىزگەن شارۋاشىلىقتاردان 40–45 سن/گا. ٴونىم الىنۋدا. اتالعان تەحنولوگيانىڭ كاتتى توپىراق ىلعالدىلىعىن ساقتاۋداعى تيىمدىلىگىن ەسكەرە وتىرىپ، بۇل تەحنولوگيانى باسقا دا داقىلدار مەن ٴتالىمى جەرلەرگە قولدانۋ ۇسىنىلۋدا.

وقو اكىمدىگى ٴباسپاسوز قىزمەتىنىڭ مالىمەتىنشە، بيىل ەگىن شارۋاشىلىعى بويىنشا اۋىل شارۋاشىلىعى داقىلدارىنىڭ كولەمى وتكەن جىلمەن سالىستىرعاندا 12،8 مىڭ گا. ارتىپ، 788،6 مىڭ گا بولدى.

ورتاشا ەسەپپەن رەسپۋبليكا بويىنشا وندىرىلگەن ماقتانىڭ - 100 %، ٴجۇزىمنىڭ - 65 %، باقشانىڭ - 66 %، ماقسارىنىڭ - 40 %، جەمىس-جيدەكتىڭ - 31 %، كوكونىستىڭ - 24 % وبلىستىڭ ەنشىسىندە.

بۇل الداعى ۋاقىتتا وڭتۇستىك قازاقستان وبلىسىن رەسپۋبليكا حالقىن جەرگىلىكتى ازىق-تۇلىك ونىمدەرىمەن قامتاماسىز ەتەتىن نەگىزگى ورتالىققا اينالدىرۋ الەۋەتىنىڭ جوعارى ەكەندىگىنىڭ بىردەن-بىر ايعاعى.

تەگي
• قازاقستان
• ەگىن
• ٴونىم

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!