مەملەكەت بىزگە دايىن بيزنەس بەردى - كووپەراتيۆ مۇشەسى

جامبىل وبلىسىنىڭ جامبىل اۋدانىندا 2016 جىلى قۇرىلعان «اۋەليە-اتا الما» اۋىلشارۋاشىلىق وندىرىستىك كووپەراتيۆى قارقىندى باۋ شارۋاشىلىعىمەن اينالىسىپ كەلەدى. جاقىن ورنالاسقان اۋىلدار تۇرعىندارى باۋلاردى ليزينگكە الىپ، شىعىنداردى ازايتىپ، ٴونىم باعاسىن تومەندەتۋ ٴۇشىن كووپەراتيۆكە بىرىكتى، دەپ حابارلايدى baq.kz ٴتىلشىسى.

قازاقستاندا قارقىندى الما باقتارىن دامىتۋ باعىتى 2014 جىلى «اگروبيزنەس 2020» باعدارلاماسىنىڭ ٴبىر باسىمدىعى رەتىندە بەكىتىلگەن بولاتىن. وسىنىڭ نەگىزىندە «اۋىل شارۋاشىلىعىن قارجىلاي قولداۋ قورى» اق جامبىل فيليالى وتباسىلىق الما باۋلارىن قارجىلاندىرۋدى 2015 جىلى باستاپ قارقىندى جۇرگىزىپ كەلەدى.

مۇنداي باۋلاردىڭ باستى ەرەكشەلىگى – زاماناۋي تەحنولوگيالاردى پايدالانىپ، سونىڭ ارقاسىندا ونىمدىلىكتى ارتتىرۋ جانە ٴونىمنىڭ ٴوز قۇنىن تومەندەتۋگە نەگىزدەلگەندىگى.

«مەن وسى جامبىل اۋدانىندا تۇرامىن. دايىن باۋدىڭ 5 گەكتارىن ليزينگكە الدىم. باعاسى – 67 ميلليون تەڭگە، ونىڭ 40 پايىزىن مەملەكەت سۋبسيديا رەتىندە تولەيدى. قۇجاتتارىن جيناپ، تاپسىرىپ قويدىق. مىنە، وسىلاي، كوشەتتەر، تامشىلاپ سۋارۋ جۇيەسى، تور، تەحنولوگيالار – بارلىعى بىرنەشە ەسە ارزان بولادى. ٴوز كۇشىمىزبەن، ارينە، مۇنداي باۋدى سالا المايتىن ەدىك. مەملەكەت بىزگە دايىن بيزنەس بەرىپ، ونىڭ باعاسىن بولشەكتەپ تولەۋگە مۇمكىندىك بەردى. بىرىگىپ، ٴبىز بارلىق قىزمەتتەردى تومەن باعامەن الىپ وتىرمىز. ٴارقايسىمىز بولەك بولساق، جولدى، ەلەكترجۇيەنى، تەحنيكا مەن بارلىق قاجەتتى زاتتاردى ٴوزىمىز ساتىپ الاتىن ەدىك. بۇل بىرنەشە ەسە قىمبات بولادى» - دەيدى كووپەراتيۆ مۇشەسى قاسىمحان قانايەۆ.

ال كووپەراتيۆ باسشىلىعىنىڭ ايتۋىنا قاراعاندا بىرلەسىپ، كووپەراتيۆ بولىپ جۇمىس ىستەۋدىڭ تيىمدىلىگى مول.

«ٴبىرىنشى ٴونىمدى كەلەسى جىلى الامىز. ال قارىزدى 2 جىلدان كەيىن تولەي باستايمىز.
«اۋليە-اتا الما» باۋى وسى جىلدىڭ اقپان ايىندا ىسكە قوسىلدى. جالپى اۋدانى – 60 گەكتار، ونىڭ 50 گەكتارى اۋىل تۇرعىندارىنا ليزينگكە 10 جىلعا بەرىلدى.
كەشەننىڭ جوبالىق كۋاتتىلىعى – جىلىنا 2،5 توننا. بۇل دەڭگەيگە 5-6 جىلدا جەتەمىز دەپ ويلامىن. بۇگىندە گولدەن دەليشەس، ايدارەد، گرەنني سميت، گالا تۇقىمدى ەرگەجەيلى كوشەتتەر ٴبىرىنشى قىستان امان-ەسەن شىقتى. كووپەراتيۆ سۋارۋ، تىڭايتقىشتاردى قۇيۋ، ارام شوپتەر مەن اۋرۋلاردى الدىن الۋ، ت.ب. قاجەتتى جۇمىستاردى جۇرگىزۋدە. ٴبىرىنشى ٴونىمدى كەلەسى جىلى الامىز، - دەيدى كووپەراتيۆ باسشىلىعى.

كووپەرايۆكە بىرىگۋدىڭ تيىمدىلىگىن باسشىلىق قانا ەمەس، قاراپايىم قىزمەتكەرلەر دە تۇسىنگەن.

«ەڭ باستىسى – ينفراقۇرىلىم، تەحنولوگيالار، ماماندار، تەحنيكا كووپەراتيۆ مۇشەلەرى ٴۇشىن ارزانداۋ تۇسەدى. ەگەر ولار ٴارقايسىسى مۇنىڭ ٴبارىن وزدەرى ساتىپ الاتىن بولسا، باعاسا بىرنەشە ەسە جوعارى بولادى. مەملەكەتتىڭ كومەگىمەن 10 وتباسى مەن تاعى 25 جۇمىسشىعا تۇراقتى تابىس كوزىن بەرەتىن جوبا ىسكە قوسىلدى. العان ٴونىمدى ٴىرى پارتيامەن، جاقسى باعامەن ساۋدا جەلىلەرى ارقىلى ساتامىز» دەيدى «اۋليە اتا – الما» اوك رۋستام عانيجانوۆ.

وسى مەحانيزم ارقىلى ٴبىر 50 گەكتارلىق كەشەن 50 ادامدى جۇمىسپەن قامتۋدا. «اۋىل شارۋاشىلىعىن قارجىلاي قولداۋ قورى» وسىنداي جوبالاردى الماتى جانە وڭتۇستىك قازاقستان وبلىسىندا جۇزەگە اسىرۋدا.

«وتكەن جىلى وبلىسىمىزدا جالپى الاڭى 100 گەكتاردا ەكى جوبا ىسكە قوسىلىپ، بيىل تاعى 100 گەكتاردا ەكى جوبا ىسكە قوسىلۋدا. ەكى جىلدىڭ ىشىندە بۇل جۇمىستارعا 2،6 ملرد تەڭگە باعىتتالدى.

ٴبىر الما كەشەنىنىڭ باعاسى ورتا ەسەپپەن 600 ميلليون تەڭگە بولسا، ونىڭ 40 پايىزىن مەملەكەت سۋبسيديالايدى. سونىمەن قاتار، ليزينگتىڭ تالاپتارى دا وتە ٴتيىمدى: مەرزىمى – 10 جىل، ۇستەمەسى – جىلدىق 6 پايىز، جەڭىلدىك كەزەڭى – 3 جىلعا دەيىن» - دەيدى «اۋىل شارۋاشىلىعىن قارجىلاي قولداۋ قورى» اق جامبىل فيليالى ديرەكتورى وكسىكباي ورازىمبەتوۆ.

ەرجان جاۋباي

تەگي
• تاراز

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!