ماقتاشىلار ماقتا وسىرۋدە تىڭ تاسىلدەردى قولدانا باستادى

وڭتۇستىك قازاقستان وبلىسى ماقتارال اۋدانىندا جەرگىلىكتى اكىمدىك پەن وبلىستىق اۋىل شارۋاشىلىعى باسقارماسىنىڭ ۇيىمداستىرۋىمەن «ماقتارال اۋدانىنىڭ جاعدايىندا ماقتا باپتاۋدىڭ يننوۆاسيالىق ادىستەرىن قولدانۋ» تاقىرىبىندا سەمينار - ترەنينگ ٴوتتى، دەپ حابارلايدى baq.kz اقپارات اگەنتتىگى.

جيىنعا اۋدان اكىمى عالىم يسمايلوۆ، وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ، شاردارا، ورداباسى اۋداندارى مەن تۇركىستان قالاسى اكىمدەرىنىڭ سالالىق ورىنباسارلارى جانە اۋىل شارۋاشىلىعى بولىمدەرىنىڭ باسشىلارى، سونداي-اق الماتى مەن جامبىل وبلىستارىنان كەلگەن عالىمدار، جەرگىلىكتى شارۋالار قاتىسىپ، تىڭ تاجىريبەلەر مەن جاڭالىقتاردىڭ كۋاسى بولدى.

ەڭ الدىمەن سەمينار ترەنينگكە قاتىسۋشىلار دوستىق اۋىلدىق وكرۋگىندەگى ك-19-7 كانالىنىڭ بويىندا «قازاق سۋ شارۋاشىلىعى» عىلىمي زەرتتەۋ ينستيتۋتى ويلاپ تاپقان سۋ ولشەۋىش قۇرالدى پراكتيكالىق سىناقتان وتكىزدى. ينستيتۋت ماماندارى قۇراستىرعان سۋ دەڭگەيىنىڭ داتچيگى ۋلترادىبىستى ولشەگىش ارقىلى سۋ دەڭگەيىنىڭ وزگەرىسى تۋرالى اقپاراتتاردى قاشىقتان الۋعا مۇمكىندىك بەرەدى. اقپارات جەكە پوچتاڭىزعا نەمەسە سمس تۇرىندە ٴموبيلدى تەلەفونىڭىزعا كەلىپ تۇسەدى. كومپيۋتەر مەن سمارتفون دامىعان بۇگىنگى تاڭدا ماقتارالدىق ديقاندارعا بۇل قۇرىلعىمەن جۇمىس جاساۋ قيىندىق تۋدىرمايدى. جالپى، دۋۆ 0،005-10 داتچيگىن سۋارمالى جۇيەلەردىڭ گيدروبەكەتتەرىنە ەنگىزۋ – سۋ دەڭگەيى مەن شىعىنىن انىقتاۋ دالدىگىن جوعارىلاتادى جانە اقپاراتتى جىلدام الۋعا كومەكتەسەدى.

ماقتارال اۋدانىنىڭ سۋارمالى جەرلەرىنە جەر استى جانە قاشىرتقى كارىز سۋلارىن فوسفوگيپس ەنگىزۋ ارقىلى پايدالانۋ تەحنولوگياسىن عالىمدار بىرنەشە ايدان بەرى «كەتەباي» كووپەراتيۆىندە سىناقتان وتكىزىپ كەلگەن. سىناقتان ٴوتىپ جاتقان تەحنولوگيانىڭ باستى ماقساتى - سۋارمالى جەرلەردىڭ قۇنارلىعىن ساقتاي وتىرىپ مول ونىمگە قول جەتكىزۋ.

«فوسفوگيپستى ٴبىر رەت ەنگىزگەن جاعدايدا كەمىندە 3-4 جىل بويى جەر قۇنارلىعىن جوعالتپايدى»، - دەيدى «قازاق سۋ شارۋاشىلىعى» عىلىمي زەرتتەۋ ينستيتۋتىنىڭ عالىمدارى.

سەمينار ترەنينگە قاتىسۋشىلاردىڭ كەلەسى ايالداعان جەرى – ج.ەراليەۆ اۋىلدىق وكرۋگىندەگى «نۇرالى جول» شارۋا قوجالىعى. ەربول ەراليەۆتىڭ باسشىلىعىنداعى قوجالىق 7 جىل بۇرىن اۋداندا ەڭ ٴبىرىنشى بولىپ «تەرەڭ قوپسىتۋ» تەحنولوگياسىن قولدانعان بولاتىن. ناتيجەسىندە قوجالىق ماقتاسىنىڭ ونىمدىلىگى 40 سەنتنەرگە دەيىن ارتتى. بۇل تەحنولوگيانىڭ ٴبىر پايداسى – ماقتا القابى قىسقى سۋارۋ كەزەڭىندە كوبىرەك سۋ قاجەت ەتكەنىمەن، جازعى سۋارۋ كەزىندە سۋدى كوپ قاجەت ەتپەيدى جانە ول ماقتارالدىقتار ٴۇشىن وتە ٴتيىمدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!