وقو جاڭعاق ٴوسىرۋدى دامىتادى

وڭتۇستىك قازاقستان وبىلىسى سارىاعاش اۋدانى جەمىستى ەلدىمەكەنىندە «وڭتۇستىك قازاقستاندا ونەركاسىپتىك جاڭعاق شارۋاشىلىعىنىڭ بولاشاعى جانە دامۋ جولدارى» اتتى حالىقارالىق عىلىمي-پراكتيكالىق كونفەرەنسيا ٴوتتى، دەپ حابارلايدى baq.kz.

جيىنعا ەلىمىزدەن وزگە رەسەي، قىرعىزستان، تاجىكستان مەن وزبەكستاننان جاڭعاق شارۋاشلىعىن زەرتتەپ جۇرگەن تاجىربيەلى عالىمدار قاتىستى.

«وڭتۇستىك قازاقستان وبلىسى گرەك جاڭعاعىن جانە ميندال ٴوسىرۋ ٴۇشىن قولايلى ورىن بولىپ تابىلادى. 2020 جىلعا دەيىن جاڭعاق جەمىس داقىلدارىن دامىتۋ باعدارلاماسىنا سايكەس، وبلىستا جاڭعاق جەمىس باۋلارىنىڭ سانىن ارتتىرۋ، جۇمىس ورىندارىن قۇرۋ جوسپارلانۋدا. سول كەزدە وڭىرىمىزدە جاڭعاقتى ەكسپورتتاۋ مۇمكىندىگى پايدا بولادى“ ، - دەدى سەميناردى اشقان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى اسقار قانىبەكوۆ.

وبلىستا جاڭعاقتى داقىلدار نەگىزىنەن تۇرعىنداردىڭ جەكە شارۋاشىلىقتارىندا 300 گەكتار القاپتا وسىرىلەدى. شەتەل نارىعىندا جاڭعاقتىڭ 1 كەلىسى 10 دوللارعا پارا-پار. ياعني جەمىستىڭ بۇل ٴتۇرىن ەكسپورتتاۋ ەل ديقاندارى ٴۇشىن مول تابىس الىپ كەلەدى. اعىمداعى جىلى وڭىردە جاڭعاق داقىلىن 400 گەكتارعا وتىرعىزۋ مەجەلەنىپ وتىر. جاڭعاق باۋلارى نەگىزىنەن قازىعۇرت، تولەبي، سارىعاش جانە تۇلكىباس اۋداندارىندا ەگىلەدى.

كونفەرەنسياعا قاتىسۋشىلار الدىمەن «سارىعاش جەر سىيى» شارۋا قوجالىعىن ارالاپ، جاڭعاق كوشەتتەرىنىڭ تۇرلەرىمەن تانىسىپ، ونى باپتاۋدىڭ ايلا-تاسىلدەرى جايلى قاجەتتى ماعلۇماتتار الدى.

عالىمدار الەمدەگى جەر كولەمىنىڭ 7% عانا جاڭعاق وسىرۋگە جارامدى ەكەنىن ايتادى. قازاقستان ايماعىندا مۇنداي جەرگە تەك وڭتۇستىك ٴوڭىرى كىرەدى. ەلىمىزدەگى جاڭعاقتىڭ 85% الماتى، جامبىل، وڭتۇستىك قازاقستان وبلىستارىندا وسىرىلەدى. سوعان بايلانىستى قازاقستان گرەك جاڭعاعىن وندىرىستىك وسىرۋگە جانە ەكسپورتقا شىعارۋعا باعىت الدى، الداڭى 2-3 جىلدا ەلىمىزدە جاڭعاق باۋلارىنىڭ كولەمىن 5 مىڭ گەكتارعا جەتكىزۋ جوسپارلانۋدا.

كورشىلەس مەملەكەتتەر اراسىندا جاڭعاق شارۋاشىلىعى رەسەي، وزبەكستان، قىرعىزستان مەن تاجىكستاندا جاقسى دامىعان. كونفەرەنسياعا كەلگەن اتالعان ەلدەردىڭ عالىمدارى جاڭعاق ٴوسىرۋدىڭ قۇپيالارى مەن تەحنولوگيالارىن ٴتۇسىندىرىپ، تاجىربيەلەرىمەن ٴبولىستى. شەت ەلدىك عالىمداردىڭ ايتۋىنشا، قازاقستاندا جاڭعاق شارۋاشىلىعىن دامىتۋعا مول مۇمكىندىك بار. تەك ونىڭ تيىمدىلىگىن شارۋالارعا كەڭىنەن ناسيحاتتاۋ قاجەت.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!